سەرۆکایەتی کۆمار ئەو نووسراوانە بە سازتە وەسف دەکات کە لە تۆڕە کۆمەڵایەتییەکاندا بڵاوکراونەتەوە و باس لە بوونی پێشێلکاریی یاسایی و گەندەڵی دەکەن.
ئەمڕۆ پێنجشەممە، فەرمانگەی ڕاگەیاندنی سەرۆکایەتی کۆمار بڵاویکردەوە، سەرۆکایەتی کۆمار جەخت لە ساختەبوونی ئەو نووسراوانە دەکاتەوە کە لە سۆشیال میدیا بڵاوکراونەتەوە و ئاماژە بە بوونی پێشێلکاریی یاسایی و گەندەڵی کارگێڕی و دارایی دەکەن.
ڕاشیگەیاند، کەسانێك لە پشت بڵاوکردنەوەی بەڵگەنامە ساختەکانەوەن کە دەیانەوێت زیان بە ناوبانگی دەوڵەت و کەرامەتی سەرۆکایەتی کۆمار بگەیەنن.
ئەوەشیخستەڕوو کە دەرگای سەرۆکایەتی بەڕووی لایەنە پەیوەندیدارەکانی بەرەنگاربوونەوەی گەندەڵی کارگێڕی و دارایی کراوەیە بۆ لێکۆڵینەوە.
هەروەها هەڕەشەی دادگاییکردنی ئەو کەسانەشی کرد کە نووسراوەکانیان ساختەکردووە یان بڵاویانکردووەتەوە یاخود بانگەشەی بۆ دەکەن.
سەرۆکایەتی کۆمار داواشی لە دەزگاکانی ڕاگەیاندن و چالاکوانانی تۆڕە کۆمەڵایەتییەکان کرد خۆیان لە بڵاوکردنەوەی هەواڵی ناڕاست و بەڵگەنامەی ساختە بەدووربگرن، چونکە بە پێی یاسای لەسەر ئەو کارانە سزا دەدرێن.
