ئێمە لە تۆرە کۆمەڵایەتیەکان

کوردستان

جێگری پارێزگاری هەڵەبجە: هەڵەبجە لەوە زیاتر بەرگەی كێشەكان ناگرێت

خەڵك – بەشی هەواڵ

جێگری پارێزگاری هەڵەبجە لەڕوونكردنەوەیەكدا، وردەكاریی كێشەكانی تەندروستی هەڵەبجە ئاشكرا دەكات و ڕایدەگەیەنێت: لیژنەی تەندروستی پەرلەمان و داواكاری گشتیمان ئاگادار كردووە، كە هەڵەبجە لەوە زیاتر بەرگەی كێشەكان ناگرێت.

ئەندازیار كاوە شێخ عەلی جێگری پارێزگاری هەڵەبجە لە ڕوونكردنەوەیەكدا ڕایگەیناد:” لەبەرئەوەی زیاتر لە ١٥ ڕۆژە لیژنەی لێكۆڵینەوە نەهاتوون، بۆچارەسەری كێشەی تەندروستی هەڵەبجە، ناچار بووین لیژنەی تەندروستی پەرلەمانی كوردستان و داواكاری گشتی هەڵەبجە ئاگادار بكەین كە هەڵەبجە لەوە زیاتر بەرگەی كێشەكان ناگرێت”.

جێگری پارێزگاری هەڵەبجە دەشڵێت:”بەڕێز وەزیری تەندروستی بەڵێنی بە لیژنەی تەندروستی پەرلەمان داوە بەزووترین كات لیژنەكە بنێرێت كە پێكیان هێناوە”.

 

دەقی ڕوونكردنەوەكەی ئەندازیار كاوە شێخ عەلی جێگری پارێزگاری هەڵەبجە:

لەبەرئەوەی زیاد لە ١٥ ڕۆژە لیژنەی لێكۆڵینەوە نەهاتوون بۆ چارەسەری كێشەی تەندروستی هەڵەبجە ،ناچار بووین لیژنەی تەندروستی پەرلەمانی كوردستان و داواكاری گشتی هەڵەبجە ئاگادار بكەین كە هەڵەبجە لەوە زیاتر بەرگەی كێشەكان ناگرێت.
بەڕێز وەزیری تەندروستی بەڵێنی بە لیژنەی تەندروستی پەرلەمان داوە بەزوترین كات لیژنەكە بنێرێت كە پێكیان هێناوە.

بەڕێزان سەبارەت بە كێشەی كەرتی تەندروستی كە بە داخەوە بوەتە گەورەترین كێشە بۆ هاوڵاتیانی پارێزگای هەڵەبجە ، و زۆر جاریش ئاراستەی ڕەخنەكان ڕووبەڕووی ئێمە دەكرێتەوە ، ئەم ڕوونكردنەوەم بە پێویست زانی، بۆ خۆ دەرباز كردن نییە لە بەرپرسیارێتی، بەڵكو بۆ تێگەیشتنی هەموانە لە هۆكاری چارەسەر نەكردنی تائێستا:

١- كێشەی تەندروستی هەڵەبجە كێشەی ئەمڕۆ نییە و بەڵكو سێ ساڵ لەمەوپێش كارمەندانی تەندروستی هەڵەبجە جگە پزیشكەكان هەمان كێشەیان هەبوو و داوای لادانی بەڕێوەبەری گشتی تەندروستی هەڵەبجە كرا ، ئەوە بوو بە هەمان شێوەی ئێستا یاداشتەكەیان ئاڕاستەی بەڕێز جێگری سەرۆكی ئەنجومەنی وەزیران و بەڕێز وەزیری تەندروستی كرا و ئەوانیش لیژنەیان پێكهێنا بۆ چارەسەر كردنی كێشەكە بە هەماهەنكی ئیدارەی پارێزگای هەڵەبجە و تاحەدێك چارەسەر كرا..

