ئێمە لە تۆرە کۆمەڵایەتیەکان

ئابوری

وردەكاری دەرستكاری كردنی مووچە و خانەنشینی و دەرماڵە ئاشكرادەكرێت

خەڵك- بەشی هەواڵ
بەڕێوەبەری گشتی خانەنشینی هەرێم ئاشكرای دەكات، مووچەی چەندین توێژی وەكو دادوەر و پەرلەمانتار و شارەزا كەم دەكرێتەوە و ھیچ كەسێكیش دوو مووچەی نامێنێت.

حازم ئیسماعیل، بەڕێوەبەری گشتیی خانەنشینی ھەرێمی كوردستان بۆ ماڵپەڕی فەرمیی پارتی ڕایگەیاندووە، “بندیوار لای ئێمە نییە و ئەوەی نایاسایی بێت ئەوانە ھەندێكمان دەستنیشان كردوون، بەڵام ئەوانەی دوو مووچەیان ھەیە، پەیوەندی بە فەرمانگەی تەكنەلۆژیا و زانیارییەوە ھەیە و بە نووسراوێك داوامان كردووە ھەر كەسێك دوو مووچەی ھەیە، لیست بۆ ئێمە ڕەوانە بكەن، بۆ ئەوەی مووچەیەكیان ببڕین، تەنھا ئەوانەی شەھیدان و كەمئەندامان نەبێت و ھەیە فەرمانبەرە و مووچەی كەمئەندامی ھەیە، ئەویش مووچەی كەمئەندامی دەگوازرێتەوە بۆ فەرمانگەی خۆی و لە وەزارەتی كاروباری كۆمەڵایەتی نامێنێت و وەكو دەرماڵە لە مووچە بۆی زیاد دەبێت، ئەوانەی شەھیدانیش ناكرێت یەكێك مووچەی شەھیدان و زیندانیانی سیاسی ھەبێت و ئەوانەش ڕێك دەخرێتەوە”.

ڕوونیشی كردەوە، “خانەنشینی لە ٢٠٠ ھەزار دەست پێدەكات ئەویش ئەوانەن كە میراتگرن، بۆ نموونە ژنێك كە مووچەی پیاوەكەی وەربگرێت، ٦٠%ی مووچەكە وەردەگرێت و ھەندێك ھەیە مووچەی زیاترە و ئەوانەی بڕوانامەیان نییە كە مووچەیان كەمە، ئەولەویاتی حكومەت ئەوەیە كە یاسای خانەنشینی دەستكاری بكرێت، كە كەمترین مووچە ٣٠٠ ھەزار دەبێت و ئەگەر دۆخەكە باش بێت ھەوڵ دەدرێت یاسای بەغدا ھی ساڵی ٢٠١٤ جێبەجێ بكرێت، كە كەمترین مووچە ٤٠٠ ھەزار دینار دەبێت و دڵنیام حكوومەت سوورە لەسەر ئەوەی مووچەی خانەنشینان باشتر بكرێت، چونكە نزیكەی ١٠٠ ھەزار خانەنشین مووچەیان لە دەوروبەری ٢٠٠ ھەزار بۆ ٣٠٠ ھەزارە”.

ڕاشیگەیاندووە، “ئەوەی پەیوەندی بە بەڕێوەبەرایەتیی خانەنشینییەوە ھەیە لە وەزارەتی دارایی، پلە باڵاكان و شارەزاكان و دادوەرەكانن و وەزارەتی پێشمەرگەش گواستنەوەیان بۆ لای ئێمە ھەیە، ئەوەی پلە باڵاكان كاتی خۆی كە خانەنشین كراون، پوختەی ڕاژەیان نەبووە، بۆیە نازانین كامە نایاساییە و ھەندێك نایاساییمان دەستنیشان كردوون و داومانەتە لیژنەی لە خۆمان باڵاتر، كە ژمارەی پلە باڵاكان زیاتر لە ٤٠٠ كەس دەبن، ئەوەی بیانناسین دەتوانین كارێك بكەین، بەڵام ئەوانەی نەیانناسین لەبەر ئەوەی ھیچیان نییە، چونكە دۆسیەی یاسایی پێویستە دامەزراندن و دەستبەكاربوونی تێدا بێت و ساڵانە تەرفیع و عەلاوەی تێدا بێت، ئەگەر بە نۆرماڵ دامەزرێت، ئەوكات دادەمەزرێت، بۆیە ئەوانەمان دەستنیشان كردوون”.

