ئێمە لە تۆرە کۆمەڵایەتیەکان

راپۆرت

بردنەوەی داواكە دەنگدانەوەی فراوانی لێكەوتەوە
“ئەوەی مام فارس و دوو پارێزەرەكە كردیان ئیشی پەرلەمانتارانی كورد بوو”

خەڵك- بەشی هەواڵ
بردنەوەی داوایەك لەلایەن جوتیارێكی كورد و دوو پارێزەری خۆبەخش لە دادگایەكی عیراق، كە بۆ وەرگرتنەوەی شایستە داراییەكانی جوتیاران لە دژی حكومەتی عیراق تۆماریان كردبوو دەنگدانەوەیەكی فراوانی لێ‌ كەوتەوە و ڕۆژنامەنووسێكیش دەڵێت: “ئەوەی مام فارس و دوو هاوڕێكەی كردیان، ئیشی نوێنەرانی كوردبوو لە بەغدا”.

دوای ئەوەی جوتارێكی كورد بە ناوی مام فارس، كە سەرۆكی ڕێكخراوی جوتیارانی سەردەم-ە لەگەڵ بەشدار حەسەن و رێبین شەماكی، دوو پارێزەری خۆبەخش لەسەر شایستە داراییەكانی جوتیاران بۆ ساڵی 2014 و 2015 و 2016 سكاڵایان لەسەر وەزارەتی بازرگانی عیراق و كۆمپانیای دانەوێڵە تۆمار كرد، دوای چەندین دادبینی دادگا بڕیاریدا بە پابەند كردنی حكومەتی عیراق بە پێدانی پارەی جوتیاران، كە بڕەكەی 555 میلر دینارە و دادگای ڕەسافەش بڕیارەكەی پەسەند كرد.

سەركەوتنی جوتیارێكی كورد و دوو پارێزەری خۆبەخش لەو داوایە بەسەر حكومەتی عیراق و وەرگرتنەوەی مافەكانی جوتیاران لەكاتێكدایە، چەندین ساڵە حكومەتی هەرێم داوا لە حكومەتی عیراق دەكات ئەو پارەیەی جوتیاران بدات، بەڵام عیراق داواكەی پشتگوێ‌ خستووە، بەڵام لە ئێستادا بە بردنەوەی ئەم داوایە ئەو جوتیارە و پارێزەرەكان لە تۆڕە كۆمەلایەتییەكان بە “پاڵەوان” وەسف دەكرێن و ڕەخنە لە حكومەتی هەرێم و نوێنەرانی كورد لە بەغدا دەگیرێت، كە چەند ساڵە نەیانتوانیوە مافەكانیان بۆ وەربگرنەوە.

لای خۆیەوە سەربەست نەریمان، ڕۆژنامەنووس لە هەژماری خۆی لە فەیسبووك ڕیگەیاندووە، “مام فارس و دوو پارێزەری خۆبەخش، لەبارەی پارەی گەنمی جوتیاران توانییان داوایەكی یاسایی ببەنەوە و حكومەتی عێراق پابەند بكەن بە گێڕانەوەی موستەحەقاتی جوتیارانی كوردستان”.

دەشڵێت: “ئەوەی مام فارس و دوو هاوڕێكەی كردیان، ئیشی نوێنەرانی كوردبوو لە بەغدا، بەڵام…”.

لای خۆشیەوە، كاردۆ محەمەد، پەرلەمانتاری خولی پێشووتری بزوتنەوەی گۆڕان و ڕاوێژكاری یوسف محەمەد، سەرۆكی خولی پێشووی پەرلەمانی كوردستان لە هەژماری خۆی لە فەیسبووك لە وتارێكدا بە ناونیشانی “شەری مافەیاسای و دەستورییە كان لەعیراق و خەبات و ئامادەیی مام فارس!” دەڵێت: “لەسەروبەندی ناردنی بودجە عیراق بۆ ئەنجومەنی نوێنەران، وەكو پەیمانگای پەرەپێدانی یاسای پیشنیارمان بۆ فراكسیونەكانی كوردستان لە بەغدا كرد، بۆ پشكی بودجەی هەرێم لە بودجەی عیراق كۆبونەوەیەك لەهەولێر ساز بدریت و یەك هەڵویستی لە پرسەكانی پەیوەست بە مافی هولاتیان و گەلەكەمان دورست بكرێت”.

