ئێمە لە تۆرە کۆمەڵایەتیەکان

کوردستان

بەوێنە؛ ڕووداوێك لە نزيك پەرلەمانی كوردستان ڕوویدا


خەڵك- بەشی هەواڵ
ئەمڕۆ دوو شەممە، ڕووداوێكی هاتوچۆ لە نزيك باڵەخانەی پەرلەمانی كوردستان ڕوویدا و بەهۆیەوە ئاستەنگی هاتوچۆ دروست بوو.

بەپێی زانیارییەكان، ئەمڕۆ 3ی ئەیلول لە شەقامی 60 مەتری هەولێر و لە نزیك باڵەخانەی پەرلەمانی كوردستان ڕووداوێكی هاتوچۆ لەنێوان دوو ئۆتۆمبێل ڕوویداوە و بەهۆیەوە زیانی مادی زۆر بە ئۆتۆمبێلەكان گەیشتووە، بەڵام زیانی گیانی نەبووە.

هەر بەپێی زانیارییەكان، بەهۆی ڕووداوەكەوە ئاستەنگی هاتوچۆ دروست بووە لەو شەقامە سەرەكیەی هەولێر.

کوردستان

هەرێم، چاوەڕێی ڕەزامەندی بەغدایە بۆ وەرگرتنی گەنمی جوتیاران


خەڵك-ئارام سەردار

 

بەڕێوەبەری ڕاگەیاندن و پەیوەندییەكانی وەزارەتی پیشەسازی و بازرگانی ڕایدەگەیەنێت، چاوەڕێی ڕەزامەندی حكومەتی ناوەندی دەكەین، بۆ ئەوەی پڕۆسەی وەرگرتنی گەنم دەست پێبكەین.

سەردار قوربانی بەڕێوەبەری ڕاگەیاندن و پەیوەندیەكانی وەزارەتی پیشەسازی و بازرگانی سەبارەت بە وەرگرتنی بەرهەمی گەنمی ئەمساڵی جوتیارانی هەرێم ڕایدەگەیەنێت، سەرجەم ڕێكارەكان و ئامادەكارییەكانی لەلایەن سایلۆكانمانەوە تەواو كراون، بەڵام بۆ كاتی دەستپێكردنی وەرگرتنی گەنمەكە چاوەڕێی ڕەزامەندی حكومەتی ناوەندی دەكەین.

دەشڵێت”هەركاتێك ئەو ڕەزامەندییە گەیشت ئەوا ڕاستەوخۆ دەست دەكرێت بەوەرگرتنی گەنمی جوتیاران لە سەرتاسەری هەرێمدا”.

ئەوەشدەخاتەڕوو، بەگوێرەی ئەزموونی ساڵانی ڕابردوو بێت وەرگرتنی گەنمی جوتیارانی هەرێم زۆربەی جار كەوتووەتە ناوەڕاستی مانگی ٦ی هەموو ساڵێكەوە .

بەردەوام بە لە خوێندنەوە

کوردستان

ژووری بازرگانی سلێمانی: پشتیوانی كردنەوەی بازاڕەكان و پابەندبوون بە ڕێنماییەكان دەكەین


خەڵك – بەشی هەواڵ
ژووری بازرگانی ‌و پیشەسازی سلێمانی پشتیوانی خۆی بۆ هەموو ئەو كاسبكار و خاوەنکارانە ڕادەگەیەنێت كە لەئێستا و ماوەی ڕابردوودا بەهۆی ئەو ڕێكارانەی گیراونەتەبەر بەمەبەستی ڕێگرتن لە بڵاوبونەوەی پەتای كۆرۆنا، تووشی زیان ‌و بێكاری بوون ‌و قەرەبووشیان نەکراوەتەوە.

لە ڕاگەیەندراوێكی ژووری بازرگانی ‌و پیشەسازی سلێمانیدا هاتووە، داوا لەلایەنە پەیوەندیدارەكان دەكات دەرفەتی كردنەوەی دوكان ‌و بازاڕ و بەڕێوەچوونی كار و پیشە و بژێویی ئەو كاسبكارانە بەپێی مەرج ‌و ڕێنماییە تەندروستییەكان بڕەخسێنێ‌، كە بەهۆی کار و کاسبی ڕۆژانەوە بژێویی ژیانیان مسۆگەر دەكەن، لەم ڕوانگەیەوە پشتگیریی لەجێبەجێكردنی داواكارییەكانیان دەكەین.