٢- ئێستاش لەو ڕۆژەی كە پزیشكەكان یاداشتەكەیان ڕادەستی ئێمە كردووە بە هەمان شێوە بەڕێزان جێگری سەرۆكی ئەنجومەنی وەزیران و وەزیری تەندروستی لێ ئاگادار كراوەتەوە و تائێستاش بۆ ١٥ ڕۆژ زیاترە چاوەڕێی لیژنەی ئەو بەڕێزانەیین و ڕۆژانە لە پەیوەندییداین لەگەڵ لایەن پەیوەندیدارەكان بۆ زوو هاتنیان.

٣ لەوانەیە بڵێن ئەی بۆ لێرەوە بڕیاری لێ نادرێت ؟

پرسیارەكە تەواوە ، بەڵام بە پێی یاسا ئەگەر كێشەیەك لە وەزارەتێكی تر هەبوو وە پێویستی بە لیژنەی لێكۆڵینەوە هەبوو ئەوا پارێزگارەكان دەسەڵاتی لیژنە دروستكردنیان نییە و دەبێت وەزارەتی پەیوەندیدار كە وەزارەتی تەندروستییە ئەو لیژنەیە دروست بكات. تەنها كارێك پارێزگاكان بیكەن پێویست بە گەیاندنی كێشەكان هەیە بە وەزارەت و ئەگەر وەزارەت بیەوێت یان ئەنجومەنی وەزیران كێشەكە زوو چارەسەر بكرێت یان كەمتەرخەم دیاری بكرێت ئەوا لیژنەكە دروست دەكات و دەكرێت پارێزگا ڕاسپێرێت ، بە دڵنیاییەوە ئەگەر ئەنجومەنی وەزیران یان وەزارەتی تەندروستی ئەو دەسەڵاتە بداتە پارێزگای هەڵەبجە ئەوا لە ماوەی كەمتر لە دوو ڕۆژ كەسی كەمتەرخەم دیاری دەكرێت .

٤- یەكێك لە گرفتەكان ئەوەیە لە هەرێمی كوردستان ، هەمووان دەزانین كە دیاری كردنی پۆستی بەڕێوەبەرە گشتیەكان لە زۆنی ئەملا یەكێتی بەهەماهەنكی پارتی و لە ڕێگەی بەڕێز جێگری سەرۆكی ئەنجومەنی وەزیران دیاری دەكرێت و دەگۆڕێت بەتایبەت ئەگەر وەزیرەكەی پارتی بێت ،واتە ئێستا بۆ چارەسەركردنی كێشەكە پێویستە هەردوولایان بەرژەوەندی خەڵكی پارێزگاكە لەبەرچاو بگرن،

و لابردنی بەڕێوەبەری گشتی تەندروستی بە بێ لیژنەی لێكۆڵینەوە تا ڕاستی بەڵگەكانی هەردوولا دەرنەكەوێت ئەنجام نادرێت.

٥- ئێمە لەبەر ئەوەی ڕانەسپێراوین لەلایەن وەزارەتی تەندروستی یان ئەنجومەنی وەزیران ناتوانین لایەنی كەمتەرخەم دیاری بكەین .

٦- بە پزیشكان و بەڕێوەبەری گشتی تەندروستیمان ڕاگەیاندووە كە تەنها هاوڵاتیان زەرەرمەندی یەكەمن لەم مانگرتنە ،ئەگەر هەر لایەك كەمتەرخەم بێت، هیچ لەزەرەر و زیانی هاوڵاتیان كەمناكاتەوە لەبەر ئەوە بە هیچ شێوەیەك لەگەڵ مانگرتنی پزیشك و كارمەندی تەندروستی نیین و هیچ پاساوێك نییە بۆ چارەسەر نەكردنی نەخۆشێك ،
دەوام بكرێتەوە تا ئەنجامی لیژنەكە دەردەچێت و هەر كەسێك كەمتەرخەم بوو لەهەر پۆستێك سزا دەدرێت.

