ئێمە لە تۆرە کۆمەڵایەتیەکان

چاوپێکەوتن

سامپاولی: مێسی پابه‌ند بوو و ئاشکرابونی کۆبونه‌وه‌کان هه‌ڵه‌بوو، فه‌ره‌نساش به‌ هێرشی هه‌ڵگه‌ڕاوه‌ جامه‌که‌ی برد

خه‌ڵک سپۆرت – مارکا

خۆرخی سامپاولی ڕاهێنه‌ری پێشوی هه‌ڵبژارده‌ی ئه‌رجه‌نتین، له‌دوای شکستی مۆندیاله‌وه‌ به‌هیچ شێوه‌یه‌ک له‌به‌رده‌م میدیاکاندا ده‌رنه‌که‌وتووه‌ و له‌چاوپێکه‌وتنێکدا له‌گه‌ڵ ڕۆژنامه‌ی مارکا جه‌خت ده‌کاته‌وه‌، حه‌وانه‌وه‌ی به‌خۆی داوه‌ و ته‌نها به‌ تاماشاکردنی رووبه‌ڕوبونه‌وه‌کان قایل بووه‌ تا بزانێت له‌ ڕابردودا چ هه‌ڵه‌یه‌کی کردووه‌.

بێده‌نگی خۆت بشکێنه‌، له‌دوای مۆندیاله‌وه‌ به‌هیچ شێوه‌یه‌ک ده‌رنه‌که‌وتویت، هۆکار چی بوو؟

کاتێکی باشم وه‌رگرت تا له‌ هه‌ڵبژارده‌ و بڕیاره‌کانی مۆندیال بکۆڵمه‌وه‌، پێویسته‌ هه‌موو شته‌کان لێکبده‌مه‌وه‌ بۆ ئه‌وه‌ی بزانم له‌داهاتودا چی ده‌که‌م.

که‌واته‌ ده‌توانین وای لێکبده‌ینه‌وه‌ که‌ خۆت شاردۆته‌وه‌؟

نه‌خێر هه‌رگیز، به‌ڵکو ویستم که‌مێک کات به‌خۆم بده‌م تا له‌ تاقیکاری و ژیانی خۆم قاڵ ببمه‌وه‌، ویستم خۆم داببڕم و به‌وشێوه‌یه‌ “ئه‌پده‌یت”ێك بکه‌م، من که‌سێکم ڕاهێنه‌ری تۆپی پێم، ته‌نها له‌ ڕاگه‌یاندنه‌کان دوورکه‌وتومه‌ته‌وه‌، به‌ڵکو به‌رده‌وامبووم له‌ گفتوگۆی وه‌رزشی و لێکدانه‌وه‌ی ڕووبه‌ڕوبونه‌وه‌کان، ژیانی کۆمه‌ڵایه‌تیم پشتگوێ نه‌خستووه‌، نه‌وه‌ستاوم له‌ چون بۆ سینه‌ما، قاوه‌ی خۆم له‌ کافتریا خواردۆته‌وه‌ و به‌پێچه‌وانه‌وه‌ که‌س ڕووبه‌ڕو وته‌یه‌کی ناشترینی ئاڕاسته‌ نه‌کردوم.

له‌ مۆندیاله‌وه‌ چ وانه‌یه‌ک فێربویت؟

ساڵێکم به‌ڕێکرد له‌هه‌مان ئه‌و پێگه‌یه‌ی ده‌ستمان پێکرد، دووچاری زریانی ڕه‌خنه‌کان بومه‌وه‌، گیرۆده‌ی چه‌ندین داواکاری بوین‌، یاریزانه‌کانم به‌توانا بون و ناچاری بردنه‌وه‌ بوین، ئه‌وه‌ش ئه‌رکی ئێمه‌ی زۆر قورس کرد.

زریان و پابه‌ندبوون… هه‌مووتان ده‌تانناڵاند؟

بێگومان، به‌نسبه‌ت ئێمه‌ و یاریزانانه‌وه‌ ده‌بوو پابه‌ندبونێکی بێوێنه‌مان هه‌بێت، پێشوه‌خت  چاومان به‌ یاریزانان که‌وت، ئه‌رکێکی زۆر قورس بوو و کۆتاییه‌که‌ی به‌ره‌وپێشچوون نه‌بوو، له‌به‌رئه‌وه‌ی ته‌نها یه‌ک ڕێگه‌مان له‌به‌رده‌مدا بوو: ده‌بێت ببینه ‌پاڵه‌وانی جیهان، ئه‌و پابه‌ندبونه‌ش نه‌هامه‌تی بوو، دۆخه‌که‌ی ئاڵۆز کرد، نه‌مانده‌توانی تاموچێژ له‌ تۆپی پێ وه‌ربگرین و هه‌میشه‌ داواکاریه‌کان به‌رزتر بوو له‌ئاستی ئێمه‌.

به‌هۆی بارودۆخه‌که‌وه‌ ئه‌و هه‌سته‌ت هه‌بوو که‌ ئه‌مه‌ کۆتاجاره‌ وه‌ک ڕاهێنه‌ر کارده‌که‌یت، نه‌ک یه‌که‌مجارت بێت له‌گه‌ڵ هه‌ڵبژارده‌که‌؟

کاری ئێمه‌ وه‌ک راهێنان چه‌ندین بوار و کێشه‌ی به‌دوایه‌وه‌ که‌ پێش چونه‌ نێو یاریگا پێویسته‌ چاره‌سه‌ریان بکه‌ین، له‌هه‌موو ئه‌وانه‌ گرنگتر هه‌ڵبژاردنی یاریزانان و بڕیاره‌کانه‌، هه‌ڵبژاردنه‌کان زۆر له‌وه‌ ئاڵۆزتره‌ که‌ باس ده‌کرێت، هه‌نگاوه‌کان هه‌میشه‌ به‌و ئاڕاسته‌یه‌ن تاکتیک و ستراتیجی نێو یاریگا گونجاو بێت، ئه‌وه‌ش ده‌بێت به‌کۆمه‌ڵ بکرێت و مه‌سه‌له‌که‌ به‌گشتی ئاڵۆزه‌.