ژووری بازرگانی ‌و پیشەسازی سلێمانی ڕاشیگەیاند بەدرێژایی سێ‌ مانگی ڕابردوو، کە پەتای کۆرۆنا بڵاوبووەتەوە، هەموو هەوڵێكیان بۆ ئەوە خستوەتەگەڕ كۆرۆنا ژیانی هاووڵاتییان نەخاتە مەترسییەوە و لەڕووی ئابورییەوە بازاڕ پشێویی ‌و گرانی بەخۆیەوە نەبینێ ‌‌و ئەو كاڵا و خۆراكانەی كە هاوردە دەكرێن، كاڵاو خۆراكی کوالێتی بەرز و تەندروست بن‌ و هاوكات لەهەوڵی ئەوەشدایە لەگەڵ لایەنە پەیوەندیدارەكان تا لەقۆناغی داهاتوودا كوردستان زیاتر پشت بە بەرهەمی خۆماڵی ببەستێت لەدابین كردنی گرنگترین پێداویستییەكانیدا.

ئەوەشیی خستەڕوو كە پشتیوانی لە هەموو ئەو داواکاریانە دەکات خوازیاری ئەوەن كارو بازاڕ‌ و چالاكی بەرهەمهێنانی کشتوکاڵی ‌و پیشەسازیی بەهیچ بیانوییەك پەكنەخرێت، بەتایبەتی ئەو كارو پیشانەی بژێویی ژیاتی ڕۆژانەی كاسبكاران دابین دەكەن.

بەردەوام بە لە خوێندنەوە

کوردستان

١٧ بڕیار لە لیژنەی باڵای ئۆپەراسیۆنەکانی سلێمانییەوە


خەڵك – بەشی هەواڵ
لیژنەی باڵای ئۆپراسیۆنەكانی پارێزگای سلێمانی بۆ بەرەنگاربوونەوەی كۆرۆنا ١٧ بڕیاری دەربارەی دۆخی کۆرۆنا و هاتووچۆ بڵاوکردەوە.

دەقی راگەیەندراوەکەی د. هەڤاڵ ئەبوبەکر سەرۆکی لیژنەی باڵای ئۆپراسیۆنەكانی پارێزگای سلێمانی بۆ بەرەنگاربوونەوەی كۆرۆنا:

بۆ/ هەموو یەکە کارگێڕیی و فەرمانگە پەیوەندیدارەکانی سنوری پارێزگای سلێمانی
بابەت/ گشتاندن