دەشڵێت: “بە داخەوە تائێسا وەڵاممان وەرنەگرتەوە، بۆئەوەی بكرێتە سەرەتایەك بۆ پڕۆژەیەكی نیشتیمانی بۆ سەرجەم مافە دەستورییەكان و پرسە چارەنوسازەكان و نەكەوینە ناو گیروگازی بەرژەوەندییە تەسكە حیزبیەكان وەكو ئێستا لەسەر پلە و پۆست دەكرێت، لەكاتێكدا گەلەكەمان لەژێرهەڕەشەی گەورەدایە” .

ڕاشیگەیاندوە، لەبەرامبەردا با پەرۆشی چالاكانی مەدەنی ببینین بۆ بەرگری لەمافی هاوڵاتیان! دوای ۹ مانگ لەبەدواداچۆن بۆ مافی جوتیاران چۆن خۆبەخشانە كەیسەكەیان بەقازانجی جوتیاران یەكلاكردەوە باپرسیار لە حزبە كوردستانیەكان و پەرلەمانتارەكانیان لە بەغدا بكەین خەریكی چین؟، كە ئەمڕۆ (١٢/٢٦) دادگای بەرایی رەسافەی بەغدا سكاڵای هەریەك لەمام فارس سەرۆكی رێكخراوی جوتیارانی سەردەم و پارێزەرانی خۆبەخش بەشدار حەسەن و رێبین شەماكی، لەبەرژەوەندی جوتیارانی هەرێم یەكلاكردەوە و حكومەتی عیراق پابەند دەكات بە پێدانی پارەی گەنمی وەرگیراوی ساڵەكانی (٢٠١٤، ٢٠١٥، ٢٠١٦) ی جوتیارانی هەرێم و قەرەبووی دواكەوتنی پارەكەشیان بۆ بكرێتەوە.

جەختیشی كردۆتەوە، ئەمەش دەرخەری توانا و هیزی ناو كۆمەڵگاییە دورلەقۆرخكاری حیزبی، ئەو ئەركەیە، كە دەبوو حكومەتی هەرێم پەرلەمانتاران شەڕیان لەسەر بكردایە، بەڵام ئەو سێ دڵسۆزە خۆبەخشە چالاكانە ئەركەكەیان لەئەستۆ گرت و بەو ئەنجامە دڵخۆشكەرەیان گەیاند.

هەروەها لەسەر هەمان بابەت، بەرهەم مستەفا، ئەندامی سكرتاریەتی یەكێتی مامۆستایانی كوردستان لە هەژماری خۆی بە ناونیشانی “مام فارس بردییەوە؟ یان بازرگانە كوردەكانی بەغداد؟” وتارێكی نووسیوە و دەڵێت: “ئەوەی بەمام فارس و هاوڕێكانی كرا، بە سەرجەم فراكسیۆنە كوردیەكانی پەرلەمانی عێراق نەكرا”.

دەشڵێت: “من دەمێكە وتومە ئێمەی خەڵكی كوردستان بەدرێژایی دروستبونی چوار خولی پەرلەمانی عێراق، سودمان نەبینیوە لەپەرلەمانتارانی كوردی بەغداد، سودمان نەبینیوە لە پۆستی وەزیرە كوردەكان و سەرۆك كۆماریش، ئەوەی سودی بینی تەنیا خودی پەرلەمانتار و وەزیرەكان خۆیان بوون”.

