ئێمە لە تۆرە کۆمەڵایەتیەکان

راپۆرت

بەمزوانە تۆڕی كارەبای عیراق بە سعودیەوە دەبەسترێتەوە

خەڵك- بەشی هەواڵ
ڕۆژنامەیەكی ئەمریكایی لە ڕاپۆرتێكیدا ئاماژە بە پشتیوانی ویلایەتە یەكگرتووەكان دەكات لە نزیكبوونەوەی عیراق و سعودیە لە بواری وزە، لەڕێی بەستنەوەی تۆڕی كارەبای عیراق لەگەڵ ڕیاز و كوێت.

بەپێی ڕاپۆرتێكی ڕۆژنامەی (وۆڵ جۆرناڵ)ی ئەمریكایی”عیراق كەوتۆتە ڕەوشێكی نەخوازراوەوە لەو دەمەی سزا ئابورییەكان بەسەر ئێراندا سەپێنرانەوە، ئەمەش وای لە عیراق كرد، داوای لە ویلایەتە یەكگرتووەكان بكات بەدەر بكرێت لەو سزایانە، بۆ مەبەستی دابینكردنی پێویستییەكانی بە كارە، چونكە تا ئاستێكی زۆر لەو بوارەدا پشت بە تاران دەبەستێت”.

هەر لە ڕاپۆرتەكەدا هاتووە”ویلایەتە یەكگرتووەكان پشتیوانی لە لێكنزیكبوونەوەی عیراق و سعودیە دەكات لە بواری وزە، لەڕێی بەستنەوەی تۆڕە كارەبای عیراق بە ڕیاز و كوێت”.

ڕاپۆرتەكە كە لەلایەن بینوا فكۆن، و مایكڵ ئار جۆردەوە ئامادە كراوە دەڵێت”ئیدارەی دۆناڵد ترەمپ سەرۆكی ئەمریكا، پشتیوانی لە خواستی فراوانكردنی بەستنەوەی تۆڕی كارەبا دەكات لەنێوان كەندا و عیراق”.

بەستنەوەی تۆڕی كارەبایی لەگەڵ وڵاتانی كەنداو، توەری گفتووگۆی چڕ بوو لەماوەی ڕابردوو، لەكاتی سەردانەكەی مستەفا كازمی سەرۆك وەزیرانی عیراقیش بۆ واشنتن لەم ماوەیەی دوایی، بەشێوەیەكی فراوانتر گفتووگۆی لەسەر كرا، ئەمەش لە ڕاپۆرتەكەدا ئاماژەی پێكراوە.
ڕۆرتە ئەمریكاییەكە، ئاماژەی بە كۆڕبەندێكی عەلی عەللاوی وەزیری دارایی عیراق كردووە لەڕێی ئینتەرنێتەوە كە باسی لە تۆڕی كارەبای وڵاتەكەی و بەستنەوەی بە تۆڕەكانی كارەبای سعودیە و كوێتەوە كردووە و كە بە وتەی ئەو “لە قۆناغێكی پێشكەوتوودایە و گەیشتۆتە ئاستی دیزایین كە قۆناغی خستنەڕووی كەمكردنەوەكانی بەدوادادێت”.

عەللاوی دەڵێت، وتوێژەكان لەبارەی وەبەرهێنانەكانی سعودیەوە بووە لە پرۆژەی (رەتاوی) بە تێچوونی زیاتر لە 2.2 ملیار دۆلار كە ئامانج لێی، بەكارهێنانی بڕێكی زۆری غازی سروشتییە بۆ بەرهەمهێنانی وزە، لەبری ئەوەی بەهەدەر بدرێت و سودی لێوەرنەگیرێت.
بەپێی زانیارییەكانی بانكی نێودەوڵەتی، كێڵگە نەوتییەكانی عیراق، ئامێری كۆكردنەوەی غازییان نییە، ئەمەش ساڵانە بۆتە مایەی سوتان و بەهەدەرچوونی 18 ملیار مەتر سێجای غازی پەیوەست بە پترۆڵ.

(وۆڵ ستریت جۆرناڵ) لە زاری وتەبێژی وەزارەتی وزەی سعودیەوە بڵاویكردۆتەوە”ڕێكەوتنەكە زۆر نزیكە كە بەستنەوەی ڕاستەوخۆی نێوان تۆڕی عیراق و سعودیە لەخۆدەگرێت، ڕیازیش ڕێڕەوەكانی وەبەرهێنانی هاوبەش لە بوارەكانی وزەی خۆر لەنێو عیراقدا تاوتوێ‌ دەكات، ئەمەش لەپێناو دابینكردنی پێداویستی بەغدا بە وزەی كارەبا”.