هه‌ست به‌ شکست و بێزاری ده‌که‌یت؟

من باس له‌ ڕوخانی وره‌ و بێزاری ناکه‌م، به‌ڵکو باس له‌هه‌سته‌ تایبه‌تیه‌کانی خۆم ده‌که‌م و به‌رپرسیارێتی ئه‌نجامه‌کان ده‌خه‌مه‌ سه‌رشانم، چونکه‌ نه‌متوانی شێوازه‌که‌م به‌سه‌ر یاریزاناندا بچه‌سپێنم، ئه‌وه‌ی هه‌ستی پێده‌که‌م و تیایدا ده‌ژیم تۆپی پێیه‌ و ئه‌و شێوازه‌ش له‌داهاتودا یاریده‌ده‌رم ده‌بێت، ده‌مه‌وێت تاموچێز وه‌ربگرم، به‌ڵام ته‌ماشاکه‌ له‌مۆندیال چی ڕوویدا! پاڵه‌وانی خوله‌که‌ ته‌نها به‌ هێرشی هه‌ڵگه‌ڕاوه و گێڕانه‌وه‌ی تۆپه‌کان و خێرایی ڕاکردنی ماوه‌ درێژی یاریزانه‌کانی‌ بردنه‌وه‌ی به‌ده‌ست ده‌هێنا، یه‌کێک له‌ پاڵێوراوه‌کانم هه‌ڵبژارده‌ی ئیسپانیا بوو که‌ یاریی ده‌کرد و به‌خێرایی کرایه‌ ده‌ره‌وه‌، پاڵه‌وان به‌شێوه‌ی سود وه‌رگرتن له‌ ڕکابه‌ران نازناوه‌که‌ی به‌ده‌ست هێنا و ئه‌وانه‌ی ترسیان له‌یارییکردن هه‌یه‌ به‌وشێوه‌یه‌ ململانێ ده‌که‌ن، له‌ئێستادا زۆر ئاسانه‌ یاریی نه‌که‌یت و سود له‌ جوڵه‌ و هه‌ڵه‌ی ڕکابه‌ران وه‌ربگریت.

هه‌ست ناکه‌یت له‌ قۆناغێکی مۆندیالدا کاری ڕاهێنانت له‌ده‌ستدا و چیتر راهێنه‌ر نه‌مابویت؟

زۆرجار له‌ یاریزانان نزیک ده‌بومه‌وه‌ و ده‌مزانی ماندون، پێموابوو بۆ مۆندیال زۆر به‌باشی ئاماده‌سازیمان کردوووه‌، به‌ڵام دواتر له‌مۆندیال بارودۆخه‌که‌ پێچه‌وانه‌ بۆوه‌، ده‌بوو هه‌وڵی هاوسه‌نگی بده‌ین له‌به‌رئه‌وه‌ی یاریزانانی ئه‌رجه‌نتین نه‌یانده‌توانی به‌ دڵه‌ڕاوکێوه‌ یاریی بکه‌ن، هه‌موو یارییه‌کان نه‌هامه‌تی بوون بۆمان، به‌ڵام دووپاتیده‌که‌مه‌وه‌، له‌ کاری راهێنان نه‌وه‌ستام و به‌باشی خۆم بۆ ڕووبه‌روبونه‌وه‌کان ئاماده‌ ده‌کرد.

توڕه‌ نه‌بویت له‌و کۆبونه‌وانه‌ی یاریزانان ئه‌نجامیان ده‌دا؟

هه‌موو کۆبونه‌وه‌کان بۆ هه‌ماهه‌نگی بوون، ساتێکی ناهه‌موار بوو و هه‌موو بابه‌ته‌ ده‌ره‌کیه‌کان وایده‌کرد ته‌رکیز له‌ده‌ست بده‌ین، ئه‌وه‌ی یاریزانانیش کردیان بۆ یارمه‌تیدان و چاکسازی بوو، هه‌وڵدانێک بوو بۆ ئه‌وه‌ی ببین، نه‌ک ته‌نها بونمان هه‌بێت، کێشه‌ له‌ کۆبونه‌وه‌کاندا نه‌بوو، به‌ڵکو کێشه‌که‌ ئه‌وه‌بوو کۆبونه‌وه‌کان ئاشکرا ده‌کران، ئه‌وه‌ له‌ساڵی ١٩٨٦یش ڕوویدا و دوای ٢٠ ساڵ به‌هه‌مان شێوه‌ ئه‌نجامماندایه‌وه‌ به‌هیوای سه‌رکه‌وتن، من پێموایه‌ فه‌لسه‌فه‌ی به‌شداریکردن و دۆزینه‌وه‌ی چاره‌سه‌ره‌کان شتێکی گونجاوه‌، به‌ڵام کاتێک بابه‌ته‌که‌ ده‌بێته‌ باس و خواسی میدیایی و تۆڕه‌ کۆمه‌ڵایه‌تیه‌کان خراپترین شت ده‌بێته‌ کۆبونه‌وه‌ و وا ده‌کات گومانمان له‌یه‌کتری هه‌بێت.

که‌واته‌ هه‌ڵه ‌بویت به‌شداریت به‌ ماسیکیرانۆ کرد له‌ بڕیاره‌کانتدا؟

نه‌خێر، هه‌ستم کرد ئه‌وه‌ بڕیارێکی گونجاوه‌ بۆ به‌ره‌وپێشبردنی ئه‌رجه‌نتین به‌گشتی و هه‌وڵمدا سه‌رجه‌م یاریزانان به‌شداری پێبکه‌م، ده‌مویست هه‌موو ئه‌وانه‌ی له‌ دڵیاندایه‌ ده‌ریبخه‌ن له‌دوای هه‌ر ئه‌نجامێکه‌وه‌، دڵه‌ڕاوکێی یاریزانان ڕێگه‌ له‌ به‌ره‌وپێشچونی به‌کۆمه‌ڵ و تاکه‌ که‌سی یاریزانان ده‌گرێت، ته‌نها شت مه‌شقه‌کان بوو که‌ له‌ئاستێکی باڵادا بوو، ماسکیرانۆش نه‌یتوانی پارێزگاری له‌ ئاسته‌ باڵاکه‌ی بکات و جگه‌ له‌وه‌ هه‌موو شتێک که‌ پێشکه‌شی کرد بۆ ئێمه‌ مه‌زن بوو.