راپۆرت

چەند وێنەیەكی ئەو سەردەمە ببینە
73 ساڵ تێپەڕ دەبێت بەسەر دامەزراندنی كۆماری مهاباد

خەڵك – بەشی هەواڵ

ئەمڕۆ 73 ساڵ بەسەر دروست بوونی كۆماری مهاباد لە رۆژهەڵاتی كوردستان و پێشەوا قازی محەمەد وەك سەرۆك كۆمار سوێندی یاسایی خوارد.
كۆماری مهاباد لە ٢ی رێبەندانی 2646ی كوردی، بەرامبەر بە 22/1/1946 لە رۆژهەڵاتی كوردستان لەسەر دەستی حیزبی دیموكراتی كوردستان دامەزرێندرا و پێشەوا قازی محەمەد وەك سەرۆك كۆمار سوێندی یاسایی خوارد، دەوڵەتێكی كوردی كەمتەمەن بوو كە لە سەدەی بیستدا‌ و لە دوای كۆماری ئاگری-لە توركیا، دامەزرا. پایتەختەكەی شاری‌ مهاباد بووە كە دەكەوێتە باكوری‌ خۆرئاوای‌ ئێران. دامەزراندنی دەوڵەت و وڵاتێك بەناوی كوردستان، خواستی لەمێژینە و ئاواتی گەلی كورد بوو، لە مانگی ئابی 1941 راپەڕینێكی جەماوەریی كۆنتڕۆڵی‌ ناوچە كوردییەكانی لە دەستی حكومەتی ناوەندیی ئێران دەرهێنا. لە شاری‌ مهاباد، كۆمیتەیەك لە كەسانی چینی ناوەند بە پشتگیری سەرۆك هۆزەكان دەسەڵاتی ناوچەكەیان گرتە دەست. پارتێكی سیاسی بەناوی كۆمەڵەی‌ ژیانەوەی كوردستان (ژێ كاف) دامەزرێنرا. قازی محەمەد، سەرۆكی بنەماڵەی‌ قازی، بە سكرتێریی پارتەكە هەڵبژێردرا.كۆمیتەكە بە سەركردایەتیی قازی محەمەد ناوچەكەیان بە لێهاتوویی‌ و سەركەوتنێكی بەرچاوەوە بۆ ماوەی پێنج ساڵ تا رووخانی كۆمار بەڕێوەبرد.

 

دامەزراندنی كۆمار

لە ئەیلولی‌ 1945 قازی محەمەد ‌و سەركردە كوردەكانی تر سەردانی تەورێزیان كرد بۆ ئەوەی‌ چاویان بە كونسوڵی‌ سۆڤیەت بكەوێت بۆ دەرباری‌ پشتگیریكردنی كۆمارێكی نوێ، لەوێشەوە رەوانەی باكۆ، ئازربایجانی سۆڤیەت، كران. لەوێ، ئاگادار بوونەوە لەوەی پارتی دیموكراتی ئازربایجان لە ھەوڵی‌ ئەوەدایە كە دەست بەسەر ئازربایجانی ئێراندا بگرێت. لە 10ی‌ كانوونی یەكەمدا، پارتی دیموكراتی ئازربایجان دەستی بەسەر پارێزگای‌ ئازربایجانی رۆژهەڵات دا گرت كە پێشتر بەدەست سوپای‌ ئێرانەوە بوو. قازی محەمەد بڕیاری‌ دا هاوشێوەی ئەوان ئەو كارە دووبارە بكاتەوە و لە 15ی‌ كانوونی یەكەمدا، كۆماری مەهابادی كوردیی دامەزرێنرا و لە 22ی‌ كانوونی دووەمی 1946 قازی محەمەد دامەزراندنی كۆماری كوردستانی راگەیاند.