٧- وەزارەتی تەندروستی بەڕێوەبەرایەتی گشتی تەندروستی هەڵەبجەی ئاگادار كردووە كە ئیجرائاتی یاسایی و ئیداری بەرامبەر بەو كەسانەی كە دەوام ناكەن بگرنە بەر، ئەمە لەباری شانی هاوڵاتیان سووك ناكات ، چونكە كەمتەرخەم سزاش بدرێت تائێستاش نەخۆش لەو كاتانەی پزیشكی لێ نییە زەرەرمەندە، بەتەنها سزای ئیداری و یاسایی چارەسەر نییە و كات ناگەڕێتەوە بۆ نەخۆشەكان..

٨- لەبەرئەوەی لیژنەماتی لێكۆڵینەوە لە وەزارەتی تەندروستی و ئەنجومەنی وەزیران ، بۆ ماوەی زیاد لە ١٥ ڕۆژە نەهاتوون بەدەم چارەسەری كێشەكەوە و ئەركی ئەوانە بە پێی یاسا ، لە ڕێگەی نوسینگەی هەڵەبجەی پەرلەمانی كوردستان ، لیژنەی تەندروستی لە پەرلەمان و داواكاری گشتی لە هەڵەبجەمان ئاگادار كردووە كە خەمساردی چارەسەری كێشەكان هاوڵاتیانی هەڵەبجەی تەواو ماندوو كردووە ، لیژنەی تەندروستی لەگەڵ وەزارەتی تەندروستی قسەیان كردووە كە بە زووترین كات لیژنەكە دەنێرن بۆ یەكلاكردنەوەی كێشەكان.

وە دڵنیاش بن لەو ڕۆژەی كێشەكە هەبووە وەك ئەركێكی سەرشان و بەبەردەوامی ، ئەوەی پەیوەندیدار بووە ڕۆژانە لە پەیوەندییدا بووین لەگەڵیان و تكا و ڕجامان لە سەروو و خواری خۆمان كردەوە، كە هەڵەبجە گیرۆدە بووە و تكایە زوو بەدەم كێشەكانەوە بێن و چیتر نەخۆش مەكەنە قوربانی هیچ پاساوێك و هیچ شتێكی تر.

بەداخەوە ئەوەی چارەسەری كێشەكان لە دەسەڵاتیدایە لە وەزارەتی تەندروستی و ئەنجومەنی وەزیران خەمساردانە دەڕواننە كێشەكە، پێویست بوو گوێ بە پشوو و جەژن و …هتد، نەدرێت ناردنی لیژنەیەك یان راسپاردنی پارێزگای هەڵەبجە بە لیژنەی لێكۆڵینەوە ئەوەندە كاتی نەدەویست.

لەگەڵ ڕێزدا

کوردستان

سەرۆكی حكومەت زەنگی دەستپێكردنەوەی پڕۆسەی خوێندنی لێدا

خەڵك-بەشی هەواڵ

 

ئەمڕۆ یەكشەممە 27/9/2020 مەسرور بارزانی، سەرۆكی ئەنجومەنی وزەیرانی هەرێمی كوردستان زەنگی دەستپێكردنی ساڵی نوێی خوێندنی لێدا.

مەسرور بارزانی لە وتارێكدا ڕایگەیاند، خۆشحاڵم كە ئەمڕۆ زەنگی دەستپێكردنەوەی پڕۆسەی خوێندن لێدەدەین، بۆ ئەوەی پڕۆسەی خوێندنی پۆلی 12ـی ئامادەیی دواتریش خوێندنی پۆلی یەك و دووی بنەڕەتی دەست پێبكات.

