شارەزایەكی كەشناسی ئاشكرای دەكات، كە خێرایی ڕەشەبا گەیشتۆتە 100 كیلۆمەتر لە كاتژمێرێكدا و لە هەندێك شوێن زیاتریش بووە و زیانی لێ كەوتۆتەوە.
شاڵاو هیدایەت، شارەزای كەشناسی بۆ (خەڵك) ڕایگەیاند، وەك ئەوەی دوێنیێ پێشبینیم كردبوو سەبارەت بە بەهێزی ئەو ڕەشەبایەی هەرێمی گرتەوە، خێراییەكەی گەیشتە 100 كیلۆمەتر لە كاتژمێرێكدا و لە هەندێك ناوچە زیاتریش بووە.
وتیشی، “بەپێی ڕاپۆرتی ئەمڕۆی کەشناسی سلێمانی خێرایی با لەهەڵشۆ لە دەڤەری پشدەر گەیشتۆتە 98 کم لە كاتژمێرێكدا و چونکە 100% لەهەموو شوێنێك وێستگەی لێ نیە تا 100 و سەرووی 100 كیلۆمەتریش بووە”.
ئاماژەی بەوەشكرد، لە هەندێك ناوچە زیانی لێ كەوتۆتەوە و لە كۆیە زیاتر لە 30 درەختی شكاندووە و لە پشدەر عەمودی كارەبای خستووە و لە سلێمانی-ش چەندین درەختی شكاندووە.