له‌هیچ شتێک په‌شیمان نیت؟

پێموابێت هه‌مووان له‌به‌شداریکردنماندا ڕاستگۆ بوین، به‌ش به‌حاڵی خۆم دڵ و هه‌سته‌کانم تێکه‌ڵ به‌ هه‌ڵبژارده‌که‌م کرد، ناشمه‌وێت سه‌رزه‌نشتی که‌س و هیچ شتێک بکه‌م، له‌ قورسایی بارودۆخه‌که‌‌ بۆ داهاتو زۆرشت فێربوم.

دڵ و هه‌ستت تێکه‌ڵ به‌ هه‌ڵبژارده‌که‌ کرد، به‌ڵام له‌ وڵاته‌که‌ی خۆته‌وه‌ ڕه‌خنه‌ی زۆرت ئاڕاسته‌ کرا، ئازاریان دایت؟

نه‌خێر، ئه‌وه‌ به‌شێك بوو له‌ دۆخه‌که‌، ڕه‌خنه‌کانیش چاوه‌ڕوان کراوبوو ده‌مانزانی توند ده‌بن، من به‌ڕێژه‌ی له‌سه‌دا ٩٥ی پاڵپشتی هانده‌ران ئه‌وکاره‌م هه‌ڵبژارد، پێیان وابوو خۆرخی سامپاولی ده‌توانێت جامی جیهانیان پێشکه‌ش بکات، کاتێک نه‌متوانی ئه‌وکاره‌ بکه‌م ڕه‌خنه‌باران کرام، دڵنیاتان ده‌که‌مه‌وه‌ هیچ ڕق و کینه‌یه‌ک له‌دڵمدا نییه‌ به‌رامبه‌ر به‌ هیچ که‌سێک.

راهێنان به‌ مێسی چ کاریگه‌ریه‌کی هه‌بوو؟

زۆر نایاب بوو، به‌تایبه‌ت که‌ ده‌مبینی زیاد له‌پێویست پابه‌نده‌ به‌ مه‌شقه‌کانه‌وه‌، ته‌نانه‌ت کاتێکیش سه‌رکه‌وتو نه‌ده‌بوین له‌هه‌مووان زیاتر پابه‌ند ده‌بوو، به‌هۆی مه‌حاڵی بارودۆخه‌که‌وه‌ ئه‌ویش وه‌ک یاریزانه‌کانی تر ده‌یناڵاند و قورسبوو بۆمان که‌ نه‌مانده‌توانی قۆناغی کۆمه‌ڵه‌کان تێپه‌ڕ بکه‌ین.

مه‌شقکردن به‌ مێسی قورس نییه‌؟ به‌وپێیه‌ی ئه‌و بۆخۆی چاره‌سه‌ره‌، باشترینه‌، ئه‌گه‌ر شکست بهێنێت واتا چاره‌سه‌ر نه‌ماوه‌…

کاتێک خاوه‌نی باشترین پێکهاته‌ی جیهان ده‌بیت بێگومان به‌رپرسیارێتی قورستر ده‌بێت و پێویسته هه‌موو شتێک‌ له‌ ترۆپکدا بێت، به‌ڵام ڕاستی ئه‌وه‌یه‌ که‌ هه‌ندێجار ده‌توانیت و هه‌ندێجاری دیکه‌ش ناتوانیت براوه‌ بیت، ئێمه‌ هه‌موو ڕۆژێک له‌نێو جه‌نگدا بوین، بونی مێسی وات لێده‌کات که‌ هیچ تێبینیه‌کت نه‌بێت و ته‌نها بۆ بردنه‌وه‌ هه‌وڵ بده‌یت.

ڕات چییه‌ ده‌رباره‌ی پێکهاته‌ی بانگهێشتکراوی ئێستای ئه‌رجه‌نتین؟

ئه‌وه‌ بڕیارێکی تایبه‌تیه‌، ڕاهێنه‌ر بۆخۆی ده‌زانێت پێویستی به‌چییه‌ و پێویسته‌ ڕێزی بگرین.

پێتوایه‌ ئه‌رجه‌نتین ده‌توانێت له‌گه‌ڵ مێسی نازناوی ‌مۆندیالی قه‌ته‌ری ٢٠٢٢ به‌ده‌ست بهێنێت، له‌کاتێکدا ته‌مه‌نی ده‌گاته‌ ٣٥ ساڵ؟

به‌ڵێ بێگومان، به‌ڵام ئه‌وه‌ پێویستی به‌ پڕۆسه‌یه‌کی نوێ هه‌یه‌، هه‌موو ئه‌وه‌ی ڕوویدا و شکا پێویستی به‌ چاکردنه‌وه‌یه‌، بۆمۆندیال و کۆپا ئه‌مریکای داهاتو پێویستمان به‌ ڕێکخستنه‌وه‌ و متمانه‌ی له‌ڕاده‌به‌ده‌ر هه‌یه‌ له‌گه‌ڵ کارو هه‌وڵدانی زیاتر، پێویسته‌ جامی کۆپا به‌ده‌ست بهێنین نه‌ک له‌ده‌ستدان و شکاندنی وره‌، له‌کاتێکدا ناتوانیت نازناوێک ببه‌یته‌وه پێویست به‌ شێتبون ناکات‌، باشتره‌ هه‌ست به‌وه‌ بکه‌ین که‌ له‌داهاتودا براوه‌ ده‌بین ئه‌گه‌رچی هه‌لێکیشمان له‌ده‌ستدابێت، به‌ڵام له‌ ئه‌رجه‌نتین سه‌رشێتی بونی هه‌یه‌، ئه‌گه‌ر تۆ براوه‌ نه‌بیت که‌واته‌ شکستخواردویت.

به‌ڵام ئه‌م قیه‌م و بیرکردنه‌وه‌ له‌ناخی ئه‌رجه‌نتینیه‌کاندا چه‌سپاوه‌…

پێویسته‌ ئه‌و قیه‌مه‌ بگۆڕن، به‌وشێوه‌یه‌ به‌یه‌که‌وه‌ ناتوانین کار بکه‌ین، ئه‌و دۆخه‌ هیستیریه‌ له‌بواری تۆپی پێدا وا ده‌کات نه‌توانیت سود له‌ پڕۆژه‌ و کات و هه‌ڵه‌کانی ڕابردو وه‌ربگریت، هیوادارم له‌داهاتودا گۆڕانکاری رووبدات، له‌کاتی مندا زیاتر ڕه‌خنه‌ له‌ شێوازه‌که‌م ده‌گیرا له‌بری ئه‌وه‌ ده‌بوو ئاماژه‌ به‌ ئاره‌زوی بردنه‌وه‌مان بکرێت، ئه‌وه‌ش شتێکی سه‌یره‌.

