ئێمە لە تۆرە کۆمەڵایەتیەکان

کوردستان

وەزارەتی دارایی عیراق وەڵامێكی توندی حكومەتی هەرێم دەداتەوە

خەڵك – بەشی هەواڵ

وەزارەتی دارایی عیراق بە ڕاگەیەنراوێكی توند وەڵامی ڕاگەیەنراوەكەی ئەمڕۆی حكومەتی هەرێمی كوردستان دایەوە و ڕایدەگەیەنێت:”حكومەتی هەرێمی كوردستان نەرمی نەنواندووە لە دۆسیەی داهاتی دەروازە سنورییەكان”.

وەزارەتی دارایی عیراق لە ڕاگەیەنراوەكەیدا، حكومەتی هەرێمی كوردستان بەوە تۆمەتبار دەكات، كە ئەو پشكە پارانەی كە وەك مووچەی فەرمانبەرانی هەرێم لەلایەن حكومەتی ناوەندەوە خەرج كراوە نەگەیەنراوەتە دەست فەرمانبەرە ڕاستەقینەكانی هەرێم.
لە ڕاگەیەنراوەكەی حكومەتی عیراقدا هاتووە:”وەزارەتی دارایی نیگەرانی خۆی نیشان دەدات لەو ڕاگەیەنراوەی حكومەتی هەرێم، هەر لە سەرەتاوە حكومەتی عیراق ئامادەبووە بەپێی دەستوور مافەكانی خەڵكی هەرێم بدات، گرەنتی مافەكانیشیان بكات، بەتایبەت دوای ئەوەی داواكاری زۆرێك لە فەرمانبەرانی هەرێممان پێگەیشت”.

وەزارەتی دارایی عیراق، ئاماژەی بەوەشداوە:”ڕوونكردنەوەكەی حكومەتی هەرێم وردبین نەبووە لە دیاریكردنی كێشەی ڕێككەوتنی نێوان هەرێم و بەغدا، بەتایبەت ئەو نەرمییەی حكومەتی عیراق نواندوویەتی بۆ ئەوەی ئاسانكاری بۆ ڕێككەوتنێك بكات كە خزمەت بە گەلی كورد بكات، جەخت دەكەینەوە حكومەتی عیراق بەپێی مافە دەستوورییەكانی مافی ئەوەی هەیە لە بەڕێوەبردنی خاڵە سنووریەكان بەشدار بێت و چاودێری داهاتی هەرێم بكات لەگەڵ داهاتە گومركییەكان، وەك چۆن ماددەی 114 ی دەستوور ڕێگەی پێداوە”.

لە بەشێكی تری ڕاگەیەندراوەكەی وەزارەتی دارایی عیراقدا هاتووە:”لەوچوارچێوەیەدا ڕایدەگەیەنین حكومەتی هەرێم نەرمی تەواوی نەنواندووە بۆ ڕێككەوتن، هەوڵیش دەدات كێشەكە بخاتە ئەستۆی حكومەتی عیراق، لەكاتێكدا وردبینی لە داهاتەكانی هەرێم یەكلایی نەكردووەتەوە و بەرپرسیاریەتی هەڵناگرن، لەبەرامبەریشدا حكومەتی عیراق جەختدەكاتەوە لە پاراستنی مافە دەستوورییەكانی هەرێم، هەر لەوچوارچێوەیەشدا لە 19 ی 5 ی 2020 دا 400 ملیار دیناری ناردووە بۆ هەرێم، تا دوای ئەو بەروارە ڕێككەوتنی كۆتایی لەگەڵ هەرێم بكات”.

وەزارەتی دارایی عیراق، سووربوونی حكومەتی عیراق بۆ ڕێككەوتن لەگەڵ هەرێم دووپاتدەكاتەوە و ڕایدەگەیەنێت:”مستەفا كازمی سەرۆك وەزیران ئاڕاستەی كردووین كە بە زووترین كات ڕێگەچارەیەك بدۆزینەوە تا كێشەكانی نێوان هەرێم و بەغدا چارەسەر بكەین و نەرمی بنوێنین لەپێناو پاراستنی مافە دەستوورییەكانی خەڵكی هەرێمی كوردستان، بۆیە داوا لە حكومەتی هەرێم دەكەین بەزوویی پابەندییە دەستوورییەكانی جێبەجێ بكات و بگەڕێتەوە بۆ سەر مێزی گفتوگۆ لەپێناو بەرژەوەندی گشتیدا”.

