ئێمە لە تۆرە کۆمەڵایەتیەکان

راپۆرت

سەرمای زستان، بازاڕی سەروپێی گەرم كردووە

خەڵك- ئارام سەردار
لەگەڵ هاتنی سەرمای زستان، درەنگانی شەو بەتایبەت دوای كاتژمێر ۲ی شەو چێشتخانەكانی تایبەت بە فرۆشتنی سەروپێ لەهەولێر پێشوازی لە كڕیارەكان دەكەن و تاوەكو دەمەوبەیانی چێشتخانەكان جمەیان دێت لەو كەسانەی ئارەزووی خواردنی ژەمێك سەروپێن (پاچە) دەكەن.

سەروپێ خواردنێكی باو و بڵاوی ڕۆژھەڵاتی ناوەڕاستە، مێژوەكەشی دەگەڕێتەوە بۆ سەدەی ناوەڕاست و یەكەمجار لە وڵاتی ئەرمینیا و دواتریش لە ئازەربایجان و بولگاریا وەكو خواردنێكی سەرەكی لە جەژن و بۆنە و ئاهەنگەكان پێشكەش كراوە و ئێستاش لەهەریەكە لە وڵاتانی ئەلبانیا، بۆسنە و هێرسك، مەنگۆلیا، بولگاریا، ئەرمینیا، ئازەربایجان، توركیا، ئێران، میسر، تونس، سوریا و عێراق، ئەم خواردنە دەخورێت و كوردیش یەكێكە لەم گەلانەی ئەم خواردنەی لاناسراوە و دەیخۆن.

لەشیرینی خەو بۆ خۆاردنی سەروپێ
خەڵكێكی زۆر لەشاری ھەولێر شەوانەی زستان لە شیرینی خەو ھەڵدەستن و ڕوودەكەنە چێشتخانەیەك بۆ خواردنێكی كوردەواری ئەویش سەروپێیە.

مێژووی سەروپێ لە هەولێر
خاوەنی پاچەی سامان لەهەولێر بە(خەڵك)ی ڕاگەیاند، خواردنی سەروپێ (پاچە) لەهەولێر بۆ سەردەمێكی زۆر زوو دەگەڕێتەوە و بۆ یەكەم جاریش هاوڵاتیەكی شەبەك بەناوی (یونس) خەڵكی موسڵ بووە چێشتخانەی تایبەت بەخواردنی سەروپێی داناوە و دواتریش بەپێی ئەم ڕیزبەندیە چێشتخانەی تریان كردۆتەوە بەناوەكانی (عەمۆ، ماڵی بورهان، حاجی بەكر، یوسف، وەستا كەریم) دواتریش تاوەكو ئێستا ئێمە و چەند چێشتخانەیەكی تر لەهەولێر هەین و سەروپێ دەفرۆشن.

وتیشی، “ئەوەی ئێمە جیادەكاتەوە لە چێشتخانەكانی تر ئەوەیە لە دوای نیوەی شەوەوە جمەی دێ و تاوەكو كاتژمێر ۷ی بەیانی، دواتریش جارێكی تر بۆ نیوەڕۆ لەكاتژمێر ۱۰ەوە سەروپێ لێدەنێینەوە، جگە لەوەی كڕیارێكی باشیان ھەیە لەسەرجەم ناوچەكانی تری ھەرێمی كوردستان سەردانیان دەكەن، هاوڵاتیانی عەرەبیش بەشێوەیەكی بەرچاو سەردانیان دەكەن، لە هەمان كاتدا بەشێوەی سەفەری بۆ ماڵەوەش دەبرێتەوە.

كڕیارەكان چی دەڵێن؟
حسێن حەمەد، تەمەن ۳۸ ساڵ، كە سەردانی پاچەی سامان دەكات بە(خەڵك)ی ڕاگەیاند، ساڵانە زۆرینەی شەوان دێم بۆ خواردنی سەروپێ، تام و چیژی خۆشی هەیە بەتایبەت، كە بەیانیان نزیك كاتژمێر ۳ بۆ ٤ لەماڵەوە دەردەچیت، بەڵام لەوەرزی گەرمادا كەمتر، چونكە سەروپێ خواردنێكی تایبەتە بۆ زستان.