که‌واته‌ سه‌رکه‌وتنی تۆپی پێی ئه‌رجه‌نتین ده‌بێت به‌کۆمه‌ڵ بێت و گۆڕانکاری ڕووبدات؟

کاتێک ئاڵوگۆڕ به‌راهێنه‌ران ده‌که‌یت له‌چه‌ند ڕۆژێکدا هه‌موو شتێک ده‌شێوێت، به‌هه‌مان شێوه‌ له‌ کۆمه‌ڵگای وه‌رزشیدا پێویستت به‌ ڕێزگرتنه‌ له‌ پڕۆژه‌ و کار، ئه‌گه‌ر دۆخه‌که‌ به‌وشێوه‌یه‌ نه‌بێت هه‌موو شتێک ئاڵۆز ده‌بێت، بیرله‌ مێسی بکه‌ره‌وه‌، له‌ به‌رشلۆنه‌ جێگیره‌ و به‌ هاوسه‌نگی کات و کاره‌کانی به‌ڕێده‌کات، کاتێک ده‌گاته‌ ئه‌رجه‌نتین دووچاری هیستیریای بردنه‌وه‌ ده‌کرێت، ئه‌وه‌ش مه‌حاڵه‌، کاتێک ده‌دۆڕێت دووچاری ڕه‌خنه‌ی کوشنده‌ ده‌کرێت و به‌وشێوه‌یه‌ ناتوانێت یاریی بکات و تاموچێژی لێوه‌ربگرێت.

ڕه‌خنه‌کانی مارادۆنا له‌ سکالۆنی زۆر قورسن و ده‌ڵێت: سکالۆنی ناتوانێت ڕۆڵی پۆلیسێکی هاتوچۆش ببینێت له‌سه‌رشه‌قامه‌کان؟

من هه‌میشه‌ ده‌ڵێم، باس له‌بۆچونی خۆم ده‌که‌م، نه‌ک که‌سانی تر.

نادادپه‌روه‌ر بویت به‌رامبه‌ر ئارمانی گۆڵپارێز؟

ئارمانی له‌ دۆخێکی باشدا بوو، به‌ڵام به‌هه‌مان شێوه‌ کاپایرۆ به‌رامبه‌ر ئیتاڵیا له‌ ئاستێکی ناوازه‌ی پێشکه‌ش کرد، هه‌روه‌ک چۆن له‌ ئه‌وروپا یاریی ده‌کات سودی به‌ پێکهاته‌که‌مان ده‌گه‌یاند، ئه‌وه‌ش له‌ ئارمانی-دا بونی نه‌بوو، ئارمانی هه‌رگیز ڕووبه‌ڕوی یاریزانه‌ ئه‌وروپیه‌کان نه‌بۆته‌وه‌، مۆندیال به‌نسبه‌ت ئه‌و گۆڵپارێزه‌وه‌ کاتی تێپه‌ڕی بوو، گه‌یشتینه‌ قۆناغی کۆمه‌ڵه‌کانی مۆندیالی ڕوسیا و به‌خێرایی چوینه‌ نێو ململانێکانه‌وه‌، کاتی زۆرمان له‌به‌رده‌ستدا نه‌بوو، به‌تایبه‌ت بۆ هه‌ڵبژاردنی یاریزانی نوێ.

مه‌به‌ستیشت له‌ دیبالا و ئیکاردیه‌؟ باسی ئه‌و دوو یاریزانه‌ ده‌که‌یت؟

ئێمه‌ پێویستمان به‌ بردنه‌وه‌ی یه‌کلاکه‌ره‌وه‌ هه‌بوو، هه‌ندێک یاریزانیش له‌دوای حه‌وانه‌کانه‌وه‌ ڕاسته‌وخۆ بانگهێشتکرابون، فاینه‌ڵی کۆپا ئه‌مریکایان خسته‌ پشت خۆیان، ماوه‌ی ئاماده‌کاریه‌کان به‌نسبه‌ت ئه‌وانه‌وه‌ زۆر کورت بوو، خاوه‌نی لیستێکی ١٠٠ یاریزانی بوین به‌هه‌موو ئاسته‌کانه‌وه‌، نه‌مانده‌توانی جێگه‌ی هه‌مووان بکه‌ینه‌وه‌ له‌ یه‌ک پاڵه‌وانێتیدا، پڕۆژه‌کانی ئێمه‌ سه‌ره‌تا ماوه‌ کورت بوو دواتر ده‌چوین بۆ قۆناغی پڕۆسه‌ی مامناوه‌ند و پاشان درێژخایه‌ن، له‌دوای روسیا ئێمه‌یان له‌یه‌کتری دابڕی و نه‌مانتوانی بره‌و به‌توانا نوێیه‌کان بده‌ین.

بێزار نیت له‌ به‌رپرسانی یه‌کێتی تۆپی پێی ئه‌رجه‌نتین؟

به‌پێچه‌وانه‌وه‌، سوپاسیان ده‌که‌م که‌ هه‌لیان پێدام، سه‌رۆکی یه‌کێتی تۆپی پێ پابه‌ندبوو به‌ به‌ڵێنه‌کانیه‌وه‌، له‌کاتی پیوێسیتدا ئاماده‌ بوو، چی به‌ تاپیا و هاوڕێیانی بڵێم که‌ ئه‌وانیش قوربانی شکسته‌کانی یه‌کێتی تۆپی پێی پێشوی وڵاته‌که‌ بوون.

چاوپێکەوتن

لوکا تۆنی: گابریال جیزوس باشترین یاریزانە بۆ یاریکردن لەگەڵ کریستیانۆ

خەڵک سپۆرت

لوکا تۆنی ئەستێرەی دێرینی ئیتاڵیا چاوپێکەوتنێک لەگەڵ ماڵپەڕی “توتۆ سپۆرت”ی ئیتاڵی ئەنجام دەدات و وەڵامی چەندین پرسیاری گرنگ دەداتەوە.

