ئێمە لە تۆرە کۆمەڵایەتیەکان

ئابوری

كچان بۆ هاوسەرگیری دەستبەرداری مەرجی ئاڵتونی زۆر دەبن

خەڵك- ئارام سەردار
وتەبێژی سەندیكای زێڕەنگەرانی هەولێر ڕایدەگەیەنێت، لەپارێزگای هەولێر ٦٦٧ دوكانی زێڕەنگەر هەیە، ئێستاش خێزانەكان هاوكاری یەكتر دەكەن بەوەی بەزێڕی كەمتر پڕۆسەی هاوسەرگیری ئەنجام دەدرێت.

هەندرێن وەرتی، وتەبێژی سەندیكای زێڕەنگەرانی هەولێر بە(خەڵك)ی ڕاگەیاند، كڕین و فرۆشتنی زێڕ بەشێوەیەكی ڕێژەیی وەستاوە، كەم كەم كڕین هەیە ئەگەر پڕۆسەیەكی هاوسەرگیری هەبێت، بەڵام لەوەشدا ئەگەر پێشتر خەڵك ٥٠ بۆ ٦٠ مسقاڵ زێڕیان بكردایە لەكاتی هاوسەرگیری، ئێستا شتێكی جوانە خێزانی كوردیش هۆشیارانەتر مامەڵە دەكات و بە ١٢ تاوەكو ٢٥ مسقاڵ زێڕ هاوسەرگیری دەكرێت.

دەشڵێت: “بەرزبوونەوەی نرخیش وایكردووە خێزانەكان هاوكاری یەكتر بكەن، بەوەی بەزێڕی كەمتر پڕۆسەی هاوسەرگیری ئەنجام دەدرێت”.

وتەبێژی سەندیكای زێڕەنگەرانی هەولێر وتیشی، “باری دارایی خەڵك باش نیە، ئەگەر ڕۆژانەش هاووڵاتی پارەیەكی دەست بكەوێت زیاتر بۆ قوتی ڕۆژانەی بەكاری دەهێنی، لەهەمان كاتدا هاووڵاتی ئەگەر بیەوێت پارەكەی نەفەوتێت و زێڕیش بۆ جوانكاری نەبێت كڕینی لیرەی زێڕ باشترە، لەئێستاشدا هاوەڵاتی ئەگەر زێڕی هەبێت باشترە دایبنێت، واتە پێم باشە هاووڵاتی زێڕ بكرێت و نەیفرۆشێت”.

لەبارەی ناردنە دەرەوەی زێڕ لەڕێگای فڕۆكەخانەكان جەختی كردەوە، تائێستا بڕیارەكەی عیراق هەروەكو خۆیەتی، بەڵام لەهەولێر ڕێگادراوە زیو بهێنرێت و ڕەوانە بكرێت بۆ دەرەوە.

بۆ ئەمڕۆ شەممە ٢١ی ١١ی٢٠٢٠ نرخی زێڕ لە بازاڕەكانی ھەرێمی كوردستان ئەمڕۆ بەمشێوەیەیە؛

مسقاڵێك زێڕی عەیار (24) بە 374 هەزر دیناری عیراقی
مسقاڵێك زێڕی عەیار (21) بە 330 هەزر دیناری عیراقی
مسقاڵێك زێڕی عەیار (18) بە 280 هەزار دیناری عیراقی

ئابوری

نرخی نەوت لە بازاڕەكانی جیهان

خەڵك-بەشی هەواڵ

 

نرخی‌ نەوت لەبازاڕەكانی‌ جیهان بەراورد بە ڕۆژانی ڕابردوو بەجێگیر ماوەتەوە.

ئاژانسەكانی جیهان بڵاویانكردەوە، نرخی نەوت بۆ ئەمڕۆ دوو شەممە، 30ی تشرینی دووەمی 2020، بەشێوەیەك بووە كە نرخی‌ نەوتی برێنت بە 47 دۆلار و 68 سەنت لە بازاڕەكانی جیهان مامەڵەی پێوەكراوە و هاوكات نرخی بەرمیلێك نەوتی خاوی ئەمریكیش بە 44 دۆلارو 94 سەنت مامەڵەی پێوەكراوە.

بەهۆی كۆتاییهاتنی ئەنجامەكانی هەڵبژاردنەكانی ئەمریكاوە، جارێكی دیكە گۆڕانكاری بەسەر نرخی نەوتی جیهانیدا هاتووە، بەڵام تاكو ئێستاش نرخەكە ناجێگیرە.