پرۆژەی بەستنەوەی كارەبان بە یەكێك لە هەماهەنگییەكان لە كۆمەڵە پرۆژەكانی كەرتی وزە دادەنرێتە كە بەرپرسانی عیراقی و سعودی تاوتوێی دەكەن.
تائێستا ئاڵوگۆڕی بازرگانی لەنێوان هەردوو وڵاتدا لە ئاستێكی نزمدایە، ئەمەش گەر بەراورد بكرێت بە بازرگانی لەگەڵ ئێران، چونكە ئاڵوگۆڕی بازرگانی لەنێوان ڕیا ز بەغدا 400 ملیۆن دۆلار تێناپەڕێنێت، بەراورد بە 10 ملیار دۆلاری نێوان تاران و بەغدا.

بەردەوام ویلایەتە یەكگرتووەكان ڕێگەی بە عیراق داوە غاز و كارەبا لە ئێرانەوە هاوردەبكات، وێڕای ئەو سزایانەی بەسەر تاراندا سەپێنراون.
عیراق كڕیاری زیاتر لەسەدا 80ی هەناردەكانی كارەبای ئێرانی بووە، بەپێی ژمارەكانی وەزارەتی وزەی ئێرانیش، هەناردەی كارەبای وڵاتەكە لە ساڵی 2019دا زیاتر لەسەدا 28 زیادی كردووە و گەیشتۆتە زیاتر لە هەشت تیراوات لە كاتژمێرێكدا.

ئامارەكانی كۆمپانیای غازی نیشتمانی ئێرانی دەریدەخەن كە هەناردەی غازی وڵاتەكە بەڕێژەی 26% لەماوەی “ساڵی ڕابردووی ئێرانی”دا زیادی كردووە (21ی ئاداری 2019 بۆ 20ی ئاداری 2020)، و گەیشتۆتە 17.5 ملیار مەتر سێجا.

عیراق و توركیا بە تاكە كڕیاری غازی ئێرانی دادەنرێن، هەرچەندە زانیارییە بڵاوكراوەكانی توركیا ئاماژە بە زیادبوونی هاوردەی غازی ئێرانی ناكەن، بۆیە دەكرێت گەشەی زیاتری هەناردە ئێرانییەكان بە عیراقەوە پەیوەست بكرێت.

لوئەی خەتیب، وەزیری كارەبای پێشووی عیراق لە لێدوانێكی لە مانگی نیسانی ڕابردوو ڕایگەیاندبوو، وڵاتەكەی پێویستی بە سێ‌ بۆ چوار ساڵە، تا هەناردەكردنی وزە لە دراوسێكەیەوە ڕابگرێت.

عیراق بەدەست كەموكوڕی كارەباوە دەناڵێنێت، ئەمەش وایكردووە بۆ ماوەیەی زۆر كارەبا لە وڵاتەكەدا ببڕێت، لە هەندێك ناوچەشدا نزیكەی 20 كاتژمێر كارەبا نابێت.

خەتیب بە “ستاندەر ئیند بۆرز گڵۆباڵ بڵانس)ی ڕاگەیاندبوو”پرۆژەكانی نەوت و غاز لە عیراق، چەند ساڵێكیان پێویستە بەر لەوەی بگەنە توانای بەرهەمهێنان، بۆیە پشت بە غازی ئێرانی دەبەسترێت”.

بە وتەی وەزیری كارەبای پێشووی عیراق”وڵات ساڵانە نزیكەی 1200 میگاوات كارەبا و نزیكەی 1.2 ملیار مەتر سێجا لە ڕۆژێكدا غاز هاودە دەكات، بە تایبەت لە مانگەكانی هاوین كە پلەكانی گەرما دەگەنە ترۆپك لە ناوچەكانی باشووری عیراق”.

لوئەی خەتیب دەڵێت”هاوردەی كارەبا لە ساڵی 2019 بە 19 گیگاوات مەزەندە كرا، پێشبینیش دەكرێت بگاتە 20 لە ساڵی 2020، لەكاتی زۆر پێویستیشدا داواكاریی لەسەر وزە دەگاتە نزیكەی 25 گێگاوات”.