لە وەڵامەکانیدا باس لە ئەگەرەکانی گواستنەوەی گابریال جیزوسی هێرشبەری یانەی مانچستەر سیتی بۆ یوڤانتۆس دەکات و بۆچوونەکانی خۆی بەم شێوەیە دەردەبڕێت:

 

ڕات بەرامبەر یوڤانتۆس و ئەگەرەکانی ئەنجامدانی گۆڕانکاری لەو یانەیە چییە بۆ وەرزی داهاتوو؟

بابەتێکی ئاساییە لەکاتێکدا یاریزانانی یوڤانتۆس تەمەنیان هەڵکشاوە، بۆنمونە هیگواین هێرشبەرێکی گەورەیە و تەمەنی ٣٣ ساڵە و کریستیانۆ کە دیاردەی تۆپی پێیە گەیشتووە بەتەمەنی ٣٥ ساڵ، کڕینی یاریزانی لاو و کۆکردنەوەی تێکەڵەیەک لە لاوان و ئەزمونداران بیرکردنەوەیەکی جوانە.

 

پێنج هێرشبەر کە پێکهاتوون لە: هالاند، ئیکاردی، گابریال جیزوس، هاری کەین و تیمۆ ڤێرنەر پاڵێوراون بۆ پەیوەندیکردن بە یوڤانتۆس، بەڕای تۆ کامیان باشترە؟

بەڕای من هاری کەین هێرشبەرێکی تێروتەسەلترە لەوانەی تر و هەمیشە لەنێو یاریگادا جیاوازی دروست دەکات، هەموو وەرزێک گۆڵی بێشومار تۆماردەکات و بۆندێکی گەورە و گونجاو دەبێت بۆ یوڤانتۆس.

 

پێتوایە کەین لە ئاستی ئیکاردیدا بێت؟

نەخێر، هاری کەین کەمێک باشترە، ئەگەر خاڵ بە هێرشبەرەکان بدەم ٩ بۆ کەین، هەشت بۆ ئیکاردی، ماورۆ هێرشبەرێکی بەتوانایە لەکۆتاییهێنان بەهێرشەکان، بەڵام ئێستا لەئاستی ئاسایی خۆیدا نییە.

 

ئەی ئەگەر ژمارە بدەیت بە هێرشبەرەکانی تر؟

جیزوس ٨.٥، هالاند ٧.٥ و ڤێرنەر ٧یان پێدەدەم، ڕاستە تیمۆ ڤێرنەری ئەڵمانی هێرشبەرێکی نێودەوڵەتی گەورەیە و یاریدەدەری لایپزیگ بووە لەسەرکەوتنەکاندا، بەڵام هێشتا ماویەتی ئەزمون پەیدابکات، هالاندیش یاریزانێکی لاوە و سەرەڕای ئەوەی توانیویەتی تواناکانی بسەلمێنێت لەماوەیەکی کورتدا، بابزانین لە داهاتوودا چی زیاتری پێدەکرێت.

 

بەڵام باسی گابریال جیزوست نەکرد؟

جیوزس هێرشبەرێکی خێرایە، لەڕووی هونەرییەوە بەتوانایە، لەگەڵ تۆماری گۆڵدا گۆڵیش دروست دەکات.

 

بەڕای تۆ کام لەو هێرشبەرانە باشترە بۆ یاریکردن لەگەڵ کریستیانۆ ؟

بێگومان گابریال جیزوس، ڕاستە لەوانەی تر گۆڵ کەمتر تۆماردەکات، بەڵام باشترین یاریزانە بۆ یاریکردن لەگەڵ کریستیانۆ.

 

بۆچی جیوزس باشترە لەوانی تر؟

هیچ هۆکارێکی تایبەتی نییە، بەڵکو مەسەلەکە ئەوەیە کە کریستیانۆ گۆڵکارە و هەموو وەرزێک گۆڵی بێشومار تۆماردەکات، بۆ ئەم کارەش پێویستی بە هێرشبەرێکی خێرایە مەودای بۆ دروست بکات، ئەوەش بە جیزوس دەکرێت، جگە لەوەش تەمەنی کەمە و زۆری دەبێت پێشکەشی یوڤانتۆسی بکات.

 

ئەندریا پێرلۆی هاوڕێت دەچێتە بواری ڕاهێنانەوە، پێتوایە سەرکەوتوو دەبێت؟

هەمیشە پێمانوابووە لە داهاتوودا پێرلۆ دەبێتە ڕاهێنەرێکی باش، هەمیشە خەونی ئەوەبوو چانسی خۆی لەبواری ڕاهێنان تاقیبکاتەوە، منیش پێموایە ئەو توانا و زیرەکی و لەسەرخۆییەی تێدایە کە بۆ ڕاهێنەرێک پێویستە، دەتوانێت ببێتە ڕاهێنەری یانەیەکی گەورە، بەڵام من پێمباشە لە تیمی لاوانی خوار تەمەن ٢٣ ساڵانی یوڤانتۆسەوە دەستپێبکات.

بەردەوام بە لە خوێندنەوە

چاوپێکەوتن

بارزانی: جوگرافیا سته‌مێكی گه‌وره‌ی له‌ ئێمه‌ كردووه‌

خەڵك – بەشی هەواڵ

 مه‌سعود بارزانی، سەرۆكی پێشووی هەرێم و سەرۆكی پارتی دیموكراتی كوردستان، له‌ديدارێكی تایبەت دا، لەگەڵ كه‌ناڵی “MBC”، رایگەیاند، جوگرافیا سته‌مێكی گه‌وره‌ی له‌ ئێمه‌ كردووه‌‌،ئه‌و كه‌سه‌ی سته‌مكاری به‌رامبه‌ر كراوه‌ و خۆشی سته‌مكاری به‌رامبه‌ر خه‌ڵك بكات، شایانی ئه‌وه‌یە سته‌مكاری زیاتری به‌رامبه‌ر بكرێت.

“MBC”: بەڕێز كاك مەسعود، پێتخۆشە بە مام یان كاك بانگ بكرێیت؟

بارزانی دەڵێت، حەزدەكەم بە كاك مەسعوود بانگ بكرێم، خەڵك و گەلی كوردستان هەر بەوشێوەیە ناوم دەبەن، بابەتەكە پێوەندی بە گەنجییەتی نییە.

