ئێمە لە تۆرە کۆمەڵایەتیەکان

چاوپێکەوتن

بەوێنە.. ئەو كچە رۆژنامەنوسەی شەوێكی لەگەڵ گەورە سەركردەیەكی داعش رۆژ كردەوە

Nemo enim ipsam voluptatem quia voluptas sit aspernatur aut odit aut fugit, sed quia consequuntur magni dolores eos qui.

Photo: Shutterstock

خەڵك-سەعد مەلا عەبدوڵڵا گوڵپی

داواكاری كچە رۆژنامەنوسێك بۆ ئەنجامدانی دیمانەیەك لەگەڵ یەكێك لە سەركردەكانی داعش.

سوعاد موخەنەت دەڵێت، چەكدارەكانی داعش پێیان راگەیاندم، بە تەنها وەرەو نابێت كەسیترت لەگەڵ بێت، هەروەها نەدەبوو تەلەفون لەگەڵ خۆم بەرم و كاتژمێرەكەم لە ئوتێلێك لە ئەنتاكیای توركیا دانا و هەموو ئامێرە رۆژنامەنەوانیەكانم دانا و تەنها پێنوسێك و دەفتەرێكم لەگەڵ خۆم برد.

من دەمویست لەگەڵ یەكێك لە سەركردە پڕ جەماوەرییەكانی داعش گفتوگۆ بكەم، كەسێك كە بتوانێت ستراتیژی داعش لە عێراق و شام روونبكاتەوە،
هاوینی ساڵی 2014 بوو سێ هەفتە پێش ئەوەی ئەم گروپە دەست بكەن بە بڵاوكردنەوەی تۆماری سەربڕینی جەیمز فولی رۆژنامەنوسە ئەمریكییەكە.

من رۆژنامەنوسێك بووم بە بەردەوام هەواڵەكانی ئیسلامیم لە ئەوروپا و رۆژهەڵاتی ناوەڕاست بۆ نیویۆرك تایمز و ئاژانسە گرنگەكانی ئەڵمانیا و واشنتن پۆست دەنارد.

ئەو كەسەی بووبونە نێوەندگیرم بۆ دیمانەكە لەگەڵ سەركردەی داعش پێم وتن، من دەتوانم هەر پرسیارێك كە خواستم لەسەری هەبێت بیكەم، چونكە بڕیار نییە پێش بڵاوكردنەوەی بابەتەكە نیشانی ئێوەی بدەمەوە، دەبوو زۆر ئاگاداری خۆم بم، چونكە پێیان وتبووم نابێت لە واشنتن پۆستەوە كەسێكیتر لەگەڵ خۆم بەرم، بەڵام داوام كرد كەسێك كە زۆر بڕوام پێی هەیە هاوكارم بێت.

بەسەركردەكانی داعشم راگەیاند، من هاوسەرگیریم نەكردووەو ناتوانم بە تەنها لەگەڵ ئێوە بمێنمەوە.

من كچێكی موسڵمانی مەراكیشی-توركیم كە لە ئەڵمانیا گەورە بووم و لەنێوان رۆژنامەنوسەكان تایبەتمەندییەكی جیاوازم هەیە.

دەمزانی كە داعش رۆژنامەنوسەكان دەستگیر دەكات، بەڵام نەمدەزانی ئەو كەسەی من دەمەوێ دیمانەی لەگەڵدا بكەم بەو شێوەیەی ئەو گروپەیە كە رۆژنامەنوسەكان دەستگیر دەكات و دەیانكوژێت و لەتۆمارە ڤیدیۆییەكاندا نیشان جیهانی دەدەن. دواتر زانیم ئەو كەسە ناوی ئەبو یوسفە.

من داوای ئەوەم كردبوو كە لەگەڵ ئەبو یوسف بە درێژایی رۆژ لە شوێنێكی گشتیدا گفتوگۆكانمان ئەنجام بدەین، بەڵام بۆم نەگونجا، دەبوو پەیوەندیەكانمان شەوانە و لە شوێنێكی تایبەت ئەنجام بدرایە، چەند كاتژمێرێك پێش مەوعیدەكەمان ئەو كەسەی لەنێوانماندا بوو كاتژمێرەكەی بۆ 11.30 خولەكی شەو گۆڕی، ئەمەش رووداوێكی خۆش نەبوو بۆ من.

ساڵێك پێشتر هێزەكانی پۆلیسی دژە تیرۆری ئەڵمانیا هاتنە ماڵەكەم و هاتبوون بۆ ئەوەی پێم بڵێن، كە گروپێكی ئیسلامی نەخشەیان داناوە بۆ ئەوەی بە بیانووی ئەنجامدانی دیمانەیەك من بۆ رۆژهەڵاتی ناوەڕاست رابكێشن، دواتر بمگرن و بمكەنە هاوسەری یەكێك لە چەكدارەكانیان.

ئێستا ئەو هەڕەشانەم وەبیردەهاتەوەو لەو خەیاڵانەدا بووم كە لەوانەیە ئەم كارە شێتانە بێت، لەگەڵ بوونی فشارێكی زۆر لەسەرم درێژەم بە كارەكانم دا، ئەگەرچی هەموو شتێك بە باشی دەڕۆیشت، یەكەمین ژنی رۆژنامەنووس بووم كە دیمانەیەك لەگەڵ سەركردەیەكی باڵای داعش ئەنجام بدەم‌و زیندووش بمێنمەوە، تاكو چیرۆكەكان بگێڕمەوە.

ئەو رۆژە یەكێك بوو لە رۆژە گەرمەكان‌و لە كۆتاییەكانی مانگی رەمەزان بوو، لە ئوتێلەكەم لە ئەنتاكیا كە سەرقاڵی رێكخستنی پرسیارەكانم بووم پانتۆڵ‌و تیشێرتێكم پۆشی بوو، بەڵام پێش هاتنە دەرەوەم لە ئوتێلەكە عەبایەكیشم دابەسەر خۆمدا.

ئەو جلوبەرگە یەكێك لەو كەسانە پێی بەخشیم كە هاوڕێی ئەبو مەسعەب زەرقاوی سەركردەی دیاری ئەلقاعیدە بوو ئەوكاتەی كە لە ئەردەن دیمانەیەكەم لەگەڵدا ئەنجام دا، ئەو كەسە بە شانازییەوە وتی ئەم عەبایە كە نیقابیشی پێوە بوو یەكێك بوو لە باشترین مۆدێلەكانی فرۆشگاكانی ئەو كات و پارچەیەكی زۆر ناسك بوو تەنانەت لە كاتی كەش و هەوای گەرمیشدا هیچ ئازارێكی نەدەدای.

بڕیار بوو ئەبو یوسف لە سنوورەكانی نێوان توركیاو سوریا لە دەروازەی ریحانلی چاومان بەیەك بكەوێت، ئەو ناوچانەم زۆر باش لەبیرە، چونكە دایكم لە حوالی گەورە بوو منیش زۆر جار بە منداڵی سەردانی ئەو ناوچانەم كردبوو.

ماڵئاواییم لە ئانتولی فاویلی هاوكارم لە واشنتن پۆست كردو ئەو لە ئوتێلەكە مایەوە چەند ژمارە تەلەفونێكم بۆ جێهێشت و وتم ئەگەر رووداوێك روویدا پەیوەندی بە خێزانەكەمەوە بكە.

نزیكەی كاتژمێر 10:15 خولەك بوو ئەو پیاوەی هاوكاری كردبووم كاتی دیمانەكە رێكبخەین بەناوی ئەكرەم ناوم دەهێنا هات بە شوێنمدا بۆ ئوتێلەكە.

دوای 40 خولەك لە لێخوڕینی ئۆتۆمبێل چووینە نێو پاركی ئوتێل یان ریستورانتێك لە نزیك دەروازەو چاوەڕێمان كرد، كەمێك دواتر دوو ئۆتۆمبێل لە تاریكیدا دەركەوتن، شۆفێری ئۆتۆمبێلی یەكەم كە هۆندایەكی سپی بوو دابەزی‌و من‌و ئەكرەمیش سەركەوتین، ئەكرەم لە پشتی شۆفێرو منیش لە تەنیشتیدا سەركەوتم.

سەرم سوڕاند تاكو چاوم بە پیاوێك بكەوێت كە دەمەوێ دیمانەی لەگەڵدا ساز بكەم، ئەبو یوسف كە لە كورسی دواوە دانیشتبوو تەمەنی لە نزیكەی 27 بۆ 28 ساڵان دەبوو، كڵاوێكی سپی لەسەر بوو و عەینەكێكی لەچاودابوو كە چاوەكانی داپۆشیبوو، باڵابەرزو شیك بوو، ریشێكی كورتی هەبوو موی سەری درێژ بوو بەشێوەیەك تاكو سەرشانی، بەو جلوبەرگەوە كە لەبەریدا بوو ئەگەر لە بازاڕەكانی ئەوروپا ببینرایە هەرگیز كەس سەیریشی نەدەكرد.

