ئێمە لە تۆرە کۆمەڵایەتیەکان

کوردستان

پڕۆژەیەك بۆ سەد ساڵەی سیڤەر ڕادەگەیەنرێت

خەڵك – بەشی هەواڵ

ژمارەیەك ئەكادیمیی كورد لە یادی سەد ساڵەی پەیماننامەی سیڤەردا پڕۆژەیەك بۆ چارەسەركردنی پرسی كورد لەناوچەكە ڕادەگەیەنن.

ئەو ئەكادیمییە كوردانە لە پڕۆژەكەیاندا ڕایدەگەیەنن: خوێندنەوەی سیڤەر دوای سەدەیەك، خوێندنەوەی چارەسەرەكانی پرسی كوردە. سیڤەر كۆمەڵێك خەسڵەت‌و نۆرمی هەبوو كە تا ئەمڕۆ بەردەوامن، وەك باڵایی بكەرە دەرەكییەكان‌و دۆخی نێودەوڵەتی، دروستبوونی دەرفەت لە میانەی دروستبوونی درز لە سیستەمی نێودەوڵەتیدا، درزگەلێك كە دەرفەت بۆ كورد دەڕەخسێنێت لێیانەوە بێتە ناو مێژووەوە. سیستەمی نێودەوڵەتی چەندە ناجێگیرو دڵڕەقە هێندەش دەرفەتڕەخسێنە‌. لە دۆخی كەم دەسەڵاتی دا مەعریفەو توانای تێگەیشتن‌و زانین‌ و هەڵسەنگاندنی دینامیكیەت‌ و میكانیزمی سیستەمی نێودەوڵەتی زێدە گرنگە.

دەشڵێن: بە لەبەرچاوگرتنی ئەم تابلۆیە ئێمە قسەو گفتوگۆی چارەسەرو ئەگەرەكان دەكەین. سەرەتا پرسی چارەسەر بۆ كێ؟ بە سودی كێ؟ لەپێناو چی دا؟ جەختیان لەسەر دەكرێت. چارەسەر دەبێت هەم لە قازانجی كورد، هەم لە قازانجی گەلانی هاوسێ دا بێت چونكە كورد لەگەڵ گەلانی ناوچەكە پێكەوە بژییان جودابێتەوە، ئەوە هەر لەگەڵ ئەوانی دیكەدا دەژێت.

جێی ئاماژەیە، پەیمانی سیڤەر لەنێوان بەریتانیا، فەڕەنساو ئیتاڵیا وەك لایەنی سەرەكی براوەی شەڕی یەكەمی جیهانی لەلایەك‌و توركیا وەك لایەنی دۆڕاو لە ١٠/٨/١٩٢٠ لە شاری سیڤەر لە فەڕەنسا مۆركرا. بەپێی پەیمانی سیڤەر، لە بەشە داگیركراوەكەی ئیمپراتۆریەتی عوسمانی چەند دەوڵەتێك لەژێر ئینتیدابی بەریتانی‌یان فەڕەنسی دروستكران‌، بەڵێنی دامەزراندنی دەوڵەتێكی سەربەخۆ بە ئەرمەنییەكان‌و ناوچەیەكی ئۆتۆنۆمییش، كە هەلی گەشەكردنی بۆ دەوڵەت هەبێت، بە كورد درا.

 

دەقی پڕۆژەكە:

 

