ئێمە لە تۆرە کۆمەڵایەتیەکان

کوردستان

پەرلەمانتارێكی كورد لەناو هۆڵی پەرلەمان داوای زمانی كوردی دەكات

خەڵك- بەشی هەواڵ
پەرلەمانتارێكی كورد لەناو هۆڵی پەرلەمانی عیراق داوا دەكات زمانی كوردی پەیڕەو بكرێت لە گفتوگۆكان و ئەوەش مادەیەكی دەستوریە.

بەپێی دەستوری عیراق، زمانی كوردی زمانی فەرمیە لە سەرتاسەری عیراق و لە كاروبارە فەرمییەكان كاری پێ‌ دەكرێت، بۆ جێبەجێ‌ كردنی ئەو مادە دەستوریەش هۆشیار عەبدوڵا، ئەندامی پەرلەمانی عیراق لە فراكسیۆنی گۆڕان لە كۆبوونەوەی ئەمڕۆی پەرلەمان داوای كردووە زمانی كوردی كاری پێ‌ بكرێت.

دەربارەی ئەو بابەتە، د. ڕێبوار كەریم، سەرۆكی فراكسیۆنی هاوپەیمانی لە پەرلەمانی عیراق بۆ (خەڵك) ئاشكرای كرد، داواكاری بەكارهێنانی زمانی كوردی تەنها بۆ كۆبوونەوەی ئەمڕۆ نەبوو، بەڵكو بۆ ئەوەبوو لە سەرجەم كۆبوونەوەكانی پەرلەمان لە گفتوگۆكاندا زمانی كوردی بەكاربهێنرێت و ئەوەش ئاساییە و بابەتێكی هونەرییە.

ڕاشیگەیاند، ئەو بابەتە لەلایەن هۆشیار عەبدوڵا لە فراكسیۆنی گۆڕان پێشنیار كرا و ئەوەش بابەتێكی هونەرییە و لەناو دەستور و پەیڕەوی ناوخۆی پەرلەمان هەیە.

دوانیوەڕۆی ئەمڕۆ كۆبوونەوەی پەرلەمانی عیراق بە بەشداری 188 پەرلەمانتار و بە سەرۆكایەتی حەسەن كەعبی، جێگری یەكەمی سەرۆكی پەرلەمان دەستی پێكرد و تێیدا بڕیار درا بە كاراكردنەوەی كۆمسیۆنی هەڵبژاردنەكان و گفتوگۆش دەكرێت لەسەر یاسای هەڵبژاردنی ئەنجومەنی پارێزگاكان و قەزا و ناحیەكان.

وەك سەرۆكی فراكسیۆنی هاوپەیمانی لە لێدوانێكی پێشتری بۆ (خەڵك) وتی، “پێنج فراكسیۆنی كوردی، هاوپەیمانی و گۆڕان و كۆمەڵ و یەكگرتوو و نەوەی نوێ‌ دژی بڕیاری كاراكردنەوەی كۆمسیۆن بوون و دەنگیان پێ‌ نەداوە”.

کوردستان

بەركەوتوویەكی چەكی كیمیایی داوای بەهاناوەچوونی بە پەلە دەكات

خەڵك – بەشی هەواڵ

كامیل عەبدولقادر كە یەكێكە لە بەركەوتووانی چەكی كیمیایی و بەهۆیەوە سییەكانی لەدەستداوە و لە ئێستادا بەمەبەستی وەرگرتنی چارەسەر لە وڵاتی ئەڵمانیایە، لە ئێستادا پزیشكەكان بڕیاری ئەوەیانداوە سییەكانی بۆ بگۆڕن، بەڵام بەهۆی ئەوەی كەسی لەگەڵدا نییە لەدوای نەشتەرگەرییەكەدا خزمەتی بكات، ژیانی لەمەترسیدایە و بەوهۆیەوە لە ڕێی تۆڕی كۆمەڵایەتی فەیسبوكەوە داوای هاوكاری بەپەلە لەدەسەڵاتدارانی عیراق و هەرێم دەكات بۆ وەرگرتنی ڤیزا بۆ منداڵەكانی تا لە مردن ڕزگاری بكەن.

