ئێمە لە تۆرە کۆمەڵایەتیەکان

راپۆرت

شەپۆلی سێیەمی كۆرۆنا ئێرانی گرتەوە

خەڵك- بەشی هەواڵ

كۆماری ئیسلامی ئێران چووە ناو شەپۆلی سێیەمی كۆرۆناوە و بەوهۆیەوە ژمارەی تووشبوون و مردن بە ڤایرۆسەكە ڕووی لە هەڵكشان كرد و سەرۆكی ئەو وڵاتەش داوا لە هاووڵاتیان دەكات خۆپارێزی بكەن.

حەسەن ڕۆحانی، سەرۆكی ئێران لە كۆبوونەوەی لیژنەی نیشتمانی بۆ ڕووبەڕووبوونەوەی كۆرۆنا ڕایگەیاند، كە پێویستە لەسەر هاووڵاتیان زیاتر پابەندی ڕێنماییە تەندروستییەكان بن و هۆشداریشی دا، “لە ئێستادا بەهۆی هاتنی وەرزی پاییزەوە نەخۆشی ئەنفلۆنزا لەگەڵ ڤایرۆسی كۆرۆنا بڵاودەبێتەوە”.

ڕاشیگەیاند، كە لە هەندێك لە وڵاتانی دراوسێ‌ نەخۆشییەكی مەترسیدارتر لە كۆرۆنا بڵاوبۆتەوە، بۆیە پێویستە ڕێكاری توند بگیرێتەبەر بۆ ئەوەی ئەو نەخۆشیە نەیەتە ناو ئێرانەوە.

لای خۆشیەوە، داود بیام گبرسی، سەرۆكی بەشی نەخۆشیە گوازراوەكان لە نەخۆشخانەی (مسیح دانشفری) كە یەكێكە لە گەورەترین نەخۆشخانەكانی چارەسەری كۆرۆنا لە تاران ڕایگەیاند، كە شەپۆلی سێیەمی كۆرۆنا لە ئێران لەكۆتایی هەفتەی ڕابردووەوە دەستی پێكردووە و ئەگەری ئەوە هەیە تاوەكو چوار مانگ بەردەوام بێت.

ئەو پزیشكە هۆشداریشی دا، “ژمارەی مردووان لە ئێران بۆ 600 كەس لە ڕۆژێكدا بەرز دەبێتەوە ئەگەر دۆخەكە وەكو ئێستا بێت، بۆیە پێویستە پابەندی پڕۆتۆكۆڵە تەندروستییەكان بین تاوەكو كارەسات دروست نەبێت”.

هاوكات، سیما سادات لاری، وتەبێژی وەزارەتی تەندوستی ئێران ڕایگەیاند، كە ماوەی هەفتەیەكە ڕێژەی بەكارهێنانی دەمامك لەلایەن هاووڵاتیانەوە كەمی كردووە بەجۆرێك بۆ 60% هاتۆتەخوارەوە.

كۆماری ئیسلامی ئێران دادەنرێت بە یەكێك لەو وڵاتانەی ناوچەكە، كە زۆرترین زیانی بەهۆی ڤایرۆسی كۆرۆناوە پێ‌ گەیشتووە، لەكاتێكدا بەدەست سزاكانی ئەمریكاوە دەناڵێنێت و ناشتوانێت دەستی بگات بە هاوكارییەكانی سندوقی دراوی نێودەوڵەتی تاوەكو باشتر ڕووبەڕووی قەیرانەكان و ڤایرۆسی كۆرۆنا ببێتەوە.

راپۆرت

عەرەب – ئیسڕائیل، لە بن گۆریۆنەوە تا پلانەکانی تڕەمپ

خەڵک

ئیسرائیل، دەیەوێت لەگەڵ زۆرترین وڵاتانی عەرەبی پەیوەندییەکانی ئاسایی بکاتەوە دواین ڕێککەوتنی ئەو وڵاتەش دوای ئیماراتی عەرەبی یەکشەممەی ڕابردوو بوو لە مەنامە، کە ڕێککەوتی لەگەڵ بەحرێن واژۆ کرد بۆ ئاسایی کردنەوەی پەیوەندییەکانی نێوانیان.