عیراق لە كۆتایی ساڵی ڕابردوو، ئاڵۆزی و خۆپیشاندانی میللی بەرفراوانی ناڕەزایی لە دژی گەندەڵی و خراپی ئاستی خزمەتگوزارییەكان بەخۆوە بینی، بە تایبەتیش بەهۆی بڕانی بەردەوامی وزەی كارەبا لە پارێزگە جیاجیاكانی وڵات.

راپۆرت

“دەوام لە خوێندنگەكان ڕادەگیرێت”

خەڵك- بەشی هەواڵ
بەهۆی تەشەنەكردنی ڤایرۆسی كۆرۆنا لە ناوەندەكانی خوێندن و تووشبوونی ژمارەیەكی زۆری مامۆستایان، پێدەچێت لە سەرەتای مانگی داهاتووەوە دەوام لە تەواوی ناوەندەكانی خوێندن ڕابگیرێت و وەزارەتی تەندروستیش دەڵێت: “ئەگەر رەوشەكە ئاوا بڕوات هەڕەشە لە پرۆسەی خوێندنیش دەكات”.

بەبڕیاری وەزارەتی پەروەردە پۆلەكانی (1 و 2)ی بنەڕەتی و 12ی ئامادەیی خوێندنیان لەناو پۆل دەستپێكردۆتەوە و پۆلەكانی دیكەش بەشێوەی ئەلیكترۆنی ئەخوێنن.

عادل حەسەن، ئەندامی ئەنجوومەنی مامۆستایانی ناڕازی لە شاری سێمانی بۆ (خەڵك) ڕایگەیاند، كە “بڕیارەكەی بەڕێوەبەرایەتی پەروەردەی سلێمانی بۆ شكاندنی بایكۆت و دەستپێكردنی پڕۆسەی خوێندن بۆ 3 ڕۆژە و لەبەر خاتری بەرپرسانی وەزارەتە، چونكە 1-11-2020 دەوامی قوتابخانەكانی هەموو كوردستان گۆڕانی بەسەردا دێت”.

لە ئێستادا لە بەشێكی زۆری خوێندنگەكانی هەولێر و دهۆك پڕۆسەی خوێندن دەستی پێكردووە، بەڵام لەسنووری پارێزگای سلێمانی و هەڵەبجە و ئیدارەكانی گەرمیان و ڕاپەڕین مامۆستایان بایكۆتی پڕۆسەی خوێندنیان كردووە و ئامادەنین بچنە هۆڵە‌كانی خوێندن و خوێندنی ئەلیكترۆنیش ڕەتدەكەنەوە.

لای خۆیەوە، د.سەیوان عەلی، بریكاری وەزیری پەروەردەی حكومەتی هەرێمی كوردستان ڕایگەیاندووە، ڕۆژی یەك شەممەی داهاتوو لیژنەی باڵای بەرەنگاربوونەوەی كۆرۆنا لە هەرێمی كوردستان كۆدەبێتەوە، تەوەرێكی كۆبوونەوەكە گفتوگۆكردن دەبێت لەبارەی خوێندنی ئەمساڵ، كە ئایا خوێندن بەردەوامبێت یان بەهۆی مەترسییەكانی كۆرۆناوە ڕابگیرێت، بۆیە ئەگەر بڕیاری ڕاگرتنی خوێندن بدات، پابەند دەبین.

ڕاشیگەیاندووە، كە لەسەرەتای دەستپێكردنی پڕۆسەی خوێندنەوە تاوەكو ئێستا بە نزیكەیی 4391 مامۆستا و قوتابی (ئەوانەی دەوام دەكەن) تووشی كۆرۆنا بوون.

هاوكات، دكتۆر ئاسۆ حەوێزی، وتەبێژی وەزارەتی تەندروستی هەرێم ڕایگەیاندووە، لە زۆربەی قوتابخانەكان و ناوەندەكانی خوێندندا ژمارەیەكی زۆر لە مامۆستایان تووشی كۆرۆنا بوون.

ئاشكراشی كرد، پێشتر بە هاوئاهەنگی لەگەڵ وەزارەتی پەروەردە بڕیاردرابوو قۆناغەكانی 3 و 4 و 9ی بنەڕەتیش بكرێنەوە، بەڵام ئەگەر ڕەوشەكە ئاوا بڕوات، زۆر زەحمەتە ئەو قۆناغانە بكرێنەوە، بەڵكو بۆ قۆناغەكانی (1 و 2)ی بنەڕەتی و 12ی ئامادەیی هەڕەشە لە پرۆسەی خوێندنیش دەكات.