سێ تەلەفونی كۆنی نۆكیاو سامسۆنگی لە تەنیشت دانرابوو، ئەوەی رونكردەوە كە لەبەر دۆخی ئەمنی نابێت كەس مۆبایلی ئایفۆن لە تەنیشیتیدا بەكار بهێنێت، كاتژمێرێكی هاوشێوەی كاتژمێری سەربازە ئەمریكییەكان لە عێراق‌و ئەفغانستان لەدەستیدا بوو، لەو خەیاڵانەدا بووم كە ئەگەر پۆلیسی توركیا پێشمان لێبگرن چی روودەدات؟

ئەكرەم دەستی بە لێخوڕینی ئۆتۆمبێل كردو بە تاریكیدا دەستی بە لێخوڕینی ئۆتۆمبێل كرد بە سنوورەكانی توركیاو كەوتینە ڕێ، جار جار چاومان بە چەند گوندێكی ناوچەكە دەكەوت، دەشمانتوانی دەنگی “با” ببیستین، دەمویست ئەمانە بكەمە یادگاری، بەڵام لەگەڵ ئەبویوسف كەوتینە گفتوگۆكردن.

ئەو كە زۆر بە نەرمی‌و هێدی هێدی دەستی بە قسەكردن كرد، هەوڵی دەدا رەگەزی مەراكیشی بشارێتەوەو ئەوە ئاشكرا نەكات‌و ئەوە بڵێت كە لە كوێی ئەوروپاوە هاتووە، بەڵام لەوە تێگەیشتم كە تایبەتمەندییەكانی لە هاووڵاتیانی باكوری ئەفریقا دەچێت، كاتێك بە زمانی عەرەبی مەراكیشی دەستم بە قسە كردن كرد، ئەو تێگەیشت كە ئاماژەی بە تێگەیشتنەكەی كرد.

ئەوە ئاشكرا بوو كە لە مەراكیش لەدایك بووە، بەڵام هەر لە منداڵیەوە لە هۆڵەندا ژیاوەو بە پێكەنینەوە وتی، ئەگەر دەتەوێ فەرەنسیش تاقی بكەیتەوە قسە بكە؟ بە هۆڵەندیش قسەی كرد و دواتر لەوە تێگەیشتم كە بەشی ئەندازیاری تەواو كردووە.
بە درێژایی كاتەكە، بۆچوونی خۆی روون كردەوە، كە داعش موسڵمانان لە فەلەستینەوە تاكو مەراكیش و تاكو ئیسپانیا رزگار دەكات، دواتر هەوڵێكیتر دەدات تاكو ئاڵای ئیسلام لە سەرتاسەری جیهان هەڵبكات، هەركەسێكیش بەرگری بكات بە دوژمن حسابی بۆ دەكات.

ئەبو یوسف وتی، ئەگەر ئەمریكا گوڵمان پێشكەش بكات ئێمەش گوڵیان پێشكەش دەكەین، بەڵام ئەگەر ئاگر بڕژێنێت بەسەرماندا، ئێمەش بە ئاگر وەڵامیان دەدەینەوە، ئەویش نەك لێرە بەڵكو لەخاكی خۆشیان بێت، لەگەڵ هەر وڵاتێكی رۆژئاوایش هەمان بۆچوونمان هەیە.

ئەبو یوسف بە منی وت، داعش بنكەو بارەگای گەورەو فراوانی هەیە، لە راستیدا ئەم گروپە پێش خۆئاشكراكردنی زۆر بە نهێنی كارەكانی خۆی رایی كردووە، ئەو كەسانەی كە خوێندنیان تەواو كردووە لە وڵاتانی ئەوروپا، ئەفسەرانی ئاسایش لە هێزەكانی سەرۆكایەتی كۆماری سەدام حسێن و بەرپرسانی پێشووی عێراق راهێنانیان بینیوە.

وتیشی، ئێمە لە سەرتاسەری دونیا خەڵكمان هەیە، هەر لە بەریتانیاوە كە بڕوانامەی بەرزیان هەیە تاكو دەگاتە پاكستان‌و سۆماڵ‌و یەمەن‌و تەنانەت لە كوەیتیش.

لە ئەبو یوسفم پرسی چ شتێك هۆكار بوو كە بێیتە ناو ئەم گروپەوە؟ ناوبراو وتی، لە دوو ڕووی حكومەتەكانی رۆژئاوا بێتاقەت بووم، لەوەی كە لە مافەكانی مرۆڤ‌و ئازادی ئایینی قسەیان دەكرد، بەڵام ئەو موسڵمانانەی كە لەوێ نیشتەجێ بوون هەمیشە بە نمرە دوو حسابیان بۆ دەكرا.

پێشی وتم، ببینن بزانە چۆن لە ئەوروپاوە وڵاممان دەدرێتەوە، من دەمویست لە هەمان ناوچەی خۆم نیشتەجێم بمێنمەوە كە گەورە بووم، بەڵام هەستم پێی دەوتم، تۆ تەنها موسڵمانێكی‌و مەراكیشیت‌و هیچ كات قبوڵ ناكرێیت.

وتیشی، هێرشی ئەمریكا بۆ سەر عێراق لە ساڵی 2003 زۆر نامەردانە بوو، چونك هیچ چەكێكی كۆمەڵكوژ لە عێراقدا بوونی نەبوو، عێراقییەكان لە ئەبوغرێب ئەشكەنجە دەدران، ئەمانەش هیچ كاریگەرییەكی لەسەر ئەمریكا نەبوو.

منیش پێم وت، ئێوە دەڵێن ئێوە لەگەڵ ئەوانەدا نین كە خەڵكی بێ تاوان بكوژرێت، ئەی بۆچی خۆتان خەڵكی بێتاوان دەكوژن‌و لەناویان دەبەن؟

چەند چركەیەك بێ دەنگ بوو، دواتر وتی، هەموو ووڵاتێك چانسی ئەوەی هەیە كە هاووڵاتییەكانی ئازاد بكات، ئەگەر نەیكات، كێشەی خۆیانە، ئێمە هیچكات هێرشمان بۆ سەر ئەوان نەكردووە، بەڵكو ئەوان هێرشیان بۆ سەر ئێمە هێناوە.

منیش وەڵامم دایەوە، “كاتێك ئێوە هاووڵاتیان بە بارمتە دەگرن ئیتر چاوەڕێی چی دەكرێت؟”

ئەوكاتە دەستی كرد بە گێڕانەوەی چیرۆكی باپیرە مەراكیشیەكەی كە بۆ بەدەستهێنانی ئازادی لەبەرانبەر داگیركارانی فەرەنسی جەنگاوە، وتیشی، ئەو جیهادە هەمان ئەم جیهادەی ئێستایە، هەموو ئەمانە ئەنجامی داگیركاری عێراقە لەلایەن ئەمریكاوە، ئێستاش ئێمە سەرقاڵی جیهادین تاكو جیهانی ئیسلام رزگار بكەین.

منیش وتم، باپیرەی منیش لە مەراكیش یەكێك بوو لە جەنگاوەران، ئەوكات من كچێكی بچكۆلە بووم بۆی دەگێڕامەوە، سەبارەت بەو جیهادە قسەی زۆری بۆ كردبووم، بەو شێوەیە كە چۆن موسڵمانان لەگەڵ جولەكەكان لە دژی فەرەنسا جەنگاون تاكو دەریان بكەن لە وڵات.
وتم، باپیرەم دەیوت، من ژن و منداڵ یاخود سەربازەكانم نەكوشتووە، لە جیهاددا هیچ كات ئیجازەی ئەوەمان نییە، شۆڕشەكەی ئەو هیچ هاوشێوەیەكی لەگەڵ كارە وەحشی‌و مەترسیدارەكانی داعشدا نەبوو؟

وتیشم، “بەڵام ئەو لە وڵاتی خۆی بوو، ئێرە وڵاتی ئێوە نییە”.

ئەوەشم پێ راگەیاند، منیش وەكو ئێوە لە ئەوروپا گەورە بووم، وەكو ئێوە لە ئەوروپا خوێندنم تەواو كردووە.

ئەویش پرسی، “بۆچی هێشتا لەسەر ئەو بڕیارەی كە ئەوروپا زۆر دادگەرو بە ویژدانن؟”

منیش وتم، شوێنگرەوەی ئەوە چییە؟

ئەویش وتی بەدیلەكەی “خەلافەتە”.

بابەتەكەمان خەریك بوو دەبوویە بابەتێكی كەسی، بەڵام جیاوازییەكی زۆرمان هەبوو، ئەوەی من بیرم لێدەكردەوە ئەو رێگایە نەبوو كە ئەو رێگایەكی دروست بۆ ژنێكی موسڵمان هەیبوو.

لێی پرسیم، بۆچی ئەم كار لەگەڵ خۆت دەكەی؟ لە راستیدا ئەو رێزەی كە ئەوروپا لە ئێمە دەگرێت راستە؟ ئەوەی ئێمە راستەو یەكسانییە كە دەیكەین، مەبەستی رێكخراوی داعش بوو؟

پێشی وتم، “پێشینەتم خوێندویتەتەوە، لەگەڵ سەرۆكی قاعیدە لە مەغریب گفتوگۆت كردووە، بۆچی تەنها پەیامنێری؟ بۆچی بەرنامەیەكی تەلەفزیۆنیت لە ئەڵمانیا نییە؟ لەگەڵ ئەو هەموو خەڵاتەی كە وەرتگرتووە، بۆچی لە كارەكەتدا لە ئەڵمانیا بەرەو پێشەوە نەڕۆیشتووی؟”

نەمدەتوانی وای دەربخەم كە لە مەبەستەكەی تێناگەم، گەورە بوون لە شوێنێك‌و گەیشتن بە پیشەیەكی تایبەت بە ناونیشانی موسڵمانێك لە ئەوروپا زۆر جاران زۆر ئاڵۆزو دژوار بوو، من سەرپۆش نادەم بەسەرما بە لیبراڵ‌و فێمێنیست حسابم بۆ دەكرێت، لە نووسینی كتێبێك سەبارەت بە كەوتنی ئاخرین نازییە زیندووەكان كە لە ژیاندا ماون هاوكار بووم، لە چەندین بابەتی جیاواز لە ئەمریكا خەڵاتی تایبەتم وەرگرتووە، بەڵام ئەبو یوسف ئەومافەشی هەبوو، من لە ئەڵمانیا بەرنامەی تەلەفزیۆنیم نییە.