ئامانجەكانی دامەزراندنی كۆماری مهاباد

1- زمانی كوردیی بكرێتە زمانی راگەیاندن ‌و خوێندن ‌و بەڕێوەبردن
2- هەڵبژاردنی ئەنجومەنی پارێزگا بۆ كوردستان بەمەبەستی چاودێری دەوڵەت‌ و بابەتە كۆمەڵایەتییەكان
3- هەموو بەرپرسەكان لە خەڵكی ناوچەكە هەڵبژێردرێن
4- یەكێتی‌ و برایەتی لەگەڵ خەڵكی ئازربایجان
5- یاسایەك هەبێت كە بە یەكچەشن مامەڵە لەگەڵ كرێكار ‌و كەسایەتییە باڵاكاندا بكات

وەزیرەكانی كۆماری مهاباد
1- حاجی بابە شێخ / سەرۆك وەزیران
2- سەیفی قازی / وەزیری جەنگ
3- محەمەد ئەمین موعینی / وەزیری ناوخۆ
4- ئەحمەد ئیلاهی / وەزیری ئابووری
5- كەریمی ئەحمەدیان / وەزیری پۆست و تەلەگراف
6- مەنافی كەریمی / وەزیری فەرهەنگ
7- سەدیقی حەیدەری / وەزیری (تەبلیغات)
8- خەلیلی خوسرەو / وەزیری كار
9- حاجی مەستەفای داودی / وەزیری بازرگانی
10- مەحموودی وەلی زادە / وەزیری كشتوكاڵ
11- ئیسماعیلی ئیلخانی زادە / وەزیری ڕێگاوبان
12- سەیید محەمەدی ئەیوبیان / وەزیری (بیهداری)
13- عەبدولرەحمانی ئیلخانی زادە / وەزیری (موشاویر)
14- مەلا حوسێنی مەجدی / وەزیری داد

كۆتایی كۆمارەكە

لە 26ی ئازاری‌ 1947 بەهۆی‌ گوشاری‌ هێزە رۆژئاواییەكان بەتایبەتی (ئەمریكا) سۆڤیەت پەیمانی بە حكومەتی ئێراندا كە لە باكوری ئێران دەكشێتەوە، لە مانگی حوزەیراندا، ئێران دەستیگرتەوە بەسەر ئازربایجاندا. ئەوە بووە هۆی‌ دابڕانی كۆماری‌ مهاباد لە سۆڤیەت و دواجار بووە هۆی‌ داڕمانی. لەم خاڵەدا، پشتگیرییەكان بۆ قازی محەمەد لە كەمبوونەوەدا بوون، بەتایبەتی لە نێوان هۆزە كوردەكاندا كە لە سەرەتادا پشتگیرییان لێدەكرد. بەرهەم‌و سەرچاوەی‌ داراییان نەما‌و شێوازی ژیانیان بەهۆی‌ دابڕانەكەوە بەرەو سەختی چوو، یارمەتی دارایی‌ و سەربازی لە سۆڤیەتەوە نەما‌ و هۆزەكان هیچ هۆكارێكیان بۆ پشتگیریكردنی قازی محەمەد نەدەبینییەوە. زۆرێك لە هۆزەكان قازییان بەجێ‌ دەهێشت. لە 5ی‌ كانوونی یەكەم، ئەنجومەنی شەڕ بە قازی محەمەدیان راگەیاند كە رێ لە ھەر پەلامارێكی سوپای‌ ئێران دەگرن كە بكرێتە سەر ناوچەكە. لە 15ی كانوونی یەكەم، سوپای‌ ئێران هاتە ناوچەكە‌ و دەستی بەسەر مهاباددا گرت. لەگەڵ هاتنیان، چاپخانەی كوردییان داخست، فێركردنیان بە زمانی كوردی قەدەغە كرد، هەر كتێبێكی كوردییان بدۆزیبایەوە دەیانسوتاند. دواجار لە 31ی‌ ئازاری‌ 1947 قازی‌ محەمەد بە تۆمەتی خیانەت لە دەوڵەتی ئێران، لە گۆڕەپانی چوارچرای شاری مهاباد لە سێدارە درا.

