ئێمە لە تۆرە کۆمەڵایەتیەکان

کوردستان

سلێمانی.. دەست بەسەر بارهەڵگرێكی ئاوی لەدەبەنراودا دەگیرێت

خەڵك – بەشی هەواڵ

بەهۆی گواستنەوەی ئاوی لە دەبەنراو لەبەر تیشكی خۆر و پلەی گەرمی بەرز، لیژنە هاوبەشەكانی قائیمقامیەتی سلێمانی دەست بەسەر بارهەڵگرێكدا دەگرن و سەرۆكی لیژنەكانیش دەڵێت: سەرپێچیكاران ڕووبەڕووی ڕێكاری یاسایی توند دەكەینەوە.

لەشكر حەمید، سەرۆكی لیژنە هاوبەشەكانی قائیمقامیەتی سلێمانی ڕایگەیاند: بەهۆی پابەندنەبوون بە مەرج و ڕێنماییەكانی كاركردن و گواستنەوەی ئاوی لە دەبەنراو لەبەر تیشكی خۆر و پلەی گەرمی بەرز، لیژنەكانی قائیمقامیەت دەستیان بەسەر بارهەڵگرێكدا گرتووە كە (65) كێس ئاوی بۆ بازاڕ گواستووەتەوە.

سەرۆكی لیژنە هاوبەشەكانی قائیمقامیەتی سلێمانی وتیشی: بەپێی ڕێنماییەكان نابێت ئاوی لەدەبەنراو لە شوێنی گەرم و بەرتیشكی خۆر عەمبار بكرێت یان بگوازرێتەوە، چونكە بەهۆی كارلێكی كیمیاییەوە ئاوی ناو دەبە پلاستیكەكان دەبێتە هۆكاری كەمبوونەوەی بەرگری لەش و زیان بەتەندروستی مرۆڤ دەگەیەنێت، بەرزبوونەوەی پلەی گەرمی بۆ (25) پلەی سەدی،‌ بەشێكی پلاستیكەكە لەگەڵ ئاوەكە‌ كارلێك دەكات دەبێتە هۆكاری سەرەكی بۆ تووشبوون بەنەخۆشی شێرپەنجە و تێكچوونی هۆرمۆنەكان بەتایبەت لەخانماندا.

لەشكر حەمید ڕوونیكردەوە: پێش ئەوەی ئاو بكرێتە ناو دەبەپلاستیكەكان ‌ماددەی ئۆزۆن (O3) بۆ خاوێنكردنەوە بەكاردەهێنرێت لەبری كلۆر، لەكاتی بەركەوتنی ئۆزۆنەكە بەتیشكی خۆر، ماددەكە شیدەبێتەوە بۆ (O2) لەگەڵ ئۆكسجینێكی چالاك، (O2) بەبێ كێشە لەگەڵ ئاو تێكەڵ دەبێت، بەڵام مانەوەی یەك ئۆكسجین و بەركەوتنی بەتیشكی خۆر، لەش تووشی نەمانی بەرگری دەكات.

سەرۆكی لیژنە هاوبەشەكانی قائیمقامیەتی سلێمانی ڕاشیگەیاند: پێشتر سەرجەم كارگەكانی ئاو، ماركێت، دوكانداران و فرۆشیاران ئاگاداركراونەتەوە نابێت شوێنی گەرم و بەرتیشكی خۆر بۆ گواستنەوە و عەمباركردنی ئاوی لەدەبەنراو بەكاربهێنن، پێویستە بارهەڵگرەكان داپۆشراوبن ئاوە لە دەبەنراوەكان دووربن لە تیشكی خۆر هەروەها شوێنی فێنكیش بۆ عەمبار دابین بكەن، بەپێچەوانەوە لیژنەكانی قائیمقامیەتی سلێمانی بەهاوكاری بەڕێوەبەرایەتی هاتوچۆ و لایەنە پەیوەندیدارەكانی تر سەرپێچیكاران ڕووبەڕووی ڕێكاری یاسایی توند دەكاتەوە.

لەشكر حەمید ئاماژەی بۆ ئەوەشكرد: بەفەرمانی قائیمقامی سلێمانی دەست بەسەر بارهەڵگرەكەدا گیراوە و سەرجەم كێسە ئاوە لەدەبەنراوەكە لەناودەبرێت و خاوەنەكەشی ڕووبەڕووی ڕێكاری یاسایی دەكرێتەوە.