سەعد ڕەعد، یەكێكی ترە لەو كەسانەی ئارەزوی زۆری هەیە بۆ ئەم خواردنە و بە(خەڵك)ی ڕاگەیاند، لەباوكیەوە فێر بووە، زورینەی بەیانیەكان كاتێك ڕوو لەبازاڕ دەكات دوای خۆشۆردن لەگەرماوی بازاڕ دێت بۆ خواردنی سەروپێ و تاوەكو كەشەكەش ساردتر بێت چێژی زیاتری لێ دەكەم.

نرخی نەفەرێك سەروپێ لەكۆن و ئێستادا
بەپێی وتەی كەسانی بەتەمەن نەفەری سەروپێ لەساڵانی حەفتاكان بە دینارێك بووە، ئێستاش بۆ هەر نەفەرێك بڕی ۱۰هەزار دینار و بۆ نیو نەفەر بڕی ۷ هەزار دینار وەردەگیرێت.

چەند زانیارییەك لەسەر خواردنی سەروپێ:
لە وڵاتانی ڕۆژهەڵاتی ئەوروپا لەو ئاهەنگانەی، كە خواردنەوەی كحولی زۆر پێشكەش دەكرێ بۆ نەهێشتنی كاریگەری خواردنەوە كحولییەكان سوودی لێوەردەگیرێت، هەروەها سودی لێ دەكرێ بۆ بەهێزكردنی كۆئەندامی هەرس و بەهێزكردنی ئێسك و بڕبرەی پشت.

ئێستا جیاواز لەساڵانی پێشوو، هاوڵاتیەكی بەرچاو ڕوویان لەخوردنی سەروپێ كردوە و ئەگەر بتەوێ ژەمێك خواردنی سەروپێ بخۆی دەبێت چاوەڕوان بیت تاوەكو كەسێك ژەمەكەی تەواو دەكات و كورسیەكەت بۆ چۆڵ دەكات، ڕۆژانەش دەیان سەر ئاژەڵ لێ دەنرێت بەشێوەیەك نزیكەی ۱۰۰ بۆ ۱٥۰ سەر ئاژەڵ دەبێت بەتەنها لە چێشتخانەیەك.

راپۆرت

شەڕی پەكەكە و توركیا مەترسی گەورە بۆ سەر هاووڵاتیانی باشووری كوردستان دروستدەكات

خەڵك-بەشی هەواڵ

تادێت شەڕی گەریلاكانی پەكەكە و لەشكری توركیا زۆرتر بۆ ناوچە ئاوەدانییەكانی باشووری كوردستان پەلدەهاوێژێت و دەگاتە ناوچەكانی بن دەسەڵاتی حكومەتی هەرێمی كوردستان دوور لە ناوچەكانی هەرێمەكانی پاراستنی مەدیای بن دەستی پەكەكە، دوێنێ فڕۆكە شەڕكەرەكانی توركیا ڕێگای سەرەكی ئامێدی –دهۆك و نزیك شارۆچكەی ئامێدییان بۆردومان كرد، كە زیانی ماڵی زۆری لێكەوتەوە.

هاوكات بۆردومانی فڕۆكە شەڕكەرەكانی توركیا گەیشتووەتە سنووری پارێزگەی سلێمانی و لە كۆتایی مانگی ڕابردوودا سنووری ناوچەی شارباژێڕیان بۆردومانكرد و هاووڵاتیانی ناوچەكە ترسیان لێنیشتووە بەهۆی چڕبوونەوەی چالاكییەكانی گەریلاكان لە سنوورەكە كە ببێتەهۆی زۆرتری بۆردومانكردن لەلایەن لەشكری توركیاوە.

لەلایەكی دیكەوە حیزب و لایەنە سیاسییەكانی باشووری كوردستان و دامەزراوە حكومەتییەكان بێدەنگییان لەئاست هێرشە داگیركارییەكانی لەشكری توركیا و خەسارۆمەندبوونی هاووڵاتیانی ناوچە سنوورییەكان هەڵبژاردووە.