پاش چەندین ساڵ لەواژۆکردنی ڕێککەوتننامەکانی ئاشتی لەگەڵ، میسر( 1979 ) و ئوردن( 1994 )ئەمە دووەمین ڕێککەوتنی دیپلۆماسی ئیسرائیلە لەگەڵ وڵاتێکی کەنداو.

جەنگەکان

لە 14ی ئایاری 1948دا پاش سێ ساڵ لەکۆتایی هاتنی دووەم جەنگی جیهان، (داڤید بن گۆریۆن) دامەزراندنی دەوڵەتی ئیسرائیلی لەبەشێک لەفەلەستیندا ڕاگەیاند، دوای ئەو بەروارە، سوپای وڵاتانی عەرەبی ( میسر، سوریا، ئوردن، لوبنان و عیراق)، جەنگیان دژی ئەو دەوڵەتە نوێیە ڕاگەیاند و دواتر لەساڵی 1949 جەنگ بە سەرکەوتنی ئیسرائیلییەکان کۆتایی هات و زیاتر لە 760 هەزار فەلەستینیش ناچار بوون هەڵبێن و ماڵ و حاڵیان چۆڵ بکەن.

لە 29ی ئۆکتۆبەری ساڵی 1956دا، پاش سێ مانگ لە بەنیشتیمانیکردنی کەناڵی سوێس لەلایەن میسڕەوە، ئیسرائیل هێزەکانی خۆی بۆ هێرشکردنە سەر ناوچەی سینا دەستپێکرد و گەیشتە ئەو کەناڵەو دواتر لە ژێر فشاری نەتەوە یەکگرتووەکان و ئەمریکا و یەکێتی سۆڤیەت ئیسرائیل پاشەکشەی کرد .

لە 5ی حوزەیرانی 1967 ئیسرائیل جەنگێکی بە ناوی ” رۆژی شەشەم ” لە دژی میسر، سوریا و ئوردن بەرپا کرد و قودسی ڕۆژهەڵات و بانی ڕۆژئاوا و کەرتی غەزە و بەرزاییەکانی جۆلان و سینای میسری گرت .

لە 6 ی ئۆکتۆبەری 1973 میسر و سوریا لە سینا و بەرزاییەکانی جۆلان هێرشیان کردە سەر ئیسرائیل .

ئاشتی لەگەڵ میسر

لە تشرینی دووەمی 1977 دا ئەنوەر سادات سەرۆکی میسر بووە یەکەم سەرۆکی دەوڵەتێکی عەرەبی کە لە دوای دامەزراندنییەوە سەردانی ئیسرائیل بکات.

ئەم سەردانە مێژووییە، ڕێگەی خۆش کرد بۆ ڕێککەوتنی(کامپ دەیڤد)، بە چاودێری ئەمریکا لە ئەیلولی 1978 دا کە لە 26 ی ئازاری 1979 دا پەیمانی ئاشتی ئیسرائیل و میسر، بۆ یەکەم جار لە نێوان ئیسرائیل و یەکێک لە وڵاتانی عەرەبیدا واژۆ کراو ڕێککەوتن هاتە ئارا .

داگیرکردنی لوبنان

لە 6 ی حوزەیرانی 1982 دا هێزەکانی ئیسرائیل لوبنانیان داگیرکرد و گەمارۆی بەیروتیان دا و داوایان کرد کە ڕێکخراوی سەربەخۆخوازی فەلەستین بە سەرکردایەتی یاسەر عەرەفات ئەو وڵاتە بەجێ بهێڵێت .

هێزەکانی ئیسرائیل تا ساڵی 2000 باشووری لوبنانیان داگیرکرد، دوای ئەوە حزبوڵڵا لە ساڵی 2006 دا دوو لە سەربازانی ئیسرائیلییان ڕفاند، دواتر ئیسرائیل هێرشێکی وێرانکەری کردە سەر لوبنان و لەگەڵ حیزبوڵا شەڕێکی توندی کرد .

ئاشتی لەگەڵ ئوردن

لە 26 ی ئۆکتۆبەری 1994 دا ، ئیسحاق ڕابین سەرۆک وەزیرانی ئیسرائیل و عەبدولسەلام مەجالی سەرۆک وەزیرانی ئوردن پەیماننامەی ئاشتیان ئیمزا کرد و بەو جۆرەش کۆتایی بە 46 ساڵ لە جەنگی نێوانیان هات .

