ئاژانسی هەواڵی سووریا بڵاویكردەوە، هێزەكانی دژە ئاسمانی پێشیان بە هێرشی مووشەكی ئیسرائیل بۆ سنووری پارێزگەی دیمەشق گرتووە و ژمارەیەكیان خستوونەتە خوارەوە.
سەرچاوەیەكی سەربازی بە ئاژانسەكەی ڕاگەیاند، هێرشە مووشەكییەكەی ئیسرائیل لە بەرەبەیانی ئەمڕۆ سێشەممەدا بووە و چەند خاڵێكی بە ئامانج گرتووە.
سەرچاوەكە، ڕاشیگەیاند، لە هێرشەكەدا دوو سەرباز بریندار بوون و زیانی مادیش هەبووە.
لەبەرامبەردا ڕووانگەی سووریا بۆ مافەكانی مرۆڤ دەڵێت، هێرشەكە خەزێنەی چەكی حیزبوڵای لوبنانی بە ئامانج گرتووە لەنێوان فڕۆكەخانەی دیمەشقی نێودەوڵەتی و ناوچەی سەیدە زەینەب لە باشووری دیمەشق.
ڕاشیگەیاندووە، دوو كەس لە هێرشەكەدا كوژراون، بەڵام ناسنامەیان ئاشكرا نەكراوە.
لەئەو ناوچەیەدا گرووپە چەكدارەكانی سەر بە ئێران و حیزبوڵای لوبنان چالاكن.
لە ماوەی ڕابردوودا بەردەوام ئیسرائیل و ئەمریكا هێرشی مووشەكی و ئاسمانییان كردووەتەسەر پێگەی گرووپە چەكدارەكانی سەر بە ئێران و چەند جارێك هەردوو فڕۆكەخانەی نێودەوڵەتی دیمەشق و حەڵەب بۆردوومانكراون.
ئیسرائیل دەڵێت، هێڵی ئاسمانیی ماهان ئێری ئێرانی، چەك و كەرەستەی سەربازی بۆ سووریا دەگوازێتەوە.
ئیسرائیل تەنها بە ئەوەش نەوەستاوە، دەڵێت، ماهان ئێر چەك بۆ حیزبوڵا دەگوازێتەوە لە ڕێگای فڕۆكەخانەی نێودەوڵەتی بەیرووتەوە، بۆیە مەترسی بۆردوومانكردنی ئەو فڕۆكەخانەیەش لەئارادا هەیە.