لەوبارەیەوە كۆنگرەی نەتەوەیی كوردستان كەنەكە و گەورە كاربەدەستانی پارتی كرێكارانی كوردستان هۆشدارییان بە دەسەڵاتدارانی باشووری كوردستان داوە لە بێدەنگییان بەرامبەر هێرشەكانی توركیا.

ئاشكراشیانكردووە كە هێرشەكانی توركیا ئامانج لێی داگیركردنی باشووری كوردستانە، نەك تەنها پارتی كرێكارانی كوردستان.

لەوبارەیەوە محەمەد عەبدوڵڵا هاوسەرۆكی تەڤگەری ئازادی كۆمەڵگەی كوردستان، بە (خەڵك)ی ڕاگەیاند، ئەوەی دەیبینین حكومەتی توركیا و ئەو هێزانەشی لە باشووری كوردستانن و گرێدراوی سیاسەتەكانی توركیان، سیاسەتی خەڵەتاندنی خەڵك بەڕێوەدەبەن.

دەشڵێت “ئامانجمان ئەوەیە كورد نابێت لە هیچ شوێنێك هەبێت و دەسەڵاتی هەبێت، لەبەرئەوەی ئامانجی هێرشەكانی توركیا هەموو كوردە نەك تەنها پەكەكە”.

ئاماژەی بۆ ئەوەش كرد، توركیا سیاسەتی تۆقاندن لە باشووری كوردستان بەڕێوەدەبات، بەداخەوە هیچ هێزێكیش نییە ئەركی پاراستنی باشووری كوردستانی گرتبێتە ئەستۆی خۆی، ئەو هێرشانەشی بۆسەر ئێمە دەكرێن و سوتاندنی دەغڵودانی جوتیاران لە چوارچێوەی سیاسەتەكانی دەوڵەتی توركیایە.

بەهۆی بوونی گەریلاكانی پەكەكە لە هەندێك ناوچەی سنووری باشووری كوردستان، زۆر جار ناوچەكە دەبێتە گۆڕەپانی شەڕی توركیا و پەكەكە و زیان بە هاووڵاتیان دەگات، لەو بارەوە محمەد عەبدوڵڵا ڕایگەیاند، كاتێك داعش هاتە ناوچەكە، گەریلاكانی پەكەكە هاتنە خوار كەركوك و مەخمور و زۆر شوێنی دیكە بۆ پارێزگاریكردن لە هەرێم، بۆچی ئەوكات هێزێكی كوردستانی بوون، بۆچی ئێستا ئەم هێزە خائینن؟

دەشڵێت “ئەو هێزانەی دەستی توركیا دەگرن بۆ ئەوەی باشووری كوردستان داگیر بكات و ڕێگریدەكەن لە چالاكییەكانی ئێمە ئەوانەن ئەم جۆرە هەواڵانە بڵاودەكەنەوە، ئەمەش لەكاتێكدایە ناوچەكانی پەكەكە شوێنە ستراتیژییەكانی هەرێم و عیراق نییە”.

ڕوونیشیكردەوە، پلانێكی گشتی لەسەر كورد هەیە و دەیەوێت كورد نینۆكی نەبێت سەری خۆی بخورێنێت، بەشێوەیەك لە شوێنێك هێزێك ڕووبەڕووی داگیركەر دەبێتەوە دەیانەوێ بیشكێنن، بەڵام لەو شوێنانەی هێزێك تەسلیمی داگیركەر دەبێت فەڕشی سووریان بۆ ڕادەخرێت و لەگەڵیان كۆدەبنەوە.