پڕۆژەیەك بۆ سەد ساڵەی سیڤەر

دوای سەدەیەك لە مۆركردنی پەیمانی سیڤەر، پێداچوونەوە بەڕووداو و دەركەوتەكانی ئەو سەد ساڵەو تێڕوانین لە دوارۆژ كاتی هاتووە. سەدەی بیست لە زۆرڕووەوە جیاوازە لە سەدەكانی پێشووتر. لە سەدەی بیستدا، تێگەیشتن‌وهاوبەشە دینییەكان وەك گرێدەری كۆمەڵگەكان لاواز دەبێت‌و خەلافەتی موسڵمانان لەناودەچێت. ئەوروپییەكان هەوڵدەدەنڕۆژهەڵاتی ناوین لە دیدی خۆیانەوە دابڕێژنەوە. ئەم هەوڵەو دەرئەنجامەكانی تراژیدیای جۆراوجۆر لە ناوچەكە بەرهەمدێنن. ئیمپراتۆریەتی عوسمانی، وەك هێزی باڵاو سیستەمی بەڕێوەچوونی ناوچەكە، هەڵدەوەشێنرێت. لە جێگایدا سیستەمگەلێكی نوێ‌ بە كۆمەڵێك چەمك‌و ئایدیا دێتە ئاراوە، لەوانە: دەوڵەت، نەتەوە، سنور، شوناس، مۆدێرنە، بەشداربوون، كە بەگشتیی ئایدیای ئەوروپایین. بۆ سەر لە نوێ داڕشتنەوەی ناوچەكە چەندین كۆنفرانسی نێودەوڵەتی سازدەكرێت، لەوانە: كۆنفرانسیڤێرسای‌و سیڤەرو لۆزان، چەندین پەیمانیش مۆردەكرێت.

پەیمانی سیڤەر لەنێوان بەریتانیا، فەڕەنساو ئیتاڵیا وەك لایەنی سەرەكی براوەی شەڕی یەكەمی جیهانی لەلایەك‌و توركیا وەك لایەنی دۆڕاو لە ١٠/٨/١٩٢٠ لە شاری سیڤەر لە فەڕەنسا مۆركرا. بەپێی پەیمانی سیڤەر، لە بەشە داگیركراوەكەی ئیمپراتۆریەتی عوسمانی چەند دەوڵەتێك لەژێر ئینتیدابی بەریتانی‌یان فەڕەنسی دروستكران‌، بەڵێنی دامەزراندنی دەوڵەتێكی سەربەخۆ بە ئەرمەنییەكان‌و ناوچەیەكی ئۆتۆنۆمییش، كە هەلی گەشەكردنی بۆ دەوڵەت هەبێت، بە كورد درا.

ماددەی ٦٤ ی پەیمانی سیڤەر پێشنیارێك دەخاتەڕوو بۆیەكگرتنەوەی بەشێكی بەرچاو لە كوردستانی ژێر دەستی عوسمانییەكان‌وڕایدەگەیەنێت ئەگەر لە ماوەی ساڵێكدا، لە مێژووی دەستبەكاربوونی پەیمانەكە، كوردەكانی توركیا داوایەكیان پێشكەش بە كۆمەڵەی گەلان كردو نیشانیاندا كە ئارەزودەكەن لە توركیا جیاببنەوەو ئەویش داواكەیڕەچاوكردن، ئەوە دەبێت توركیا دەستبەرداری هەموو مافەكانی بێت. هاوكات، پێشنیاری پێكەوەلكانی ئارەزومەندانەی كوردەكانی ویلایەتی موسڵیش بە كوردەكانی دەوڵەتە سەربەخۆكە دەكات.

كاتێك ئێمە وەك كۆمەڵێك ئەكادیمیی ئاوڕ لە ساتەوەختی سیڤەر دەدینەوە، وەك ڕووداوێكی سیاسی تەماشای دەكەین‌. ڕووداوی سیاسی بەمانای ئەوەی هەوڵ بۆ دەستكاریكردن‌و گۆڕینی ئاراستەی پیادەكراو و دەستپێكردنی ئاراستەیەكی نوێ. ساتەوەختی سیڤەر ڕووداوێكی دەوڵەمەندە بۆ تێگەیشتنی كورد بۆ خۆی‌و پەیوەندی بە سیستەمی ناوچەیی‌و جیهانی‌و نۆرمەكانی بەڕێوەبردنەوە.

لەكاتێكدا سیڤەر ساتەوەختی دانپێنان‌و ناسین‌و هەوڵدانە بۆ بەرجەستەكردنی مافەكانی كورد وەك نەتەوەكانی دیكە، لەهەمانكاتدا، بەرجەستەبوونی دیاردەیەكە كە زلهێزەكانی دنیا پەیمانێك دەدەن‌و پاشان بەهۆی گۆڕانكاری هێزو بەرژەوەندییەكانییان لە ناوچەكەو دنیا دا پشتگوێیدەخەن. وەك هەمووڕووداوێكی ئومێدبەخش كاتێك فەراهەم نابێت، نائومێدی لەگەڵ خۆیدا دێنێت.

