ئێمە لە تۆرە کۆمەڵایەتیەکان

کوردستان

ڕەتیدەكاتەوە نەخۆشخانەیەكی تر بۆ تووشبوان تەرخان كرابێت
تەندروستی سلێمانی ئاماری تووشبوان بە كۆرۆنا ئاشكرا دەكات

خەڵك- بەشی هەواڵ
وتەبێژی بەڕێوەبەرایەتی تەندروستی پارێزگەی سلێمانی، ئاماری تووشبوان بە ڤایرۆسی كۆرۆنا ئاشكرا دەكات، ڕەتیشیدەكاتەوەبەهۆی زۆری ژمارەی تووشبوان لە پارێزگەكەدا نەخۆشخانەیەكی تر بۆ تووشبوان تەرخان كرابێت.

یاد نەقشبەندی، وتەبێژی بەڕێوەبەرایەتی تەندروستی پارێزگەی سلێمانی بە (خەڵك)ی ڕاگەیاند:”لەئێستادا 75 حاڵەتی توشبوو لە شاری سلێمانی هەیە، لەوانە 40 حاڵەتیان نیشانەی توندی ڤایرۆسەكەیان هەیە، لەنێوان ئەوانەشدا 3 حاڵەت باری تەندروستیان ناجێگیرە”.

سەبارەت بە تەرخانكردنی نەخۆشخانەیەكی تر بۆ تووشبوانی ڤایرۆسی كۆرۆنا، وتەبێژی تەندروستی سلێمانی بۆ (خەڵك) ڕەتیكردەوە هیچ نەخۆشخانەیەكی تر بۆ تووشبوانی كۆرۆنا لە سلێمانیدا تەرخانكرابێت.

یاد نەقشبەندی دەڵێت:”لەئێستادا توانای لەخۆگرتنی ژمارەی توشبووەكان هەیە و نەگەیشتوونەتە ئەو ئاستەی پەنا بۆ تەرخانكردنی نەخۆشخانەی تر ببەن بۆ تووشبوانی ڤایرۆسی كۆرۆنا، بەو پێیەی هەندێك لە حاڵەتەكان لە ئوتێل سەناریان”.

پێشتر هەندێك لە میدیاكان لە زاری بەرپرسێكی بەڕێوەبەرایەتی تەندروستی سلێمانییەوە بڵاویان كردەوە كە گوایە”لەبەر زۆری ژمارەی تووشبوان بە ڤایرۆسی كۆرۆنا لە سلێمانی، نەخۆشخانەی جمهوری بۆ لەخۆگرتنی نەخۆشەكانی كۆرۆنا تەرخان دەكرێت”.

هاوكات د. یاد لە هەژماری خۆی لە فەیسبووك ڕایگەیاندووە، “تووشبووانی نوێ لە نەخۆشخانەی سەرچنار سەرەیان گرتبوو بۆ پرکردنەوەی فایل بۆ ئەوەی داخڵ بکرێن، کە هەموو جۆرە تەمەنێک و رەگەزێکی تیابوو سەرەرای ئەوەی ٤ پزیشک خەریک بوون یەکێکیان لەبەر دراگاکە سیان لە ژوورەوە” .

دەشڵێت: ” خێزانێک هاتنە لام لەناو حەوشەی نەخۆشخانەکە ووتی دکتۆر گیان من خۆم و مێردەکەم و ۲ مناڵەکەم نەتیجەکەمان دەرچووە هەڵگرین ٫ وتم بەداخەوە بەس سوپاس بۆ خوا کە تەندروستیتان باشە٫ ووتی دکتۆر گیان خەمی خۆمانم نیە دایک و باوکم بەتەمەنن و لە ماڵەوە وەزعیان خراپە و تەنگە نەفەسەن فریایان کەون ٫ لەویا کاک ئازاد بەرێوبەری کارگێری ووتی قسەم لەگەڵ کردوون تۆزێکیکە اسعاف ئەروات ئەیانهێنێت”.

جەختیشی كردۆتەوە، نەخۆشخانەکان لە لێوای پربووندایە.

کوردستان

هەپەگە؛لە هەفتانین و خواكورك و دێرسیم چالاكییان ئەنجامداوە و سێ سەرباز كوژرا

خەڵك – بەشی هەواڵ

ناوەندی ڕاگەیاندنی هێزەكانی پاراستنی گەل- هەپەگە ڕایدەگەیەنێت، لە هەفتانین خواكورك و دێرسیم لەگەڵ گەریلاكانی یەژاستار دژی سوپای توركیا چالاكییان ئەنجامدا.

ئەمڕۆ ناوەندی ڕاگەیاندنی هێزەكانی پاراستنی گەل-هەپەگە لە ڕاگەیەنراوێكدا بڵاویكردەوە، لە دوو ڕۆژی ڕابردوودا لە هەفتانین خواكورك و دێرسیم لەگەڵ گەریلاكانی یەژاستار دژی سوپای توركیا چالاكییان ئەنجامداوە و سێ سەرباز كوژرا.