ئەمەش لە كاتێكدایە، ئەمڕۆ ئەنجومەنی وەزیرانی هەرێمی كوردستان بە سەرپەرشتی مەسرور بارزانی، سەرۆكی ئەنجومەنی وەزیران و بەشداریی قوباد تاڵەبانی جێگری، سەرۆك وەزیران ، لە ڕێگەی ڤیدیۆ كۆنفرانسەوە كۆبووەوە و لە كۆبوونەوەكەدا بەغدا بە كەمتەرخەم لەقەڵەم درا لەبارەی ڕێكنەكەوتن لەگەڵ هەرێم.

کوردستان

ئاسایشی سلێمانی ؛ باندێكی باندێكی‌ چوار كەسی‌ دەستگیركرد

خەڵك – بەشی هەواڵ

بەڕێوەبەرایەتی‌ ئاسایشی‌ پارێزگای‌ سلێمانی‌ ڕایدەگەیەنێت، باندێكی‌ چوار كەسیان دەستگیركردووە، كە كاریان بارزگانی بووە بە شوێنەوار و ماددەی‌ هۆشبەرەوە و بە چەكی بێ ‏مۆڵەتەوە هەستاون بە ‏هەڕەشەكردن لە خەڵك .

بەڕێوەبەرایەتی‌ ئاسایشی‌ پارێزگای‌ سلێمانی‌ ئەمڕۆ پێنجشەممە 24ی‌ ئەیلولی‌ 2020، لە ڕاگەیەندراوێكدا ، كە وێنەیەكی بۆ (خەڵك) هاتووە ڕایگەیاندووە، هێزەكانیان لە رۆژی 10ی ئەیلوولی 2020 باندێكی چوار كەسییان ‏دەستگیركرد كە بازرگانییان بە شوێنەوار و ماددە هۆشبەرەكانەوە ‏كردووە.

ڕاشیگەیاندووە، ئەو چوار كەسە هەستاون بە ‏هەڕەشەكردن لە خەڵك بە چەكی بێ ‏مۆڵەت و بازرگانییان بە شوێنەوار و ‏ماددە هۆشبەرەكانەوە كردووە، هاوكات بە چەقۆ و چەكیش خەڵكیان بریندار ‏كردووە.‏

ئاشكراشیكردووە، ئەو چوار كەسە ‏تەمەنیان لەنێوان 40 بۆ 44 ساڵدا بووە، سیانیان دانیشتووی وڵاتی ‏بەریتانیان ‌و یەكێكیشیان دانیشتووی شاری سلێمانییە‌ و سەرجەمیشیان دانیان بە تاوانەكانیاندا ناوە، ئێستاش رووبەڕووی یاسا كراونەتەوە و ‏لێكۆڵینەوەش لەگەڵیاندا بەردەوامە.‏

 

بۆ بەڕێز / كەناڵەكانی ڕاگەیاندن
بابەت / دەستگیركردنی باندێكی تۆمەتبار
لەدرێژەی كارو چالاكیەكانی بەڕێوەبەرایەتی ئاسایشی سلێمانی , بەمەبەستی پاراستنی سەروماڵا و كەرامەتی هاوڵاتیان و ڕوو بەڕوو بونەوەی هەرجۆرە كارێكی هەڵخەڵەتاندن و فریودان و ئەنجامدانی كاری نایاسی تێكدانی ئاسایش و ئارامی هاوڵاتیان
هێزەكانی ئاسایشی سلێمانی توانیان لەڕۆژی (10/9/2020 ) لە چالاكیەكدا چوار تۆمەتبار دەستكیربكەن بەفەرمانی دادوەر و بەپێی ماددەی ( 431) لەیاسای سزادانی عێراقی بە ناوەكانی ( ك،ع،خ لەدایكبوی ساڵی 1981 ڕەگەز كورد دانیشتوی وڵاتی بەڕیتانیا / س،م،ص لەدایكبوی 1985 ڕەگەز كورد دانیشتوی وڵاتی بەڕیتانیا / ب،ص،ڕ لەدایكبوی 1980 ڕەگەز كورد دانیشتوی وڵاتی بەڕیتانیا / ز،م،م لەدایكبوی 1976 دانیشتوی سلێمانی) ، تۆمەتباران هەستاون بە هەڕەشەكردن لەخەڵكی بەچەكی بێ مۆڵەت و بازركانی كردن بە شوێنەوار و بازرگانی بە ماددەی هۆشبەر و برینداركردنی هاوڵاتیان بەچەقۆ و،هەڵگرتنی چەكی بێ مۆڵەت ، سەرجەمیان دانیان بەتاوانەكانیاندا ناوە و ڕوبەڕوی یاسا كراونەتەوە و لێكۆڵینەوە لەگەڵیاندا بەردەوامە .

لەگەڵ ڕێزدا….