دوای سێ ساڵ لە پەیمانی سیڤەر، هاوپەیمانان پەیمانێكی دیكە لەگەڵ توركە كەمالییەكاندا لە لۆزان مۆردەكەن. لۆزان نەك هەرڕێگربوو لە پێش دامەزراندنی ناوچە ئۆتۆنۆمەكە‌و دەوڵەتە چاوەڕوانكراوەكە، بەڵكو كوردستانی عوسمانی بەسەر سێ دەوڵەتە تازە دامەزراوەكەدا، عێراق، توركیاو سوریا، بەفەرمیكرد‌و گەلی كوردیشی لە مافی بەدەوڵەتبوون، پێچەوانەی گەلانی دیكەی ناوچەكە، بێبەری كرد.

كوردەكانی ئێران كە سەدان ساڵ بوو لە ململانێكانی نێوان سەفەوییەكان‌و عوسمانییەكان ناوچەكانیان خرابوویە سەر قەڵەمڕەوی سەفەوییەكان، بەهاتنی قاجارەكان‌و دامەزراندنی دەوڵەتی نوێی ئێران لە ١٩٢٥ دا، وەك كوردانی دیكە، لە مافی بە دەوڵەتبوون بێبەشكران.

لە غیابی دەوڵەتدا، گەلی كورد مافی سەربەخۆیی‌و سەروەرییشی لێ زەوتكرا. ئەمەش لەوكاتەوە هەتا ئێستا، كڕۆكی پرسی كورد لەڕۆژهەڵاتی ناوین پێكدێنێت. لەو ساتەی گەلی كورد بوو بە بەشێك لە پێكهاتەی چوار وڵاتەكە، بوونی كوردو پرسی كورد نەك هەر لە دامەزراندنی دەوڵەت بەڵكو لە فەراهەمكردن‌و چێژوەرگرتن لە مافە سەرەتاییە سیاسیی‌و كۆمەڵایەتییەكانی دیكەی – وەك ئۆتۆنۆمی ناوچەیی، بەكارهێنانی زمانی دایك، پراكتیزەكردنی ئازادانەی كەلتورو داب‌و نەریت – بێبەشكراوە، قەدەغەكراوە، سنوورداركراوەیانڕێگریلێكراوە.

لە سیڤەرەوە تا ئێستا مامەڵكردن لەگەڵ گەلی كوردو پرسی كورد لەلایەن چوار وڵاتەكەوە كەم تا زۆر گۆڕانی بەسەردا هاتووە،ڕۆژگارو قۆناغ هەبووە كورد لەسەر شوناسی كوژراوە، دووچاری پاكسازیی نەتەوەیی بۆتەوە، جینۆساید كراوە، قۆناغیش هەبووە بە تاك یان بە كۆمەڵ هەندێك لە مافە سیاسی‌و كەلتورییەكانی بەدەستهێناوەو پیادەكردوە. سەرەڕای ئەمە، چوار دەوڵەتەكە بە تێكەڵەیەك لە بەكەمینەكردنی كوردو بەئاسایشكردنی پرسەكەی مامەڵەیان لەگەڵ كورد كردوە. مەبەستی سەرەكیش لەممامەڵەكردنە تواندنەوەو سڕینەوەو قڕكردنی كورد بووە لە پڕۆسەی دروستكردنی چوار دەوڵەت-نەتەوە دا. ئەم جۆرە مامەڵەیە قەیرانی فرە ئاستی بەرهەمهێناوە، كە پێویستی بە چارەسەرە نەك هەر بۆ كورد بەڵكو بۆ ئەوانی دیكەش چونكە پرسی كورد پێشئەوەی كێشەی كورد بێت، كێشەی شكستی ئەو وڵاتانەیە كە ناتوانن مەدەنی بن، بوار بە جیاواز بدەن، دیموكراسی ڕاستەقینە بن.

