سه‌رۆكوه‌زیرانی عێراق دوای ٥٠ رۆژ سه‌ردانی نه‌خۆشخانه‌ی كازمیه‌ی کرد له به‌غدای پایته‌خت كه پێشتر توڕه‌یی خۆی له‌و نه‌خۆشخانه‌یه به‌رامبه‌ر به‌ئاستی خزمه‌تگوزارییه‌كان ده‌ربڕی و داوای ده‌ستبه‌جێ نۆژه‌نكردنه‌وه و زیاتركردنی خزمه‌تگوزاریه‌كانی كرد.
به‌گوێره‌ی راگه‌یه‌ندراوێكی نوسینگه‌ی راگه‌یاندنی، محه‌مه‌د شیاع سودانی سەرۆکوەزیرانی عێراق، ئێواره‌ی ئه‌مڕۆ دووشه‌ممه، نه‌خۆشخانه‌ی فێركاری كازمیه‌ی فێركاری، دوای ته‌واوكردنی كاری نۆژه‌نكردنه‌وه و چاكسازی تێیدا به‌سه‌ركرده‌وه.
هه‌ر به‌گوێره‌ی راگه‌یه‌ندراوه‌كه، محه‌مه‌د شیاع سودانی له سه‌ردانه‌كه‌ی پێشویدا بۆ نه‌خۆشخانه‌كه كه ٥٠ ڕۆژ له‌مه‌وبه‌ر ئه‌نجامیدا، فه‌رمانیكرد به ده‌ستپێكردنی كاره‌كانی نۆژه‌نكردنه‌وه‌ی نه‌خۆشخانه‌كه، به‌وه‌ش سه‌رجه‌م كاره‌كانی نۆژه‌نكردنه‌وه و چاكسازیش له ماوه‌یه‌كی پێوانه‌ییدا جێبه‌جێكران، بۆ ئه‌وه‌ی سه‌رجه‌م به‌شه‌كانی نه‌خۆشخانه بخرێته خزمه‌ت هاوڵاتیانه‌وه.
شه‌وی ١٣-١١-٢٠٢٢، محه‌مه‌د شیاع سه‌رۆكوه‌زیرانی عێراق سه‌ردانی نه‌خۆشخانه‌ی كازمیه‌ی كرد و توڕه‌یی خۆی ده‌ربڕی به‌رامبه‌ر به‌و خزمه‌ته‌ی كه له نه‌خۆشخانه‌كه پێشكه‌ش به هاوڵاتیان ده‌كرێت و راشیگه‌یاند، “خوا مۆفه‌قمان نه‌كات بۆ ئه‌م خزمه‌ته‌ی پێشكه‌شی ده‌كه‌ین”.
