بەڕێوەبەرایەتی گشتی گەشتوگوزاری هەولێر ڕایدەگەیەنێت، لە ماوەی ساڵی 2022دا زیاتر لە دوو ملیۆن و 752 هەزار گەشتیاری ناوخۆ و پارێزگەكانی عێراق و بیانی سەردانی هەولێر و دەور،وبەریان كردووە.
بەڕێوەبەرایەتی گشتی گەشتوگوزاری هەولێر لە ڕاگەیەنراوێكدا ئاماژەی بەوەكردووە، كابینەی نۆیەمی حكوومەتی هەرێمی كوردستان بە مەبەستی هەمەجۆركردنی سەرچاوەكانی داهات، بەشێوەیەكی باشتر بایەخ بە سێكتەری گەشتوگوزار و پەرەپێدانی ئەو سێكتەرە دەدات و بۆ ئەو مەبەستەش چەندین هەنگاوی چاكسازی و ئاسانكاری لە بەرژەوەندی سێكتەرەكەدا گرتووەتەبەر و ئەمەش كاریگەری لەسەر بەرزكردنەوەی ژمارەی گەشتیاران بۆ هەرێمی كوردستان و هەولێر هەبووە.
ئاشكراشی كردووە، بە گوێرەی دوایین ئامار، لە سنووری گەشتوگوزاری هەولێر لە ماوەی ساڵی 2022دا زیاتر لە دوو ملیۆن و 752 هەزار گەشتیاری ناوخۆ و پارێزگەكانی عێراق و بیانی سەردانی هەولێر و دەورووبەریان كردووە.
ڕوونیشی كردۆتەوە، تەنها لەپشووەكانی سەری ساڵی 2023دا 61 هەزار و 658 گەشتیار بەمەبەستی بەشداریكردن لەچالاكییەكانی ساڵی نوێدا سەردانی پارێزگای هەولێریان كردبوو.
