ئێمە لە تۆرە کۆمەڵایەتیەکان

کوردستان

ژووری ئۆپەراسیۆنی هەولێر ژمارەیەك بڕیاری بۆ قەدەغەی هاتووچۆ ڕاگەیاند

خەڵك- بەشی هەواڵ

ژووری ئۆپەراسیۆنی پارێزگای هەولێر ڕایدەگەیەنێت، لەمشەوەوە تا هەفتەیەك شەوانە قەدەغەی هاتووچۆ دەگیرێتەبەر و هاتووچۆی نێوان شارەكان بە داخراوی دەمێننەوە.

ژووری ئۆپەراسیۆنی پارێزگای هەولێر لە ڕاگەیەنراوێكدا ئاماژەی بەوەكردووە، (مزگەوت، كڵێسا، شوێنە ئاینییە پیرۆزەكان، هۆڵی بۆنە ئاینییەكان) بەداخراوی دەمێننەوە و پرسە دانان و چوونە سەرقەبران قەدەغەیە.

دەقی ڕاگەیەنراوەكە:

دوای نیوەڕی ئەمڕۆ شەممە 2020.7.11، بەسەرپەرشتی د.فرسەت سۆفی پارێزگاری هەولێر و بە ئامادەبوونی د.عەلی ڕەشید سەرۆكی ئەنجومەنی پارێزگای هەولێر، ژووری ئۆپەراسیۆنی پارێزگای هەولێر كۆبۆوە و كۆبوونەوە گەیشتە ئەم دەرنجامانەی خوارەوە:-

لە كاتژمێر (12)ی ئەمشەو 11 لەسەر 12ی2020/7، بۆماوەی یەك هەفتە تاوەكو كاتژمێر 12ی شەوی 18 لەسەر 19ی2020/7 ڕێكارەكان بەمشێوەیەی لای خوارەوە دەبێت:-

1-لە سنووری سەنتەری شار و سەرجەم قەزاكانی دیكەی سنووری پارێزگای هەولێر، لەكاتژمێر (12)ی شەو تاوەكو (5) بەیانی، سەرجەم بازاڕ و دوكان و هەموو ئەو شوێنانەی بۆ خزمەتی هاوڵاتییان كراوەن دادەخرێن، جگە لە دەرمانخانەكان.

2- هاتووچۆ لەنێوان پارێزگای هەولێر و پارێزگاكانی دیكەی هەرێمی كوردستان و عێراق بەداخراوی دەمێنێتەوە، جگە لەو حاڵەتانە نەبێت كە لە بەیانی وەزارەتی ناوخۆی حكومەتی هەرێمی كوردستان دیاریكراون.

3-سەبارەت بە كەرنتینی ئەوانەی لەوڵاتانی ترەوە لەڕێگەی فرۆكەخانەی نێودەوڵەتی هەولێر یان لەدەروازەی سنووری حاجی ئۆمەران و دەروازە سنوورییەكانی تری هەرێمی كوردستان دەگەڕێنەوە بۆ شاری هەولێر، ژووری ئۆپەراسیۆنی پارێزگای هەولێر دوای ئەوەی ڕاوێژ لەگەڵ وەزارەتی ناوخۆ و وەزارەتی تەندروستی حكومەتی هەرێمی كوردستان دەكات ئەو رێكارە دەگرێتەبەر، هەموو ئەوانەی لەوڵاتانی ترەوە دەگەڕێنەوە دەبێت پشكنینی پشتڕاستكراوەیان لەو شوێن و وڵاتەی كە لێیەوە هاتوون لابێت و ماوەكەی (48) كاتژمێری بەسەردا تێپەڕنەبووبێ، بەپێچەوانەوە لەسەر ئەرك و تێچووی خۆیان پشكنییان بۆ ئەنجام دەدرێت و بەڵێن نامەیان لێوەردەگیرێت كە بۆ ماوەی (14) ڕۆژ لەشوێنی حەوانەوە یان ماڵەكەی خۆیان كەرەنتین بكرێن.

