کەشناسی عێراق ڕایگەیاند ئەمڕۆ بارانێکی بەخوڕ لە هەرێم دەبارێت و هەفتەی داهاتووش بارانبارین بەردەوام دەبێت. شارەزایانی کشتوکاڵێش دەڵێن، “هەرکاتێک چینی سەرەوەی زه‌وى بە قوڵی ٣٠ بۆ ٤٠ سانتیمه‌تر تەڕ بوو ئەوا پەڵە دەدات”. واتە زەوی تێر و پاراو بووە و بەکەڵکی کێڵان و کشتوکاڵ کردن دێت.
بەگوێرەی پێشبینییەکانی کەشناسی عێراق ئەمڕۆ بارانێکی بەخوڕ دەبارێت و لە دوو ڕۆژی سەرەتای هەفتەی داهاتووش بارانبارین بەردەوام دەبێت.
لایخۆشییەوە، شاڵاو هیدایەت پسپۆڕی بواری کەشناسی ڕایگەیاند، لە ناوچەکانی قەرەداغ و کۆیە و ڕاپەڕین پەڵەی داوە.
لەبارەی پەڵەدانیشەوە شارەزایانی کشتوکاڵ دەڵێن، هەرکاتێک چینی سەرەوەی زه‌وى بە قوڵی ٣٠ بۆ ٤٠ سانتیمه‌تر تەڕ بوو پەڵە دەدات و بەو پێیەش لە ناوەندی شاری سلێمانی ٢٤.٨ ملیم و لە هەولێر نزیکەی ٣٠باران باریوە.
هاوکات، ڕێژە و ماوەی بارین هیچ پەیوەندی بە پەڵەدانەوە نیە، بۆ نمونە بارانێکی هێواشی نەرم و بەردەوام دەکرێت لە ٢٠ تاوه‌كو ٢٥ ملیمه‌تر پەڵەی پێبدات، لەبەر ئەوەی بە تەواوی دەچێتە ناو خاکەوە، بەڵام رەنگە بارانێکی بەلێزمە و به خوڕ بە ٤٠ ملیمه‌تریش نەتوانێت قوڵی پێویست تەڕ بکات.