ناوبراو سوپاسی وەزیری پەروەردەی كرد، بۆ هەوڵ و ماندوبوون و دانانی میكانیزمێك بۆ دەستپێكردنەوەی پڕۆسەی خوێندن، بەتایبەتی لەم دۆخەی كە بەهۆی ڤایرۆسی كۆرۆنا هاتووەتە ئاراوە.
بارزانی ئاشكراشیكرد، ڕاستە خوێندن پڕۆسەیەكە بۆ فێربوون، بەڵام لە هەمانكاتدا قۆناغێكە بۆ هەستكردن بە بەرپرسیاریەتی، قوتابی بۆ ئەوە دەخوێنن، تا ببن بە ئەندامێكی كاریگەری كۆمەڵگە و فێری زانست بن، بۆ ئەوەی وڵات بەرەوپێش بەرن. خوێندن تەنها خوێندنەوەی كتێب و وانە نییە، بەڵكو خۆئامادەكردنە بۆ ژیان، بۆیە تا زیاتر خۆتان ئامادەبكەن بۆ ژیان هێندە دەتوانن سەركەوتووبن لە ژیان. دڵنیام زۆر لە ئێوەی قوتابیان ژیانی بندەستیتان نەبینیوە، بەڵام ئەوەی ئێستا لەم هەرێمە هەیە بەرهەمی خوێنی شەهیدان و قوربانیدانێكی زۆرە.

لای خۆشیەوە ئالان حەمەسەعید وەزیری پەروەردە، سوپاسگوزاری ئاڕاستەی مەسرور بارزانی كرد كە 540 ملیۆن دینار وەك بودجە بۆ پێداویستییە پزیشكییەكان و خۆپارێزی لە قوتابخانەكان تەرخان كردووە.

ئەمەش لەكاتێكدایە بەهۆی نەبوون و دواكەوتنی مووچەكانیان ئەمڕۆ یەك شەممە لە پارێزگاكانی هەڵەبجەو سلێمانی و ئیدارەكانی گەرمیان و ڕاپەڕین خۆپیشاندانی مامۆستایان و فەرمانبەران ئەنجام دەدرێت و بایكۆتی پڕۆسەی خوێندن دەكەن.

بەردەوام بە لە خوێندنەوە

کوردستان

كۆدەنگی لەسەر داخوازییەكانی مامۆستایان دروست دەبێت

خەڵك – بەشی هەواڵ

فڕاكسیۆنی كۆمەڵ لە پەرلەمانی كوردستان و ژمارەیەك نوێنەر لە ئەنجومەنی نوێنەرانی عیراق پشتیوانی لە داخوازییەكانی مامۆستایانی هەرێم دەكەن.

لەگەڵ بڕیاری دەستپێكردنەوەی دەوام لە ناوەندە پەروەردەییەكانی سەر بەوەزارەتی پەروەردە، مامۆستایان ڕایانگەیاند، سبەینێ یەك شەممە خۆپیشاندانی سەرتاسەری لەشارە جیاوازەكانی هەرێمی كوردستان ئەنجام دەدەن، لەپێناو دابین كردنی مووچە لەكاتی خۆیدا و بەبێ لێبڕین و جەختیش لە بایكۆت دەكەنەوە.

لەوبارەیەوە، فڕاكسیۆنی كۆمەڵ لە پەرلەمانی كوردستان و ژمارەیەك نوێنەر لە ئەنجومەنی نوێنەرانی عیراق ڕایدەگەیەنن: پشتیوانی لە داخوازییەكانی مامۆستایانی هەرێم دەكەن.

فڕاكسیۆنی كۆمەڵ لە پەرلەمانی كوردستان لە ڕاگەیەنراویكدا ئاماژە بەوەدەكات: ئێمە پشتیوانی تەواوی خواست و داخوازییەكانی مامۆستایان دەكەین و دەبینە بەشێك لەو فشارانەی مامۆستایان بە ئاڕاستەی هێنانەدی داواكارییەكانیان.

فڕاكسیۆنی كۆمەڵ لە پەرلەمانی كوردستان ئەوەش دەخاتە ڕوو، لە هەرێمێكدا كە ژمارەی دانیشتووانەكەی ناگاتە شەش ملیۆن كەس و لەسەر دەریایەك نەوت و دەیان سەرچاوەی گرانبەهای سامانی سرووشتی هەبێت، خاوەنی چەندین دەروازەی سنووریی نێودەوڵەتیی و داهاتێكی زەبەلاحی ناوخۆ بێت، ستەم و عەیبەیەكی گەورەیە مامۆستایان و كادیرانی پەروەردە بێنە سەر شەقام و داوای مووچەی پێنج مانگ پێش ئێستایان بكەن.