لەبارەی گواستنەوەی خانەنشینانی پێشمەرگە بۆ سەر وەزارەتی دارایی، حازم ئیسماعیل ڕایگەیاند، “چەند كۆبوونەوەیەكمان كردوون و ئێستا لە قۆناغی كۆتاییداین و چەند لیژنەیەكمان پێك ھێناوە و چەند كۆنووسێكمان ئامادە كردووە و ئەوانیش لیستی خۆیان ئامادە دەكەن و لیژنەیەكی ھاوبەش ئامادە دەكەین بۆ ئەوەی ناوەكان بگوازینەوە، ئەوەش كاتی پێویستە، بۆ بەدەستخستنی لیست ئەوەی سلێمانی ڕەوانەی ئەوێی دەكەین و بۆ ھەولێر و دھۆك لە ھەولێر بەڕێوەبەرایەتییەك ھەیە تایبەت بە خانەنشینانی ئەوان، بۆیە ھەر كاتێك ناوەكان تەواو بوون، ئەوكات دەچنە بانكەكان و ناوەكان لە ڕاگەیاندنەكان بڵاو دەكەینەوە، كە لەوێ مووچەی خۆیان وەرگرن بە ئەوانەی یەكەی حەفتا و ھەشتاشەوە، بۆیە كێشەمان نابێت و ھەر كاتێك لیستمان بۆ ھات، ئەوەش چارەسەر دەكەین”.

سەبارەت بە شارەزایان، بەڕێوەبەری گشتیی خانەنشینی وتی، “نووسراوێكمان كردووە و ئەوانەی خانەنشین كراون مووچەیان ھەموار دەكرێتەوە، وەكو پلە تایبەتەكان لە سەرۆكی ھەرێم تا بەڕێوەبەری گشتی و هی دادوەرانیش ٧٠% دەبێت و بەڕێوەبەری گشتی و ڕاوێژكارەكان ئەوانە٦٠% و ئەوانەی پەڕلەمانتارن كە جاران شەش ملیۆن و٥٦٠ هەزاریان وەردەگرت، ئێستا ٥٠% وەردەگرن ئەگەر ١٥ساڵ خزمەتیان ھەبێت و ئەوەی خزمەتی كەمتر بێت، ھەندێكیان دوو ملیۆن وەردەگرن، چونكە بڕگەیەك ھەیە ئەوەی خزمەتی نییە ٢٥%ی مووچە و دەرماڵە وەردەگرن، بەڵام بۆ ئەم خولە دەگوترێ تەنھا چەند پەرلەمانتارێك ڕەتیان كردۆتەوە، ئەوانەی دیكە ڕەتیان نەكردۆتەوە، بەڵام ئەوەی بیەوێت خانەنشینی ڕەت بكاتەوە تەنھا بۆ مانگێك نییە و بۆ ھەموو كاتێك دەرگا كراوەیە و داوا دەكات مووچەیان ڕابگرێت و ئێمەش ڕایدەگرین و لیژنەشمان دروست كردووە، كە پلە باڵاكان و شارەزایان و پەڕلەمانتاران ھەمووی جیا دەكەینەوە و تائێستا تەنھا ناوی شارەزایانمان بۆ ھاتووە و لە ماوەیەكی كەمدا یەكلایی دەكەینەوە، كە دادوەرەكان ژمارەیان كەمە و زوو یەكلا دەكرێنەوە و بڕیارەكەش لە ١/٧ـەوە جێبەجێ دەكرێت”.