4-سەبارەت بەبازگەكانی پارێزگای هەولێر لەگەڵ پارێزگاكانی دیكەی هەرێمی كوردستان و عێراق، ژووری ئۆپەراسیۆنی پارێزگای هەولێر بەسەرپەرشتی بەڕێوەبەرایەتی گشتی تەندروستی هەولێر، سیستەمێكی بۆ پشكنین و چۆنیەتی هاتنە ژوورەوەی ئەو هاوڵاتییانەی دەیانەوێت بێنە هەولێر داڕشتووە و لە سەرەتای هەفتەی داهاتوودا ئەو سیستەمە دەچێتە واری جێبەجێكردن.

5- ژووری ئۆپەراسیۆنی پارێزگای هەولێر لە كۆبوونەوەیدا تەواوی ئەو گلەیی و سەر‌نج و ڕەخنە و كەم و كوڕیانەی هەبوون سەبارەت بە نەخۆشخانەكانی تایبەت بە كۆرۆناو پاك و خاوێنی و خزمەتكردنی نەخۆشەكانی تاوتوێكرد و خستیە بەرباس، دڵنییای دەدەینە هەموو لایەك‌ بە زووترین كات هەر گرفت و كێشەیەك هەیە چارەسەر دەكرێت.
6- چێشتخانەكان بە پابەندبوون بەڕێنماییە تەندروستییەكان و بڕیارەكانی دەستەی گەشت گوزار كراوەدەبن، هەر چێشتخانەیەك ئەو مەرجە تەندروستییانەی بۆیان دیاركراوە جێبەجێیان نەكات شوێنەكەی دادەخرێت بۆ ماوەیەك كە لە هەفتەیەك كەمتر نەبێت.

7- بەهۆی بڵاو بوونەوەی ڤایرۆسی كۆرۆنا بە شێوەیەكی فراوان لە شاری هەولێر و مەترسی داری دۆخەكە (مزگەوت، كڵێسا، شوێنە ئاینییە پیرۆزەكان، هۆڵی بۆنە ئاینییەكان) بەداخراوی دەمێننەوە و پرسە دانان و چوونە سەرقەبران قەدەغەیە.

8-ئەم شوێنانەش بەداخراوی دەمێننەوە (هۆڵەكانی ئاهەنگ گێران، هۆڵەكانی بووك گواستنەوە، یانەی شەوانە، نێرگەلەكێشان، هۆڵ و سەنتەرەكانی لەشجوانی، هۆڵەكانی وەرزشی، مەلەوانگە، هۆڵەكەكانی ئاهەنگی شەوانە، یانەكانی مەی خواردنەوە (بار)، گەرماو (حەمام)، سەنتەرەكانی مەساج).
9- ساردەمەنی، چایەخانە، ڕیستۆرانتی باخچەكان، سەرجەم شوێنەكانی هاوشێوەیان، دەبێت تەنها بە كەل و پەلی سەفەری كە بۆ یەك جار بەكاردەهێنرێت كاربكەن و ڕەچاووی ڕێنماییە تەندروستییەكان بكەن، بە پێچەوانەوە شوێنەكەیان دادەخرێت بۆ ماوەیەك كە لەهەفتەیەك كەمتر نەبێت.

10-لە رۆژانی هەینی (بازاڕە میللیەكان، گۆڕەپانەكانی باڵندە، پیشانگاكانی ئۆتۆمۆبێل) بەتەواوی دادەخرێن و هاتووچۆكردن لێیان قەدەغەیە.