سەرۆكی لیژنە هاوبەشەكانی قائیمقامیەتی سلێمانی ئەوەشی خستەڕوو، لەكاتی هەبوون و بەدیكردنی ئاوی لەدەبەنراو لە ‌شوێنی گەرم و بەرتیشكی خۆر، لەڕێی ژمارە (07708677777) یان لاپەڕەی تایبەتی (قائیمقامیەتی سلێمانی) لەتۆڕی كۆمەڵایەتی فەیسبوك لیژنە هاوبەشەكانی قائیمقامیەتی سلێمانی ئاگاردار بكەنەوە بۆ گرتنەبەری ڕێكاری پێویست بەرامبەر سەرپێچیكاران.

کوردستان

یەكەمین پاسپۆرت لە چەمچەماڵ درایە دوو تاقانەی شەهید و ئەنفالكراو

خەڵك- بەشی هەواڵ
لێپرسراوانی باڵای وەزارەتی ناوخۆی حكومەتی هەرێمی كوردستان سەردانی قەزای چەمچەماڵ یان كرد و لەرێی كردنەوەی نوسینگەی پاسپۆرتی قەزاكەوە، یەكەمین پاسپۆرتیان بەخشییە دوو تاقانەی شەهید و ئەنفالكراوی سنورەكە.

لەسەردانەكەی ئەمڕۆدا و لەمەراسیمێكدا، “رێبەر ئەحمەد” وەزیر و “چەتۆ ساڵح” بریكاری وەزارەتی ناوخۆ هاوڕێ لەگەڵ ژمارەیەك لەلێپرسراوانی حكومی پارێزگای سلێمانی، نوسینگەی پاسپۆرتی چەمچەماڵیان كردەوە و بەشەكانیان بەسەركردەوە و لەنزیكەوە لەچۆنێتی بەرێوەچوونی كاروباری ئەفسەر و كارمەندانی نوسینگەكەیان كۆڵییەوە.

دواتر و لەكۆنفرانسێكی رۆژنامەییدا، “رێبەر ئەحمەد” وەزیری ناوخۆ گرنگی كردنەوەی نوسینگەی پاسپۆرتی بۆ قەزاكە خستەروو بەتایبەت كەزیاتر لە 7500 بنەماڵەی شەهیدان لێرەن كەبەشێكی زۆریان خاوەنی چەندین كەسی ئەنفالكراون، وتیشی ئێمە هاتوین بەشێك لەو خزمەتگوزارییانەی كەحكومەت پێشكەشی هاوڵاتیانی دەكات بۆ هاوڵاتیانی ئەم سنورە بەردەست بكەین.

هەر لەكۆنفراسەكەدا، “چەتۆ ساڵح” بریكاری وەزارەتی ناوخۆ ڕایانگەیاند: خزمەتكردنی كەسوكاری شەهیدان و ئەنفالكراوان بەئەركی سەرشانی خۆمان دەزانین لەم پێناوەشدا هەنگاوەكانمان زۆری ماوە بۆ خزمەتكردن، وتیشی شەرەفمەندین كە لەناوكەس و كارەكەی خۆماندا ئەمڕۆ یەكەم پاسپۆرت دەبەخشینە دوو تاقانەی شەهید و ئەنفالكراو.

لەو مەراسیمەدا وەزیر و بریكاری وەزارەتی ناوخۆ، یەكەمین دوو پاسپۆرتی چاپكراوی نوسینگەكەیان بەخشییە دوو كوڕی تاقانە كەباوكیان شەهید و ئەنفالكراوە بەناوەكانی (ژیار ئاسۆ شەهاب، هەڤاڵ غالب محمد).

جێی باسە كردنەوەی نوسینگەی پاسپۆرتی چەمچەماڵ،‎ هەنگاوێكی تری خزمەت و كارئاسانییە بۆ كەسوكاری شەهید و ئەنفالكراوانی سنورەكە، هەموو ئەو دەسەڵاتانەش كەلەبەرێوەبەرایەتی گشتی پاسپۆرتی سلێمانی بۆ وەرگرتنی پاسپۆرت و نوێكردنەوەی ئەنجام دەدرێت، لەنوسینگەی پاسپۆرتی چەمچەماڵیش دەبێت.

دواتر وەفدەكەی وەزارەتی ناوخۆ بەسەرۆكایەتی “رێبەر ئەحمەد” و “لیوا چەتۆ ساڵح” و وەفدی هاورێیان، بەمەبەستی دابەشكردنی پێداویستی (15) فەرمانگە و بەرێوەبەرایەتی، سەردانی كۆگای نوێی پارێزگای سلێمانی بۆ هەماهەنگی قەیرانەكان كرد.