“MBC”: زۆر به‌دەگمه‌ن ده‌بینین كاك مه‌سعود جیا لە جلی كوردی جلی دیكە بپۆشێت، ئه‌مه‌ بۆچی؟

سه‌رۆك بارزانی: جلی كوردی جلی پێشمه‌رگه‌یه‌، من له‌و باوه‌ڕه‌دام ئه‌گه‌ر ئه‌م جلانه‌ نه‌پۆشم، شێوازێكی دیكه‌ پیشان ده‌دات، له‌وانه‌یه‌ كاریگه‌ری له‌سه‌ر پێشمه‌رگه‌ هه‌بێت.

پرسیارێكی ترى “MBC”  بریتییە لەوەی كە ئایا سەرۆك بارزانی ژیانی شاخ یان كۆشك زیاتر خۆشحاڵی دەكات، لە وەڵامدا سەرۆك بارزانی دەڵێت، ژیانی شاخ، بەلای منەوە ژیانی شاخ خۆشترە.

“MBC”: به‌ڵام ژیانی شاخ سه‌خته‌؟

سه‌رۆك بارزانی: به‌لای منه‌وه‌ پێچه‌وانه‌یه‌، ژیانی شاخ به‌لای منه‌وه‌ خۆشتره‌.

“MBC”: ده‌نگی ته‌قه‌ لای تۆ چی ده‌گه‌ینێت؟

سه‌رۆك بارزانی: بە پێكەنینەوە “میوزیك”.

له‌ وه‌ڵامی ئه‌و پرسیاره‌ی ئایا جوگرافیا سته‌م و زۆرداری له‌ كورد كردووه‌؟  بارزانی جه‌ختی كرده‌وه‌‌: بێگومان جوگرافیا سته‌مێكی گه‌وره‌ی له‌ ئێمه‌ كردووه‌.

“MBC”: ئه‌وه‌ی هه‌میشه‌ سته‌مكاری به‌رامبه‌ر ده‌كرێت، له‌وه‌ ده‌ترسێت كه‌ سته‌مكاری به‌رامبه‌ر خه‌ڵك بكات؟

سه‌رۆك بارزانی: ئه‌و كه‌سه‌ی سته‌مكاری به‌رامبه‌ر كراوه‌ و خۆشی سته‌مكاری به‌رامبه‌ر خه‌ڵك بكات، شایانی ئه‌وه‌یە سته‌مكاری زیاتری به‌رامبه‌ر بكرێت.

“MBC”دوای چوونی بارزانی نه‌مر بۆ یه‌كێتی سۆڤیه‌ت و رووخانی رژێمی پاشایه‌تی له‌ عێراق، ئه‌و شه‌وه‌ی ته‌له‌فۆنێكی له‌ناكاو بۆ سه‌رۆك بارزانی دێت؟

سه‌رۆك بارزانی: من بچووك بووم، من ته‌له‌فۆنه‌كه‌م هه‌ڵگرت، پێی گوتم تۆ كێیت؟ منیش گوتم فڵانه‌ كه‌سم، پێی گوتم بانگی برا گه‌وره‌كه‌ت بكه‌، مه‌به‌ستی خوالێخۆشبوو لوقمان بوو، ئه‌و شه‌هید بوو، چووم بۆ لای پێم گوت كه‌سێك ته‌له‌فۆن ده‌كات و ده‌ڵێت من هه‌واڵێكی زۆر گرنگم پێیه‌، ئه‌ویش هات و ته‌له‌فۆنه‌كه‌ی هه‌ڵگرت، به‌ بڕوای من دوا نیوه‌ڕۆ بوو، كاتێك پێی گوت “باوكت ده‌گه‌ڕێته‌وه‌”، خۆتان ئاماده‌ كه‌ن و وه‌رن بۆ فڕۆكه‌خانه‌، ئێمه‌ش خۆمان ئاماده‌كرد و چووین بۆ فڕۆكه‌خانه‌. له‌ فڕۆكه‌خانه‌ی موسه‌ننا پێشوازیمان لێكرد، رۆژێكی نه‌مر و گه‌وره‌ بوو، هه‌موو گه‌لی عێراق هاتنه‌ سه‌ر شه‌قام، بۆ ئه‌وه‌ی پێشوازی لێ بكه‌ن، به‌لای ئێمه‌وه‌ رۆژێكی مه‌زن بوو.

“MBC”دوای ئه‌وه‌ی بارزانی نه‌مر چه‌كه‌كه‌ی هه‌ڵده‌گرێت و له‌ دژی سته‌مكاریی عه‌بدولكه‌ریم قاسم، ده‌گه‌ڕێته‌وه‌ بۆ شاخ؟

سه‌رۆك بارزانی: عه‌بدولكه‌ریم قاسم رێگه‌ی به‌ باوكم دا بگه‌ڕێته‌وه‌ عێراق، ئه‌و كات كه‌ مامی من “شێخ ئه‌حمه‌د” له‌ زیندان بوو و به‌ له‌سێداره‌دان حوكم درابوو، له‌ زیندان ئازاد كرا، رێگه‌یان به‌ خانه‌واده‌كانماندا بگه‌ڕێنه‌وه‌ ناوچه‌كه‌ی خۆمان له‌ بارزان، گرنگترین شت ئه‌وه‌ بوو كه‌ له‌ ده‌ستووری كاتیدا ئه‌وه‌ بوو كورد و عه‌ره‌ب هاوبه‌شن له‌و نیشتمانه‌دا، ئه‌مه‌ش بۆ ئه‌و كات شتێكی زۆر گه‌وره‌ بوو. گه‌وره‌ترین هه‌ڵه‌ كه‌ عه‌بدولكه‌ریم قاسم كردی ئه‌وه‌ بوو، كه‌وته‌ ژێر كاریگه‌ری ده‌وروبه‌ره‌كه‌ی، له‌ كاتێكدا ده‌وروبه‌ره‌كه‌ی هه‌مووی ژه‌هراوی بوو، خه‌ڵكێك له‌ ده‌وری بوو، له‌ لووتكه‌ی شۆفێنیه‌تدا بوون.