ئەو پەیماننامەیە کە بە ئامادەبوونی بیل کلینتۆن سەرۆکی ئەوکاتی ئەمریکا  واژۆ کرا، گەرەنتی دا بە ئاسایشی ئیسرائیل لەسەر سنوورەکان و هەماهەنگی ئابووری نێوان هەردوو وڵاتی لێ هاتە بوون.

دوو ڕاپەڕین و ڕێککەوتنەکانی ئۆسلۆ

لە دیسەمبەری 1987 دا فەلەستینییەکان لە بانی ڕۆژئاوا و کەرتی غەزە ” شۆڕشی بەردین ” یان بەرپا کرد، کە یەکەم سەرهەڵدان بوو لە دژی داگیرکارییەکانی ئیسرائیل .

لە 13 ی سێپتەمبەری 1993 دا پاش شەش مانگ لە دانوستانی نهێنی لە ئۆسلۆ، ئیسرائیل سەربەخۆیخوازانی فەلەستین ڕێکەوتننامەکانیان لەسەر خۆبەڕێوەبردنی فەلەستینیەکان لە واشنتن لە مەراسیمێکدا واژۆ کرد کە تەوقەکردنێکی مێژوویی نێوان یاسر عەرەفات و ئیسحاق ڕابین سەرۆک وەزیرانی لێهاتە بەرهەم و دواتر یاسر عەرەفات گەڕایەوە ناوچە داگیرکراوەکان و لەوێ دەسەڵاتی فەلەستینی دامەزراند .

لە نۆڤەمبەری 1995 ئیسحاق ڕابین لەلایەن توندڕەوێکی جولەکەوە، دژی پرۆسەی ئاشتی لەگەڵ فەلەستینییەکان تیرۆر کرا.

دوای شکستی دانوستانەکانی ئیسرائیل و فەلەستین لە کامپ دەیڤد و سەردانێکی مشتومڕکەر لە ئەیلولی 2000 دا لە لایەن ئاریل شارۆن، سەرۆکی ئەو کاتی بەرهەڵستکارە ڕاستڕەوەکانی ئیسرائیل، بۆ گۆڕەپانی مزگەوتی ئەلئەقسا لە ئۆرشەلیم ، ڕاپەڕین و سەرهەڵدانی دووەم دروست بوو .

سوپای ئیسرائیل لە بانی ڕۆژئاوا دا، یەکێک لە شارە گەورەکانی داگیرکرد و لەمانگی ئازاری 2002 گەورەترین هێرشی خۆی بۆ سەر ناوچەکە دەستپێکرد .

لە ئەیلولی 2005 دا ئیسرائیل یەکلایەنە لە کەرتی غەزە کشایەوە، پاش ئەوەی بزوتنەوەی حەماس لە ساڵی 2007 دا ئەو کەرتەی کۆنترۆڵکرد، ئابڵووقەیەکی توندی سەپاند، لە مانگی تەموزی ساڵی 2014 یشدا ئیسرائیل ئۆپەراسیۆنێکی لە کەرتی غەزە دەستپێکرد.

پلانی ترامپ

ڕۆژی 6ی کانوونی یەکەمی 2017 دۆناڵد تڕەمپ، سەرۆکی ئەمریکا، قودسی وەک پایتەختی ئیسرائیل ناساند، بەم کارەی فەلەستینیەکان و بەشێک لە  کۆمەڵگەی نێودەوڵەتی توڕەو نیگەرانکرد.

لە 14/5/2018 ئەمریکا باڵیۆزخانەکەی خۆی گواستەوە بۆ قودس پاشان لە مانگی ئازاری 2019دا، سەرۆکی ئەمریکا فەرمانێکی بۆ دانپێدانان بە سەروەری ئیسرائیل لەبەرزاییەکانی جۆلان واژۆکرد.

لە 28 ی کانونی دووەمی 2020 دا تڕەمپ پلانێکی مشتومڕ لەسەری ئاشکرا کرد کە تێیدا هاوپێوەنکردنی ئیسرائیل بۆ چەند بەشێکی بانی خۆرئاوای لەخۆ دەگرێت، هاوکات دەوڵەتانی عەرەبی هۆشدارییان داو ئەم کارە دەبێتە هۆی ” ناکۆکی گەورە ” .