ڕاگەیاندنی
بەڕێوەبەرایەتی ئاسایشی پارێزگای سلێمانی

بەردەوام بە لە خوێندنەوە

کوردستان

مەسرور بارزانی؛ سەرەڕای قەیرانی دارایی بەردەوامن لە پێشكەشكردنی خزمەتگوزاریییەكان

خەڵك – بەشی هەواڵ

سەرۆكی حكومەتی هەرێمی كوردستان ڕایدەگەیەنێت ، هەرێمی كوردستان فاكتەرێكی گرنگی سەقامگیرییە لە عیراق و ناوچەكەدا ، دەشڵێت،”سەرەڕای قەیرانی دارایی حكومەت بەردەوامە لە ئەنجامدانی پڕۆژەی خزمەتگوزاریی و جێبەجێكردنی بەرنامە چاكسازییەكەی”.

مەسرور بارزانی، سەرۆكی حكومەتی هەرێمی كوردستان لە هەژماری تایبەتی خۆی لە فەیسبوك بڵاویكردەوە، ئەمڕۆ پێنجشەممە 2020/9/24 پێشوازی لە مارتن هوس، باڵیۆزی یەكێتی ئەوروپا لە عیراق كردووە، ‎لە دیدارێكدا دوایین گۆڕانكاری و پێشهاتەكانی عیراق و پەڕەپێدانی پەیوەندییەكانی نێوان هەرێمی كوردستان و یەكێتی ئەوروپایان تاووتوێ كردووە.

ڕاشیگەیاندووە، ‎سوپاسی پشتگیری یەكێتی ئەوروپای كردووە، لە هەرێمی كوردستان و جەختیشی لەوە كردوە، كە هەرێمی كوردستان فاكتەرێكی گرنگیی سەقامگیرییە لە عێراق و ناوچەكەدا .

باسی لەوەشكردووە، كە سەرەڕای قەیرانی دارایی بەڵام حكومەتی هەرێمی كوردستان، بەردەوامە لە ئەنجامدانی پڕۆژەی خزمەتگوزاریی و جێبەجێكردنی بەرنامە چاكسازییەكەی، لە پێناو گەشەپێدانی زیاتری هەرێم.

هاوكات ‎باڵیۆزی یەكێتی ئەوروپا لە عێراق، ئاماژەی بەوەدا، كە هەرێمی كوردستان نموونەیەكی سەركەوتوو و گەشەسەندووە لە عیراق و یەكێتی ئەوروپاش ئامادەیە بۆ پەرەپێدانی زیاتری پەیوەندییەكان و هاندانی وەبەرهێنەرانی ئەوروپایی بۆ وەبەرهێنان لە هەرێمی كوردستان.

بەردەوام بە لە خوێندنەوە

کوردستان

وەزارەتی سامانەسروشتییەكان ڕاگەیەنراوێكی بڵاوكردەوە

خەڵك – بەشی هەواڵ

وەزارەتی سامانە سروشتییەكانی حكومەتی هەرێم بەتوندی ئەو دەنگۆیانەی ئەم دواییەی وەزیری دارایی حكومەتی فیدڕاڵ سەبارەت بە بەقاچاغبردنی نەوتی هەرێم ڕەتدەكاتەوە و دەشڵێت،”دامەزراوەی دیلۆیت وردبینیان بۆ دەكات وئەوانیش بۆ رای گشتی دەيخەنەڕوو”.

وەزارەتی سامانە سروشتییەكانی حكومەتی هەرێم لە ڕاگەیەنراوێكدا بڵاویكردەوە، بەتوندی ئەو دەنگۆیانەی ئەم دواییەی وەزیری دارایی حكومەتی فیدڕاڵ سەبارەت بە بەقاچاخبردنی نەوت لە هەرێمی كرودستان ڕەتدەكەینەوە، ئەم جۆرە پڕوپاگەندانە بێ بنەما و بێ بەڵگەن.

لە ڕاگەیەنراوەكەدا هاتووە، ژمارەكانی تایبەت بە هەناردە و بەرهەمهێنانی نەوت لەلایەن دامەزراوەی دیلۆیت وردبینیان بۆ دەكرێت و بۆ رای گشتی دەخرێتەڕوو بۆیە راستتر ئەوەیە، كە دەسەڵاتی فیدراڵی هەمان ڕێكاری حكومەتی هەرێم بگرێتەبەر.

ئەوەشخراوەتەڕوو، وردبینی و بڵاوكردنەوەی رێژەی بەرهەمێنانی نەوت، لەلایەن دامەزراوەی دیلۆیت ەوە لە پێناو شەفافیەت و بەپرسیارێتی زیاترە لە كەرتی نەوت لەسەر ئاستی تەواوی عێراق دا.

بەردەوام بە لە خوێندنەوە

کوردستان