لە ڕاگەیەنراوەكە فڕاكسیۆنی كۆمەڵ لە پەرلەمانی كوردستان ئاماژە بەوەدەكات، دڵنیاین لەوەی كە هەرێمی كوردستان هیچ قەیرانێكی دارایی و نەبوونی داهاتی نییە، بەڵكو كێشەی نەبوونی دەسەڵاتداری دڵسۆز و دەستی پاك و ویژدانی زیندووی بەرپرسیارێتیی هەیە و سامانی خەڵك و داهاتی گشتی لە دەستێكی نائەمیندایە و بانگەشەی چاكسازیش لەلایەن ئەم دەسەڵاتەوە جگە لە قسەیەكی بەتاڵ شتێكی دیكە نییە. بۆیە بەتەواوی پشتگیریی داوا و خواست و خۆپیشاندانی مەدەنییانەی مامۆستایانین و پێویستە دەسەڵات بە زووترین كات وەڵامی ئەرێنیان بداتەوە و دەست هەڵبگرێت لە بەلاڕێدابرنی قەیران بە قەیرانێكی دیكە.

هاوكات، 15 نوێنەری كورد لە فڕاكسیۆنە جیاوازەكان كە نوێنەرایەتی پارێزگاكانی ھەرێمی كوردستان دەكەن لە ئەنجومەنی نوێنەرانی عیراق لە ڕاگەیەنراوێكدا دەڵێن: پشتیوانی داواكاری مامۆستایان و فەرمانبەران و ناڕەزایەتییەكانیان دەكەین و داوا لە حكومەتی ھەرێمی كوردستان دەكەین دەستھەڵگرێت لە سیاسەتی چەوساندنەوەی فەرمانبەران و بڕینی مووچەكانیان و مانگانە و لە كاتی خۆیدا مووچەكانیان دابین بكات.

 

ئەو نوێنەرانەی ئەنجومەنی نوێنەرانی عیراق كە پشتیوانی لە داخوازییەكانی مامۆستایان دەكەن:

(ئەحمەد حاجی ڕەشید، غالب محەمەد عەلی، سروە ونس، یسرا ڕەجەب، ڕێبوار كەریم مەحمود، ڕابوون مەعروف، سەركەوت شەمسەدین، جەمال كۆچەر، موسەننا ئەمین، كاوە محەمەد، هۆشیار عەبدوڵا، سەلیم هەمزە، یوسف محەمەد سادق، بەهار مەحمود، عەبدولباری مودەریس).

بەردەوام بە لە خوێندنەوە

کوردستان

ئاماری ئەمڕۆی تووشبوون و مردن بە كۆرۆنا لە سلێمانی بڵاوكرایەوە

خەڵك- بەشی هەواڵ

تەندروستی سلێمانی دواین ئاماری تووشبوون بە ڤایرۆسی كۆرۆنا بڵاودەكاتەوە و ئاشكرای دەكات، كە تەنها شەش كەس گیانیان لەدەستداوە.

د. یاد نەقشبەندی، وتەبێژی تەندروسستی سلێمانی ڕایگەیاند، لە ئەگەری جێبەجێنەكردنی ڕێنمایەكان و پابەندنەبوونی هاووڵاتیان بە تاك پارێزییەوە، جارێكیتر ئامارەكان هەڵكشانی خێرا دەبینن و نەخۆشخانەكان پڕ دەبنەوە.

ڕایگەیاندووە، ئەمڕۆ شەممە 26ی ئەیلولى2020، تەنها 18 كەس بەهۆی تووشبوون بە ڤایرۆسی كۆرۆنا خراونەتە ناو نەخۆشخانە و لە هەمان كاتدا 24 كەس چاكبوونەتەوە و نەخۆشخانەیان جێهێشتووە.

ڕاشیگەیاندووە، تا ئێستا 184 نەخۆش لە نەخۆشخانە ماون و ژمارەیەكیان لە چاودێری چڕ خەوێنراون و تەنها 6 كەسیش گیانیان لەدەستداوە.

 

بەردەوام بە لە خوێندنەوە

کوردستان