ئاساییکردنەوەی پەیوەندییەکان لەگەڵ ئیمارات و بەحرێن

ڕۆژی 13ی ئاب، تڕەمپ “ڕێککەوتنێکی مێژوویی ئاشتی” لە نێوان ئیسرائیل و ئیمارات ڕاگەیاند و ڕۆژی 11ی ئەیلولیش دۆناڵد تڕەمپ ڕایگەیاند، کە ئیسرائیل و بەحرێنیش پەیوەندییەکان ئاسایی دەکەنەوە.

سەرچاوە؛ یۆرۆ نیوز

 

بەردەوام بە لە خوێندنەوە

راپۆرت

كازمی دەتوانێت عێراق لە جەنگەڵستان رزگار بكات؟

خەڵك- بەشی هەواڵ

ئەمڕۆ دوو شەممە مستەفا كازمی سەرۆك وەزیرانی عێراق گەشتێكی ئەوروپی چوار رۆژە دەستپێدەكات كە فەرەنسا و ئەڵمانیا و بەریتانیا دەگرێتەوە.

دۆسێكانی سەردانەكە

سەردانەكەی سەرۆك وەزیران چەند دۆسێیەك لە خۆی دەگرێت لەوانە لابردنی ناوی عێراق لە لیستی یەكێتی ئەوروپا بۆ ئەو وڵاتانەی مەترسیدارن لەسەر ئاستی باڵا، پەیوەندی دوو قۆڵی، هاوكاری ئابووری، روبەڕوبونەوەی كۆرۆنا و شەڕی دژی داعش.

هاوكات سەردانەكە چەند دۆسێیەكی هەرێمی و نێودەوڵەتی لە خۆی دەگرێت كە گرنگی هاوبەشیان هەیە.

كازمی رۆژی یەك شەممە لەسەرگەڵ فەرماندە سەربازی و ئەمنییەكانی پارێزگای سەڵاحەدین لە باكوری عێراق كۆبووەوە، لەوێ وتی: هیچ شوێنێك بە هیچ جۆرێك بۆ گەڕانەوەی تیرۆر نییە بە هەر ناوێك.

كۆبونەوەكە دوای سەردانێكی كازمی بوو بۆ پارێزگای سەڵاحەدین دوای كوشتنی هەشت گەنجی رفێنراو لەلایەن گروپێك چەكداری نەناسراو لە رۆژی شەممە لە شارۆچكەی بەلەد و كازمی جەختیكرد كە دەبێت هاووڵاتیان بپارێزرێن.

كازمی لە دوای مشتومڕی سیاسییەكان و دوای شكستی چەندین كاندید و خۆپیشاندانەكان بووە سەرۆك وەزیرانی عێراق.

هەنگاوەكانی كازمی لەنێوان رەخنەگرتن و وەسفدا

ناوبراو دەیەوێت خۆی وەك سەرۆك وەزیرانێكی نوێ و تایبەت لە ناو سەرجەم سەركردەكانی ئێستا و پێشووی عێراقدا نمایش بكات لەسەر ئاستی ناوخۆیی و دەرەكی.

كازمی چەند هەنگاوێكی ناوە لەسەر ئاستی ناوخۆ كە جێگەی سەرنجی خەڵك و سیاسییەكان و مێدیاكانیش بووە، لەوانە بەردەوام لەناو خەڵكدا بووە، لە كێشەكانی پرسیوە، زوو گەیشتووەتە شوێنی رووداوەكان و سەردانی زۆر ناوچەكانی كردووە بەشێوەیەكی مەیدانی، لەسەر ئاستی ئیداریش كۆمەڵێك بەرپرسی لە پۆستەكانیان لاداوە، كۆمەڵێك كەسی داناون كە تا ئاستێك لای خەڵك خۆشەویستن، هەوڵی داوە حكومەت ئیدارەی دەروازە سنورییەكان بگرێتەدەست و لە بن دەستی حزب و میلیشیاكان دەریانبهێنێت.
لەسەردەمی كازمیدا موچە دواكەوت

رەخنەگرەكانی كازمی سەرباری ئەو هەنگاوانە، دەڵێن تا ئێستا كازمی لەسەر ئاستی خزمەتگوزاری گشتی كە داواكاری سەرەكی هاوڵاتیان بوو، هیچی نەكردووە، تەنانەت بۆ یەكەمجار لە كابینەكەی ئەو لە مانگی رابردوو موچە لە كاتی خۆی دواكەوت.