بە هەر حاڵ بە تەواوەتی پێچەوانەی ئەبو یوسف بووم كە خەلافەتی بە رێگا چارە دەزانی، بەڵام ئەوە لە بیرمدا نەڕۆیشتە دەرەوە، كە كۆمەڵگەو سیاسەتمەدارانی رۆژئاوایی لە رێرەوی جێبەجێكردنی ئەو سیاسەتانەی كە هەیانە هیچ هەنگاوێك نەهاتونەتە پێشەوە، دامەزراندنی ئاسایشی گشتی كە رێگرییەكی زیاتر بۆ هاووڵاتیان دەستبەر دەكات رێگا چارەیەكی گونجاو نییە.

بە ئەبو یوسفم راگەیاند، لەوانەیە ئێوە لەسەر حەق بن، كە لەگەڵ بۆچونەكانی دونیا یەك ناگرنەوە، بەڵام ئەو شەڕەی كە ئێوە دروستان كردووە، جیهاد نییە، جیهاد ئەوە بوو كە ئێوە لە ئەوروپا بمانایەتەوەو لەپێش ئەوانەوە قسەتان دەكرد، ئەو كارە ناڕەحەتر بوو، ئێوە ئاسانترین رێگاتان هەڵبژاردووە.

بۆ چەند چركەیەك هەردوكمان بە بێ دەنگی ماینەوە.

ئەبو یوسف تەئكیدی لەوە كردەوە كە دەبێت پێش ئەوەی ئەو بگەینەوە شوێنی خۆی، دەبێت من بەرنەوە بۆ ئەنتاكیاو سوپاسم كردو لە ئۆتۆمبێلەكە هاتمە خوارەوە.

تەنات لەم كاتانەدا چایخانەكان پڕ بوون لە هاووڵاتیان و پێش خۆرهەڵاتن سەرقاڵی نان خواردن بوون (پارشێو).

زۆر رازی بووم لە چاوپێكەوتنەكە، بەڵام لەوەش نیگەران بووم كە ئەبو یوسف چۆن بەو دڵنیاییەوە قسەی دەكرد، ئەو دەیوت، هەر كەس هێرشمان بكاتە سەر لەنێو دڵی وڵاتەكەی هێرشی دەكەینە سەر، گرنگ نییە ئەگەر ئەمریكا بێت یان فەرەنساو بەریتانیا بن هەر وڵاتێكی عەرەبی بێت.

لەپێش خۆمەوە دەموت خەریكە مرۆڤەكان وردە وردە لەدەست دەدەین، ئەم پیاوە دەیتوانی پیاوێكیتر بێت‌و دەشیتوانی ژیانێكی تری هەبێت.

چاوپێکەوتن

سەعدی پیرە: یەكێتی بە بەری مام جەلالدا دوراوە بۆ هیچ كەسێكی تر نابێت

خەڵك- ئەحمەد عەبدوڵڵا

سەعدی پیرە وتەبێژی فەڕمی یەكێتی نیشتمانی كوردستان پێیوایە، دەبێت گۆڕانكاری بكەن و جارێكی دیكە یەكێتی لەگەڵ دۆخی ئێستادا بگونجێنن “یەكێتی كراسێكە بە بەری مام جەلالدا دوراوە و بۆ بەری هیچ كەسێكی تر نابێت”.

وتەبێژی فەڕمی یەكێتی لە چاوپێكەوتنێكدا لەگەڵ (خەڵك) باس لەوەشدەكات، بەهۆی هەڵبژاردنی سەرۆك كۆمارەوە ساردی كەوتۆتە نێوان پەیوەندییەكانی یەكێتی و پارتییەوە، بەڵام جارێكی دیكە ڕێكدەكەونەوە و ئەوەشی ڕووی داوە “بووە بەشێك لە مێژوو”.

سەبارەت بە دانانی دوو جێگر بۆ سەرۆكی حكومەتی هەرێم لە كابینەی نوێدا ناوبراو بە پێكەنینەوە دەڵێت”با چوار جێگری هەبێت”.

خەڵك: دوێنێ‌ تەلەفۆنم بۆ كردی بۆ چاوپێكەوتنەكە، وتت لە بەغدادیت، حەزدەكەم لەوێوە دەستپێبكەین، گفتوگۆتان كرد لەگەڵ لایەنە عێراقییەكان، بەتایبەتی چەند  پرسێكتان یەكلایی نەكردۆتەوە، وەك پارێزگاری كەركوك و وەزیرێك بۆ یەكێتی لە كابینەی نوێی عێراقدا؟

سەعدی پیرە: سەردانی ئەمجارەم بۆ بەغداد پەیوەندی بە گفتوگۆكردن لەسەر وەزارەت و پارێزگاری كەركوكەوە نەبوو، بەڵكو پەیوەندی بە سەفەرێكەوە هەیە كە من بڕیارە سەردانی چین بكەم و نوێنەرایەتی یەكێتی بكەم لە دوای 20ی مانگ. مەسەلەی وەزیر و پۆستێكی وەزاری، تائێستا كۆتایی نەهاتووە، هەشت وەزارەت ماوە و یەكێك لەو وەزارەتانەش بەر یەكێتی دەكەوێت و باس لەوەدەكرێت، وەزارەتی داد بێت و كاندیدی یەكێتیش ئامادەیە.

خەڵك: سەبارەت بە دەستپێكردنی گفتوگۆ بۆ پێكهێنانی كابینەی نوێی هەرێم گەشتونەتە كوێ‌، بەتایبەتی لەگەڵ پارتیدا، چونكە پارتی لەزاری چەند بەرپرسێكی باڵاوە رایگەیاندووە، سەردەمی 50 بە 50 لەگەڵ یەكێتی تەواو بووە؟

سەعدی پیرە: بەو جۆرە نییە، ئێوە متمانەپێكراو “امین” نین لە گواستنەوەی قسەكانی پارتی، بەرپرسی باڵایان واینەوتووە، خەڵكێك لە ناو پارتی وایوتووە، بەڵام تۆ بۆچونی یەكێتی لە مەیدانی ماستەكە وەردەگریت، یان لە منی وەردەگریت، ئێمە ئەو بۆچونەمان لە هیچ بەرپرسێكی باڵا و فەرمی پارتی گوێ لێنەبووە. بە پێچەوانەوە ئەوان دەڵێن، یەكێتی و پارتی لە رابردوو، لە خۆشی و ناخۆشی پێكەوە بووین و ئێستاش پێكەوە دەمێنینەوە. لە ئەنجامی دانانی سەرۆك كۆماری عێراق، ساردی كەوتۆتە نێوانمان، ئاساییە، ئێمە دوو هێزی جیاوازین، بەڵام دەبێت رێكبكەوین و ئەوەشی لە بەغداد روویدا، بوو بە بەشێك لە مێژوو.

خەڵك: هەستناكرێت بەو جۆرەش سادە و ساكار بێت كە بەڕێزت باسی دەكەیت، چونكە تەنانەت كەناڵە فەڕمییەكانی گۆڕانیش دەڵێن، یەكێتی نەرمی دەنوێنێت بۆ پارتی بۆ ئەوەی گۆڕان بەشداری نەكات و خۆی زۆرترین پۆست وەربگرێت لەگەڵ پارتی؟

سەعدی پیرە: دیارە ئاگاداری قسە فەڕمییەكانی گۆڕان و پارتی نەبویت لە سێ‌ چوار رۆژی پێشوودا.

خەڵك: زۆر ئاگادارم و ئەوە قسەی فازڵ میرانی، سكرتێری مەكتەبی سیاسی پارتییە، كە وتی “بەپێی كورسی مامەڵە لەگەڵ یەكێتی ناكەین، بەڵام 50 بە 50ش نەما” ئەوەی پەیوەندی بە گۆڕانەوە هەبێت، كەناڵی “كەی ئێن ئێن” بڵاوی كردۆتەوە، كە زمانحاڵ و تەلەفزیۆنی فەڕمی گۆڕانە؟

سەعدی پیرە: كەواتە بەپێی كورسی نییە، حكومەت دروستكردن لەسەر بنەمای هاوپەیمانی جیاوازە لەگەڵ وانەی بیركاری، دەرسی بیركاری لێكدانەوەی ژمارەیە، بەڵام حكومەت دروستكردن، پێویستی بە بڕێك مێژوو، بڕێك خەبات، سیاسەت، هێز و ئابوری هەیە، هەروەها لە رووی جوگرافیاوە، بەهیچ شێوەیەك حكومەت بەبێ‌ پارتی و یەكێتی دروستناكرێت.