بەردەوام بە لە خوێندنەوە

راپۆرت

پەیوەندییەكانی ئەنەكەسە و دەسەڵاتدارانی رۆژئاوا تێكچوونەوە

خەڵك- بەشی هەواڵ

جارێكی دیكە پەیوەندییەكانی ئەنجومەنی نیشتمانی كوردی سوریا ئەنەكەسە لەگەڵ دەسەڵاتدارانی رۆژئاوای كوردستان تێكچووەوە.

مانگی رابردوو بە چاودێری ئەمریكا پارتی یەكێتی نیشتمانی كوردستان پەیەنەكەسە كە سەر بە دەسەڵاتدارانی رۆژئاوای كوردستانە لەگەڵ ئەنەكەسە لەسەر دروستكردنی ئەنجومەنێك وەك مەرجەعی رۆژئاوای كوردستان رێككەوتن.

جارێكی دیكە ناكۆكییەكانی هەردوولایەنی ئەنەكەسە و حكومڕانەكانی رۆژئاوای كوردستان سەریهەڵدایەوە دوای راگەیەنراوێكی ئەنەكەسە كە داوای گەڕانەوە بۆ سیستمی خوێندنی سەر بە حكومەتی سوریا و سیستمی خۆسەری رۆژئاوا دەكات.

لەوبارەیەوە كۆما جڤاكێن كوردستانێ كەجەكە لە راگەیەنراوێكدا دەڵێت: لە دۆخێكی بەم شێوەیەدا پێویستە: هەموو لایەك خاوەن چ هێڵێكی سیاسی بن، هەموو كوردێكی وڵاتپارێز و دیموكراتەكان لەسەر بناغەی مافە نەتەوەییەكان و دیموكرات خاوەنداری لە هەڵوێستی نەتەوەیی بكەن. لەبەرئەوەی لە دۆخی ئەمڕۆدا یەكڕیزی نەتەوەیی ئیدی لە هەڵبژاردەیەك زیاتر، بۆ ئێمە پێویستیەكی هاشاهەڵنەگرە.

وتیشی: لەم ڕۆژانەی دواییدا ڕاگەیەنراوی ئەنەكەسە لەبارەی خوێندنگاكانی سەر بە خۆبەڕێوەبەرایەتی خۆسەر و گەڕانەوە بۆ سیستمی خوێندنی حكومەتی شام و هەڵوەشاندنەوەی سیستمی هاوسەرۆكایەتی، بە ئاشكرایی بەو واتایە دێت كە لە دوژمن زیاتر دوژمنایەتی لەبەرانبەر بەها و دەستكەوتەكانی گەلی كورد گەلانی تری هەرێمەكە دەكرێت. هەمان ئەنەكەسە كە دوای ئەوەی لەگەڵ بەرپرسانی توركیا قسەی كرد و وتی، بڕوانامەی خوێندنگاكانی هەرێمەكانی سەر بە بەڕێوەبەرایەتی خۆسەر، لە نێودەوڵەتیدا كاری پێناكرێت.

راشیگەیاند، دوو دەستەواژەی (دژە كورد) و (دژە دیموكراسی) كە هەموو ساتێك لەدژی شۆڕشی ڕۆژئاوا بەكار دەهێنرا و بە هاوكاریكردنی حكومەتی شام تاوانبار دەكرا، ئەمڕۆ بە هەڵوێستی خۆی لە بەرانبەر پەروەردەی زمانی كوردی و پشتگیریكردن لە گەڕاندنەوەی سیستمی خوێندنی ڕژێمی سوریا دوو ڕاستین كە پێكەوە ئاشكرا بوون، ئەنەكەسە كە بەهۆی ئەوەی بە هیچ شێوەیەك بەشداری لە پڕۆسەی تێكۆشانی شۆڕشی ڕۆژئاوا نەبوو و هیچ باجێكی نەدا، بۆیەش خاوەنداریكردن لە دەستكەوتەكانی ڕۆژئاوا وەك ئەركی خۆی نابینێت و ئامادەیە مامەڵە بەم دەستكەوتانە بكات. ئەنەكەسەش باش دەزانێت كە سەرەتا گەلی كورد، گەلان باكوور و ڕۆژهەڵاتی سوریا بە هیچ شێوەیەك داواكاری گەڕاندنەوەی سیستمی خوێندنی ڕژێم و هەڵوەشاندنی سیستمی هاوسەرۆكایەتی قبوڵ ناكەن.