بەردەوام بە لە خوێندنەوە

راپۆرت

پێنج ساڵ بەسەر كەوتنی موسڵدا تێپەڕبوو
ئەو ڕۆژەی موسڵ كەوت و بومەلەرزەیەكی ڕوخێنەر عیراقی هەژاند

خەڵك- ئەحمەد عەبدوڵڵا

ڕۆژی 9ی حوزەیرانی 2014، زۆربەی میدیاكانی عێراق و جیهان بڵاویانكردەوە، كە چەكدارانی دەوڵەتی ئیسلامی”داعش” لە شارۆچكەی بەعاج لە باشوری خۆرئاوای موسڵەوە بەرەو سەنتەری شارەكە هاتوون و پێشبینیان كردبوو، كە ئەگەر حكومەت لە ماوەیەكی كورتدا ڕووبەڕوویان نەبێتەوە، موسڵیش وەك فەللوجە”لە مانگی یەكی 2014 دا كەوتە دەست داعش” دەكەوێتە دەست ئەو گروپە و دوای جموجوڵە نائاساییەكە موسڵ كەوت و داعش دەستی بەسەر شارەكەدا گرت، هەرچەندە چەند فەرماندەیەكی سوپای عیراق و نزیكەی 30 هەزار سەرباز و پۆلیس و كارمەندی ئەمنی لە شارەكەدابوون، بەڵام هەموویان ڕایانكرد و شارەكەیان بە داعش سپارد.

جلی سەربازێكی عیراقی دوای هەڵهاتنی لە موسڵ

ڕۆژی 5ی حوزەیرانی 2014، چەكدارانی داعش لە سوریاوە دزەیان كردە دەوروبەری موسڵ و لەڕێگەی ئۆتۆمبێلی بارهەڵگرەوە و بەیارمەتی بەشێك لە دانیشتیوانی موسڵ چونە نێو شارەكەوە و لە ماوەیەكی كورتدا توانیان 1400 چەكدار بگەیەننە بەری ڕاستی شارەكە و پاشان لە ڕۆژی 9ی حوزەیراندا سێ‌ ئۆتۆمبێلیان تەقاندەوە و هێرشیان كردە سەر هێزەكانی عیراق، كە ژمارەیان نزیكەی 30 هەزار سەرباز و پۆلیس بوون و لە شەش فرقەدا كۆكرابوونەوە.

دەستپێكردنی هێرشەكە بۆ ماوەی 24 كاتژمێر بەردەوام بوو، ڕۆژی 10ی حوزەیران بە تەواوەتی موسڵ كەوت، ئەوەیش لێدانێكی زۆر كاریگەر بوو لە هێزەكانی عیراق و شیرازەی بەرەكانی عیراقی لە سنوری سوریاوە بۆ سنوری ئێران پچڕاند.

كەوتنی موسڵ دوای نزیكەی چوار مانگ هات لە كەوتنی فەللوجە و كۆنتڕۆڵكردنی لەلایەن داعشەوە و بەوەش داعش بنكەیەكی سەقامگیرتری لە عیراقدا گرت و سوپای عیراق و هێزە ئەمنییەكانیشی تا نزیك بەغدا دەركرد.

ڕۆژی 10ی حوزەیرانی 2014 ئاژانسەكانی جیهان وێنە و ڤیدیۆی ئەو سەرباز و ئەفسەرە عیراقییانەیان بڵاودەكردەوە، كە جلەكانیان فڕێ‌ دەدا و خۆیان ڕاستی پێشمەرگە دەكرد و بەشێكیشیان لەلایەن داعشەوە دەستگیركران، كە بەپێی ئامارە نافەڕمییەكان لە چەند ڕۆژێكدا هەزار و 400 كەسیان كوژران و ئەمەیش دیمەنێكی زۆر دڕەندەی دا بە داعش.

شەوی 10ی حوزەیران، نوری مالكی، فەرماندەی گشتی هێزە چەكدارەكانی عیراق لەوكاتەدا، لە تەلەفزیۆنی فەڕمی عیراقەوە پەیامێكی بڵاوكردەوە و دڵنیای دایە هاووڵاتیانی عیراق، كە هێزە ئەمنییەكان بەرگری دەكەن و ڕێگەنادەن بەغدا بكەوێت، ڕەنگە ئەوە باشترین وتەیەك بێت لەوكاتەدا مالكی بۆ خەڵكی وتبێت، چونكە زۆربەی عیراقییەكان پێشبینی كەوتنی بەغدا و تەنانەت عیراقییان دەكرد و بەشێك لە هاووڵاتیانی بەغدایش بەرەو باشوری عیراق هەڵهاتن.