بەردەبازی چارەسەركردنی پرسی كورد بە جیاكردنەوەی چەمكی داوا و ماف دەست پێدەكات، ئەوەش بەو مانایەی كاتێك كورد داوای مافەكانی دەكات بە مافی دەوڵەتی سەربەخۆو سەروەرییشەوە، ناكرێت وەك داوایەك بۆ دابەشكردن‌و هەڵوەشانەوەی ئەو وڵاتانە تەماشابكرێت، بەڵكو دەبێت وەكماف‌وڕێگەچارەیەك بۆڕزگاركردنی ئەم وڵاتانە ببینرێت بۆ گەیشتن بە سەقامگیریی‌و ئاشتی لەو وڵاتانەو لە ناوچەكەو لە جیهان.

خوێندنەوەی سیڤەر دوای سەدەیەك، خوێندنەوەی چارەسەرەكانی پرسی كوردە. سیڤەر كۆمەڵێك خەسڵەت‌و نۆرمی هەبوو كە تا ئەمڕۆ بەردەوامن، وەك باڵایی بكەرە دەرەكییەكان‌و دۆخی نێودەوڵەتی، دروستبوونی دەرفەت لە میانەی دروستبوونی درز لە سیستەمی نێودەوڵەتیدا، درزگەلێك كە دەرفەت بۆ كورد دەڕەخسێنێت لێیانەوە بێتە ناو مێژووەوە. سیستەمی نێودەوڵەتی چەندە ناجێگیرو دڵڕەقە هێندەش دەرفەتڕەخسێنە‌. لە دۆخی كەم دەسەڵاتی دا مەعریفەو توانای تێگەیشتن‌و زانین‌و هەڵسەنگاندنی دینامیكیەت‌و میكانیزمی سیستەمی نێودەوڵەتی زێدە گرنگە.

بە لەبەرچاوگرتنی ئەم تابلۆیە ئێمە قسەو گفتوگۆی چارەسەرو ئەگەرەكان دەكەین. سەرەتا پرسی چارەسەر بۆ كێ؟ بە سودی كێ؟ لەپێناو چی دا؟ جەختیان لەسەر دەكرێت. چارەسەر دەبێت هەم لە قازانجی كورد، هەم لە قازانجی گەلانی هاوسێ دا بێت چونكە كورد لەگەڵ گەلانی ناوچەكە پێكەوە بژییان جودابێتەوە، ئەوە هەر لەگەڵ ئەوانی دیكەدا دەژێت.

هەڵبەت، پێكەوەژیان چەندین جۆری هەیە، پێكەوەژیان وەك نەبویەك. لە پاش سیڤەرەوە ئەو سیستەمەی كە لە ناوچەكەدا داڕێژراوە چارەسەری پرسی كورد لەم بژاردەیەدا دەبینێت.

ئێمە لەو دونیابینیەوە پرسەكە دەبینین كە ئەگەر دەوڵەتێك لەسەر سڕینەوەی كورد دروستكرابێت ئەوە لە دەرئەنجامدا نەك بۆ كورد بەڵكو كێشەی گەورە بۆ خودی دەوڵەتەكە‌و كۆمەڵگاكەی‌و كۆمەڵگای نێودەوڵەتیش دروستدەكات. بەسەربازییبوونی كۆمەڵگەكان، گەشەنەكردنیان، باڵادەستیی عەقڵیەتی فاشیزم بەشی هەرە زۆری دەگەڕێتەوە بۆ داننەنان بە كوردو چارەسەرنەكردنی پرسەكەی.

هەندێك پرسی پێكەوەبوون لە ئاستی فیكریدا لە پارادایمی دیموكراسیدا دەبینن‌و بەدیموكراسیكردنی ئەو وڵاتانەی كە كوردیان تێدا دەژی وەك چارەسەر بۆ پرسی كورد وێنادەكەن. ئەم دیدە زیاترڕۆمانسییە لەوەی مێژوویی‌و واقیعی بێت. دیموكراسی تەنیا كاتێك دەبێتە چارەسەر كە زامنی فرەیی‌و جیاوازییەكان بكات‌و دووربێت لە خواستی هەژموونگەرایی نەتەوەی یان گروپی سەردەست‌.
یەكێكی دیكە لە تێزەكانی پێكەوەژیان كە ئەمڕۆ برەوی هەیە، تێزی عەبدوڵا ئۆجەلانە. ئەم تێزە چەندین لایەنی جوان‌و چەندینی كێشەئامێزی هەیە. تێزی ئۆجەلان لەسەر گۆڕینی سیستەمی دەوڵەتیی‌و نێودەوڵەتی ناوچەكە بونیادنراوە، كە لە هەوڵی كۆتاییهێنان بە مۆنۆپۆلكردنی دەوڵەت وەك ئامرازێكی نەتەوەی سەردەستە. لەجێی ئەودا پێشنیاری ئیدارەی خۆسەری دەكات.