ئاماژەی بەوەشكردووە، بەم ڕۆژەڤە بێواتایانە تا دەتوانێت پڕۆسەی كۆبوونەوەكانی یەكێتی نەتەوەیی درێژ دەكات. ئاڵۆزی دەكات و لە ئەنجامدا پەیەنەكە بە تێكدانی كۆبوونەوەكان تاوانبار دەكات.

لە ساڵی 2012 دوای شۆڕِشەكانی سوریا كە ساڵێك پێشتر دەستیپێكرد، كوردەكانیش راپەڕین و شارەكانی رۆژئاوای كوردستانیان گرت و پارتی یەكێتی دیموكرات پەیەدە دەسەڵاتی گرتە دەست.

هەر زوو ناكۆكییەكان لە نێوان ئەنەكەسە و حكومڕانەكانی رۆژئاوا دەستیپێكرد و سەرجەم بارەگاكانی ئەنەكەسە داخران و سەركردەكانیان دەستگیركران و كاری سیاسی و رێكخراوەییان لێ قەدەغەكرا.

دوای دوو رێككەوتنیش لە دهۆك و هەولێر ئەنەكەسە و پەیەدە نەیانتوانی بگەنە رێككەوتن، تا دوای فشارەكانی ئەمریكا لە مانگی رابردوو رێككەوتنێكیان واژۆكرد.

بە ڕای چاودێرانی سیاسی جێبەجێكردنی ئەو رێككەوتنەی لە رۆژئاوا كراوە، قورسە، بەهۆی ئەوەی میكانیزمەكانی جێبەجێكردنی دیارینەكراوە و قورسە ئەنەكەسە بچێتە ژێر سیستمی حكومڕانی رۆژئاوا كە لەسەر بنەماكانی بیروباوەڕ و كاری پەكەكە دامەزراوە، حكومڕانەكانی رۆژئاواش ئەستەمە سازش لە گۆڕینی ئەو بنەمایانەی حكومڕانی بكەن.

بە ڕای چاودێران خاڵێكی دیكەی ناكۆكی لەسەر هێزە سەربازییەكانە، چونكە ئەنەكەسە خاوەنی هێزێكی مەشقپێكراو و راهێنراوە لە هەرێمی كوردستان كە ژمارەیان زیاتر لە پێنج هەزار كەسە و یەپەگە رێگانادات بگەڕێنەوە رۆژئاوا، ئەنەكەسەش ساز لە گەڕانەوەی هێزەكەی بەناوی لەشكری رۆژ ناكات.

بەردەوام بە لە خوێندنەوە

راپۆرت

توركیا پەنا بۆ سپیكردنەوەی پارە دەبات

خەڵك- بەشی هەواڵ

پارتی داد و گەشەپێدانی دەسەڵاتداری توركیا پرۆژە یاسایەك پێشكەشی پەرلەمان دەكات بۆ دووبارە گەڕاندنەوەی پارە لە دەرەوە، ئەو یاسایە رێگا دەدات بەشێوەیەكی كاتی بە كەس و كۆمپانیاكان بۆ گواستنەوەی پارە و ئاڵتوون و دراوە بیانییەكان بەبێ پشكنینی باج و لێكۆڵینەوەی تاوان یان سزا یان غەرامە، ئەمەش لەشێوەی سپیكردنەوەی پارەدایە بە پێی راپۆرتی رۆژنامەی ئەحوالی توركی.

رۆژنامەی زولفەقار دۆغان نوسی: گۆڕانكارییە یاساییەكان كە یاسای گەڕانەوەی پارە دەگرێتەوە تا ئێستا شەش جار كراوە كە یەكەم جار لە قەیرانی دارایی جیهانی 2008 دەركەوت.

ئاماژەی بەوەشكردووە ئەمجارە دەبێتە حەوت جار كە دەبێتە پرۆژە یاسایەكی تەواو.

ئەنقەرە چاوەڕێی 259 ملیار دۆلارە

دواین یاسا كە پێشكەشكی پەرلەمان كراوە، هەر وردبونەوە و لێكۆڵینەوەیەك لەسەرچاوە داراییەكان دوردەخاتەوە و هیچ باجێكیش دانانێت.

رۆژنامەی ئەحوال نوسیویەتی: قەبارەی ئەو سەرمایەی حكومەت چاوەڕێی گەڕانەوەیەتی لە دەرەوە دەگاتە 259 ملیار دۆلار، بۆیە هیچ پرسیار و باجێكی لەسەر دانانێت لە پێناو گرەنتی گەڕانەوەی بۆ نێوخۆی وڵات.

