جارێكی دیكە دابەشكردنی مووچە دواكەوت


بەهۆی مەرجی عێراق بۆ ناردنی لیستی مووچە تاوەكو پارەی مووچە ڕەوانە بكرێت و دواكەوتنی ناردنی لیستەكە جارێكی دیكە دابەشكردنی مووچەی فەرمانبەرانی هەرێم دواكەوت و مانگێكی تێپەڕاند و بەرپرسانی كورد لە بەغدا و هەرێم هەر جارەی وادەیەك بۆ دابەشكردنی مووچە ڕادەگەیەنن، بەڵام هێشتا خشتەی مووچە ڕانەگەیەنراوە.

لە ساڵی 2023دا تەنها 9 مووچە بەبێ‌ پلەبەرزكردنەوە دابەشكرا و تا ئێستا چارەنووسی 3 مووچەی كۆتایی ئەو ساڵە نادیارە، هەرێم و عێراق هەریەكەیان دەیخەنە ئەستۆی ئەوی دیكەیان و دواجاریش دادگای فیدڕاڵی چارەنووسی مووچەی یەكلایی كردەوە و هەرێمی پابەند كرد بە ناردنی لیستی مووچە و مووچەخۆران و عێراقیشی پابەند كرد بە دابین كردنی پارەی مووچە.

ماوەی 5 ڕۆژ تێپەڕیوە بەسەر مانگی ئادار (3) و تا ئێستا چارەنووسی دابەشكردنی مووچەی مانگی شوبات (2) نادیارە.

مانگی 2ی ڕابردوو لە 2ی مانگەوە دەست بە دابەشكردنی مووچەی مانگی 1ی مووچەخۆران كرا و لە 8ی مانگ كۆتایی هات، ئەمڕۆ، كە 5ی 3ی 2024ە ماوەی 33 ڕۆژ بەسەر ئەو وادەیە تێپەڕیوە و هێشتا چارەنووسی دابەشكردنی مووچە نادیارە.

فەرمانبەران و مووچەخۆرانی هەرێم هەموو مانگێك بۆ پێدانی مووچە دەبێت چەندین ڕۆژ چاوەڕێ‌ بن و حكومەتی هەرێمیش تەنها كاتێك مووچە دابەش دەكات، كە پارەكەی بەغدا بگات، لەكاتێكدا داهاتی مانگانەی ناوخۆی هەرێم بە وتەی بەرپرسانی هەرێم: “مانگانە 340 ملیار دینارە و 120 ملیار دیناری بۆ خەرجی حكومەت و وەزارەت و دامودەزگاكان بەكاردەهێنرێتەوە”.

ڕۆژی هەینی 1ی ئادار وەزارەتی دارایی هەرێم “سەرجەم وەزارەت و فەرمانگەكانی پابەند كرد بە ئامادەكردنی لیستی مووچەخۆران بە زمانی عەرەبی لە ماوەی 24 كاتژمێردا بۆ ئەوەی ڕەوانەی وەزارەتی دارایی عێراق بكرێت”، بەڵام ماوەی 5 ڕۆژ تێپەڕیوە و بە وتەی سەرچاوەكانی هەواڵ لیستەكە ئەمڕۆ تەواو بووە و هێشتا ڕەوانەی بەغدا نەكراوە، بەوهۆیەشەوە تاوەكو لیستەكە ڕەوانە نەكرێت مووچە لە بەغداوە ناخرێتە سەر هەژماری وەزارەتی دارایی هەرێم و بەوهۆیەوە دابەشكردنی مووچە دواكەوتووە.

بۆ دابەزاندنی نرخی گۆشتی سور پێشنیارێک دەدرێتە حکومەت
پێشت بۆ دابەزاندنی نرخی گۆشتی سور پێشنیارێک دەدرێتە حکومەت
بەهای دۆلار جارێكی دیكە بەرزبووەوە
دواتر بەهای دۆلار جارێكی دیكە بەرزبووەوە
پەیوەندیدار