ئێمە لە تۆرە کۆمەڵایەتیەکان

ئابوری

نێچیرڤان بارزانی رونكردنەوەیەكی لەسەر بەردەوامی موچەی فەرمانبەران بڵاوكردەوە

خەڵك- بەشی هەواڵ

سەرۆكی حكومەتی هەرێمی كوردستان رایگەیاند، تائێستا رێكەوتنی ناردنی 317 ملیار دینارەكەی بەغداد ماوە و ئەوەش مانای وایە موچەی فەرمانبەران لەكاتی خۆیدا دەدرێت.

نێچیرڤان بارزانی لە كۆنگرەیەكی رۆژنامەنووسیدا باسی لەوەكرد، تائێستا هیچ بڕیار و رێكەوتنێكی نوێ لەسەر پارەكەی بەغداد نییە و بڕیارە لەكاتی خۆیدا بنێردرێت.

وتیشی”هیودارین ئەو پارەیە لەكاتی خۆیدا بنێردرێت”.

مانگانە حكومەتی عێراق 317 ملیار دینار دەنێرێت بۆ هەرێمی كوردستان و موچەی نیوەی فەرمانبەرانی هەرێمی پێدەدرێت و ئەگەر ئەو پارەیە نەنێردرێت، حكومەتی هەرێم ناتوانێت لەكاتی خۆیدا موچە دابەش بكات.

لە ماوەی رابردوودا بەرپرسانی باڵای حكومەتی هەرێم رایانگەیاند، تا ئەو كاتەی پارەكەی بەغداد بنێردرێت، موچەی فەرمانبەران لەكاتی خۆیدا دابەش دەكرێت و ئەگەر نەنێردرێت، ئەوان ناتوانن موچە دابەش بكەن.

ئابوری

پێشنیارێكی یاسین مەحمود بۆ هەڵەبجە بڕیارێكی گرنگی بەداوی خۆیدا هێنا

خەڵك – بەشی هەواڵ

دوای ئەوەی یاسین مەحمود وتەبێژی یەكێتی وەبەرهێنەرانی كوردستان پێشنیاری كرد، ژمارە (1)ی تابلۆی‌ ئۆتۆمبێلی‌ پارێزگای‌ هەڵەبجە لە 100 هەزار دۆلارەوە بخرێـتە كێبڕكێوە بۆ ئەوەی‌ پڕۆژەكانی‌ پارێزگای‌ هەڵەبجەی‌ پێ‌ جێبەجێ بكرێت، حكومەتی هەرێم بڕیاریدا ژمارە نایابەكان بە شێوەی زیادكردنی ئاشكرا بفرۆشێت.

لەوبارەیەوە كاوە شێخ عەلی جێگری پارێزگاری هەڵەبجە لە هەژماری تایبەتی خۆی لە تۆڕی كۆمەڵایەتی فەیسبوك ڕایگەیاندووە، ئەنجومەنی وەزیران و وەزارەتی ناوخۆ ڕەزامەند بوون لەسەر دروستكردنی تابلۆكانی پارێزگای هەڵەبجە و فرۆشتنی ژمارە نایابەكان بەشێوەی زیادكردنی ئاشكرا و گەڕانەوەی داهاتی بۆ پارێزگای هەڵەبجە و دانانی ژمارەی حسابی تایبەت بە داهاتەكان بۆ پڕۆژەكان و ئاوەدانكردنەوەی پارێزگاكەو گەشەپێدانی بەڕێوەبەرایەتی هاتووچۆی هەڵەبجە.

ئاماژەی بۆ ئەوەشكردووە، لیژنەیەك پێكهێنراوە بە سەرۆكایەتی پارێزگاری هەڵەبجە و ئەندامیەتی لایەنە پەیوەندیدارەكان و چاودێری داواكاری گشتی بۆ ئەوەی بەشێوەی ئاشكرا و شەفاف بفرۆشرێت.

جێگی پارێزگای هەڵەبجە دەشڵێت: “سەرۆكایەتی ئەنجومەنی وەزیران و وەزارەتی ناوخۆ ئەو كۆنووسەی، كە لە كۆبوونەوەی ڕۆژی ٥/٥/٢٠١٩ لە وەزارەتی ناوخۆ ئامادەكرا بە ئامادەبوونی (پارێزگاری هەڵەبجە و بەڕێوەبەری گشتی دیوانی وەزارەتی ناوخۆ و جێگری پارێزگار و بەڕێوەبەری گشتی هاتووچۆی هەرێم و بەڕێوەبەری هاتووچۆی سلێمانی و بەڕێوەبەری هاتووچۆی هەڵەبجە ) سەرجەم خاڵەكانی پەسەندكران و ڕەزامەندبوون لە سەر سەرجەمیان”.