 

بەردەوام بە لە خوێندنەوە

راپۆرت

كونەماسی، هەوارگەی گەشتیاری هاوین و زستان

سەیرانگای كونە ماسی.. فۆتۆ: ئامەد حەسەن

شارباژێڕ- ئامەد حەسەن

سەیرانگای كونە ماسی یەكێك لە سەیرانگا و هاوینە هەوارەكانی باشووری كوردستانە لە سنوری پارێزگای سلێمانی و هەڵكەوتوو لە باكوری پارێزگاكەیە لە دووری 30 كیلۆمەتر.

سەیرانگەی كوناماسی بریتییە لە گوندێك كە بەهۆی زۆری سەرچاوەكانی ئاو و فێنكی كەشوهەواكەی لە وەرزی هاویندا بووە بە سەیرانگا و ناوچەیەكی گەشتیاری بە درێژایی ساڵ و بە تایبەت بۆ وەرزی هاوین.


ساڵانە بەتایبەت لە وەرزی هاوین و بۆنەكانی نەورۆز و جەژنەكان و رۆژانی هەینیدا گەشتیارێكی زۆری نێوخۆیی و ئێرانی و گەشتیاری باشوور و نێوەڕاستی عێراق ڕووی تێ دەكەن.

چەند چەم و رووبارێكی ناوچەی شارباژێڕ لە كونەماسی یەك دەگرن و لقێكی سەرەكی رووباری زێی بچوك پێكدەهێنن، چەمی خێوەتە و مۆكەبە یەكدەگرن و دێنە كونەماسی، لەوێ چەمی باڵخێ ك لە دۆڵی جافایەتییەوە دێت تێكەڵی رووبارەكە دەبێت، هەروەها چەمی دۆڵبێشك لە ناوچەی شینكایەتییەوە دێت تێكەڵی رووبارەكە دەبێت.

ئەمە سەرباری ئەوەی لە نێو كونەماسی و لەكەناراوەكان دوو سەرچاوەی ئاوی سازگار و سارد هەن و ریَژەیەكی زۆر ئاویان هەیە، گرنگترینی ئەو دوو سەرچاوەیە ئاوی ئەشكەوتی كونەماسییە كە لە نێو ئەشكەوتەكەدا ئاوێكی زۆر دێتە دەرەوە و تێكەڵی رووبارەكە دەبێت.

ئەم ئەشكەوتە لە ساڵانی دەیەی رابردوو و پێشتریشدا لە وەرزی پایزدا یان لەسەرەتای وەرزی باران بارین و پەڵەدا بەهۆی زۆربوونی ئاوی رووبارەكە و قوڕاوبوونیەوە، ماسییەكی زۆر لە نێو سەرچاوەی ئاوی ئەشكەوتەكەدا كۆدەبووەوە بەهۆی روونی ئاوەكەوە، ئەمەش لەلایەن هاووڵاتیانی گوندەكانی سنورەوەكە كە (شەوانە لەوێ بۆ ماوەیەكی دیاریكراو دەمانەوە) بەشێوەیەكی یەكسان ماسییەكان دەگرت و دابەشیان دەكرد.
بەڵام لەم ساڵانەی دوایی رێژەی ئەو ماسیانە نەماون، بەهۆی كەمبونەوەی بەرهەمی ماسی لە روبارەكاندا بەهۆی راوكردن بەشێوەی نەشیاو.

 

بەردەوام بە لە خوێندنەوە

راپۆرت

چەك ئاسایشی كۆمەڵایەتی هەرێم دەخاتە مەترسییەوە

خەڵك-ئارام سەردار

دوێنێ ئێوارە لەگەڕەكی مامزاوا لەسەر كۆتر دوو كەس كوژران كە كوڕو باوكێك بوون هاوكات سێ كەسی تریش بریندار بوون، دەستەی مافی مرۆڤیش داوا لەهێزە ئەمنییەكان دەكات رێكارە پێویستەكان توندتر بكرێن لەبەرامبەر ئەو چەكە زۆرەی لەدەستی هاوڵاتیاندایە.