ناوبراو ئاماژەشی دا: “لە زۆر شتدا ھەنگای باشمان ناوە، تەنھا ھەندێك وردەكاری نەبێت، كە پەیوەندییان بە كاری دیكەوە دەبێت وەكو پلە تایبەتەكان، كە پێویستە بۆ دۆسیەكانیان بگەڕێینەوە، چونكە ھەیە وەزیرە و ھیچ ڕاژەی لای ئێمە نییە و پێویستە بە نووسراوێكی ئەنجوومەنی وەزیران پوختەی ڕاژەیان بۆ دروست بكرێت، چونكە وەزیری فیعلی بوونە و ھەشە مامۆستا بووە و لە فەرمانگەی دیكە بووە و بۆتە وەزیر، ئەوانە ھەمووی ڕاژەیان ھەیە و بۆیان چارەسەر دەكرێت ھەر یەكە و لە ڕێگەی فەرمانگەكانی خۆی، بۆیە كۆسپێك نییە نەتوانین چاكسازی بكەین و خەڵك دڵنیا دەكەینەوە، كە پڕۆسەی چاكسازی ھەر لە مووچە نییە، بەڵكو لە ھەموو بوارەكاندا دەبێت”.

ئابوری

بەهای دۆلار و تمەن دابەزی

خەڵك- بەشی هەواڵ
جارێكی دیكە بەهای تمەن و دۆلاری ئەمریكی لە بازاڕەكانی هەرێم دابەزینی تۆماركرد.

خاوەن نووسینگەیەكی ئاڵوگۆڕی دراو لە سلێمانی بۆ (خەڵك) ڕایگەیاند، دوای ماوەیەكی زۆر لە سەقامگیری لە بەهای دۆلاری ئەمریكیدا بەرامبەر بە دیناری عیراقی، ئەمڕۆ بەهای 100 دۆلار دابەزی بۆ 123 هەزار دینار و لە دەرەوەی بازاڕیش بە 122 هەزار و 750 فرۆشراوە.

ئاماژەی بەوەشكرد، كە تمەن بەردەوامە لە دابەزین و ئەمڕۆ 100 دۆلار بە 2 ملیۆن و 740 هەزار بە حەواڵە و هەروەها بە 2 ملیۆن و 640 هەزار بە دەستی مامەڵەی پێوەكراوە.

بەهۆی ناسەقامیگری دۆخی ئابووری و پەتای كۆرۆنا و ئەو سزایانەی ئەمریكا خستونیە سەر ئێران، بەهای دراوی ئەو وڵاتە بەردەوام لە دابەزیندایە.

بەردەوام بە لە خوێندنەوە

ئابوری

“دادگا لەبەرژەوەندی هاووڵاتیان و دژی كۆمپانیاكانی مۆبایل بڕیاریدا”

خەڵك- بەشی هەواڵ
پەڕلەمانتارێكی كورد لە بەغدا ڕایدەگەیەنێت، كە دادگا لەبەرژەوەندی هاووڵاتیان و دژی كۆمپانیاكانی مۆبایل بڕیاریدا.

د. غالب محەمەد، ئەندامی پەڕلەمانی عیراق لە كۆنگرەیەكی ڕۆژنامەوانیدا ڕایگەیاند، پاش كۆكردنەوەی واژوو، تۆماركردنی داوای یاسایی، ئەمڕۆ ۲٠/۹/۲٠۲٠ لەگەڵ سەركەوت شەمسەدین و هاوپیشەكانمان لە فراكسیۆنە جیاوازەكان (محمد شیاع سودانی، علا‌و روبەیعی، محمد دەراجی، عالییە نوسەیف) پشتیوانی خۆمان دەربڕی بۆ بڕیاری دادگای كەرخ بۆ هەڵوەشاندنەوەی بڕیاری ژمارە (٥٠) ی ساڵی ۲٠۲٠ ی ئەنجوومەنی وەزیران و ڕەتكردنەوەی تانە و تەزەڵومی حكومەتی عیراق و كۆمپانیای ئاسیا و زەین.