جێی ئاماژەیە، پێشتر یاسین مەحمود وتەبێژی یەكێتی وەبەرهێنەرانی كوردستان بە (تۆڕی میدیایی خەڵك)ی ڕاگەیاندبوو، ژمارە 1ی تابلۆی هەڵەبجە بە هەر كەسێك بێت دەبێتە فەخر و شانازی بۆی، بۆیە پێویستە ژمارە (1)ی تابلۆی‌ ئۆتۆمبێلی‌ پارێزگای‌ هەڵەبجە لە 100 هەزار دۆلارەوە بخرێـتە كێبڕكێوە بۆ ئەوەی‌ پڕۆژەكانی‌ پارێزگای‌ هەڵەبجەی‌ پێ‌ جێبەجێ بكرێت.

یاسین مەحمود، ئاماژەی بەوەشدابوو، تابلۆی شارەكانی تری هەرێم لە ئێستادا نرخیان گەیشتووەتە نزیكەی 1 ملیۆن دۆلار، ئەمە دەرفەتێكە بۆ ئەوەی ژمارە 1ی تابلۆی هەڵەبجە بەپێی یاسا ڕێكبخرێت و لەكاتی كردنەوەی موزایەدەكەی لە 100 هەزار دۆلارەوە دەست پێ بكات. وتیشی، “من ڕەنگە زۆر مەبەستم ئەوە نەبێت ببمە خاوەنی ئەو ژمارەیە، بەڵام ئەمە هەلێكە بۆ هەڵەبجە لەو ڕێگەیەوە برێك پارە بگاتە دەست بەڕێوەبەرایەتی و بخرێتە خزمەت پڕۆژەكانی هەڵەبجە”.

یاسین مەحمود ئاماژەی بۆ ئەوەشكردبوو، ئەگەر كاری جددی لەسەر بكرێت لە ژمارە سەرەتاكانی تابلۆی هەڵەبجە نزیكەی 200 ملیۆن دۆلار كۆدەكرێتەوە بەمەش پڕۆژەكانی‌ پارێزگای‌ هەڵەبجەی‌ پێ‌ جێبەجێ دەكرێت، ئاشكراشیكرد، ئامادەیە نرخی‌ تابلۆی‌ ژمارە یەك تا 500 هەزار دۆلار، كە دەكاتە (50 دەفتەر) بەرزبكەنەوە.

بەردەوام بە لە خوێندنەوە

ئابوری

سبەینێ‌ مووچەی 6 وەزارەت و دامەزراوە دابەش دەكرێت

خەڵك- بەشی هەواڵ
ماوەی زیاتر لە 15 ڕۆژ دابەشكردنی مووچەی مانگی ئاداری ڕابردووی فەرمانبەران دەستی پێ‌ كردووە و بڕیاریشە سبەینێ‌ مووچەی فەرمانبەرانی 6 وەزارەت و دامەزراوە دابەش بكرێت.

سەرچاوەیەك لە گەنجینەی سلێمانی بۆ (خەڵك) ئاشكرای كرد، سبەینێ‌ پێنج شەممە 20ی حوزەیران مووچەی وەزارەتەكانی (بازرگانی، ڕۆشنبیری و لاوان، ئاوەدانكردنەوە) و هەرسێ‌ سەرۆكایەتی پەڕلەمان و هەرێم و ئەنجوومەنی وەزیران دابەش دەكرێت.

سەرچاوەكە جەختیشی كردەوە، كە ڕۆژی یەك شەممە و دوو شەممەی داهاتوو مووچەی خانەنشینی پێشمەرگە و شارستانی دابەش دەكرێت.

جەختیشی كردەوە، كە ئەگەری ئەوەش هەیە دابەشكردنی مووچەی خانەنشینان گۆڕانكاری بەسەردابێت و پێشبخرێت.

بەردەوام بە لە خوێندنەوە

ئابوری

دابەشكردنی زەوی لە سلێمانی دەستی پێكردەوە

خەڵك- بەشی هەواڵ
سەرۆكایەتی شارەوانی سلێمانی 30 پارچە زەوی بەشێوەی تیروپشك بەسەر دانیشتوانی گەڕەكێكدا دابەش دەكات و جەختیشدەكاتەوە، كە ئەو كەسانە ناگرێتەوە، كە پێشتر سوودمەند بوون.

سەرۆكایەتی شارەوانی سلێمانی لە ڕاگەیەندراوێكدا ئاماژەی بەوەكردووە، ئەمڕۆ چوار شەممە ١٩/٦/٢٠١٩ سەرۆكایەتی شارەوانی سلێمانی ھەستا بە دابەشكردنی (٣٥) پارچە زەوی بە شێوەی تیروپشك بەسەر دانیشتوانی گەڕەكی شێخان-ی شاری سلێمانی،كە سەرجەم ئەو خانوانە موڵكی شارەوانین و پێشتر فەرمانبەرانی شارەوانی تێیدا نیشتەجێ بوون.

ڕاشیگەیاندووە، ئەم زەویانە ئەو كەسانە ناگرێتەوە، كە پێشتر سوتمەند بوون.

ئاشكراشی كردووە، دوای چۆڵكردنی خانووەكان لەلایەن دانیشتوانی ئەو گەڕەكە، سەرۆكایەتی شارەوانی سلێمانی دەیكاتە پڕۆژەیەكی ھاوچەرخ، كە شایستەی خەڵكی شاری سلێمانی بێت.

بەردەوام بە لە خوێندنەوە

کوردستان