11-دەوامی فەرمانگەكان، جگە لە (تەندروستی، پۆلیس، ئاسایش، فەرمانگە خزمەتگوزارییەكان)، بەسیستەمی شەفتات و بەڕێژەی لە 30% دەبێت لەڕۆژانی (یەك شەممە تاوەكو چوارشەممە)، سەرجەم فەرمانبەرانی فەرمانگەكان دەبێت (دەمامك) ببەستن، هەر فەرمانبەرێك لە كاتی دەوام (دەمامك)ی نەبەستابێت رێكاری كارگێری بەرامبەری دەگیرێتە بەر، هیچ هاوڵاتییەك و موراجعێك بەبێ بەستنی (دەمامك) بۆی نیە بچێتە ناو هیچ فەرمانگەیەك، هەر فەرمانگەیەك قەرەبالغی تێدا دروستبێت بە هەماهەنگی لەگەڵ وەزارەتی پەیوەندیدار دەوام لەو فەرمانگەیە ڕادەگرین، ئەو فەرمانبەرانەشی جێنشینی دەرەوەی شاری هەولێرن و دەوامییان لەناوی سەنتەری شاری هەولێرە، پێویست ناكات دەوام بكەن.

12-لە هەر شوێنێكی بازرگانی و بازار و دوكان و ماركێت و مۆڵ و چێشتخانەیەك رێنماییە تەندروستیەكان جێبەجێ نەكرێن، دەست بەجێ ئەم شوێنە دادەخرێت، بۆ ماوەیەك كە لە هەفتەیەك‌ كەمتر نەبێت.

13-كردنەوەی نۆڕینگە و سەنتەر و كۆمەڵگە پزیشكییەكان ئارەزومەندانە دەبێت و ئەوانەشی كراوە دەبن دەبێت ئەو مەرجانەی خوارەوە یان تێدابێت:
ـ كردنەوەی نۆڕینگەكان لە كاتژمێر (3)ی دوای نیوەڕۆ بۆ (8)ی ئێوارە دەبێت.
ـ لە هۆڵی چاوەڕوانی لە چوار نەخۆش زیاتری لێ نەبێت و نێوانی هەر یەكەیان دوومەتر كەمتر نەبێت.
ـ پزیشك دەستكێشی لەدەست بێ و (دەمامك) ببەستبێ.
ـ نەخۆش یەك هەواڵی زیاتر لەگەڵ نەبێت و هەردوكیان (دەمامك)یان بەستابێ.
ـ ڕۆژانە نۆڕینگە و سەنتەر و كۆمەڵگاكان (تعقیم) بكرێن.
ـ لەو ماوەیەدا لە(كاتژمێر 3 بۆ 7) لە (10) نەخۆش زیاتر نەبینرێت.

14- دەسەڵاتی تەواو دەدرێت بە سەرجەم قایمقامەكان بۆ بەرگرتن لە كۆرۆنا و جێبەجێكردنی ڕێكارەكانی خۆپارێزی، هەر بڕیارێك لە سنووری قەزاكەیان بیدەن و لە كاتی پێویستیش بۆیان هەیە لەسنووری قەزاكەیان كەرەنتین و قەدەغەی تەواوەتی ڕابگەیەنن.

15- ئەم بڕیارانە لەكاتژمێر 12ی شەوی 11 لەسەر12ی 2020/7 دەچێتە واری جێبەجێكردنەوە تاوەكو كاتژمێر 12ی شەوی 18 لەسەر 19ی 2020/7.

ژووری ئۆپەراسیۆنی پارێزگای هەولێر
2020.7.11

کوردستان

دوواین ئاماری تووشبووانی كۆرۆنا لە ڕۆژئاوای كوردستان

خەڵك-بەشی هەواڵ

 

بەڕێوەبەرایەتی تەندروستی ئیدارەی خۆسەری لە ڕۆژئاوای كوردستان ڕایدەگەیەنێت، ئەمڕۆ یەك شەممە 39 تووشبووی نوێ لە ناوچەكانی باكوری سوریا تۆماركراون و دوو تووشبووش گیانیان لەدەستداوە.

بەڕێوەبەرایەتی تەندروستی ئیدارەی خۆسەری لە ڕۆژئاوای كوردستان لە ڕاگەیەنراوێكدا ئاماژە بۆ ئەوە دەكات، لە 24 كاتژمێری ڕابردوودا 39 تووشبووی نوێی كۆرۆنا لەناوچەكانی ئیدارەی خۆسەر تۆماركراون كە زۆرترینیان لە قامشلۆ 9 تووشبوو، حەسەكە 17 تووشبوو و لە شارۆچكەی گركێ لەگی-یش 4 تووشبوو تۆماركراون.