رەخنەگرەكان دەڵێن: ئەو كارانەی كازمی كردوونی تەنها هەندێك هەنگاوی نمایشی بوون بۆ خەڵكی عێراق بە مەبەستی خۆدەرخستن و خۆبردنە پێشەوە بووە.

كازمی سەرۆك وەزیرانی عێراق كە دەوترا لەلایەن ئەمریكاوە پشتیوانی دەكرێت و سەردانە تایبەتەكەی بۆ ئەمریكا و كۆبونەوەی لەگەڵ سەرۆك دۆناڵد ترەمپ، ئەو پەیامەیدا كە دەبێت كازمی سنورێك بۆ هێرش و چالاكی میلیشیا چەكدارەكانی سەر بە ئێران دابنێت، بەڵام نەیتوانی ئەو كارە بكات و بگرە رۆژانە چالاكیی گروپەكان زیاتر دەبێت.

كار گەیشتووەتە هەڕەشەی ئەمریكا بۆ داخستنی باڵیۆزخانەكەی لە عێراق و هەڕەشەی وەشاندنی گورزی سەربازی لە میلیشیاكان.

مورگان ئۆرتیگاس وتەبێژی وەزارەتی دەرەوەی ئەمریكا لە راگەیەنراوێكدا ئاشكرایكرد چالاكییەكانی میلیشیا چەكدارەكانی سەر بە ئێران هەڕەشە لە ئاسایشی حزبە عێراقییەكان دەكات لەم هەلومەرجە ناسكەی عێراقدا بەتایبەت قەیرانی دارایی و هەڕەشە بەردەوامەكانی داعش.

لە ئاستی چاوەڕوانییەكاندا نییە

بەشێك لە چاودێران وتویانە، كازمی ئەو سەرۆك وەزیرانە نییە كە خەڵك چاوەڕێی دەكات، تا عێراق رزگاربكات لەو هەموو قەیرانەی تێیدایەتی، خۆشی دەزانێت ئەو توانایەی نییە، بەڵام دەیەوێت سەرۆك وەزیرانێكی خۆنمایشكار بێت لەناوخۆ و لەسەر ئاستی دەرەكیش بەتایبەت لە پەیوەست بە كێشەكانی ئەمریكا و ئێران، هەوڵدەدات خۆی بگونجێنێت لەگەڵ سەرجەم لایەنە ناكۆكییەكان.

كازمی هێندەی لە هەوڵی بەدەستهێنانی دۆستەكانیەتی، هێندە خەریكی دروستكردنی نەیار و دوژمن نییە، بە ئامانجی دروستكردنی پێگەیەك بۆ خۆی بۆ ئامانجە سیاسیی و كەسییەكانی هاوشێوەی سەركردەكانی تری عێراق.

بۆیە ئایندە وەڵامی ئەو پرسیار و بۆچونانەش دەداتەوە كە كازمی دەتوانێت عێراق لەو جەنگەڵستانە رزگار بكات كە تێی كەوتووە، یان ئەویش ماوەكەی بە كۆمەڵێك دەستكەوتی كەسییەوە وەك سەركردەكانی تر تێدەپەڕێنێت.

بەردەوام بە لە خوێندنەوە

راپۆرت

لە هەرێم 5 ساڵە ڕاگیراوە و حكومەت بێدەنگە
عیراق بڕیارێكی دەربارەی پلەبەرزكردنەوەی فەرمانبەران دەركرد

خەڵك- بەشی هەواڵ
دوابەدوای بڕیاری ئەمیندارێكی گشتی ئەنجوومەنی وەزیرانی عیراق، وەزیری تەندروستی ئاشكرای دەكات، كە دەست بە پێدان و خەرج كردنی پلەبەرزكردنەوە و سەرمووچەی فەرمانبەران دەكرێت، بەڵام لە هەرێمی كوردستان 5 ساڵە پلەبەرزكردنەوەی فەرمانبەران ڕاگیراوە.