داعش لە ماوەیەكی كورتدا هەموو ناوچە سونییەكانی گرت و لە خۆرهەڵاتەوە نزیك شاری بەعقوبەی سەنتەری پارێزگەی دیالە بووەوە و لە خۆرئاوایشەوە گەیشتە نزیك شاری ڕومادی و سنورەكانی سوریا و ئوردنیشی گرت و ئەوەیش وەك گرتنی شادەماری دڵی عیراق بوو، سنورێكی پان و پۆڕی بۆ داعش دەستبەركرد، كە دەیتوانی بەئاسانی هێزەكانی لە سوریاوە بۆ عیراق و بەپێچەوانەوە بجوڵێنێت.

شەپۆلی كەوتنی موسڵ لە ماوەی دوو ڕۆژدا گەیشتە تكریت و ڕۆژی 12ی حوزەیران لە سەربازگەی “سپایكەر” هەزار و 700 خوێندكاری سەربازی كوشت و ئەوەیش دەنگدانەوەی زۆری لێكەوتەوە، بەتایبەتی زۆربەی ئەو خوێندكارانە شیعەمەزهەب بوون و لە چوونی داعش بۆ ناوچەكە ئاگادارنەكرابوونەوە و دواتریش والێكدرایەوە، كە دەستێك لە نێو حكومەتەوە هاوكاری داعشی كردبێت بۆ كوشتنی ئەو كەسانە و ڕۆژێك دواتریش عەلی سیستانی، مەرجەعی باڵای شیعەكانی عیراق فتوای دەركرد و حەشدی شەعبی دروستكرا.

دیمەنێك لە كوشتنی سەربازانی سپایكەر لە تكریت

دوای كەوتنی موسڵ لە ماوەیەكی كورتدا مەترسی كەوتەسەر سنورەكانی هەرێمی كوردستان و ڕۆژی 15ی حوزەیران بۆ یەكەمجار ڕووبەڕووبونەوە لە نێوان پێشمەرگە و داعشدا لە جەلەولا ڕوویدا، دوای ئەوەی چەكدارانی داعش زۆربەی سنوری دیالەیان كۆنتڕۆڵكرد، بەتایبەتی لەوكاتەدا داعش چەك و جبەخانەیەكی زۆری لە موسڵ دەستكەوتبوو، كە بەپێی ئامارە بڵاوكراوەكان لە وەزارەتی بەرگری عیراق بەهایان دەگەیشتە 28 ملیار دۆلار.

خالد عوبێدی، وەزیری پێشووتری بەرگری عیراق لە چاوپێكەوتنێكدا لەگەڵ “سكای نیوز” ئاماژەی بەوەكرد، كە دوای كەوتنی موسڵ شەڕكردن لەگەڵ داعش قورستربوو، چونكە چەكی شەش فیرقەی سەربازی عیراقیان پێبوو، سەرباری ئەوەی دەیانتوانی بە ئاسانی هێزی پشتیوان لە سوریاوە بهێنن.

كەوتنی موسڵ تەنها لە پێدراوە سەربازییەكەیدا نەمایەوە و قاڵبێكی سیاسی و دیمۆگرافیشی بەدواداهات، چونكە هەرێمی كوردستان و عیراقی لێكدابڕی و 500 هەزار هاووڵاتی لە ناوەڕاستی عیراقەوە ئاوارەی هەرێمی كوردستان بوون، كە دواتر ئەو ژمارەیە گەیشتە ملیۆنێك و 800 هەزار كەس و فشارێكی دارایی زۆریان خستەسەر حكومەت و خەڵكی هەرێمی كوردستان.