“MBC”: ئه‌وانه‌ی ده‌وروبه‌ری له‌ نه‌ته‌وه‌ی عه‌ره‌ب بوون؟

سه‌رۆك بارزانی: نه‌ته‌وه‌ی عه‌ره‌ب و غه‌یره‌ عه‌ره‌بیش بوون، ئه‌ویان هانده‌دا بۆ ئه‌وه‌ی په‌یوه‌ندی له‌گه‌ڵ هه‌موو ئه‌و كه‌سانه‌ ببڕێت كه‌ پشتگیریان ده‌كرد و به‌رگرییان لێ ده‌كرد، له‌وانه‌ش كورد، به‌ تایبه‌تیش بارزانییه‌كان، به‌ره‌و خاڵێك پاڵیان پێوه‌نا گه‌ڕانه‌وه‌ هه‌نگاوێكی زۆر ئه‌سته‌م بوو، به‌رده‌وام هانیان ده‌دا، وایان لێكرد گومان له‌ باوكم بكات، به‌وه‌ی ده‌بێته‌ سه‌ركرده‌ و شوێنی ئه‌و ده‌گرێته‌وه‌، به‌ڕاستی هه‌ندێك شتی خه‌یاڵییان خسته‌ مێشكییه‌وه‌، بۆیه‌ كه‌وته‌ ژێر كاریگه‌ری ده‌وروبه‌ره‌كه‌ی و له‌ كۆتاییدا ناژیرانه‌ ره‌فتاری كرد، له‌گه‌ڵ ئه‌وه‌شدا من ده‌ڵێم: پێویست بوو له‌گه‌ڵ عه‌بدولكه‌ریم قاسم به‌رده‌وام نه‌بێت، ده‌بوایه‌ به‌ هه‌رشێوه‌یه‌ك له‌ شێوه‌كان لێی دوور بكه‌وێته‌وه‌، به‌ڵام روویدا.

“MBC”: مه‌سعود بارزانی بۆ یه‌كه‌م جار كه‌ له‌ مه‌یدانی جه‌نگ له‌ شۆڕشی ئه‌یلول به‌شداری كرد، له‌ ته‌مه‌نێك بوو كه‌ هێشتا له‌سه‌ر ئه‌وه‌ رانه‌هاتبوو!؟

سه‌رۆك بارزانی: كاتێك شۆڕشی ئه‌یلوول هه‌ڵگیرسا، به‌ ته‌واوی له‌ 11ی ئه‌یلوولی ساڵی 1961 بوو، كاتێك هێزی ئاسمانی عێراقی هێرشی چڕی هێنایه‌ سه‌ر ته‌واوی ناوچه‌كانی كوردستان، له‌ 16ی ئه‌یلوول ئێمه‌ له‌ شوێنێكی باكووری گوندی بارزان بووین له‌ چیای شیرین، من خۆم له‌ ناو چادرێك بووم، كاتێك “فڕۆكه‌ی مێك” ئێمه‌ی بۆردومان كرد، له‌ 20ی گوڵانی ساڵی 1962 په‌یوه‌ندیم به‌ شۆڕشه‌وه‌ كرد، ده‌ستم دایه‌ تفه‌نگ و تا ئێستاش به‌رده‌وامم.

“MBC”: بۆچی تۆ ده‌ڵێیت شۆڕشی ئه‌یلوول گه‌وره‌ترین شۆڕشه‌كانی كوردە، ئایا له‌ هه‌موویان گه‌وره‌تره‌؟

سه‌رۆك بارزانی: چونكه‌ راپه‌ڕین و شۆڕشه‌كانی پێشووتر ناوچه‌یی بوون و له‌ سنوورێكی دیاریكراودا هه‌ڵده‌گیرسان و بۆ ماوه‌یه‌كی دیاریكراویش به‌رده‌وام ده‌بوون، ماوه‌كانیان كورت بوون، سنووری ساڵێك یان چه‌ند مانگێكیان تێپه‌ڕ نه‌ده‌كرد، هه‌رچی شۆڕشی ئه‌یلوول بوو به‌رده‌وام بوو، جه‌نگاوه‌ره‌كانی له‌ هه‌موو پارچه‌كانی كوردستان به‌شدار بوون و په‌یوه‌ندییان به‌ شۆڕشه‌وه‌ كرد، ئافره‌تان خواردنیان پێشكه‌ش به‌ شۆڕش ده‌كرد، زۆر جه‌نگی دژوار روویاندا، ئه‌و شه‌ڕانه‌ له‌ هه‌موو رووداوێك زیاتر له‌ هزرم ماونه‌ته‌وه‌، بۆ نموونه‌‌ شه‌ڕی زاویته‌ له‌ 12ی كانوونی یه‌كه‌می ساڵی 1961، كه‌ شه‌ڕێكی مێژوویی بوو. شه‌ڕی هه‌ندرێن، شه‌ڕی حه‌وزی رواندز، شه‌ڕی چیای مه‌تین، شه‌ڕه‌كانی ساڵی 1963، سه‌ختترین ساڵ بوو له‌ ته‌مه‌نی شۆرشی ئه‌یلول، له‌و ساڵه‌دا نه‌فیرعام هه‌بوو و هه‌ریه‌ك له‌ ئێران و توركیا و سووریاش تێیدا به‌شداربوون.

“MBC”: هه‌موویان به‌شدار بوون؟

سه‌رۆك بارزانی: به‌ڵێ هه‌موویان به‌شداربوون. سوورییه‌كانیش ده‌ستیان به‌ كوده‌تا كرد، دوو لیوای سوپایان نارد، شه‌ڕی ئێمه‌یان كرد و سوپای سووریا رووبه‌ڕووی شكستێكی گه‌وره‌ش بووه‌وه‌. ئه‌و كات له‌ رێگه‌ی ئه‌فسه‌رێكه‌وه‌ هه‌ماهه‌نگی له‌ نێوان هێزه‌كانی توركیا و عێراقدا هه‌بوو و باره‌گاكه‌ی له‌ مووسڵ بوو، هه‌روه‌ها ئه‌فسه‌رێكی ئێرانیش له‌ كه‌ركووك بوو، هه‌ماهه‌نگی ته‌واو له‌ نێوان عێراق، ئێران، توركیا و سووریادا هه‌بوو. ئێمه‌ گه‌مارۆ درابووین، به‌ڵام سوپاس بۆ خودا، سه‌ركه‌وتین.