پێدانی سەرمووچە و پلەبەرزكردنەوە بە یاسای خزمەتی شارستانی و یاسای بەرزەفتی فەرمانبەران چەسپێنراوە و لەڕووی یاساییەوە نابێت ڕابیگرێت و لە عیراق دەنگۆی ڕاگرتنی ئەو مافە یاساییەی فەرمانبەران بڵاوبووبووەوە، لەكاتێكدا ماوەی 5 ساڵە پلەبەرزكردنەوەی فەرمانبەرانی هەرێم ڕاگیراوە و ماوەی 3 ساڵیشە بۆ هێزەكانی پێشمەرگە ڕاگیراوە، بەڵام بۆ هێزەكانی ناوخۆ بەردەوامە.

لە عیراق دەنگۆی وەستانی پلەبەرزكردنەوە هەیە
نووسینگەی سەرۆك وەزیرانی عیراق لە نووسراوێكدا بۆ پارێزگای بابل لە مانگی ڕابردوودا جەختی لە ڕەزامەندی ئەمیندارێتی گشتی ئەنجوومەنی وەزیران كردووە بۆ دەستپێكردنەوەی پلەبەرزكردنەوە و سەرمووچەی فەرمانبەران.

وەك لە نووسراوەكەدا هاتووە، “هیچ ڕێگرییەكی یاسایی نییە بۆ پێدانی سەرمووچە و پلەبەرزكردنەوەی فەرمانبەرانی دەوڵەت و كەرتی گشتی”.

لای خۆشیەوە، حەسەن تەمیمی، وەزیری‌ تەندروستی‌ عیراق ڕایگەیاند، ڕەزامەندییان دەربڕیوە لەسەر دەستپێكردنەوە بەخەرجكردنی سەرەمووچە و پلەبەرزكردنەوە لەڕۆژی‌ شایستەبونی فەرمانبەرانەوە.

ڕاشیگەیاند، لەگەڵ وەزارەتی‌ دارایی قسەكراوە بۆ ئەوەی‌ دەرماڵەی‌ مەترسی‌ بۆ ئەوانەی،‌ كە خوێندنی‌ باڵا لە ناوەندەكانی‌ تەندروستی‌ تەواو دەكەن خەرج بكرێت.

فەرمانبەرانی مەدەنی هەرێم زەرەرمەندی یەكەمن
لە 1-1-2016ەوە پلەبەرزكردنەوەی فەرمانبەران، كە مافێكی یاساییە ڕاگیراوە و تا ئێستا هیچ بڕیارێكی حكومەتی هەرێم نییە بۆ پێدانەوەی ئەو مافە بە فەرمانبەران و لەگەڵ ئەوەشدا بەپێی زانیارییەكانی (خەڵك) لە وەزارەتی دارایی هەرێم پڕۆژە یاسای بودجەی 2020 ئامادەكرابوو، كە بڕیار بوو ئەگەر هەرێم و عیراق ڕێكبكەون ئەوا پلەبەرزكردنەوەش دەست پێ‌ بكاتەوە، بەڵام نە لە عیراق و نە لە هەرێم یاسای بودجەی 2020 پەسەند نەكرا و نەچووە پەڕلەمان.

وەك ناڕەزاییەكیش لەلایەن فەرمانبەرانەوە، چەندین كەمپین و داواكاری ئاڕاستەی حكومەت كراوە بۆ گێڕانەوەی ئەو مافەی بە یاسای (خزمەتی شارستانی) چەسپێنراوە، بەڵام حكومەت بێدەنگ بووە و لەو چوارچێوەیەشدا لە ئێوارەی ئەمڕۆ چوار شەممە ٥ی شوباتی ۲۰۲۰ لەشاری هەولێر، كەمپەینی گیڕانەوەی مافی پلەبەرزكردنەوە (تەرفیع)ی فەرمانبەران یەكەم كۆبوونەوەی خۆی ئەنجامدا و داوای گێڕانەوەی ئەو مافە یاساییە بۆ فەرمانبەران دەكەن.