دەقی نووسینەكەی كامیل عەبدولقادر:

لەبەر ئەوەی مەترسی زۆر هەیە لەسەر ژیانم لەڕووی تەندروستیەوە بەهۆی نەخۆشی لەكاركەوتنی سیەكانمەوە بەهۆی گازی خەردەلەوەو ئەگەر بگەڕێنرێمەوە بۆ عێراق ئەگەری مردنم هەیە ناچار ئەڵمانیا ڕازی بووە (مافی مانەوەی نەناردنەوە) م پێ بدات.

پزیشكە ئەڵمانیەكان لەبەر ئەوەی كۆتا ڕۆژەكانی تەمەنم بەڕێ دەكەم و خۆری تەمەنم ڕوو لەئاوابوونە ڕازی بوون بەوەی نەشتەرگەری چاندنی سیەكانم بۆ ئەنجام بدەن؛ بەڵام چەند مەرجێكیان بۆ داناوم، دوو مەرجیان ناتوانم بەتەنها خۆم جێ بەجێی بكەم:

یەكەم : فێربوونی زمانی ئەڵمانی و دووهەم : نەمانەوەمە لەكەمپداو نیشتەجێ بوونمە لەشوێنێكی تایبەتدا یاخود شوقەیەكی سەربەخۆدا بۆ ئەوەی لە كەسانی دیكەوە توشی نەخۆشی تری ڤایرۆسی و میكرۆبی نەبم لەحاڵەتێكدا كۆئەندامی بەرگری لەشم لاوازەو جەستەم توانای ڕووبەڕووبونەوەی نەخۆشی دیكەی نەماوە.

بۆ فێربوونی زمانی ئەڵمانی بەردەوام كۆشش دەكەم و پشتیوان بەخوا بەهاوكاری چەند دڵسۆزێك فێر دەبم؛ بەڵام بۆ دەرچوون لەم كەمپەدا زۆر پێویستم بە مناڵەكانمە كە لە بەرواری ۲۰۱۷/۱۱/۲۹ وە لێیان دابڕاوم و ناتوانم خۆم خزمەتی خۆم بكەم و بۆ هەموو شتێك پێویستم بەیەكێكە هاوكاریم بكات! .

لەئێستادا وێڕای باری تەندروستی زۆر خراپم بە هاوكاری هەندێك برای بەڕێز خۆم ژیانی ڕۆژانەی خۆم زۆر بەسەختی لەو كەمپەدا بەڕێ دەكەم ! .

ئەگەر بەهانامەوە نەیەن ئەو دوو مەرجەی پزیشكەكان لەسەریان داناوم هەرگیز جێ بەجێ نابێت، لەبەر ئەوە داوا لەدەسەڵاتدارانی عێراق و هەرێم دەكەم كە ڤیزا بۆ مناڵەكانم وەربگرن تاوەكو لەنزیكەوە چاودێریم بكەن و خزمەتم بكەن بەتایبەتی پاش ئەنجامدانی نەشتەرگەری چاندنی سیەكان بۆم .

لەحاڵەتێكدا نەشتەرگەریەكەم بۆ ئەنجام بدرێ و منداڵەكانم لام نەبن و خزمەتم نەكەن ڕەنجمان بەخەسار دەچێ و نەشتەرگەریەكە شكست دێنێ و مەترسی زۆر گەورەتر لەسەر ژیانم دروست دەبێت .

هێشتا چاوەڕێم گوفتارەكانتان بكەن بە كردارو بەهانامەوە بێن پێش ئەوەی گیان لەدەست بدەم؛ چونكە پاش مردنم دروشم و شیوەنی كەستانم ناوێ ! .