پشتگوێخستنی دادگای دەستوری

لەلایەكی دیكەوە مەترسی هەیە دادگا ناوخۆییەكان بڕیاری دادگای دەستووری جێبەجێنەكەن و بەرزترین دادگا لە وڵات پشتگوێبخەن.

گرەنتی چییە بۆ كەس و كۆمپانیاكان كاتێك دادگاكانی دارایی و باج یاسا نوێیەكە پشتگوێبخەن.

سەرجەم لایەنە نێوخۆیی و بیانییەكان لە توركیا دەتوانن سود لەو هەلە وەربگرن بۆ گەڕانەوەی سەرمایەكانیان لە دەرەوە، بەڵام یاساكە ئەوانە ناگرێتەوە كە ناچنە ژێر باری باجی داهاتەوە.
ئەم جوڵەی دوایی هاوكاتە لەگەڵ زیانی سیاسی و ئابوری و دادوەری و دامەزراوەیی دیار لە توركیا و پاشەكشەی ئابوری و قەرز گەیشتووەتە بەرزترین ئاستی لەگەڵ زیادبوونی پەرەسەندنە سیاسییە ناوخۆیی و دەرەكییەكان.

كۆچی وەبەرهێنانی بیانی

ئەو ژینگە نوێیەی توركیا ئاستەنگی بۆ وەبەرهێنانی بیانی دروستكردووە، بۆیە زۆریان كۆچیان كردووە لەگەڵ توانای هەڵگیرسانی ململانێ لە چوار بۆ پێنج بەرە و هەڕەشەكانی ئەمریكا و ئەوروپا بە سەپاندنی سزا بە سەر توركیادا.

توركیا بە قورسترین قەیرانی داراییدا تێپەڕ دەبێت بەتایبەت رۆژانە لیرەی توركی بەهاكەی لە بەرامبەر دۆلاری ئەمریكیدا لە دەستدەدات.

هۆكاری پاشەكشەی ئابووری توركیا

ئابوریناسان هۆكاری پاشەكشەی ئابوری توركیا و دابەزینی بەهای لیرە لە چەند هۆكارێكی ناوخۆیی و دەرەكیدا دەبیننەوە.

ئابوریناسەكان ئاماژە بەوە دەكەن، لە هۆكارە دەرەكییەكانی قەیرانی دارایی توركیا، نەخۆشی كۆرۆنا و دابەزینی ئاستی چوونی گەشتیاران بۆ توركیا بۆ نزمترین ئاستی، كە ئەو وڵاتە زۆر پشت بە گەشتیاری دەبەستێت لەگەڵ كاریگەرییەكانی دیكەی نەخۆشی كۆرۆنا بۆ سەر ئابوری جیهان بە گشتی.

هۆكارێكی دیكەی دەرەكی تێوەگلانی توركیایە لە چەندین ململانێی هەرێمی وەك سوریا، عێراق، لیبیا، قەرەباغ لەنێوان ئازەربایجان و ئەرمینیا، كشمیر لەنێوان پاكستان و هیندستان، دژایەتی ئیسرائیل كە تا ئێستاش هاوبەشێكی گەورەی ئابوری توركیا، تێكچوونی پەیوەندییەكانی توركیا لەگەڵ ئەمریكا و ئەوروپا لەسەر گەڕان بە دوای وزە لە دەریای ناوەڕاست و كڕینی موشەكی ئێس 400 روسی.

هاوكات پشتیوانییەكانی توركیا بۆ ئیخوان موسلیمین و گروپە چەكدارە توندڕۆكان و شەڕی كورد هۆكاربوون بۆ دابەزینی خواست لەسەر كاڵای توركی لە چەندین وڵات بەتایبەت لە سعودیە و ئیمارات و میسر و هەرێمی كوردستان.

لە هۆكارە ناوخۆییەكانیش رۆشتنی توركیا بەرەو دەوڵەتێكی دەسەڵاتی تاكە كەسی كە پێشتر دەسەڵات لە چەند دامەزراوەیەكدا بوو، ئێستا كۆبووەتەوە لە تەنها كەسێكدا، ئەوەش كاریگەری لەسەر ئاستی ناوخۆ و زیاتر بوونی ململانێكان ناسەقامگیری سیاسی و ئابووری كردووە.

بەردەوام بە لە خوێندنەوە

کوردستان