خەڵك: مەبەست ئەمری واقیعە، كە هەردوولایان زۆنی دەسەڵاتی خۆیان هەیە؟

سەعدی پیرە: تۆ تەنها لێكدانەوەی نەرێنی دەكەیت و منیش ئەوە قبوڵناكەم، لێكدانەوەی من وایە، ئێمە و پارتی دوو ئیدارە بووین، یەكمان گرتەوە، تائێستاش سیمای دوو ئیدارەیی هەیە و كۆتایی نەهاتووە، كەواتە چۆن یەكێتی دەتوانێت دەسەڵاتی بەسەر زۆنی زەرددا بسەپێنێت، بەبێ‌ پارتی، یان پارتی چۆن دەتوانێت دەسەڵات بسەپێنێت بەبێ‌ یەكێتی.

خەڵك: ئەی سەبارەت بە گۆڕان، چەند رۆژێكە دەڵێن، ئێوە لەگەڵ پارتی لە هەوڵدان بۆ ئەوەی گۆڕان بەشداری حكومەت نەكات، بۆ ئەوەی پێگەی خۆتان بە بەهێزی بمێنێتەوە؟

سەعدی پیرە: كێ‌ لە گۆڕان وای وت؟

خەڵك: چەند رۆژێكە لەرێگەی كەناڵی “كەی ئێن ئێن”ی زمانحاڵی ئەو حزبەوە دەوترێت.

سەعدی پیرە: قسەی فەڕمی گۆڕان لە كەی ئێن ئێن وەرناگرم، كاك عومەری سەید عەلی، كاك حەمە تۆفیق و برادەرانی جڤات دەتوانن قسە بكەن.

“سەرۆكی پەرلەمان و جێگری سەرۆكی حكومەت هی یەكێتین، سەرۆكی ئەنجومەنی وەزیران هی پارتییە”

خەڵك: لەسەر پۆستەكانی هەرێم قسەی جیاواز دەكرێت، بەڵام ئەوەی زۆر جێگای تێبینییە، باس لەوەدەكرێت لەوانەیە لەم خولەدا سەرۆكی حكومەت دوو جێگری هەبێت و ئێویش وەك یەكێتی رەتتانكردۆتەوە؟

سەعدی پیرە: با چوار جێگری هەبێت “بە پێكەنینەوە” سەرۆكی پەرلەمان و جێگری سەرۆكی حكومەت هی یەكێتین، سەرۆكی ئەنجومەنی وەزیران هی پارتییە، پارتیش وایوتووە، بەڵام هەر یەكلایی نەكراونەتەوە و باس دەكرێت، ئەوەیش زیاتر ئێوە وەك راگەیاندن باسیان دەكەن. ئەمانە بنەمای راستیان نییە، كۆبونەوەی فەرمی نەكراوە، لە راگەیاندنەوە یەكتر ئاگادار ناكەینەوە.

خەڵك: ئەی لە كۆبونەوەی فەرمی باسنەكراوە، چۆن بەرێزت ئەوەندە دڵنیایت پۆستەكانی سەرۆكی پەرلەمان و جێگری سەرۆكی حكومەت بۆ ئێوە دەبن؟

سەعدی پیرە: كاكە من دەمێكە سیاسەت دەكەم، قاعیدەی سیاسی وایە، هێزی یەكەم، دووەم، سێهەم و چوارەم هەیە، ئەوانەی بەشداری دەكەن، یەكێتی و پارتی، ئەوانی تر دەڵێن، با سەیری بەرنامەكە بكەین. پۆستی یەكەم بۆ حزبی یەكەمە، كە سەرۆكی حكومەتە و پۆستی دووەم بۆ حزبی دووەمە لە سەرۆكایەتییەكان و پاشان جێگر و پۆستەكانی دیكە.

خەڵك: كاك سەعدی وەڵامی پرسیاری دوو جێگرەكەم وەرنەگرتەوە، بۆچونی فەرمی یەكێتی لەسەر پێشنیازی دوو جێگری چیە؟

سەعدی پیرە: بەفەڕمی باسنەكراوە، هەر كاتێك باسكرا، ئێمە قسە دەكەین، بەڵام پێموایە دوو جێگر و سێ‌ جێگر، ئەوە وردكردنەوەیە، ئێمە با پۆستەكان وردنەكەینەوە، ئەگەر دەمانەوێت لە رووی ئابورییەوە سود وەربگرین، چوار جێگر دابنرێت، هەر یەكەو نوسینگەی دەبێت و هەر یەكە و پاسەوان و خزمەتكار و خەرجی دەوێت، لەكاتێكدا هەرێم دۆخی ئابوری خراپە، جا ئەو كاتە حەقە بوترێت، ئەگەر چوار جێگرت هەبێت، بۆ دۆخت خراپە، یان وەزارەتەكانی تریش حەقوایە بچوكبكرێنەوە.

خەڵك: مەبەستت ئەوەیە، كە بەرپرس دابنرێت و پۆست دروستبكرێت و پاشان خانەنشین بكرێن، هەموو فشاری دارایی زیاتر دەكات، هەرچەندە ئێستا بەهۆی خانەنشینی پلەباڵاكانەوە گلەیی زۆر دەكرێت، پێتانوایە خانەنشینكردنی پلەباڵاكانیش هەمان بابەتن، یانی پێتانوایە ناحەقی زۆری تێدایە؟

سەعدی پیرە: دوو جۆرن، یەكێكیان مافی ئیداری خۆیانە، بەپێی ساڵانی خزمەت، لە یاسایی خانەنشینی عێراقدا باسكراوە. ئەوەی تریش بۆ هەندێك كەس كراوە، وەك بۆ پیاوێكی شۆرشگێڕی وەك عەزیز محەمەد بكرێت.

خەڵك: بەڵام یاساكەی هەرێم كێشەی زۆر گەورەی تێدایە، بەشێك لە وەزیر و پەرلەمانتارەكان لە تەمەنی 30 ساڵیدا خانەنشین كراون بە 6 ملیۆن دینارەوە؟

سەعدی پیرە: ئەوە دەبێت لە پەرلەمان چاكبكرێت و سیستمێك دابنرێت تەخشان و پەخشانی تێدا نەبێت و ئەگەر بدرێت بە كەسێك رەچاوی خزمەت بكرێت.

خەڵك: بابەتێكی تری گەرم سەبارەت بە یەكێتی كۆنگرەیە، لێدوانی جیاواز لەمبارەوە دەدەن، حەزدەكەم بۆچۆنی فەڕمی یەكێتی بزانم، بۆچی كۆنگرە زۆر دواكەوتووە و تائێستا هیچ وادەیەك بۆ بەستنی دیاری نەكراوە؟

سەعیدی پیرە: دەبوو ساڵانی 2013 یان 2014 كۆنگرەمان ببەستایە، بەڵام بەرێز مام جەلال نەخۆش كەوت. ساڵی 2014 لە مانگی 6، هێرشی داعش دەستی پێكرد، پاشان تا 2017 مایەوە، لەو ماوەیەدا قەیرانی دارایی و بابەتی ریفراندۆم دەستی پێكرد، 8 تا 9 ساڵ دەبێت كۆنگرەمان نەكردووە، بۆیە نابێت و 8 نەوەمان بێبەش كردووە لە داڕشتنی بەرنامەی یەكێتی و بەرنامەی 8 ساڵ پێش ئێستا پەیڕەو دەكەین. بۆ بەرنامەی نوێی یەكێتی دەبێت دەستەیەك هەڵببژێرێن و كارەكان جێبەجێ‌ بكەن. بەرنامە هەیە، بەڵام هێشتا وادەی كۆنگرە دیاری نەكراوە، ناتوانم زیاتر بە بەرێزت بڵێم.

خەڵك: بەپێچەوانەی بەڕێزتەوە، چەند بەرپرسێكی یەكێتی دەڵێن”چەند بەرپرسێكی باڵای یەكێـتی رێگرن لە كۆنگرە”؟

سەعدی پیرە: تۆ پێتوایە من لەبەرژەوەندی كێ‌ ئەو قسەیە دەكەم.

خەڵك: نازانم، بۆچونی چەند بەرپرسێكی دیكەی یەكێتی دەگوازمەوە بۆ بەڕێزت؟

سەعدی پیرە: دوای مام جەلال شاراوە نییە، یەكێتی كێشەی هەبوو لە نێو سەركردایەتیدا، ئەو كێشانە بە من و بە تۆ و بەو برادەریش كە ئەو قسانەی كردووە چارەسەرنابێت، لەوانەیە ئەوەی بە جەنابتی وتووە، خۆشی بەشێك بێت لە كێشەكان. كەواتە ئێمە چ سود لە كۆنگرەیەك وەردەگرین كە پچڕ پچڕ بێینە دەرەوە، دەبێت بە یەكگرتوویی بڕۆین و بە یەكگرتوویی بێینە دەرەوە.