پاڵپشت بە بەیانی ژمارە (٣٨)ی ساڵی (٢٠٢٠)ی وەزارەتی ناوخۆو پاشكۆكانی و بڕیارەكانی كۆبوونەوەی لیژنەی باڵای ئۆپراسیۆنەكانی هەرێمی كوردستان ڕۆژی (٢/ ٦/ ٢٠٢٠)و بڕیارەكانی كۆبوونەوەی لیژنەی باڵای ئۆپراسیۆنەكانی پارێزگای سلێمانی بۆ بەرەنگاربوونەوەی كۆرۆنا لە ڕۆژی (١/ ٦/ ٢٠٢٠)، لەپێناوی پاراستنی ئاسایشی تەندروستی‌و تەندروستیی گشتیی هاووڵاتیان‌و بەرگرتن لە تەشەنەكردنی پەتای كۆرۆناو بەرزكردنەوەی ئاستی خۆپارێزیی لەلایەن هاووڵاتیانی بەڕێزەوە، لیژنەی باڵای ئۆپراسیۆنەكانی پارێزگای سلێمانی بۆ بەرەنگاربوونەوەی كۆرۆنا بڕیاری لەم ڕێكارو ڕێنماییانەی خوارەوە داو پێویستە وەكو خۆیان جێبەجێ‌ بكرێن‌و هەر خەمساردیی‌و كەمتەرخەمییەك، لایەنی فەرمیی جێبەجێكار ڕووبەڕووی لێپرسینەوەو ڕێكاری یاسایی‌و كارگێڕیی توند دەكاتەوە:
١-بەیانی ژمارە (٣٨)ی ساڵی (٢٠٢٠)ی وەزارەتی ناوخۆی حكومەتی هەرێمی كوردستان و هەردوو نووسراوی ژمارە (٧٢٥٣ و ٧٢٥٤)ی ڕۆژی (١/ ٦/ ٢٠٢٠)ی وەزارەتی ناوخۆ وەكو خۆیان جێبەجێ‌ دەكرێن‌ جگە لەو بڕگانەی کە لەم ڕاگەیەندراوەدا هەموارکراونەتەوە، پێویستە هەموولایەك پابەندی بڕگەكانی ئەم بڕیارانە بن.
٢-لە سەعات (٦)ی ئێوارەی ڕۆژی (٣/ ٦/ ٢٠٢٠)ەوە بەپێی ئەم ڕاگەیەندراوەو ڕێكارو ڕێنماییەكانی پێشتر لەلایەن وەزارەتە پەیوەندیدارەكان‌و لیژنەی باڵای ئۆپراسیۆنەكانی پارێزگای سلێمانی بۆ بەرەنگاربوونەوەی كۆرۆناو قائمقامیەتی قەزای مەڵبەندی سلێمانی‌و بەڕێوەبەرایەتی گشتی تەندروستی سلێمانی‌و فەرمانگە پەیوەندیدارەكانی تر پەیوەست بە بوارە جیاجیاكان دیاریكراون، لەژێر چاودێریی‌و لێپرسینەوەو پشكنینی وردو توندی لیژنەكانی بەدواداچوون‌و لیژنەكانی قائمقامیەتەكان‌و بەڕێوەبەرایەتی گشتی تەندروستیدا، سێكتەرەكان دەكرێنەوە، هەركەس‌و شوێنێك پابەندی تەواوی ڕێكارو ڕێنماییە تەندروستیی‌و كارگێڕیی‌و ئارامییەكان نەبێت، شوێنەكەی بۆماوەی هەفتەیەك دادەخرێت‌و ڕێكاری یاساییش بەرامبەر خۆی دەگیرێتەبەر.
٣-پێویستە هەموو ئەو بوارو سێكتەرو شوێنی كارو دامەزراوانە لە كەرتی گشتی‌و تایبەتدا، پابەندی تەواوی ڕێوشوێنەكانی تەندروستیی‌و خۆپارێزیی بن‌و پێداویستی پاكژكردنەوەو كەلوپەلی خۆپارێزیی بەكاربهێنن و پەیڕەوی ڕێنماییە تەندروستییەكان بكەن.
٤-پێویستە دووریی نێوان كەسێك بۆ كەسێكی تر لە هەموو شوێنە گشتیی‌و فەرمانگەو دامەزراوەكان‌و بازاڕو مۆڵ‌و ماركێتەكاندا لە (یەك مەترو نیو) كەمتر نەبێت‌و نابێت لە هیچ شوێنێكدا بەریەككەوتن‌و تێكەڵاوبوون‌و كۆڕو كۆبوونەوەو قەرەباڵغی ڕووبدات، بەپێچەوانەوە ئەو شوێنە دادەخرێت‌و خاوەنەكەی ڕووبەڕووی ڕێكاری یاسایی دەكرێتەوە، لە فەرمانگەکانی دەوڵەتیشدا بەڕێوەبەری فەرمانگەکە ڕووبەڕووی لێپرسینەوەی یاسایی و کارگێڕیی دەکرێتەوە.
