لە ڕاگەیاندراوێکدا لاهور شێخ جەنگی هۆشداری دەداتە یەکێتی و پارتی، دەڵێت ئەگەر لە خەمی میللەتدا نەبن، هاووڵاتیان لێتان ڕادەچڵەکن و شاربەردەتان دەکەن.
ئەمڕۆ لاهور شێخ جەنگی، هاوسەرۆکی پێشووی یەکێتی نیشیتیمانی کوردستان ڕایگەیاندووە، بزووتنەوەی سیاسیی کورد بەدرێژایی خەباتی نەتەوایەتی بەرهەمەکەی فیدراڵییەت و حکومەتی هەرێم و پەرلەمان بوو، بەڵام ئەم هەرێمە کە ئێستا لەژێر مەترسیی پاشەکشەیەکی دەستووریی و سیاسیدایە، دەبێت حیزب و سیاسییەکان بە تایبەتی سەرانی یەکێتی و پارتی لە پێناو بەرژەوەندیی تەسکی خۆیان هەرکات بیانەوێت شەش مانگ کۆک و شەش مانگ ناکۆکن و بەردەوام یاریی ترسناک بە چارەنووسی ئەم میللەتەوە دەکەن.
دەڵیت ” لەبری ئەوەی خەریکی قۆڵبادانی یەکتر و گوێڕایەڵی دەوڵەتان بن باشتر وایە بیر لەئێستا و ئایندەی سیاسیی هەرێم و خەڵکەکەی بکەنەوە ئەگینا بەدڵنیاییەوە بەردەوامبوونتان بەم ڕەفتارانەتان وا دەکات کە میللەت لێتان ڕابچڵەکێت و وڵات بەدەرتان بکات”.
ئاماژە بۆ ئەوەدەکات، یەکێتی و پارتی خاوەنی دەنگی هەموو کوردستان نین، هەڵبژاردنەکەی ڕابردوو سەلماندی، کە ٪٧٣ هاووڵاتیان بەشداری دەنگدانیان نەکردووە.