 

“لەوانەیە پێویست بێت بۆ كۆنگرە رێككەوتنی پێشوەخت بكەین”

خەڵك: مەبەست ئەوەیە رێكەوتنی پێشوەختە بكەن، پێش كۆنگرە؟

سەعدی پیرە: لەوانەیە ئەوەش پێویست بێت، بەڵام ئێمە ناكۆكیمان هەیە، بەڵام خەریكە كێشەكان كەناڵیزە بكەین و یەكێتی بۆ كۆنگرە پێویستی بە ساڕێژكردنی كێشەكانی هەیە، پاشان بڕیار بدات.

خەڵك: دەوترێت بەشێكی كێشەكانتان چارەسەر كردووە، ئەوانەی پێشتر لە نێوان گروپەكانی یەكێتیدا هەبوو؟

سەعدی پیرە: دیزە بە دەرخۆنەمان كردووە، یان پێویستی سەپاندبێتی، لە ناو یەكێتی نەگەیشتونەتە رێكەوتن، ناتوانین كۆنگرە ببەستین. یەكێتی دەبێت هەموو بەرپرسەكانی كۆبكاتەوە و سود لەهێز و تواناكانیان وەربگرێت. ئەو یەكێتییەی دەبینرێت، كراسێكە بە بەری مام جەلال دوراوە  و بۆ هیچ كەسێكی تر نابێت، دەبێت ئێمە جارێكی تر دەستكاری یەكێتی بكەینەوە.

خەڵك: مەبەست ئەوەیە دەتانەوێت یەكێتی بە بەری خۆتان بدورن؟

سەعدی پیرە: نا مەبەستم ئەوەبوو، كە دەبێت دوای مام جەلال چۆن یەكێتی رێكبخەینەوە و ئیدارەی بكەین. یەكێتی رێكخراوێكی ئاسان نییە، یەكێتی بۆچونی جیاواز هەیە.

خەڵك: ئەو گۆڕانكارییانەی لە ماوەی رابردوودا بەسەر یەكێتیدا هات، چەند هەڤاڵێكتانی ئاشت كردەوە و هەندێكی لێ تۆراندن، تەنانەت برادەرتان هەیە لە مەكتەبی سیاسی دەوام ناكات؟

سەعدی پیرە: چاك دەبێت، ئەو شتانە لە نێو یەكێتیدا هەبوە، بۆچونی جیاواز هەیە و ئەوانەش تۆ باسیان دەكەیت خۆیان خاوەنی یەكێتین.

 

“گەمارۆكانی ئێران زیانی بۆ سەر یەكێتی دەبێت، بەڵام قابیلی چارەسەرە”

خەڵك: بابەتێكی تر سزاكانی سەر ئێرانە، پێتانوایە كاریگەری لەسەر یەكێتی دەبێت، بەتایبەتی لەرووی سیاسی و ئابورییەوە؟

سەعدی پیرە: لەسەر یەكێتی نا، لەسەر هەموو كوردستان، بە ئەمریكییەكانمان وت “نەتانوانیوە سزاكانی سەر مەكسیك جێبەجێ‌ بكەن”، ئەگەر مەبەستیان نە ڕۆیشتنی نەوت بێت بە تەنكەر كێشە نییە، بەڵام ناتوانرێت بەوردی كۆنتڕۆڵی سنورەكان بكرێت. بۆ یەكێتی زیانی دەبێت، بەڵام قابیلی چارەسەرە.

خەڵك: لە نێو یەكێتیدا دوو لیژنە دروستكران بۆ چاكسازی لە حزب و حكومەت، بەڵام شتێكی ئەوتۆتان نەكرد؟

سەعدی پیرە: نەخشەڕێگایەكمان هەبوو بۆ گۆڕانكاری. زۆرجار لایەنە سیاسییەكان، ئیش بۆ خەڵك دەدۆزنەوە، نەك خەڵك بۆ ئیش بدۆزنەوە و گۆڕانكاری لەسەر ئەو بنەمایە بكەین.

خەڵك: بەڵام هیچتان نەكرد؟

سەعدی پیرە: هیچمان نەكرد، چونكە ئەگەر لە حكومەت بیكەین، دەبێـت ئیدارە بگۆڕدرێت، ئەگەر لە حزب بێت، دەبێت كۆنگرە بكرێت. رەنگە پێویست بێت لەسەر ئاستی مەكتەبی سیاسی و سەركردایەتی و بەڕێوەبەرە گشتییەكان یان فەرماندەكان گۆڕانكاری بكرێت.

بەردەوام بە لە خوێندنەوە

چاوپێکەوتن

عەدنانی حەمەی مینا: لیژنەیەكی هاوبەش لە یەكێتی و هاوپەیمانی دروستكراوە بۆ گەڕانەوەی كادیرەكانی هاوپەیمانی

خەڵك- ئەحمەد عەبدوڵڵا

عەدنانی حەمەی مینا، ئەندامی سەركردایەتی یەكێتی دەڵێت، لیژنەیەكی هاوبەش لە نێوان یەكێتی و هاوپەیمانی بۆ دیموكراسی و دادپەروەری پێكهێندراوە بۆ گەڕانەوەی كادیرەكانیان بۆ نێو یەكێتی و بڕیارە لە چەند رۆژی داهاتوودا ژمارەیەكیان بگەڕێنەوە.

ئەو ئەندامەی سەركردایەتی یەكێتی لە چاوپێكەوتنێكدا لەگەڵ (خەڵك) باسی كێشەكانی حزبەكەی كردووە و رونیكردۆتەوە، كە بەشێكیان چارەسەركراون و هەندێكی تریان ماونەتەوە.

سەبارەت بە كۆنگرەیش رەتیدەكاتەوە، هیچ كەسێك رێگری لە كۆنگرە كردبێت و دەڵێت”هەلومەرجی كوردستان و كێشەكانی یەكێتی رێگرن و ئومێد دەكەين یەكێتی لە داهاتوودا كۆنگرە بۆ بەهێزبونەوە و یەكگرتنەوە بكات، نەك بۆ پشتگوێخستن”.

خەڵك: بەگشتی دۆخی یەكێتی چۆنە، بەتایبەتی دوای بەدەستهێنانەوەی ژمارەیەكی زۆری كورسی، هەرچەندە بۆچونێكیش هەیە، كە یەكێتی هەروەكجارانە و گۆڕانكاری ئەوتۆی تێدا نيیە و سەركەوتنەكەی راستەقینە نيیە؟

عەدنانی حەمەی مینا: یەكێتی نیشتیمانی كوردستان رابردوویەكی گەش و پرشنگداری هەیە. ئێمە حزبێكی سیاسین و لە دەسەڵاتیشداین، لەوانەیە لە ماوەی رابردوودا كێشە و كەموكورتیمان هەبوبێت، یان بەهۆی هەندێك بارودۆخی نەخوازراوەوە، لە ئەنجامی هەندێك بیركردنەوەوە. ئەو بۆچونانەیشی جەنابت باسیان دەكەیت، بەهۆی هەڵكشان و بەخۆداچونەوەی یەكێتییەوە دروستبوون، یەكێتی بەرنامەیەكی تازەی هەیە و خۆی رێكخستۆتەوە، ئەو هۆكارانەیشی كە پێشتر گرفت و كێشەیان لای هەندێك لە هەڤاڵەكانمان دروستكردبوو، ئەگەر نەڵێم هەمووی، بەشێكیان چارەسەركراون و هەوڵیش دەدرێت بچینەسەر شارێگای خۆمان و تەنها و تەنها بەرژوەندییەكانی یەكێتی و گەل لەبەرچاو بگرین و پێموایە لە داهاتوودا یەكێتی باشتر باوەش بۆ تێكۆشەرەكانی دەكاتەوە.

خەڵك: پەیوەندیتان لەگەڵ حزبە سیاسییەكان و بەتایبەتی لەگەڵ پارتی لەچی ئاستێكدایە، بەتایبەتی لەماوەی رابردوودا جۆرێك لە گرژی دروستبوو؟

عەدنانی حەمەی مینا: دەكرێت بەجۆرێكی تر باسی ئەم بابەتە بكەین، پێگە و مەوقیعی حزبەكان لەدەسەڵاتی ئێمەدا نیە، هەموو ئەو حزبانەى كوردستان بوونیان هەیە و پێویستە بەپێی پێگەیان مامەڵەیان لەگەڵ بكرێت. پارتی دیموكراتی كوردستان حزبێكی سیاسیە و ژمارەیە لە گۆڕەپانەكەدا و پێگەی هەیە، ناتوانرێت پێگەی پارتی لەبەرچاونەگیرێت، ئەگەر پارتیش نەبێت، هەر حزبێكی تریش بێت، تا ئاشتەوای و پێكەوەژیانیش هەبێت، لە بەرژەوەندی خەڵكی كوردستانە.

 پارتی حزبێكی سیاسيیە و ژمارەیە لە گۆڕەپانەكەدا و پێگەی هەیە، ناتوانرێت پێگەی  لەبەرچاونەگیرێت 

عەدنانی حەمەی مینا ئەندامی سەركردایەتی یەكێتی نیشتمانی كوردستان

خەڵك: بەرهەم ساڵح چۆن و بۆچی گەڕایەوە بۆ نێو یەكێتی؟

عەدنانی حەمەی مینا: مێژوو و خەباتی د.بەرهەم، مێژووی یەكێتی نیشتیمانی كوردستانە، ئەگەر تێبینیت كردبێت لەكاتی بانگەشەی هەڵبژاردندا، د.بەرهەم هیچی خراپی لەسەر یەكێتی نەوت، بەڵكو بەردەوام بە شانازییەوە باسی مێژووی یەكێتی دەكرد، بۆیە سروشتییە د. بەرهەم لەگەڵ یەكێتی گرفتی هەبوبێت و پاشان زەمینەیەك هاتووەتە پێشەوە و لەو گۆشەیەوە د. بەرهەم گەڕایەوە نێو یەكێتی، چونكە لە نێو یەكێتییدا ئاراستەیە هەبوو، لەچوارچێوەی یەكخستنی ماڵی یەكێتی.