بەردەوام بە لە خوێندنەوە

ئابوری

كەلار.. دوو كەس دەستگیركران

خەڵك – بەشی هەواڵ

پۆلیسی كەلار دوو كەسی بە تۆمەتی فرۆشتنی خۆراكی بەسەرچوو دەستگیركرد، زۆربەشیان ئەو خۆراكانەن كە ڕۆژانە منداڵان دەیكڕن.

لەڕاگەیەندراوێكی لیژنە هاوبەشەكانی قائیمقامییەتی كەلار ڕاگەیەنراوە، لەلایەن لیژنە هاوبەشەكانی قائیمقامییەتی كەلارەوە، لە دوكانێكدا زیاتر لە 300 كیلۆ خۆراك و شیرینی خراپ و بەسەرچوو دەستیان بەسەردا گیرا و دوو كەسیش بە تۆمەتی فرۆشتنی ئەو خۆراكە دەستگیركران.

لە ڕاگەیەندراوەكەدا ئەوەشخراوەتەڕوو، دەستبەسەراگرتنی ئەو خۆراكانە بە هاوكاری پۆلیسی بەرەنگاربوونەوەی تاوان بووە كە زانیاریان هەبووە لەسەر ئەو شوێنكارە و دواتر لیژنەكانی قائیمقامییەتیان لێ ئاگاداركردەوە و خۆراكەكانیش زۆربەیان پێكهاتوون لە شیرینی و ئەوبابەتانەی مناڵان ڕۆژانە لە دوكانەكان دەیكڕن.

لیژنە هاوبەشەكانی قائیمقامییەتی كەلار ئاماژەی بەوەشكردووە، دەستگیركراوەكان هەردووكیان كوردن و دانیشتووی ڕۆژهەڵاتی كوردستانن و لە كاتی لێكۆڵینەوەدا دانیان بەوەداناوە ئەو خۆراك و بابەتە شیرینیانە لە كۆگایەكدا لە سنوری شاری كەلار دەیهێنن و دەیفرۆشنەوە و لە ئێستادا فەرمانی گرتن بۆ خاوەنی ئەو كۆگایەش دەرچووە.

بەردەوام بە لە خوێندنەوە

کوردستان

قوباد تاڵەبانی بۆ ئەمریكا: بۆ ئەنجامدانی چاكسازی پێویستمان بە یارمەتی ئێوەیە

خەڵك – بەشی هەواڵ

جێگری سەرۆك وەزیرانی ھەرێمی كوردستان بۆ ئەنجامدانی چاكسازی لە وەزارەتی پێشمەرگە داوای یارمەتی لە ئەمریكا دەكات.

قوباد تاڵەبانی جێگری سەرۆك وەزیرانی ھەرێمی كوردستان لەگەڵ وەفدێكی سەربازیی ئەمریكا بەسەرپەرشتی ژەنەراڵ گریگۆری كرودەر كۆبووەوە و تاووتوێی چۆنییەتی ئەنجامدانی چاكسازیی لەوەزارەتی پێشمەرگە و ھەماھەنگی زیاتریان كرد.

لە كۆبوونەوەكەدا باس لە شەڕی تیرۆر و ھەماھەنگی زیاتری نێوان پێشمەرگە و ھاوپەیمانان كرا، ھەردوولا ھاوڕابوون لەسەر ئەوەی پێشمەرگەو ھێزی ھاوپەیمانان بە ھەمان شێوەی كە لەشەڕی داعشدا ھەماھەنگ بوون، لە داھاتووشدا بە ھەماھەنگی زیاترەوە پێكەوە ڕووبەڕووی تیرۆر ببنەوە.

لە بەشێكی تری كۆبوونەوەكەدا، باس لە چۆنیەتی چاكسازیكردن لە وەزارەت و هێزەكانی پێشمەرگە كرا و جێگری سەرۆك وەزیران جەختی لەسەر پێویستی بەردەوامبوونی یارمەتییەكانی ئەمریكا بۆ ئەنجامدانی چاكسازی لە وەزارەتی پێشمەرگە كردەوە.

بەردەوام بە لە خوێندنەوە

کوردستان