٥-لە ڕۆژی (٧/ ٦/ ٢٠٢٠)ەوە بەپێی ئەو بەرنامەیەی پێشتر لەلایەن هەر فەرمانگەیەكەوە دیاریكراوە دەوامی فەرمیی فەرمانگەكانی دەوڵەت دەستپێدەكاتەوە، پێویستە فەرمانبەران پابەندی تەواوی ڕێوشوێن‌و ڕێكارو ڕێنماییە تەندروستیی‌و خۆپارێزییەكان بن‌و پێشوازیی لە هیچ سەردانكەرو هاووڵاتییەك ناكرێت ئەگەر كەلوپەلی خۆپارێزیی (ماسك‌و دەستكێش)ی بەكارنەهێنابێت، لە هەموو فەرمانگەكاندا پێویستە لەڕێی سیستمی یەك پەنجەرەوە مامەڵەكان لە هاووڵاتیان وەربگیرێت‌و لەهەمان شوێنەوە وەڵام بدرێنەوەو هاتنە ناو بەڕێوەبەرێتی‌و بەش‌و ژوورەكانی فەرمانگەكان قەدەغەیە، لە هەر شوێنێكدا سەرپێچی بكرێت بەڕێوەبەری ئەو فەرمانگەیە ڕووبەڕووی لێپرسینەوەو ڕێكاری یاسایی دەكرێتەوە.
٦-پێویستە هاووڵاتیانی خۆشەویست پابەندی تەواوی بڕیارو ڕێنمایی و ڕێكارە تەندروستیی و خۆپارێزییەكان بن و ڕۆڵی شیاوی خۆیان لە پاراستنی تەندروستی خۆیان و خەڵكدا ببینن و لە ڕوودانی هەر نەخۆشیی و ناخۆشییەک و کەمتەرخەمییەکدا خۆیان بەرپرسیار دەبن و ئەگەر زیانیان بە تەندروستیی گشتیی گەیاند لەلایەن فەرمانگەی داواکاری گشتییەوە ڕێکاری یاساییان لەبەرامبەردا دەگیرێتەبەر.
٧-تیمی تەندروستی‌و پشكنین لە هەموو دەروازە نێودەوڵەتی‌و بازگە سەرەكییەكانی نێوان سلێمانی‌و شارەكانی تری دەرەوەی هەرێمی كوردستاندا بە جێگیریی دەمێننەوەو پشكنین‌و ڕێنمایی تەندروستیی پێشكەش دەكەن، هەر كەمتەرخەمییەك لەم بوارەدا بەڕێوەبەری دەروازەو مەرزو بازگەكان‌و بەڕێوەبەرێتی گشتیی تەندروستی ڕووبەڕووی لێپرسینەوەی یاسایی‌و كارگێڕیی دەكاتەوە.
٨-دوای تەواوبوونی ماوەی كەرەنتینەكردنی دیاریكراوی دەروازەی نێودەوڵەتی باشماخ وەك لە بڕگەی (دەیەم)ی بەیانی ژمارە (٣٨)ی ساڵی (٢٠٢٠)ی وەزارەتی ناوخۆدا هاتووە، دەروازەكە لەژێر ڕێوشوێن‌و ڕێكارو ڕێنمایی توندی تەندروستیی‌و كارگێڕیی‌و ئارامییدا دەكرێتەوەو هەماهەنگیی لەگەڵ لایەنی كۆماری ئیسلامیی ئێران دەكرێت بۆ كۆنترۆڵكردنی تەواوی لایەنی تەندروستیی لە هەردوولاوە.
٩-هاتووچۆ لەنێوان سنوری ئیداری پارێزگای سلێمانی‌و پارێزگاكانی تری دەرەوەی هەرێمی كوردستاندا بە ڕاگیراوی دەمێنێتەوەو لەدوای (٧/ ٦ /٢٠٢٠)یشەوە پێویستە تەنها بە ڕەزامەندیی وەزارەتی ناوخۆو بەپێی پشكنین‌و ڕێكاری تەندروستیی‌و كۆرەنتینەكردن هاتووچۆی دیاریكراوی ڕێگەپێدراو هەبێت، بازگەی جێگیرو تیمی گەڕۆك لە هێزەكانی ئاسایشی ناوخۆ ڕاسپێردراون بۆ كۆنترۆڵكردن‌و ناوچەو ڕێگا لاوەكیی‌و نایاساییەكان‌و هەركەس هەوڵی بە نایاسایی هاتنە سنوری ئیداریی پارێزگای سلێمانی بدات ڕووبەڕووی ڕێكاری یاسایی توند دەكرێتەوە.