خەڵك: بەڵام بۆچونێك هەیە بەپێچەوانەی ئەو قسانەی بەرێزتەوە، دەڵێت یەكێتی نەیتوانی كەسێكی شیاو بۆ ئەو پۆستە كاندید بكات، ناچاربوون بە گەڕانەوە بەرهەم ساڵح؟

عەدنانی حەمەی مینا: ئەو بۆچونە زۆر ناتەواوە، چونكە پێش كاندیدكردنیشی گفتوگۆ هەبووە بۆ چارەسەركردنی گرفتەكان، ئەو بڕیارە زادەی 24 كاتژمێر نەبوو. د.بەرهەمیش كەسێكی شیاوە و یەكێتیش دوای گەڕانەوەی د.بەرهەم، ئەوی بەباشترین كاندید زانیووە.

 

خەڵك: پەیوەندی یەكێتی لەگەڵ قەوارەی هاوپەیمانی لەچ ئاستێكدایە، دەوترێت هەوڵدەدەن بۆ گەڕانەوەی بەشێكی تر لە كادیرەكانیان كە پێشتر یەكێتی بوون؟

عەدنانی حەمەی مینا: لەوانەیە بەشێك لەو كادیرانە لەگەڵ د.بەرهەم بگەڕێنەوە، لە مەكتەبی رێكخستن و هاوپەیمانی لیژنەیەكی هاوبەش دروستكراوە، كار لەسەر ئەوەدەكەن، ئەوانەی كە پێشتر یەكێتی بوون، بگەڕێنەوە، هەروەها خەڵكیان هەیە یەكێتی نەبوون و دێنە نێو یەكێتی یان لەوانەیە خەڵكیشیان تێدایە نەیانەوێت ببن بە یەكێتی.

خەڵك: یەكێتی وەك حزب مامەڵە لەگەڵ هاوپەیمانی دەكات؟

عەدنانی حەمەی مینا: من ناتوانم ئەو قسەیە بكەم ئێستا، هاوپەیمانی قەبارەی چەندبێت بەو شێوەیە، هاوپەیمانی خۆی قەوارەیەكە و قەوارەكە هەیە، نە بەدەست یەكێتییە و نەبەدەست خەڵكی ترە، كە بمێنێت یان نەمێنێت، بچوك بێت یان گەورەبێت، ئەوە رۆژگار دەری دەخات.

خەڵك: زۆرجار باس لە كێشە ناوخۆییەكانی یەكێتی دەكرێت، ئەو كێشانە چارەسەركراون یان وەكخۆیان ماونەتەوە؟

عەدنانی حەمەی مینا: یەكێتی نەیشاردۆتەوە و یەكێتی بەردەوام كێشەكانی ئاشكرایە، حزبێكی شەفافە و كێشەی هەبووە، برادەرانی سەركردایەتی نەمانشاردۆتەوە و كێشەمان هەبووە، هەوڵدراوە ئەو هۆكارانەی بونەتەمایەی ئەو كێشانە چارەسەر بكرێن.

خەڵك: هەوڵدراوە، یانى چارەسەرنەكراون؟

عەدنانی حەمەی مینا: هەوڵدراوە و بەشێكیان چارەسەركراون، بەشێكیشیان ماون و هەمووی بەخێرای و لە كون فەیەكونێكدا چارەسەرناكرێن.

 یەكێتی بەردەوام كێشەكانی ئاشكرایە، حزبێكی شەفافە و كێشەی هەبووە، برادەرانی سەركردایەتی نەمانشاردۆتەوە و كێشەمان هەبووە 

خەڵك: زۆرجار باسی كۆنگرە دەكەن، هەمووتان بەگرنگی دەزانن، بەڵام دوای چەند ساڵێك بەسەر تێپەڕبوون بەسەر كاتەكەیدا هێشتا نەكراوە، بۆچی كۆنگرە ناكرێت و لەمپەرەكانی چین؟

عەدنانی حەمەی مینا: كۆنگرە بۆ هەر حزبێكی سیاسی زەرورەتێكی حەیاتییە، دەبێت كۆنگرە ببەسترێت لەكات و ساتی خۆیدا. كۆنگرەش هەمیشە بۆ نوێبونەوەی حزبە، بۆ دانانی بەرنامەی گونجاوە لەگەڵ واقیعدا بگونجێت، بەشێكی كەمیشی تەرخان دەكرێت بۆ ئەوەی سەركردایەتییەكی تر هەڵبژێرێتەوە، جا سەركردایەتییە، كۆن بێت، كۆن و نوێ‌ بێت، یان هەمووی نوێ‌ بێت، بۆیە یەكێتیش بەهۆی ئەو كێشانەی جەنابت باستكرد كۆنگرەی نەبەستووە، چونكە كاری لەپێشینەی هەبووە، وەك شەڕی داعش، كێشەمان لەگەڵ عێراق، قەیرانی دارایی، كاریگەریان لەسەر یەكێتی هەبووە، ئومێد دەكەین لە داهاتوودا كۆنگرەیەكی گونجاو ببەستێت، بۆ پشتگوێخستن نەبێت، بەڵكو بۆ یەكێتی ناو یەكێتی بێت.

خەڵك: دەوترێت چەند بەرپرسێكی باڵای یەكێتی رێگرن لە بەستنی كۆنگرە؟

عەدنانی حەمەی مینا: من ئەو بۆچونەم نیيە، بەڵكو واقیعی ناو یەكێتی وایخواستووە و بۆ ئەوەی رێگری لە گەورەبوونی كێشەكانی یەكێتی بكرێت، لەگەڵ ئەو هۆكارانەی كە پێشتر باسمكردن پێكەوە رێگری بەستنی كۆنگرەبوون، یەكێتی پێیوابووە ئەگەر كۆنگرە بەو شێوەیە بكرێت، لەوانەیە زیانی لێبكات. هەموو لایەنێكی سیاسیش بیر لە قازانج زیاتر دەكاتەوە، لەوانەیشە هەندێك شتی تایبەتیشی تێكەڵاو كرابێت، بەڵام لای زۆرینەی یەكێتی كۆنگرە بۆ بەهێزكردنە.

 بەشێكی كەمی كۆنگرە تەرخان دەكرێت بۆ ئەوەی سەركردایەتییەكی تر هەڵببژێرێتەوە، جا سەركردایەتییەكە، كۆن بێت، يان كۆن و نوێ‌ 

عەدنانی حەمەی مینا گفتووگۆ لەگەڵ ئەحمەد عەبدوڵڵا رۆژنامەنووسی (خەڵك)دا دەكات

خەڵك: بابەتی بەشداری یەكێتی لە حكومەتدا زۆر باس دەكرێت، چۆن لەو بابەتە دەڕوانن و هیواخوازن حكومەتی داهاتوو چۆن بێت؟

عەنانی حەمەی مینا: هیوادارم كابینەی خزمەتكردنی خەڵكی بێت و داهاتەكەی بۆ خزمەتی خەڵك بێت، هیوادارم ئەو داهاتەی هەیەتی بخاتەخزمەتی خەڵكەوە و دەرسمان لە هەڵەكان وەرگرتبێت و بە قەدەر بەڕەكەی خۆمان پێمان رابكێشین.

خەڵك: یەكێتی بەشداری حكومەتی داهاتوو دەكات و باستان لە وەرگرتنی هیچ پۆستێك كردووە لە ئەنجومەنی سەركردایەتی؟
عەدنانی حەمەی مینا: یەكێتی بەفەرمی ئەنجامی هەڵبژاردنی قبوڵ كردووە، حزبی دووەمە لەسەر ئاستی هەرێمی كوردستان. چۆنیەتی بەشداریكردنی بەندە بەو گفتوگۆیانەی كە بۆ پێكهێنانی حكومەتی هەرێم ئەنجام دەدرێن.

خەڵك: لە ماوەی رابردوو بەرپرسی چەند مەڵبەندێك گۆڕان و دەوترێت پەیوەندی بە ململانێی نێو یەكێتییەوە هەبووە، بەرێزیشت یەكێك بوویت لەو بەرپرسانی لە پۆستەكەدا نەمایت یان خۆت وازت هێنا؟

عەدنانی حەمەی مینا: لە كۆبونەوەی سەركردایەتی لە هەولێر پێش ئەوە داوام كرد ناچمەوە بۆ ئەوێ‌ و برادەرێكی تر دابنێن. بەنسبەت گۆڕینی بەرپرسی مەڵبەندەكانی چەمچەماڵ و گەرمیانیشەوە، ململانێ نيیە، مەڵبەندی گەرمیان ئەندامێكی سەركردایەتیان بۆ ناردووە و بەرپرسەكەی پێشوویش تێكۆشەرێكە و كاری زۆری كردووە.