ئەم هەوڵەش دەرەنجامی سەردانە بەردەوامەكانی “چەتۆ ساڵح” بریكاری وەزارەتی ناوخۆ دێت بۆ ناوچە جیاوازەكان و بەدواداچوون بۆ داواكاری فەرمانگەكانی سەر بەوەزارەتەكەی و گه یاندنی ئه و داواكاریانه ش بۆ سەروی خۆی لە وەزیری ناوخۆو بەڕێز كاك “قوباد تاڵەبانی “جێگری سەرۆكی ئەنجومەنی وەزیران

دابین كردنی ئەم پێداویستیانەش بەمەبەستی باشتر پێشكەشكردنی خزمەتگوزارییەكان بەهاوڵاتیان و بەدەنگەوەهاتنی داواكاری و خواستی بەرێوەبەرایەتییەكان.

 

بەردەوام بە لە خوێندنەوە

کوردستان

ئاسایشی ڕۆژئاوایی سلێمانی؛ 3 كەس لە تەقەكەرانی چەمچەماڵ دەستگیر كران

خەڵك – بەشی هەواڵ

بەڕێوەبەرایەتی ئاسایشی ڕۆژئاوایی سلێمانی ڕایدەگەیەنێت ، لە هەوڵەكانی هێزەكانیان بۆ دەستگیركردن و ڕێگریكردن لەو كەسانەی، كە بەتەقەی هەڕەمەكی دەیانەوێت ئارامی هاووڵاتیان تێك بدەن 3 كەس دەستگیركران.

بەڕێوەبەرایەتی ئاسایشی ڕۆژئاوایی سلێمانی لە ڕاگەیەنراوێكدا ، كەوێنەیەكی دەست (خەڵك) كەوتووە ڕایگەیاندووە، لە لایەن هێزەكانیانەوە 3 كەس بەناوەكانی (س،ف،ع ) (گ،ن،م) (چ،ش،ح) نزیك زانكۆی چەرمۆ لەچەمچەماڵ، كەتەقەی هەڕەمەكیان كردبوو لەلایەن هێزەكانمانەوە دەستگیركران .

ڕاشیگەیاندووە، تۆمەتباران دانیشتوی چەمچەماڵن، لەئێستادا بەفەرمانی دادوەری دادگای لێكۆڵینەوە بەبڕیاری (570) ڕاگیراون ، 2 دەمانچە و یەك كڵاشینكۆف و ئۆتۆمبێلێكی جۆری قەمەرە (ئۆپترا)ی تەقەكەرەكان دەستی بەسەردا گیراوە.

 

بەردەوام بە لە خوێندنەوە

کوردستان

دهۆك؛ بەهۆی ڕووداوێكی هاتووچۆ وە 2 كەس گیانی لەدەستدا و 4 كەسی دیكەش برینداربوون

خەڵك – بەشی هەواڵ

بەڕێوەبەرایەتی هاتووچۆی دهۆك ڕایدەگەیەنێت، ڕووداوێكی وەرگەڕان لەسەر ڕێگای دهۆك هەولێر لە شارەدێی ڕۆڤیا دروستبووە و ئۆتۆمبێلێكی دیكە بەخێرایەكی زۆر خۆی كرد بەناو ژمارەیەك هاووڵاتی كە نزیك ڕووداوەكە بوون و 2 لەو هاووڵاتیانە گیانی لەدەستداو 4ی دیكەش برینداربوون.

ئازاد تەها ، وتەبێژی بەڕێوەبەرایەتی هاتووچۆی دهۆك بڵاویكردەوە ، پاش نیوەڕۆی ئەمڕۆ پێنج شەممە 26-11-2020 لەسەر ڕێگای هەولێر- دهۆك و نزیك گوندی پلاسانی سەر بە شارەدێی ڕۆڤیا ئۆتۆمبێلێك وەرگەڕا و ژمارەیەك هاووڵاتی لە نزیك ڕووداوەكە كۆبونەوە.

وتیشی ،”لەكاتی ڕووداوەكە ئۆتۆمبێلێكی دیكە خۆی كرد بەناو ئەو ژمارە هاووڵاتیەی نزیك ڕووداوی وەرگەڕانەكە بوون ، كە بەو هۆیەوە 2 هاووڵاتی گیانیان لەدەستدا و 4 هاووڵاتی دیكە برینداربوون”.

ڕاشیگەیاندووە، ئەو دوو كەسەی گیانیان لەدەستداوە یەكێكیان خەڵكی گوندی پلاسان و ئەوەی دیكە خەڵكی زاخۆیە و بریندارەكانیش ڕەوانەی نەخۆشخانە كران بۆ وەرگرتنی چارەسەر.

بەردەوام بە لە خوێندنەوە

کوردستان