هاوكات هەڵكشان و داكشانی نرخی نەوت لەكاتێكدایە، ژمارەیەك لەو وڵاتانەی بۆ ڕووبەڕووبوونەوەی ڤایرۆسی كۆرۆنا بەشێك لە كەرتە پیشەسازی و بازرگانییەكانیان وەستاندبوو، بەڵام لە ئێستادا و بەهۆی كەمبوونەوەی مەترسییەكانی كۆرۆنا، بەشێك لە چالاكییە ئابوورییەكانیان دەستپێكردووەتەوە، ئەمەش بووەتە هۆی بەرزبوونەوەی نرخی نەوت.

بەردەوام بە لە خوێندنەوە

ئابوری

لە گەرمیان 100 هەزار بەسەر هاووڵاتیان دابەش دەكرێت

خەڵك- بەشی هەواڵ

بەڕێوەبەرایەتی تۆڕی پاراستنی كۆمەڵایەتی گەرمیان داوا لە هاووڵاتیان دەكات سەردانی بانكی گەورە لە كەلار بكەن بۆ وەرگرتنی 100 هەزار دیناری تایبەت بە ماڵە هەژار و كەمدەرامەتەكان.

بەڕێوەبەرایەتی تۆڕی پاراستنی كۆمەڵایەتی گەرمیان لە ڕاگەیەنراوێكدا ئاماژەی بەوەكردووە، هەموو خێزانە هەژار و كەمدەرامەتەكانی (گەڕەكی شێروانە، گەڕەكی بنگرد، گەڕەكی شارەوانی، گەڕەكی ڕزگاری لەكەلار، گەڕەكی ئاوارەكان) ئاگاداریان دەكەینەوە، كە سبەینێ‌ دوو شەممە سەردانی بانكی گەورە لە كەلار بكەن.

ڕاشیگەیاندووە، تەنها ئەو خێزانە هەژارانە سەردانی بانك بكەن، كە لەمانگی ئابی ڕابردوودا ناوەكانیان لەلایەن لیژنەكانی بەرێوەبەرایەتی گشتیمانەوە تۆماركراوە.

جەختیشی كردۆتەوە، سبەینێ‌ هاوكارییەكەی حكومەتی هەرێم، كە بڕەكەی خۆی لە ۱۰۰ هەزار دینارە دابەش دەكرێت و دەبێت ڕەگەزنامە و فۆڕمی خۆراك لەگەڵ خۆتان ببەن بۆ وەرگرتنی بڕە هاوكارییەكە .

بەردەوام بە لە خوێندنەوە

ئابوری

حكومەتی هەرێم كاتی دابەشكردنی مووچە ڕادەگەیەنێت

خەڵك- بەشی هەواڵ
وتەبێژی فەرمی حكومەتی هەرێم ئاشكرای دەكات، كە پارەكەی بەغدا بگات یان نا، بەم زووانە دەست بە دابەشكردنی مووچە دەكەن.

جوتیار عادل، وتەبێژی حكومەتی هەرێمی كوردستان بە كەناڵی ڕووداوی ڕاگەیاندووە، “بەمزووانە مووچە دابەشدەكرێت، ئەوەش یەكێكە لە ئەولەویاتەكانی حكومەتی هەرێمی كوردستان”.

وتیشی، “ئێمە سوپاسی خۆڕاگری مووچەخۆرانی هەرێمی كوردستان دەكەین و پارەكەی بەغدا بگات یاخود نەگات بەمزووانە دەست بە دابەشكردنی مووچە دەكەین”.

ئاشكراشی كرد، لە چوار شەممەی رابردوو لە كۆبوونەوەی ئەنجوومەنی وەزیران قسەمان لەسەر مووچەی فەرمانبەران كردووە، یەكێك لە راسپاردەكانی سەرۆكی حكومەت ئەوەبووە، كە بەگەیشتن یان نەگەیشتنی 320 ملیارەكەی بەغدا، حكومەتی هەرێمی كوردستان بەمزووانە مووچە دابەشدەكات.

بەڵام وتەبێژەكەی حكومەتی هەرێم میكانیزم و كاتی دابەشكردنی بە تەواوی دیاری نەكرد و ئەوەشی باس نەكردووە، كە لێبڕین لە مووچە دەگرێت یان نا، ئەگەر لێبڕین بكرێت ڕێژەكەی چەند دەبێت.

بەردەوام بە لە خوێندنەوە

کوردستان