ڕەخنەی سەرەكی ئێمە لەو تێزە سەرچاوەكەی لەوە گرتوە كە وەك سیڤەر پێمان دەڵێت هەڵوەشانەوەی سیستەمی دەوڵەتیی ناوچەكە پرسێكی ناوخۆیی نیەو كەمتر پەیوەستە بە خواست‌و ئارەزوی گەلانی ناوچەكە، بەڵكو پرسێكی نێودەوڵەتییە.

لێرەدا پرسی دەوڵەتبوون وەك بەدیل دێتە پێشەوە. بەڵام دەوڵەتبوون زیاتر لەڕێگایەكی هەیە. فۆرمێكی باوی دەوڵەتبوون لای كورد، مۆدێلی نافیكریی‌و هەستسازیی تەقلیدییە. ئێمە ئەم دیدە بە لاوازو پڕ كێشە دەبینین.

ئێمە سەرەتا دەوڵەتبوون لە نیشتیماندا (تێرەتۆریدا) دەبینین، هاوكات‌و دواتر دەوڵەتبوون لە حوكمداریدا، لە دروستكردنی كۆمەڵگەدا، لە هەبوونی ئاگایی دەوڵەتدارییدا، لە تۆكمەكردنی خودو شوناس‌و زمان‌و كەلتوری پێكەوەژیان‌ویەكسانی‌و عەدالەتی كۆمەڵایەتیدا، لە بەرهەمهێنانی هێزدا، لە پێشاندانی نمونەی جوان بە دنیادا دەبینین، نەك داوایەكیڕوتی سۆزدار.

دەستەبژێری سیاسی تەقلیدی كوردی بە گشتی لە ئاستێكدا نەبووە كە بتوانێت هاوتەریب لە ناوەوەو دەرەوە برەو بە پرسی دەوڵەتبوون بدات. هۆكارەكانی ئەمە زۆرن، لەوانە باڵایی حیزب بە سەر نیشتماندا، شەڕی ناوخۆیی، نەبوونی توانای دروستكردنی دەزگاو سیستەمی بان-حیزبی‌و بان-سنوریی‌، واتە نیشتیمانیی. لەم ساڵانەشدا، بەتایبەتی لە باشور، پرسی كەڵەكەكردنی سامانیش ئاستەنگێكی گەورەیە.

لەبەرئەوەی دەوڵەتیەكەی سەرەكییە لە سیستەمی نێودەوڵەتیدا، ئەوا بێدەوڵەتی واتە ئامادەنەبوون لە سیستەمی نێودەوڵەتیدا‌و لاوازبوون‌و بەكەمینەبوونیش لەنێو چوار وڵاتەكەدا. ئەمەش كورد دەخاتە بەرڕەحمەتی دەوڵەت‌و نەتەوەی سەردەست‌و ئەگەری سڕینەوەو لەناوچوون دێنێتەگۆڕو بەواقیعدەكات، چ بەخێرایی چ بەهێواشی.

بەكورتی، پڕۆژەكەی ئێمە ئاوڕدانەوەیەكە لە سیڤەر بەڵام بە چاو لەسەر دواڕۆژ كە خۆی لە نوسینی كتێبێك بە زمانی كوردی دەبینێت بە تەرجومەكردنی بۆ توركی‌و فارسی‌و عەرەبی‌و ئینگلیزی‌و فەڕەنسی. كتێبەكە بە هەڵوەستەیەك لەسەر پەیمانی سیڤەر دەستپێدەكات، دواتر دێتە سەر دەستنیشانكردن‌و گفتوگۆكردنی ئەو بنەمایانەی كە پرسی كورد پێكدێنن. بەدواداچوونێكیش دەكات بۆ سەد ساڵ لە بێبەشكردنی كورد لە هاوتابوون‌ بە ئەوانی دیكەو پەراوێزبوونی لە مێژوودا. ڕەهەندە ناوچەیی‌و نێودەوڵەتییەكانی پرسی كورد‌و كاریگەریی بكەروڕووداوە نێودەوڵەتییەكان‌ لەسەر پەراوێزخستن لەلایەك‌و دەرخستنی كورد لەلایەكی دیكە بەشێكی گرنگی پڕۆژەكە پێكدێنن. لە كۆتاییدا، پڕۆژەكە بەچڕی گفتوگۆی چارەسەرو پێشنیارەكان بۆ پرسی كورد دەكات‌و هەوڵدەدات بیرۆكەی نوێ بخاتەڕوو بۆ گفتوگۆو كەڵك لێوەرگرتن‌، بەمەبەستی دروستكردنی گفتوگۆیەك لە نێو كورد‌ خۆی‌و لەگەڵ ئەوانی دیكەدا.