محەمەد گۆمەشینی وتەبێژی دەستەی سەربەخۆی مافەكانی مرۆڤ لەهەرێمی كوردستان بە(خەڵك)ی راگەیاند، بەداخەوە ئەوەی دەستەكەمان كە دەمێكە هاواری بۆ دەكات دیاردەی چەكداری بەردەوامە و رووداوەكانی كوشتن و تەقەكردن و خۆكوشتن بوونی هەیە، ئەمە ئەوەمان پێدەڵێت كە حاڵەتەكانی بوونی چەك لەدەستی هاووڵاتی و بردنەوەی چەك لەلایەن كارمەندانی هێزە ئەمنییەكان بۆ ماڵەوە هۆكار گەلێكن بۆ ئەم رووداوانە.

وتیشی “رۆژ نییە هەواڵێك بڵاونەبێتەوە لەسەر رووداوەكانی كوشتن، ئەمەش وێڕای ئەوەی هەرێمی كورستان هیچ رۆژێك بەبێ تەقەكردن بەڕێ ناكات و خەڵك گوێبیستی تەقەكردن نەبێت، بەتایبەت لەدوای كاتژمێر ١٢ی شەو گوێبیستی تەقەی زۆر دەبیت كە نائاساییە ئەمەش نیشانەی ئەوەیە چەك زۆرە لەدەستی هاووڵاتی، چونكە ئەو تەقانەی دەكرێن هێزە ئەمنییەكان نین، بەر لەدوو رۆژ لەشەقامێكی هەولێر دووكەس لەسەر رووداوێكی هاتووچۆ پێكنەهاتن تەلەفۆنیان دەكرد بۆ كەسوكاریان كە بەچەكەوە بێن، بەڵام ئێمە كەوتینە بەین و كێشەكەمان چارەكرد، ئەگەر نا كێشەی گەورەی لێ دەكەوتەوە”.

ئەوەشی خستەڕوو “ئێمە جەخت دەكەینەوە لەسەر بەردەوامی هەڵمەتی هۆشیاری، بەڵام دڵنیاشتان دەكەمەوە ئەو هەڵمەتانە سودی نیەی بەهیچ شێوەیەك بەقەد ئەوەی مەفرەزەكانی پۆلیس و ئاسایش لەشوێنەكان لەناكاو بن و پشكنین بكەن بۆ ئوتومبێلەكان بەتایبەت جام رەش و هەڵگرانی تابلۆی بیانی، چونكە ئەگەر پشكنین بكەی لەتەواوی شارەكانی هەرێم رەنگە لە ١٠ تەكسی ٥ تەكسی چەكی لەلابێت، بۆیە دەبێـت رێكارەكان توندتر بكرێن، ئەم رووداوانەش قسەكانی ئێمەی سەلماندووە كە چەكێكی زۆر لەدەستی هاووڵاتیاندایە”.

لای خۆشیەوە رێدار ئەمین پزیشكی پسپۆڕی نەخۆشییە دەروونییەكان نوسینێكدا باس لەوەدەكات “چەندین ساڵ پێش ئێستا لە لیژنەی موڵەتی چەك هەڵگرتن بووم، زۆر دژی چەك هەڵگرتن بووم، زۆر كەم واژۆم دەكرد، خەڵكێكی زۆر گلەییان دەكرد، كە بۆچی مۆڵەتیان پێنادەم، لەوانەش چەرەزات فرۆش، شەكەرات فرۆش، جلوبەرگ فرۆش، بێ ئیش، گەنجی هەژدە ساڵان، چەرچی پیشانگای ئۆتۆمبێل، شوان (داوای دەمانچەیان دەكرد، دەیانگوت كلاشینكۆف بەزەحمەت هەڵدەگیرێت)، ژمێریاری كۆمپانیا (كە دەبوایە ئەو چەك هەڵنەگرێت، بەڵكو كۆمپانیا پاسەوان دابنێ)، قوماش فرۆش……زۆر كەسی تر داوای مۆڵەتی چەكیان كردووە”.