هاتنی لێشاوێك ئاوارەی عەرەبی سوننە بۆ هەرێم

كەوتنی موسڵ سەرەتای قۆناغێكی مەترسیداری لە عیراقدا دروستكرد، كە بەشێك بە “كەوتنی موسڵ” و هەندێكی دیكە بە “سەرەتای هاتنی داعش” وەسفی دەكەن. هەزاران ڕووداوی سەربازی و ئابووری و كۆمەڵایەتی گەورەی لێكەوتەوە و عیراقی گەیاندە لێواری مەرگ و بومەلەرزەیەكی ڕوخێنەر كە بینای جەستەی عیراقی لە بنەڕەتەوە لەرزاند، بەڵام لەپڕ لولەی تفەنگەكانی داعش بەرەو باكور سوڕێندرا و ئاڕاستەی كورد كران، بەتایبەتی دوای ئەوەی بەرپرسانی باڵای هەرێم لەوكاتەدا باسیان لەوەكرد، كە كورد سنوورەكانی خۆی گرتووەتەوە و سەرەتای دروستبوونی دەوڵەت خەمڵیوە.

ڕۆژی 3ی ئابی 2014، داعش هێرشێكی فراوانی كردەسەر خۆرئاوای موسڵ و شنگال و ناوچەكانی ئێزدی كۆنتڕۆڵ كرد، دوای ئەوەی پێشمەرگە كشانەوە و ئەمەیش سەرەتایەكی مەترسیدار بوو بۆ هەرێمی كوردستان و یەكەم ڕووبەڕووبونەوەی سەختی پێشمەرگە و داعش بوو، لە ماوەی پێنج ڕۆژدا گەیشتە نزیك هەولێر.

شەوی 8ی ئابی 2014، داعش مەخموری گرت و مەترسی لەسەر كەوتنی هەولێریش دروستبوو، بۆیە سەركردایەتی هەرێمی كورستان بە پەلە داوای هاوكارییان لە ئەمریكا كرد و هەر ئەو شەوەش یەكەم گورزی ئاسمانی لەداعش درا و لە هەولێر دوورخرایەوە و ئێران-یش وەك یەكەم وڵات پشتیوانی گەیاندە هەرێم.

گۆڕینی ئاڕاستەی هێرشی داعش تائێستا بەفەڕمی نازانرێت چ بوو، بەڵام گومان لەوەدانییە، كە دەستێك داعشی هاندا سنوورێك بۆ بەرەو پێشبردنی مەسەلەی كورد دابنێت و لەو قۆناغەدا بەربەستی بكات، ئەمەش ئەو پرسیارەیە، كە ڕەنگە مێژوو لە داهاتوودا وەڵامەكەی دەستبخات.

بەردەوام بە لە خوێندنەوە

راپۆرت

ئەمڕۆ سەرۆكی نوێی هەرێمی كوردستان لە ڕێوڕەسمێكی تایبەتدا دەستبەكار دەبێت

خەڵك-سەعد مەلا عەبدڵڵا گوڵپی

بڕیارە ئەمڕۆ دوو شەممە لە ڕێوڕەسمێكی تایبەتدا بە بەشداری نوێنەرانی حزب و لایەنە سیاسییە نێوخۆیی و دەرەكییەكان و هەروەها بەرپرسانی باڵای عیراق و نوێنەرانی وڵاتانی بیانی، نێچیرڤان بارزانی وەك سەرۆكی هەرێمی كوردستان سوێندی یاسایی بخوات و دەستبەكار بێت.

ڤالا فەرید سەرۆكی پەڕلەمانی كوردستان لە ڕاگەیەندراوێكدا، بانگهێشتی گشت ئەندامانی پەڕلەمان دەكات بۆ ئامادەبوون لە دانیشتنی ژمارە (7)ی ئاسایی، ساڵی یەكەم لە خولی هەڵبژاردنی پێنجەمی پەڕلەمان، لەكاتژمێر 11ی پێشنیوەڕۆی ئەمڕۆ دووشەمە ڕێكەوتی 2019/6/10، بۆ دەستبەكاربوونی سەرۆكی نوێی هەرێمی كوردستان.