“MBC”: ئه‌و كات هیچ كاردانه‌وه‌یه‌كی عه‌ره‌بییتان پێ گه‌یشت پشتیوانیتان لێ بكات، یاخود به‌ گشتی عه‌ره‌ب هه‌مووی له‌ دژی ئێوه‌ بوون؟

سه‌رۆك بارزانی: ده‌توانم بڵێم زۆربه‌یان هاوسۆز بوون له‌گه‌ڵمان، به‌ڵام به‌ ئاشكرا هیچ كه‌سێك پشتگیری ئێمه‌ی نه‌كرد، ته‌نیا ئه‌و كاته‌ نه‌بێت كه‌ ناكۆكی كه‌وته‌ نێوان حزبی به‌عس و جه‌مال عه‌بدولناسر، كاتێك محەمەد حەسەن هه‌یكه‌ل له‌ رۆژنامه‌ی ئه‌هرام گوتاری ده‌نووسی و تێیدا پشتیوانی شۆڕشی ئه‌یلوولی ده‌كرد.

“MBC”: جگه‌ له‌ رووی میدیاییه‌وه‌، جه‌مال عه‌بدولناسر هیچ پشتیوانیه‌كی ماددی و چه‌كی پێشكه‌ش به‌ ئێوه‌ كرد؟

سه‌رۆك بارزانی: نه‌خێر هه‌رگیز، ته‌نیا پشتگیری مه‌عنه‌وی ئێمه‌ی ده‌كرد.

“MBC”: ئه‌و پشتگیرییه‌ مه‌عنه‌وییه‌ كاریگه‌ری هه‌بوو؟

سه‌رۆك بارزانی: تا راده‌یه‌ك به‌ڵێ، به‌ڵام له‌ڕووی مه‌یدانییه‌وه‌ هیچ كاریگه‌ریەكی نه‌بوو.

“MBC”: ئه‌و كات سعوودییه‌كان چیان به‌ ئێوه‌ ده‌گوت؟ هه‌ڵوێستی ئه‌وان چی بوو؟

بارزانی: بیرم نایەتەوە هیچ رۆژێك له‌ رۆژان سعوودیه‌كان دژی ئێمه‌ وه‌ستابنه‌وه‌، به‌شێك له‌ وڵاتانی عه‌ره‌بی پشتگیری عێراقیان ده‌كرد و چه‌پڵه‌یان بۆ سه‌ركه‌وتنه‌ وه‌همییه‌كانیان لێده‌دا و بروسكه‌ی پیرۆزباییان بۆ سه‌رۆك كۆمار ده‌نارد و پشتیوانی خۆیان پیشان ده‌دا، به‌ڵام هیچ كاتێك نه‌مانبینی سعوودیه‌، هه‌ڵوێستێكی‌ دژ به‌ كورد نیشان بدات.

لە بەشێكی تری دیدارەكەی كەناڵی”MBC” بارزانی، دەڵێت:  سەدام  وتوویەتی كەركووك شارێكی كوردییە، سەرۆك بارزانی دەڵێ، سەدام حوسێن خۆی ئەمەی پێگوتم و بەو شێوەیەیش وتی كە كەركووك شارێكی كوردییە، بەڵام سەرچاوەی سەرەكی ئابوورییە بۆ دامەزراندنی دەوڵەت، من لەسەر ئەوەیش ڕەزامەند نیم.

 

بەردەوام بە لە خوێندنەوە

چاوپێکەوتن

پێریسیچ: ئامانجم بەردەوامبوونە بۆ ماوەی حەوت ساڵی تر لەنێو یاریگاکاندا

خەڵک سپۆرت – فوتباڵ ئیتاڵیا

ئیڤان پێریسیچی کرواتی ئەستێرەی نوێی یانەی بایرن میونشن چاوپێکەوتنێک لەگەڵ ماڵپەڕی “فوتباڵ ئیتاڵیا” ئەنجام دەدات، لە وەڵامەکانیدا ئاماژە بە ئاست و بارودۆخی دەرونیی لە یانە باڤارییەکە دەکات.

هەروەها دانی پێدادەنێت، کە مانەوە لە بایرن میونشن خەونێکی گەورەیە، بەڵام داهاتووی لەدەستی خۆیدا نییە.

کەشی شاری میونشن چۆنە بەلاتەوە؟ خۆت گونجاندووە؟

تائێستا هەموو شتێکی میونشن لەبەرچاوی مندا جوانە و لەڕووەکانی وەرزشیی و ژیانی تایبەتی یاریزانانەوە شارێکی ناوازەیە.

لە بایرن ئامانجی داهاتووت چییە؟

هەنگاو بە هەنگاو هەوڵدەدەم و ڕۆژ لەدوای ڕۆژ پلان دادەڕێژم، دوای ئەوەی خۆم گونجاند سەیردەکەم بزانم چی ڕوودەدات، کاتێک تەمەنت ٣٠ ساڵ دەبێت واتای ئەوە نییە گەورەبوویت و سودت نەماوە، هەست دەکەم لە بارودۆخێکی باشدام و پلانم هەیە حەوت بۆ هەشت ساڵی تر لەنێو یاریگا ئەوروپییەکاندا بەردەوامبم.

دوای پەیوەندیکردن بۆ بایرنەوە چۆن ئاستی خۆت هەڵدەسەنگێنیت؟

هەموو شتێک لە میونشن جوان و ڕێکوپێکە، لەڕیزەکانی بایرن هەست بە ئارامی دەکەم، تائێستا بارودۆخەکە لەبارە و ئەوەش لەهەموو شتێک گرنگترە.

بیر لە بەردەوامبوون دەکەیتەوە، یان گەڕانەوە بۆ ئینتەرمیلان؟

بابەتەکە لەدەستی مندا نییە، لێرە خۆشحاڵم و بیر لەهیچ شتێک ناکەمەوە تەنها بەرژەوەندییەکانی یانەی بایرن میونشن نەبێت، لێرە هەموو شتێکیان پێداوم و لەوساتەوە پەیوەندیم پێوەکردون ژیانیان پێبەخشیوم، هاندەران و یاریزانان زۆر یارمەتیدەرم بوون.

دەتوانیت ڕوونکردنەوەی زیاتر بدەیت؟

لەبارەی داهاتوومەوە نازانم چی ڕوودەدات، لەئێستادا هیچ شتێک نازانم تا پێتان بڵێم، بڕیاری کۆتایی لەدەستی ئیدارەی یانەدایە و منیش تەنها دەمەوێت تاموچێژ لە تۆپی پێ وەربگرم و بەهەموو هێزمەوە هەوڵی بردنەوە بدەم.

بەردەوام بە لە خوێندنەوە

کوردستان