ڕاشیگگەیاند، ئەو هەنگاوە بە كۆكردنەوەی واژوی ۹۲ پەڕلەمانتار و تۆماركردنی سكاڵا لەلایەن محمد شیاع سودانی وەك نوێنەری پەڕلەمانتاران دژی بڕیارەكەی حكومەت بۆ نوێكردنەوەی مۆڵەتی ئەو كۆمپانیایانە.

ئاشكراشی كرد، بەپێی بڕیاری دادگا حكومەت ناتوانێت ڕاستەوخۆ مۆڵەتی ئەو كۆمپانیایانە نوێ بكاتەوە، كۆمپانیاكان دەبێت قەرزەكانیان بدەنەوە بە حكومەتی هەرێم و حكومەتی عیراق، كرێی ئینتەرنێت و مۆبایل بەرزە و خزمەتگوزاری وەك پێویست نییە، بۆیە دەبێت دەرفەت بۆ كۆمپانیای تریش بكرێتەوە و بازاڕەكە قۆرغ نەكرێت.

لە ماوەی ڕابردوودا هەردوو لیژنەی دەستپاكی و لیژنەی پەیوەندییەكان و ڕاگەیاندنی پەڕلەمانی عیراق بڕیارێكی حكومەتی عیراقی بۆ نوێكردنەوەی مۆڵەتی كۆمپاكانیانی گەیاندن (مۆبایل) ڕەتكردەوە و ڕایگەیاند، كە دەبێت ڕەزامەندی بۆ نوێكردنەوەی مۆڵەتی ئەو كۆمپانیایانە چەند مەرجێكی تێدابێت و لە بەرژەوەندی هاوولاتیان بێت و قەرزەكانیشیان بدەنەوە.

دادگا لەبەرژەوەندی هاوڵاتیان و دژی کۆمپانیاکانی مۆبایل بریاریداپاش کۆکردنەوەی واژوو، تۆمارکردنی داوای یاسایی، ئەمڕۆ ۲٠/۹/۲٠۲٠ لەگەڵ هاورێم کاک سەركەوت شەمسەدین و هاوپیشەکانمان لە فراکسیۆنە جیاوازەکان(محمد شیاع سودانی، علاء روبەیعی، محمد دەراجی، عالییە نوسەیف) لە کۆنگرەیەکی رۆژنامەوانی سەرکەوتنی هەوڵەکانمان دژی کۆمپانیاکانی مۆبایل راگەیاند، و پشتیوانی خۆمان دەربری بۆ بریاری دادگای کەرخ بۆ هەڵوەشان بریاری ژمارە (٥٠ ) ی ساڵی ۲٠۲٠ ی ئەنجومەنی وەزیران و رەتکردنەوەی تانە و تەزەڵومی حکومەتی عێراق و کۆمپانیای ئاسیا و زەین.ئەو هەنگاوە بە کۆکردنەوەی واژوی ۹۲ پەرلەمانتار و تۆمارکردنی سکاڵا لەلایەن بەرێز محمد شیاع سودانی وەک نوێنەری پەرلەمانتاران دژی بریارەکەی حکومەت بۆ نوێکردنەوەی مۆڵەتی ئەو کۆمپانیایانە.بەپێی بریاری دادگا حکومەت ناتوانێت راستەوخۆ مۆڵەتی ئەو کۆمپانیایانە نوێ بکاتەوە، کۆمپانیاکان دەبێتە قەرزەکانیان بدەنەوە بە حکومەتی هەرێم و حکومەتی عێراق، کرێی ئینتەرنێت و مۆبایل بەرزە و خزمەتگوزاری وەک پێویست نییە. بۆیە دەبێت دەرفەت بۆ کۆمپانیای تریش بکرێتەوە و بازارەکە قۆرغ نەکرێت.پێکەوە بەردەوام ئەبین و کاری هاوبەش لەگەڵ پەرلەمانتاران فراوانی دەكەینغالب محمد عەلی