ئاشكراشیدەكات، دوو تووشبووی كۆرۆنا لە كۆبانی گیانیان لەدەستداوە و 7 تووشبووی دیكەش چاكبوونەتەوە و كۆی گشتی تووشبووانیش گەیشتە هەزار و 398 كەس.

بەردەوام بە لە خوێندنەوە

کوردستان

ئەم هەواڵە نوێدەكرێتەوە..
خۆپیشاندانی سەرتاسەری مامۆستایان دەستیپێكرد

سلێمانی ـ نزار جەزا

ئەمڕۆ شەممە لە یەكەم رۆژی دەستپێكردنی ساڵی نوێی خوێندن لە شاری سلێمانی مامۆستایان نەچوونە هۆڵەكانی خوێندن و خۆپیشاندانیان دەستپێكرد.

پەیامنێری (خەڵك) لە شوێنی خۆپیشاندانەكەدا وتی: خۆپیشاندەران لە پێش بەڕێوەبەرایەتی پەروەردەی رۆژئاوا كۆبوونەتەوە و خۆپیشاندانیان سازكردووە و خەڵكی دیكەشیان لەگەڵدایە.

ئاماژەی بەوەشكرد خۆپیشاندەران داوای خەرجكردنی موچەكانیان دەكەن كە ماوەی چەند مانگە پێیان نەدراوە لەگەڵ دابەشكردنی موچە مانگانە لە كاتی خۆیدا.

ناڕازییەکان کە مامۆستایان ڕابەرییان دەکەن لەبەردەم بەڕێوەبەرایەتی پەروەردەی ڕۆژئاوای سلێمانی گردبوونەتەوە و دروشمی جۆراوجۆر دەڵێنەوە.

بڕیارە پاش کەمێکی دیکە بەڕێپێوان بەڕێبکەون بۆ بەردەم بینای پارێزگای سلێمانی و لەوێ بەیاننامەی خۆیان بخوێننەوە و تێیدا کۆی داواکارییەکانیان دەخەنەڕوو و هەنگاوی دواتریان ئاشکرادەکەن.

هاوكات لە شاری كەلار و كۆیەش خۆپیشاندانی مامۆستایان دەستیپێكردووە و لەبەردەم بەڕێوەبەرایەتییەكانی پەروەردەی شارەكانیاندا كۆبوونەتەوە.

هاوكات بڕیارە لە شاری هەڵەبجە و رانیەش خۆپیشاندانی مامۆستایان بەڕێوەبچێت.
زانیاری نوێتر…

بەردەوام بە لە خوێندنەوە

کوردستان

راوێژكاری ئاسایشی نەتەوەیی عێراق گەیشتە هەولێر

خەڵك- بەشی هەواڵ

راوێژكاری ئاسایشی نەتەوەیی عێراق قاسم ئەعرەجی گەیشتە هەولێر بە سەرۆكایەتی شاندێكی ئەمنی.

سەرچاوەیەك بۆ الاخباریە وتی: ئەعرەجی لەگەڵ شاندێكی ئەمنی گەیشتووەتە هەولێر.

ناوبراو لەگەڵ بەرپرسە ئەمنییەكانی هەرێمی كوردستاندا كۆدەبێتەوە.

زانیاری زیاتر لەبارەی سەردانەكە بڵاونەكراوەتەوە، بەڵام هاوكاتە لەگەڵ هەڕەشە و هۆشدارییەكانی ئەمریكا بۆ عێراق لەسەر هێرشكردنەسەر بەرژەوەندییەكانی ئەمریكا لەلایەن ملیشیا چەكدارەكانەوە.

هاوكات نێچیرڤان بارزانی سەرۆكی هەرێمی كوردستان ئامادەیی هاوكاری و پشتیوانی بۆ دابینكردنی سەقامگیری و ئاسایش لە عێراق نیشانداوە.

بەردەوام بە لە خوێندنەوە

کوردستان