ڕێوڕەسمەكە لە هۆڵی سەعد عەبدوڵڵا لە شاری هەولێر بەڕێوەدەچێت، سەرۆكی پەڕلەمانی كوردستان لە ڕاگەیەندراوێكدا ڕوونیكردەوە، لەبەر ئامادەبوونی میوانان لەسەر ئاستی ناوخۆ و دەرەوەی هەرێمی كوردستان و نەبوونی شوێنی پێویست لە تەلاری پەڕلەمان، دەستەی سەرۆكایەتی پەڕلەمان بڕیاری دا ئەم دانیشتنە لە هۆڵی سەعد عەبدوڵڵا لەشاری هەولێری پایتەختی هەرێمی كوردستان بێت.

ڕێوڕِەسمەكە شێوازی سوێندخواردنی سەرۆكی وڵاتانی پێوەدیارە و بەهۆیەوە ژمارەیەك زۆر لە میوانی نێوخۆیی و بیانی بانگهێشت كراون و بەپێی زانیارییەكان 1200 كەس ئامادەی ڕێوڕەسمەكە دەبن.

پێشەوا ھەورامانی وتەبێژی فراكسیۆنی پارتی دیموكراتی كوردستان ئاشكرایكرد، ھەرسێ سەرۆكایەتییەكەی عێراق و چەندین خەڵكی دیكە لە ناوەوە و دەرەوە بانگهێشت كراون و فراكسیۆنەكانیش سەرپشكن لەوەی بەشداری بكەن، هاوكات شاندێكی یەكێتیی نیشتمانیی كوردستان وەك دووەم هێزی هەرێم بە سەرۆكایەتی كۆسرەت ڕِەسوڵ جێگری یەكەمی سكرتێری گشتی حزبەكە بەشداری مەراسیمەكە دەكات، ئەمەش كاریگەری ئەرێنی لەسەر ڕەوشی سیاسی هەرێم هەیە، چونكە بەشداریكردنەكەی شاندی یەكێتی دوای ناكۆكییەكانی پارتی و یەكێتی و بەشدارینەكردنی فڕاكسیۆنی یەكێتی دێت لە كۆبوونەوەی هەڵبژاردنی نێچیرڤان بارزانی بە سەرۆكی هەریم و بەشدارینەكردن لە هەڵبژاردنی دەستەی سەرۆكایەتی پەڕلەمان و هەڵوەشاندنەوەی دوو ڕێككەوتنی فەرمی نێوان پارتی و یەكێتی.
بەپێی زانیارییەكان، جگە لە سێ سەرۆكایەتییەكەی عیراق، لەسەر ئاستی عیراق و هەرێمی كوردستانیش لایەنە سیاسییەكان بەشداری مەراسیمەكە دەكەن و هاوكات سەرجەم باڵیۆز و نێردەی وڵاتانی جیهان و ژمارەیەك لە وەزیرەكانی دەرەوە بەشداری مەراسیمەكە دەكەن.

هەر بەپێی زانیارییەكانی (خەڵك) لە ڕێوڕەسمەكەدا وەبەرهینەرانی هەرێمی كوردستانیش بەشدارییان پێكراوە و بانگێشهتكراون، ئەویش وەكو لەبەرچاوگرتنی ڕۆڵی وەبەرهێنەران لەماوەكانی ڕابردوودا لە پڕۆسەی ئاوەدانكردنەوەی كوردستان.

بەشێك لە چاودێرانی سیاسی ئاماژە بۆ ئەوە دەكەن، ئەم ڕێوڕەسمە هەنگاوێك دەبێت بەرەو ئاشتەوایی و یەكخستنەوەی نێوماڵی كورد، بەتایبەت دوای بانگهێشتكردنی بەرهەم ساڵح سەرۆك كۆماری عیراق بۆ ڕێوڕەسمەكە.
ئەمەش لەكاتێكدایە، لەدوای 2ی ئۆكتۆبەری ساڵی ڕابردوو بەهۆی هەڵبژاردنی بەرهەم ساڵح وەك سەرۆك كۆماری عیراق ناكۆكیەكانی نێوان پارتی و یەكێتی گەیشتە لوتكە و تا ئێستاش نەتوانراوە چارەسەری بیماری نێوانیان بكەن، بەڵام دوای سەردانی سەرۆك كۆماری عیراق بۆ یەكەم جار كاریگەری لەسەر هێوركردنەوەی كێشەكان دەبێت و گرنگی تایبەتی خۆی هەیە بەتایبەت بۆ ئاساییكردنەوەی نێو ماڵی كورد.