Gepostet von ‎Ghalib M. Ali-غالب محەمەد عەلی‎ am Sonntag, 20. September 2020

بەردەوام بە لە خوێندنەوە

ئابوری

سلێمانی لەسەر غەرامەی نەبەستنی پێوەری ئاو هاتەدەنگ

خەڵك- بەشی هەواڵ
بە بڕیاری وەزارەتی شارەوانی حكومەتی هەرێم، لەم مانگەوە هەر ماڵ و شوێنێك پێوەری ئاوی نەبەستبێت بڕی 100 تاوەكو 250 هەزار دینار غەرامە دەكرێت و سەرۆكی ئەنجوومەنی پارێزگای سلێمانی-ش ڕایدەگەیەنێت، ئاوی پێویست بۆ هاووڵاتیان دابین نەكراوە و خەڵك مووچەی نییە تاوەكو غەرامەش بكرێت.

بەپێی ڕێنماییەكی وەزارەتی شارەوانی هەرێم، كە دەست (خەڵك) كەوتووە، هەر ماڵێك یان شوێنێكی نیشتەجێبوون یان پەرستگایەك پێوەری ئاوی نەبەستبێت بڕی 100 هەزار دینار غەرامە دەكرێت و دوای 3 مانگ ئەگەر هەر نەیبەست بڕەكە دەبێتە 200 هەزار و بۆ فەرمانگەكان و كەرتی تایبەت و بازرگانی بڕی غەرامەكە زیاترە و زۆرترین غەرامەش بۆ شووشتنگە (غەسل) دیاری كراوە، كە 250 هەزار دینارە و دوای 3 مانگ دەبێتە 450 هەزار دینار.

ئازاد محەمەد، سەرۆكی ئەنجوومەنی پارێزگای سلێمانی لەكۆنگرەیەكی ڕۆژنامەوانیدا ڕایگەیاند، بڕیاری حكومەتی هەرێم بۆ غەرامەكردن بە بڕی 100 هەزار دینار بۆ ئەوانەی، كە پێوەری ئاویان نەبەستووە لەگەڵ باروگوزەرانی هاووڵاتیان و ئەو مووچەیە ناگونجێت، كە حكومەت دابەشی دەكات.

وتیشی، “ناكرێت حكومەت ئەركەكانی خۆی وەكو پێویست جێبەجێ نەكات و بڕیاری لەو جۆرەش دەربكات، كە بارگرانی بۆ هاووڵاتیان دروست دەكات، چونكە حكومەت نەیتوانیوە ئاوی پێویست بۆ هاووڵاتیان دابین بكات”.

جەختیشی كردەوە، كە پێشنیاز دەكەین ئەو بڕیارە ڕابگیرێت تاوەكو ئەو كاتەی دۆخی دارایی هاوولاتیان باش دەبێت.

بەپێی نووسراوی بەڕێوەبەرایەتی گشتی ئاو و ئاوەڕۆ ژمارە (٢٢١٩ لە ٢٠٢٠/٩/٨)، كە دەست (خەڵك) كەوتووە، پێویستە ماددەی (٩) لە ڕێنمایی تایبەت بە بەستن و خوێندنەوەی پێوەری ئاوی خواردنەوە لە هەرێمی کوردستان ژمارە (١)ی ساڵی ٢٠١٨ جێبەجێ بکرێت بۆ گشت بەکارهێنەرانی ئاو لە ڕێکەوتی دەستپێکردنی خولی (٧)، كە دەكاتە 13-9-2020.

بەردەوام بە لە خوێندنەوە

کوردستان