خەڵك: بەڵام لەوكاتەدا وابڵاوكرایەوە، كە بەرێزت ئامادەنەبویت تەقە لەخۆپیشاندەران بكەیت و دەستتلەكاركێشاوەتەوە، ئەو كاتەی خۆپیشاندەران لە رانیە ویستیان مەڵبەند بسوتێنن؟

عەدنانی حەمەی مینا: ئەو كاتە من نەخۆش بووم، كە من چووم رووداوەكە روویدابوو، ئێستایش هەمان شت دەڵێمەوە و خوێنی گەنجێك لای من گرنگترە لە بارەگایەك، ئەو شەوە بەیاننامەیەكم بڵاوكردەوە و یەكێتی بۆ ئەوە دروستبووە لەسەنگەری خەڵكدا بێت، نەك تەقە لە خەڵك بكات.

خەڵك: لە ماوەی رابردوودا لیژنە دروستكرا، بۆ چاكسازی لە نێو حزب و حكومەتدا، بەڵام لیژنەكان هیچیان پێنەكرا، بەرپرسێكی یەكێتی وتی مەكتەبی سیاسی رێگربوون؟

عەدنانی حەمەی مینا: ئەندامی لیژنەی گۆڕانكاری لە حكومەت بووم، بڕیارمان نەبووە دەموچاو بگۆڕین، بۆ پڕكردنەوەی بۆشایی بووە، هەروەها ئەگەر بەبەڵگە بەرپرسێك شتی لەسەر سەلمێندرا، ئەوا كەسێكی شیاو دابنرێت، بەڵام هەندێكی نەكرا.

خەڵك: مەكتەبی سیاسی رێگر نەبوون؟

عەدنانی حەمەی مینا: نەمبیستووە.

خەڵك: لە ماوەی رابردوودا گلەيی زۆر لە چەند بەرپرسێكتان كرا، دەوترێت ناتوانرێت ژمارەیەك بەرپرسی یەكێتی بگۆڕدرێن؟

عەدنانی حەمەی مینا: نا وانيیە، ئەگەر حزبێك نەتوانێت چەند بەرپرسێك بگۆڕێت بۆچی حزبایەتی دەكات، بەڵام ناكرێت ئەگەر من كەسێكم پێ قبوڵ نەبوو، بڵێم بیگۆڕن و بگۆڕدرێت، پێشتر جەنابت پرسیارت كرد، كە گۆڕانكاری كراوە و ململانێ‌ بووە، ئێستا دەڵێت ناتوانێت چەند كەسێك بگۆڕێت، ئەگەر بیگۆڕە ململانێی و ئەگەر نەیگۆڕێت، ناتوانێت بیگۆڕێت!

خەڵك: بیستومە لە ناو گۆڕانكارییەكان لە هێز پێشمەرگەدا، لەوانەیە بەرێزت پۆستێكی باڵای سەربازی وەربگرێت؟

عەدنانی حەمەی مینا: نەمبیستووە، من كادیری یەكێتیم، چاوم لە پۆست و پلە نەبووە و یەكێتی لە هەر شوێنێك پێویستی بە من بێت لەوێ‌ دەبم.

بەردەوام بە لە خوێندنەوە

چاوپێکەوتن

ئارام قادر: ئەوەی بەرامبەر هاوپەیمانی دەكرێت، سیناریۆی هەڵبژارنە‌و بۆ شەرعیەتدانە بە ساختەكاری

خەڵك-سەعد مەلا عەبدوڵڵا گوڵپی

ئارام قادر ئەندامی دامەزرێنەری هاوپەیمانی بۆ دیموكراسی و دادپەروەری لە دیمانەیەكی تایبەتی (خەڵك) دا ئاماژە بۆ ئەوە دەكات، ئەنجامی هەڵبژاردنەكان واقیعی سیاسی و جوگرافیای سیاسی لە هەرێمی كوردستان دەگۆڕێت، ئاشكراشیكرد، ئەنجامی هەڵبژاردنەكان چاوەروان نەكراو دەبێت و خەڵك تووشی شۆك دەكات بەتایبەت لایەنە سیاسییەكان.

خەڵك: لە ئێستادا دەتانەوێ بەشێوازی پێشوو درێژە بە هاوپەیمانی بدەن یاخود بەشێوازێكیتر و گۆڕانكاری دروست بكەن؟
ئارام قادر: هاوپەیمانی بریتییە لە پڕۆژەیەكی فیكری سیاسی، دیدگایەكی نوێیە لە كاری سیاسی، بریتییە لە كلتورێكی تازە لە نەریتی سیاسی، هاوپەیمانی بەردەوام دەبێت هەرچەندە سەرۆكی هاوپەیمانی گەڕاوەتەوە نێو یەكێتی، بەڵام بەدڵنیاییەوە هاوپەیمانی لەبەر ئەوەی كۆمەڵێك خەڵكی پاشخانی جیاوازی تێدا بووە هەموو كۆبونەتەوە لە چوارچێوەی ئەو پڕۆژە مەدەنییە كە لە چوارچێوەی بزاڤێكی كۆمەڵایەتی مەدەنیدا خۆی دەبینێتەوە، ئێمە درێژە دەدەین بە خەباتی سیاسی خۆمان لەو چوارچێوەیەدا و هیواو ئومێدمان وایە كە ئەم پڕۆژەیە فراوان بكەین و بەهێزتری بكەین لە داهاتوودا، چونكە ئێمە ئەم پرۆژەیە بە تاكە چارەسەر دادەنێین، لەبەر ئەوەی هەرێمی كوردستان لەسایەی ئەو حزبانەی كە ئێستا لە هەرێمدا كار دەكەن هەمیشە هەوڵیان داوە ناكۆكیەكان قوڵ بكەنەوە، بەڵام گوتاری هاوپەیمانی دەیەوێت ناكۆكییەكان بگۆڕێت بە راجیایی ‌و را جیاجیاكانیش ببێتە ململانێی سیاسی، نەك ناكۆكی و قوڵكردنەوەی را جیاوازەكان لە هەرێمی كوردستان.


خەڵك: بەهەمان دیدگای پێشوو بەردەوام دەبن؟
ئارام قادر: بە هەمان دیدگا بەردەوام دەبین و هەوڵ دەدەین ئەو دیدگایانەش دەوڵەمەندتر بكەین، چونكە پێشبینی دەكەین هەرێم بەرەو قەیرانی گەورەتر و قوڵتر دەڕوات، بەداخەوە ئەویش لەسایەی ئەو حوكمڕانییەی ئێستا هەرێم بەڕێوەی دەبات كە كۆمەڵیك قەیرانی بۆ هەرێمی كوردستان دروست كردووە لە رووی سیاسی و ئابووری و كۆمەڵایەتییەوە كە ئەوەش دەخوازێت ئێمە بیر لە چارەسەرێكی جددی بكەینەوە، لەو بڕوایەداین ئەو دیدگاو بیروبۆچونەی هاوپەیمانی بە فاكتەری سەرەكی دادەنرێت بۆ سەقامگیری هەرێمی كوردستان.

خەڵك: پێتان وایە ئەوەی باسی دەكەیت بتوانن فراوانی بكەن، لەكاتێكدا بەرهەم ساڵح گەڕاوەتەوە نێو یەكێتی، یان گەڕانەوەی ناوبراو كاریگەری لەسەر كەسایەتی مەعنەوی هاوپەیمانی دروست نەكردووە؟
ئارام قادر: هەر هاودیدێك لە هاوپەیمانی بڕواتە نێو لایەنێكی تر یاخود بێئومێد بێت لەكاری سیاسی و وازی لێبهێنێت ئێمە پێی نیگەرانین، بەدڵنیاییەوە زیانیشی دەبێت، بەڵام هاوپەیمانی توانای ئەوەی هەیە ئەو زیانە چارەسەر بكات و ئەو برینە ساڕێژ بكات، چونكە ئێمە بە ئومێدەوە دەڕوانینە داهاتوو وە بنەمای هاوپەیمانیش بریتییە لەو تێروانین و دیدگایە كە پەیوەست نییە بە كەسایەتی و گروپێكەوە، بەڵكو بریتییە لە دیدگایەكی رۆشنبیری فیكری كە خەڵك پێویستی بەو دیدگا نوێیە هەیە لە هەرێمی كوردستان بۆ ئەوەی بتوانین هەرێمی كوردستان و هاووڵاتیانی كوردستان رزگار بكەین لەو بارودۆخە ناهەموارەی كە ئێستا تێیكەوتووە.

خەڵك: دەسەڵاتدارانی هەرێم كار لەسەر بردنی هاودیدان دەكەن، ئەمە كاریگەری لەسەر دواخستنی كاری سیاسی ئێوە ناكات؟
ئارام قادر: وەك پێشتر ئاماژەم پێكرد زیانی دەبێت، بەڵام ئەوەش بەدیاردەیەكی سروشتی دەزانم، چونكە حزبە سیاسیەكانی كوردستان لە هەرێم ململانێی یەكتری دەكەن، ململانێیی ئەوە دەكەن لە ساحەی هەرێمی كوردستان زۆرترین ئەندام و لایەنگریان هەبێت، هاوپەیمانیش كۆمەڵێك دەستەبژێری جوان و بەهێزی هەیە بەتایبەت لەناو توێژی گەنجەكاندا، حزبەكانی تر دەیانەوێ سود لەو توانا و وزانە وەربگرن، بەڵام ئەوەی ئێستا لەم كاتەدا زیاتر بریتییە لە كۆمەڵێك سیناریۆ كە لە هەڵبژاردنەكانی پێشووش دوبارە بوەتەوە، ئێستاش ئەوە سیناریۆی هەڵمەتی هەڵبژارنە بۆ بەهێزكردنی پێگەی خۆیان و بۆ شەرعیەتدانیشە بە ساختەكاری لە هەڵبژاردنەكان.