شێركۆ كرمانج – سەردار عەزیز- ئارام ڕەفعەت – هەردی مێد

دوو كەسایەتی دیكە، د. بورهان یاسین‌ و كاك تاهیر خالیدی،لە دەستپێشخەری‌و گەڵاڵەبوونی بیرۆكەكانی ئەم پڕۆژەیە ڕۆڵی كاریگەرییان هەبووە، ئێمە ڕێزو پێزانینمان بۆ هەوڵەكانیان هەیە.

کوردستان

وێنە.. لە هەولێر كەسێك بە تۆمەتی بەكارهێنانی ماددەی كریستاڵ دەستگیركرا

خەڵك – بەشی هەواڵ

بەڕێوەبەرایەتی پۆلیسی پارێزگای هەولێر ڕایدەگەیەنێت، كەسێكیان بە تۆمەتی بەكارهێنانی ماددەی هۆشبەر دەستگیركردووە.

بەڕێوەبەرایەتی پۆلیسی پارێزگای هەولێر لە لاپەڕەی فەڕمی خۆی لە تۆڕی كۆمەڵایەتی فەیسبوك بڵاویكردەوە، هێزەكانیان ئاگاداركرانەوە لەوەی ئۆتۆمبێلێكی جۆری (مارسیدس) بۆ ماوەیەكی زۆر لە شەقامی كۆیە وەستاوە، دوای گەیشتنی پۆلیس دەركەوت كە شۆفێری ئۆتۆمبێلەكە بە هۆی بەكارهێنانی ماددەی هۆشبەرەوە بێ هۆش بووە.

پۆلیسی هەولێر ڕوونیشیكردووەتەوە، تۆمەتبارەكە ناوی (هـ.ن.ر)ە، بڕێكی زۆر ماددەی هۆشبەری لە جۆری (كریستاڵ) و حەب و كەلوپەلی بەكارهێنانی ماددەی هۆشبەر و چەقۆ پێبووە.

پۆلیسی هەولێر ئەوەشیخستووەتەڕوو، پەڕاوی لێكۆڵینەوە بۆ تۆمەتبار كراوەتەوە و بەپێی ماددەی (١٤)ی ماددە هۆشبەرەكان ڕاگیراوە.

 

بەردەوام بە لە خوێندنەوە

ئابوری

سامانە سرووشتییەكان: باشترە عیراق وەك هەرێمی كوردستان بهێڵن لایەنی سەربەخۆ وردبینی لە پرسی نەوت بكات

خەڵك – بەشی هەواڵ

دوای ئەوەی وەزیری نەوتی عیراق ئاماژەی بەوەكردبوو، كەنەوتی هەرێم بەقاچاغ دەبرێت و لەئۆپیك كێشەی بۆ عیراق دروست كردووە، وەزارەتی سامانە سرووشتییەكانی هەرێم ئەو وتانە ڕەتدەكاتەوە.

وەزارەتی سامانە سرووشتییەكانی حكومەتی هەرێمی كوردستان لە ڕاگەیەنراوێكدا ڕایگەیاند:”ئامار و زانیاریی بەرهەمهێنانی نەوت لە هەرێمی كوردستان لەلایەن كۆمپانیای دیلۆیتی جیهانییەوە وردبینیی تێدا دەكرێت و بەشێوەیەكی بەردەوام بڵاودەكرێتەوە، بۆیە باشترە كە حكومەتی فیدراڵیی عیراق وردتربن لە لێدوانەكانیان، باشترە عیراقیش وەك هەرێمی كوردستان بهێڵن لایەنی سەربەخۆ وردبینی لە زانیارییەكانی تایبەت بە پرسی نەوت بكات”.