دروستبوونی كێشە و ململانێكانی لایەنە سیاسییەكانی هەرێمی كوردستان لەسەر هەمواركردنەوەی یاسای سەرۆكایەتی هەرێم وایكرد دەرگای پەڕلەمانی كوردستان دابخرێت، بەڵام دوای ئەنجامدانی هەڵبژاردنەكانی هەرێمی كوردستان و ڕێككەوتنی پارتی و گۆڕان و پێكهاتەكان توانرا دامەزراوەی سەرۆكایەتی هەرێمی كوردستان لە پەڕلەمانی كوردستان بەسەرجەم دەسەڵاتەكانییەوە پەسەند بكرێت ودامەزراوەكە كارا بكرێتەوە دوای نزیكەی دوو ساڵ لە هەڵپەساردنی بەهۆی دەستلەكاركێشانەوەی مەسعود بارزانی سەرۆكی پێشووی هەرێمی كوردستان لە ساڵی 2017 دا.

 

رێكارەكانی تایبەت بە سوێندخواردنی سەرۆكی هەرێمی كوردستان – عێراق.

1- دەقیقەیەك وەستان و رێزنان لە گیانی پاكی شەهیدانی كوردستان و عێراق لەگەڵ سروودی نیشتمانی عێراقی و مارشی نەتەوەیی ئەی رەقیب.

دووەم- خوێندنەوەی بڕیاری ژمارە 6ـی ساڵی 2019 تایبەت بە هەڵبژاردنی رێزدار نێچیرڤان ئیدریس مستەفا بارزانی بە سەرۆكی هەرێمی كوردستان – عێراق.

3- سوێندخواردنی سەرۆكی هەرێمی كوردستان (نێچیرڤان ئیدریس مستەفا بارزانی).

4- پێشكەشكردنی وتاری بەشێك لە ئامادەبووان بەو بۆنەیەوە.

5- وتەی سەرۆكی هەرێمی كوردستان (نێچیرڤان ئیدریس مستەفا بارزانی).

دووەم، ناونانی سەرۆكی ئەنجوومەنی وەزیرانی هەرێمی كوردستان – عێراق، بەپێی بڕگەی 3 لە ماددەی 56 لە یاسای هەڵبژاردنی پەرلەمانی كوردستان ژمارە 1ـی ساڵی 1992ـی هەمواركراو.

 

نێچیرڤان بارزانی كێیە؟
نێچیرڤان ئیدریس مستەفا بارزانی:
– لە 21ـی ئەیلوولی 1966 لە حاجی ئۆمەران لەدایكبووە
– جێگری سەرۆكی پارتی دیموكراتی كوردستانە
-لە 1975 لەگەڵ بنەماڵەكەیدا ئاوارەی ئێران بوون
– خوێندكاری بەشی زانستە سیاسییەكان بووە لە زانكۆی تاران
– لە 1989 بووەتە ئەندامی مەكتەبی سیاسیی پارتی
– لە 1996 بووەتە جێگری سەرۆكوەزیرانی هەرێمی كوردستان
– لە 1999 بووەتە سەرۆكوەزیران (كابینەی چوارەم)
– 2006 بووەتە سەرۆكوەزیران (كابینەی یەكگرتنەوە)
– لە 2011 بۆ 2013 جارێكی دیكە بووەتەوە سەرۆكوەزیران
– لە 2013 جارێكی دیكە پۆستی سەرۆكوەزیرانی پێدرایەوە تاوەكو 2018
– لە 3-12-2018 كرایە بەربژێری پارتیی دیموكراتی كوردستان بۆ پۆستی سەرۆكی هەرێمی كوردستان
-لە 28-5- 2019 بە سەرۆكی هەرێمی كوردستان هەڵبژێردرا.

بەردەوام بە لە خوێندنەوە

کوردستان