دەشڵێت “ئەوەندە خەڵك داوای چەكی دەكرد، وام دەزانی لە تەكساسم، نەك هەولێر، ئەمە لە كاتێكدا هەولێر یەكێكە لە شارە ئارامەكانی جیهان، بۆیە من كە ڕێگریم لە چەك دەكرد، دەمزانی دەرەنجامی خراپی لێدەكەوێتەوە، لە هەستكردن بە پرسیاریەتیم بوو، ئەگەر مەسەلەی چەك هەڵگرتن تەسك نەكرێتەوە، چاوەڕیی تاوانی زیاتر بن”.

هاكات پارێزەر رێبین سەباح سەبارەت بەدیاردەی چەكداری و كوشتن و خۆكوشتن بە(خەڵك)ی راگەیاند “یەكێك لە هۆكارە سەرەكییەكانی دوبارەبوونەوەی ئەو حاڵەتانەی كوشتن لە هەرێمی كوردستان بە گشتی و شاری هەولێر بە تایبەتی بەر بڵاوی دیاردەی قێزەوەنی چەكدارییە لە نێو هاووڵاتیاندا كە چەندین ساڵە لەلایەن خەڵكی دڵسۆزو خەمخۆرەوە هەوڵ بۆ ئەمە دەدرێ، كە ئەم دیاردەیە ئەگەر بنەبڕیش نەكرێ، ئەوا سنوردار بكرێت، تاوەكو بتوانرێ ڕێژەی ئەو كوشتن و شەڕانەی لە ئەنجامی بوونی دیاردەی چەكداری ڕوو دەدەن، سنوردار بكرێن، ئەوەی جێگای داخە تاوەكو ئێستا ئەو دیاردە قێزەونە هەر بەردەوامە”.

دەشڵێت “لە دوا حاڵەتیشدا دوێنی شەوی بەرواری ۲۰۱۸/۱/۱۲ لە ئەنجامی كێشەی دوو بنەماڵەی درواسێی یەكتر كە چەك لەو كێشەیە بەكارهێنرا دوو هاووڵاتی كوژران و سێی تریش بریندار بوون، بۆیە پێویست دەكات لای هەر هەمووان فشارێكی گەورە لە ڕێگای ئەنجامدانی كارو چالاكی مەدەنی و چەندەها هەوڵی هۆشیاركردنەوەی هاووڵاتیان بۆ ئەم پرسەو ناردنی یاداشتی داواكاری بۆ سەرۆكایەتی داواكاری گشتی بۆ مەبەستی ڕێگەگرتن لەو دیاردەیە بكرێت”.

ئاشكراشیكرد “وەك پارێزەرێك لەگەڵ چەند پارێزەرو چالاكوانێكی مەدەنی بۆ سبەی بەرواری ۲۰۱۸/۱/۱٤ یاداشتێكی داواكاری بۆ مەبەستی ڕێگەگرتن لە دیاردەی چەكداری و هەبوونی چەك لە ناو ماڵان بۆ سەرۆكایەتی داواكاری گشتی دەنێرین بەو هیوایەین لەو ڕێگایەوە بتوانرێ ئەگەر نەتوانرێ ڕێگری تەواویش لەو دیاردەیە بكەین ئەوا سنورداری بكرێت”.

بەردەوام بە لە خوێندنەوە
کام لەم وەزارەتانەی کابینەی ٨ لە ئاست خزمەتکردن بە هاولاتیان جێدەستی دیار بووە؟
  • وه‌زارەتی كشتوكاڵ و سەرچاوەکانی ئاو 86%, 42
    42 86%
    42 - 86% هەموو دەنگەکان
  • وه‌زارەتی دارایی و ئابووری 8%, 4
    4 8%
    4 - 8% هەموو دەنگەکان
  • وه‌زارەتی بازرگانی و پیشه‌سازی 6%, 3
    3 6%
    3 - 6% هەموو دەنگەکان

کوردستان

دوایین