زانكۆی سلێمانی بۆ ئاهەنگی دەرچوونی خوێندكاران بڕیاریدا لە ساڵی داهاتووەوە تەنها بە ئامادەبوونی خوێندكاران و مامۆستایان بێت و هێنانی میوان و شیرینی و ئاهەنگ گێڕان قەدەغە بكات.
د. پێشڕەو حەمەجان، یاریدەدەری سەرۆکی زانکۆ بۆ کاروباری خوێندکاران لە ڕاگەیەنراوێكدا ئاماژەی بەوەكردووە، ئەنجوومەنی زانکۆی سلێمانی لە کۆبوونەوەی ئاسایی خۆیدا لە ١٠-٥-٢٠٢٣ لەپاش بەدواداچوون وهەڵسەنگاندێکی ورد بۆ ڕێوڕەسمی وێنەگرتنی دەرچوونی خوێندکارانی ئەم ساڵی خوێندن لەناو کەمپەسەکانی زانکۆ بەتایبەت دوای گوێگرتن لەگلەیی خوێندکاران و کەسوکاریان و مامۆستایان و کارمەندانی پرسگە و باخچەکان، لە پێناو پاراستنی پاکوخاوێنی و سەوزایی و ئارامی و هاتووچۆی ناو کەمپەسی زانکۆ لەلایەک و کەمکردنەوەی ئەرکی دارایی سەرشانی کەسوکاری خوێندکاران و بەدەستهێنانی جۆرێک لە دادپەروەری بۆ خوێندکاران چەند بڕیارێكی دەركرد.
ڕاشیگەیاند، ئەم بڕیارانە لەبارەی ڕێوڕەسمی وێنەگرتنی دەرچوون بۆ ساڵی خوێندنی داهاتوو (٢٠٢٣-٢٠٢٤) جێبەجێ دەكرێن:
1- وێنەگرتنی دەرچوون لەناو کەمپەس تەنها بە ئامادەبوونی (خوێندکارانی قۆناغی کۆتایی ومامۆستایانی کۆلێج) دەبێت.
2- هێنانی میوان وکەسوکار بۆ ناو کەمپەسەکانی زانکۆ بۆ بەشداری ڕێوڕەسمی وێنەگرتن ڕێگەپێنەدراوە.
3- ڕازاندنەوەی مێز وکورسی وهێنانی کۆمپانیای دیکۆرات ودیاری ودانانی خواردن وخواردنەوە وشیرینی وئاهەنگ گێڕان لەناو کەمپەس ڕێگەپێنەدراوە.
4- بەهیج جۆرێک ڕێگە بەهێنانە ژورەوەی ئۆتۆمبێل بۆ ناوکەمپەس نادرێت لەژێر ناوی وێنەگرتن.
5- داواکردنی وێنەی دەرچوون لەلای وێنەگری زانکۆ کارێکی ئارەزومەندانەیە بۆ خوێندکاری دەرچوو.
جەختیشی كردۆتەوە، خوێندکارانی دەرچوو دەتوانن ئاهەنگ و کاتە خۆشەکانی خۆیان لەگەڵ کەسوکارییان لە دەرەوەی کەمپەسی زانکۆ بەسەربەرن.