وەزارەتی سامانە سرووشتییەكان ئاماژەی بەوەشكردووە:” حكومەتی هەرێمی كوردستان دوای ڕێككەوتنی ئۆپيك پڵەس قەبارەی بەرهەمهێنانی كەمكردووەتەوە و كۆی گشتیی بەرهەمەكانی لە ئاستی پێویستدا نین بەراورد بە بەرهەمەكانی بەشەكانی دیكەی عیراق”.

وەزارەتی سامانە سرووشتییەكانی هەرێم بسی لەوەش كردووە:” ئەو ڕوونكردنەوەیان بۆ حكومەتی فیدراڵی وەكو بەشێك لە گفتوگۆیەكی گشتگیرتر لەقەڵەم دەدەن”.

بەردەوام بە لە خوێندنەوە

کوردستان

فراكسیۆنی پارتی؛ بە شانازییەوە یادی ریفراندۆمی سەربەخۆیی كوردستان دەكەینەوە

خەڵك – بەشی هەواڵ

فراكسیۆنی پارتی لە پەڕلەمانی كوردستان ڕایدەگەیەنێت ، بە شانازییەوە یادی ریفراندۆمی سەربەخۆیی كوردستان دەكەینەوە، كە خاڵێكی وەرچەرخانی گرنگ بوو لە مێژووی بزاڤی رزگاریخوازی گەلی كوردستان.

فراكسیۆنی پارتی لە پەڕلەمانی كوردستان لە ڕاگەیەنراوێكدا بڵاویكردەوە ، ریفراندۆمی سەربەخۆیی كوردستان، كە لە 25ـی ئەیلوولی 2017 ئەنجام درا، رۆژێكی نیشتمانیی شكۆدارە و شانازییەكی گەورەیە بۆ هەموو ئەوانەی بە بەڵێ، دەنگیان بۆ سەركەوتنی دا.

ڕاگەیەنراوى فراكسیۆنی پارتی لە ساڵیادی ریفراندۆمی سەربەخۆیی كوردستان
بە شانازییەوە یادی ریفراندۆمی سەربەخۆیی كوردستان دەكەینەوە، كە خاڵێكی وەرچەرخانی گرنگ بوو لە مێژووی بزاڤی رزگاریخوازی گەلی كوردستان.
ریفراندۆمی سەربەخۆیی كوردستان، كە لە 25ـی یٔەیلوولی 2017 یٔەنجام درا، رۆژێكی نیشتمانیی شكۆدارە و شانازییەكی گەورەیە بۆ هەموو یٔەوانەی بە بەڵێ، دەنگیان بۆ سەركەوتنی دا.
لە ساڵیادی ریفراندۆمدا، بەڵێن بە سەرۆك بارزانی دەدەین تا بمێنین پێشمەرگەی یٔەو ڕێیە دەبین كە یٔەو بۆ گەلەكەی هەڵیبژاردووە، كۆڵنەدان و وەفای یٔەو بۆ گەلەكەی دەنگی یٔازادیخوازانی كوردی بە گوێی كۆمەڵگەی نێودەوڵەتی و یار و نەیارانی گەلی كوردستان، گەیاند.
یٔێمە وەك فراكسیۆنی پارتی لە پەرلەمانی كوردستان هەردەم شانازی بەو دەستكەوتە مەزنەی گەلەكەمان دەكەین و بە رابەرایەتیی جەنابی سەرۆك بارزانی و بە پێشڕەویی پارتە نەتەوەییخوازەكەمانەوە، خەبات بۆ بەدیهاتنی دەكەین.
سڵاو بۆ هەموو یٔەو كەسانەی بەشداربوون لە سەركەوتنی ڕیفراندۆمی سەربەخۆیی كوردستان و دروود بۆ گیانی شەهیدانی كاروانی رزگاری و سەربەخۆیی كوردستان.
فراكسیۆنی پارتی
لە پەرلەمانی كوردستان

بەردەوام بە لە خوێندنەوە

کوردستان