خەڵك: پەیوەندیتان چۆنە لەگەڵ ئەو لایەنانەی كار لەسەر بردنی هاودیدەكانتان دەكەن؟
ئارام قادر: ئێمە لە هاوپەیمانی بڕوامان بە دیالۆگی نیشتمانی هەیە، ئەمەش بە مانای ئەوە نایەت ئێمە رەخنە نەگرین یان رازی بین لە تێڕوانین و بۆچونیان، بەڵكو دەمانەوێ لەجیاتی ناكۆكی، ململانێی سیاسی دروست ببێت لە چوارچێوەی ململانێی سیاسیدا، بەشێویەك هەر لایەنێك هەوڵ بدات كار و خەباتی خۆی بكات ‌و سیاسەتی خۆی پیادە بكات، بەڵام لەگەڵ ئەوەشدا دەبێت ئێمە ئاگاداری ئەوە بین كوردستان پێویستی بە قوڵكردنەوەی ناكۆكییەكان نییە بەڵكو پێویستی بە دیالۆگی نیشتمانی و گفتوگۆ هەیە بۆ ئەوەی هەرێمی كوردستان بخەینە سەر رۆخی سەقامگیری و ئەم بارە ناهەموارەی كە هاتووە چارەسەری بكەین.

خەڵك: دوو كورسییەكەی هاوپەیمانی لای ئێوە ماونەتەوە؟
ئارام قادر: ئەو دوو كورسییە بریتییە لە دەنگی دەنگدەرانی هاوپەیمانی و وەكو فراكسیۆنی هاوپەیمانی بەردەوام دەبێت و لە ئەنجومەنی نوێنەرانی عێراق وە نوێنەری هاوپەیمانی دەبن لە بەغدا.

خەڵك: سەرپشككراون لەسەر ئەوەی لەگەڵ بەرهەم ساڵح دەگەڕێنەوە یان نا؟
ئارام قادر: ئەگەر هەر كەسێك بچێتە نێو لایەنێكی تر، كەسێكی تر دەچێتە شوێنەكەی لەناو ئەنجومەنی نوێنەرانی عێراق.

خەڵك: هاوپەیمانی تاكە حزبە كە بایكۆتی هەڵبژاردنەكانی كردووە، ئەوەی دەخوێندرێتەوە دەوترێت رێكەوتنی نێوان حزبە دەسەڵاتدارەكان و هاوپەیمانییە، لەكاتێكدا بەرهەم ساڵح بڕیارەكەی داوە؟
ئارام قادر: نەخێر، پێش ئەوەی باسی سەرۆك كۆمار بكرێت، ئەو بڕیارە دراوە كە ئێمە بەشداری لە هەڵبژاردنەكانی پەرلەمانی كوردستان نەكەین، ئەویش لە سۆنگەی ئەو قەناعەتەمانەوە بوو كە ئەمجارە ساخەتەكارییەكی زۆر زۆر گەورە دەكرێت لە هەرێمی كوردستان بەجۆرێك دەرئەنجامەكانی چاوەڕوان نەكراوە و دەبێت و خەڵك تووشی شۆك دەكات بەتایبەت لایەنە سیاسییەكان، داواشمان لە گۆڕان و كۆمەڵ و یەكگرتووش كرد بایكۆت بكەن، چونكە دەرئەنجامی هەڵبژاردنەكان دەرئەنجامێكە واقیعی سیاسی و جوگرافیای سیاسی لە هەرێمی كوردستان دەگۆڕێت، لەبەرئەوە بەشدارینەكردنی ئێمە لە هەڵبژاردن هیچ پەیوەست نییە بە پرسی پۆستی سەرۆك كۆمار.

خەڵك: ئەو لایەنانەی باست كرد ئاگاداری ئەو دۆخەن كە ساختەكاری گەورە دەكرێت؟
ئارام قادر: بەدڵنیاییەوە ئاگادارن، چونكە ئێمە دووجار لەگەڵ كۆمسیۆن كۆبووینەوە و نوێنەری گۆڕان و كۆمەڵ و یەكگرتووش ئامادەبوون، بەڵام ئەوان بڕیارێكی سیاسیاندا كە بەشدار دەبن، ئێمەش پێمان باش بوو بایكۆتی بكەین و داواشمان لەوان كرد، بەڵام بەداخەوە ئەوان رای پێچەوانەیان هەبوو.


خەڵك: هاوپەیمانی لە رووی دارایی پشت بە چ لایەنێك و بوارێك دەبەستێت؟
ئارام قادر: ئێمە پێشتر پشتگیری مادیمان لەسەر دۆخی ناوخۆمان بوو، چونكە هاوپەپەیمانی یەكێك لە سیاسەتەكانی ئەوەیە كە كەمترین موچە خۆری هەیەو نامانەوێ نەریت و سیستمی حزبەكانی تر دووبارە بكەینەوە، كە زۆرترین موچەخۆریان هەیەو زۆربەی هاودیدانی ئێمە لەسەر بنەمای خۆبەخشی كار دەكەن و چالاكی دەكەن، ئەوەی موچە خۆرە رێژەكەی زۆر كەمە، جگە لەوەش نەمانویستووە بنكەو بارەگای زۆر دابنێن ئەم دوو فاكتەرە وایكردووە ئێمە خەرجییەكانمان كەم بێت، كە دەتوانرێت لە رێگای دۆست و هاوڕێكانمانەوە لە هەرێمی كوردستان پشتیوان و هاوكارمان بۆ بەدەستهێنانی ئەو خەرجییە.

خەڵك: واتە بودجەیەكی دیاریكراوتان نییە؟
ئارام قادر: نەخێر بودجەیەكی دیاریكراومان نییە و داهاتی دیاریكراویشمان نییە، بەڵكو ئێمە زیاتر لەسەر كۆمەك و پشتیوانی دۆستەكانی هاوپەیمانی كار دەكەین.

خەڵك: هاوپەیمانی دەزگای میدیایی هەبوو، ماڵپەری خەندانیش هاتە نێو هاوپەیمانی و تەلەفزیۆنی خەندانیش كرایەو دواتر داتانخست، هیچ نەخشەیەكتان هەیە لەو بوارەدا؟
ئارام قادر: خەندان پەیوەندی بە هاوپەیمانییەوە نییە، بەڵام لە داهاتوودا نەخشەو بڕیارمان هەیە سەبارەت بە میدیای هاوپەیمانی.

خەڵك: باس لەوە دەكرێت كە لە ئایندەدا كۆبونەوەیەكی بەرفراوان بكەن كاتەكەی كەیە؟
ئارام قادر: كاتەكە دیاری نەكراوەو بڕیارمان داوە كۆبونەوەیەكی گشتی ئەنجام بدەین دوای هەڵبژاردنەكان، دەستەی بەڕێوەبردن دیاری دەكرێتەوەو رێكخستنەكان كارا دەكەینەوە.

خەڵك: لەو كۆبونەوەیەدا سەرۆك دیاری دەكەن؟
ئارام قادر: لە كۆبونەوەكەدا یەكلادەكرێتەوە بۆچونەكان جیاوازە، ئایا یەك كەس دەبێتە سەرۆك یاخود دەستەیەك هاوپەیمانی بەڕێوەدەبەن.
خەڵك: زۆرترین چاو لەسەر ئێوەیە كە ببنە سەرۆكی هاوپەیمانی ئەگەر داواتان لێبكرێت دەبنە سەرۆكی هاوپەیمانی؟
ئارام قادر: جارێ زووە، ئێمە لە كۆبونەوە گشتییەكان بڕیار لەسەر ئەوە دەدەین، بەڵام گرنگ ئەوەیە ئێمە ئەرك و بەرپرسیارێتی پڕۆژەی هاوپەیمانیمان هەڵگرتووە كە هیواخوازین ئەو پڕۆژەیە بگەیەنینە ئامانجی خۆی و بیكەینە میكانیزمێك بۆ بەختەوەری هاووڵاتیانی هەرێمی كوردستان.

خەڵك: هەندێك لە هاودیدان بانگەشە دەكەن بۆ لایەنێكی تری سیاسی ئەمە رێكەوتنی سیاسییە یان رای كەسییە؟
ئارام قادر: هاوپەیمانی قەوارەیەكی سەربەخۆیە و هەر كەسێك ئەو كارە بكات ئەوە دەرچوونە لە سیاسەت و بەرنامەی هاوپەیمانی و ئەو هەڵوێستەی هیچ پەیوەندی بە هاوپەیمانییەوە نییە.

بەردەوام بە لە خوێندنەوە
کام لەم وەزارەتانەی کابینەی ٨ لە ئاست خزمەتکردن بە هاولاتیان جێدەستی دیار بووە؟

کوردستان

دوایین