فەرمانبەران لە تۆڕە كۆمەڵایەتییەكان بە هاشتاگی (#بەڵێ_بۆ_گەڕانەوەی_پلەبەرزكردنەوە) پەیامێك ئاڕاستەی سەرۆك وەزیرانی هەرێمی كوردستان دەكەن و داوای لێ‌ دەكەن ئەو “مافە یاسایی و سروشتییە”یان بۆ بگەڕێنرێتەوە.

لە گەڵ هاشتاگەكە فەرمانبەران لە پەیامەكەدا نووسیویانە، “بەڕێز جەنابی سەرۆك وەزیرانی هەرێم، مەسرور بارزانی لە ئێستادا داواكاری تەواوی مامۆستایان و فەرمانبەرانی هەرێم گەڕانەوەی #پلە_بەرزكردنەوەیە (ترفیع) دوای چەند ساڵێك لە ڕاگیرانی پێویستە بەزووترین كات دووبارە بگەڕێتەوە، كە ئەمەش مافێكی سروشتی فەرمانبەرانە”.

بۆ بەدواداچوونی ئەو پرسە (خەڵك) چەند جارێك پەیوەندی كرد بە ئاوات شێخ جەناب، وەزیری دارایی و ئالان حەمەسەعید، وەزیری پەروەردە و د. جوتیار عادل، وتەبێژی حكومەتی هەرێم و ئومێد سەباح، سەرۆكی دیوانی ئەنجوومەنی وەزیران، بەڵام وەڵامی پەیوەندییەكانیان نەدایەوە.

لای خۆشیەوە، ڕێباز حەملان، یاریدەدەری سەرۆك وەزیرانی هەرێم بۆ كاروباری ئەنجوومەنی وەبەرهێنان و ڕاژەی گشتی لەماوەی ڕابردوودا وتبووی، “پرسی پلەبەرزكردنەوەی فەرمانبەران ئێستا لە ئەنجوومەنی وەزیران لە ژێر دیراسەدایە، سەرۆكی دیوانی ئەنجوومەنی وەزیران كاری جدی لەسەر دەكات و لەكاتێكی نزیكدا یەكلایی دەكرێتەوە.

لە وەزارەتی پێشمەرگە پلەبەرزكردنەوە دەستی پێكردەوە
پێشتر، میران بەكر، سكرتێری ڕۆژنامەوانی وەزیری پێشمەرگەی حكومەتی هەرێم بۆ (خەڵك) ڕایگەیاند، بڕیار دراوە پلەبەرزكردنەوە بۆ هێزەكانی پێشمەرگە دەستپێبكاتەوە و سەرەتا بۆ 2017 ئەنجام دەدرێت.

ڕاشیگەیاند، كە بڕیاردرا پلەبەرزكردنی ھێزی پێشمەرگە بۆ ساڵی ٢٠١٧ جێبەجێ بكرێت و پلەبەرزكردنەكانی ٢٠١٨ و ٢٠١٩ و ساڵەكانی داھاتووش، بە پێی میكانیزمی نوێ و دوای وردبوونەوەی زیاتر بڕیاری پێویستی لەبارەوە بدرێت.

لە وەزارەتی ناوخۆی هەرێم نەوەستاوە
لە مانگی ڕابردوودا بەڕێوەبەرایەتی هاتووچۆی سلێمانی لە ڕاگەیەنراوێكدا ئاماژەی بەوەكردووە، لەخشتەی پلە بەرزكردنەوەی (٢٠٢٠)ی وەزارەتی ناوخۆی حكومەتی هەرێمی كوردستاندا، پلە بەرزكردنەوە بۆ ژمارەیەك لە ئەفسەرانی بەڕێوەبەرایەتی هاتووچۆی پارێزگای سلێمانی كراوە.

هاوكات، بەڕێوەبەرایەتی هاتووچۆی هەولێر لە ڕاگەیەنراوێكدا ئاماژەی بەوەكردووە، (٢٠/٩/٢٠٢٠)، بەڕێوەبەری پۆلیسی پارێزگای هەولێر (عەمید/ دلێر نەجاڕ)، لە مەڕاسیمێكی شایستەدا خەڵاتی ڕێزلێنانی بەخشی بە (٤١) ئەفسەری سنووری بەڕێوەبەرایەتی پۆلیسی پارێزگای هەولێر، بە بۆنەی پلە بەرزبوونەوەیان.

بەردەوام بە لە خوێندنەوە

کوردستان