١٠-داوا لە هەموو لایەنە سیاسییەكان و دەستەبژێرو كەسایەتییە ئایینی‌و سیاسیی‌و كۆمەڵایەتی‌و ڕۆشنبیرییەكان دەكەین، كە هەماهەنگیی تەواوی دامودەزگاكانی حكومەتی خۆجێی سلێمانی و حكومەتی هەرێمی كوردستان بن‌و، ڕۆڵی شایان و پێویستی خۆیان لە پاراستنی ئاسایشی تەندروستیی و تەندروستیی گشتیدا ببینن‌و هەموو ئەندام و لایەنگرو هەوادارەكانیان دڵنیا بكەنەوە، كە مەترسیی پەتای كۆرۆنا مەترسییەكی جدییەو هەر كەمتەرخەمیی‌و بەكەمگرتنێك كارەساتی گەورەی تەندروستیی‌و مرۆیی لێدەكەوێتەوە.
١١-داوا لە هەموو دەزگاو كەناڵەكانی ڕاگەیاندن‌و چالاكانی تۆڕە كۆمەڵایەتییەكان دەكەین، كە ڕۆڵی مێدیایی‌و نیشتمانیی‌و مرۆیی خۆیان لە ڕووبەڕووبوونەوەی كۆرۆناو بەرزكردنەوەی ئاستی پابەندبوون‌و خۆپارێزیی هاووڵاتیاندا ببینن‌و وەك هەمیشە چاودێرێكی وردی سەر دامەزراوە دەوڵەتیەكان بن بۆ جێبەجێكردنی ئەرك‌و ڕێكارە یاساییەكان، هەركەس‌و كەناڵێك گیانی سەركەشیی‌و بێباكیی‌و گومانی بەكەمگرتن‌و شێواندنی ڕاستییەكان بڵاوبكاتەوە، لەلایەن فەرمانگەی داواكاری گشتییەوە ڕێكاری یاسایی پێویستی بەرامبەر دەگیرێتەبەر.
١٢-هەركەسێك هەوڵی بەقاچاخ هاتنەوە، یان بەقاچاخ هێنانەوەی خەڵك بدات، ڕێكاری یاسایی توندی بەرامبەر دەگیرێتەبەر.
١٣-هەموو هۆكانی گواستنەوەی گشتی (تەكسی، پاس، مینی پاس) پێویستە پابەندی ڕێكارو ڕێنماییە تەندروستیی‌و خۆپارێزییەكان بن‌و بەپێچەوانەوە لەلایەن بەڕێوەبەرایەتی هاتووچۆی پارێزگای سلێمانییەوە بۆماوەی هەفتەیەك دەست بەسەر ئۆتۆمبێلەكانیاندا دەگیرێت.
١٤-لیژنەیەكی بەدواداچوونی هاوبەش لە هەموو یەكە كارگێڕییەكانی سنوری پارێزگای سلێمانیدا، لە (نوێنەری قائیمقامیەت، هێزە هاوبەشەكانی لیژنەی ئارامیی، نوێنەری هەریەك لە بەڕێوەبەرایەتیەكانی تەندروستی، ئەوقاف، گەشتوگوزار، شارەوانی) لە ئەمڕۆوە لەژێر چاودێری قائیمقامی قەزاكاندا پێكدەهێنرێت‌و ڕێكاری ڕاستەوخۆو خێرا بەرامبەر هەركەس‌و شوێنێكی سەرپێچیكار دەگرنەبەرو هەماهەنگیی تەواوی لیژنە هاوبەشەکانی قائیمقامیەتەکان و بەڕێوەبەرایەتی تەندروستیی و بەڕێوەبەرایەتی خۆپاراستنی تەندروستیی دەبن.
١٥-پێویستە بەنزینخانەو كارمەندانی بەنزینخانەكان پابەندی تەواوی ڕێكارو ڕێنماییە تەندروستییەكان بن‌و لەلایەن كارگوزاری بەنزینخانەكانەوە سوتەمەنیی بكەنە ئۆتۆمبێلەكانەوەو نابێت شۆفێر یان سەرنشین لە ئۆتۆمبێلەكانیان بێنە خوارەوە.
١٦-بەهەموو شێوەیەك سەردانیكردنی نەخۆش لە نەخۆشخانەكاندا قەدەغەیە.
١٧-پرسەدانان‌و ئاهەنگگێڕان‌و، هەر كۆڕو كۆبوونەوەیەك كە بەریەككەوتن‌و تێكەڵاویی دروست بكات قەدەغەیە.

د. هەڤاڵ ئەبوبەکر
پارێزگاری سلێمانی
سەرۆکی لیژنەی باڵای ئۆپراسیۆنەكانی پارێزگای سلێمانی بۆ بەرەنگاربوونەوەی كۆرۆنا
٣ / ٦ / ٢٠٢٠

بەردەوام بە لە خوێندنەوە

کوردستان