 

دەقی ڕاگەیەنراوەكەی هەپەگە :
هەفتانین
گەریلاكانی یەژاستار لە چوارچێوەی هەنگاوی شۆڕشگێریی جەنگی هەفتانین، ڕۆژی ١٥ی ئەم مانگە كاتژمێر ٠٣:٥٠ خولەكی دوانیوەڕۆ، دژی سوپای تورك لە گردی شەهیدان چالاكیی نیشانشكێنیان ئەنجامدا، لەو چالاكییەدا سەربازێك كوژرا.

خواكورك
ڕۆژی ١٦ی ئەم مانگە كاتژمێر ٠٤:٠٠ی بەرەبەیان، هێزەكانمان لە چوارچێوەی هەنگاوی شۆڕشگێریی شەهید باگەڕ و شەهید ڕۆنیا-دا، لە گردی شەهید دەروێش دژی سوپای داگیركەری تورك چالاكییان ئەنجامدا، لە چالاكییەكەدا مۆڵگە و حەشارگەی دووژمن كرانە ئامانج، بەڵام ژمارەی كوژراو بریندارەكان ڕوون نەبووەتەوە.

دێرسیم
سوپای داگیركەری تورك لە نزیك گوندی چاكماكلی لە ناوچەی خۆزاتی دێرسیم بارەگایەك دروست دەكات، گەریلاكانی یەژاستار ڕۆژی ١٤ی ئەم مانگە كاتژمێر ٠٨:٠٠ی بەیانی دژی پاسەوانانی بارەگاكە چالاكییان ئەنجامدا، لەم چالاكییەدا دوو سەربازی دووژمن كوژران و دووی دیكەش برینداربوون، یەكینەكەمان بە سەلامەت گەڕایەوە شوێنی خۆی.

هێرشی ئاسمانیی
فڕۆكە جەنگییەكانی سوپای داگیركەری تورك، ڕۆژی ١٤ی ئەم مانگە كاتژمێر ٠١:٠٠ی بەرەبەیان ناوچەی خانتوری هەفتانین، ڕۆژی ١٥ی ئەم مانگە كاتژمێر ٠٥:٠٠ی ئێوارە ناوچەی بەكتۆریا و هەروەها ڕۆژی ١٥ی ئەم مانگەش كاتژمێر ١٠:٣٠ خولەكی شەو گردی ئامێدی لە ناوچەی ئامێدی سەربە دهۆك-یان بۆردوومانكرد.

بەردەوام بە لە خوێندنەوە

کوردستان

هەولێر؛دزێك دەستگیركرا كە ماددەی هۆشبەریشی بەكارهێناوە

خەڵك – بەشی هەواڵ
بەڕێوەبەرایەتیی پۆلیسی پارێزگای هەولێر ڕایدەگەیەنێت ، دوای كۆكردنەوەی زانیاری و بەدواداچوون كەسێكیان دەستگیركرد ، كە تۆمەتبارە بە دزینی 2 ماتۆڕسكیل، دەشڵێت،”لە ماڵەكەیدا دەست بەسەر ماددەی هۆشبەر و كەرەستەكانی بەكارهێنانی و جلوبەرگی سەربازی بە پلەی عەمید گیرا”.

بەڕێوەبەرایەتیی پۆلیسی پارێزگای هەولێر لە ڕاگەیەنراوێكدا ، كە وێنەیەكی دەست (خەڵك) كەوتووە ڕایگەیاندووە، تیمەكانمان دوای كۆكردنەوەی زانیاری و بەدواداچوون، لە ماوەی كاتژمێرێكدا لە گەڕەكی پۆلیسان كەسێكیان بە ناوی (س.ع) بە تۆمەتی دزینی 2 ماتۆڕسكیل دەستگیر كرد.

ڕاشیگەیاندووە، لە ماڵەكەیدا ماددەی هۆشبەر و كەرەستەی بەكارهێنانی ماددە هۆشبەرەكان و دەمانچەیەك و 2 ماتۆڕسكیلەكە و كۆمەڵێك فیشەك و هەندێك (جلوبەرگی سەربازی بە پلەی عەمید) دەستیان بەسەردا گیرا.

ئاماژە بۆ ئەوەشكراوە، تۆمەتباری ناوبراو بەپێی ماددە (446) لە یاسای سزادان بەند كرا و دۆسیەیەكی دیكەی سەربەخۆش لەسەر تۆمەتبار كرایەوە بەپێی ماددە (14)ی هۆشبەرەكان، لەبەر ئەوەی ماددەی هۆشبەری بەكارهێنابوو.

بەردەوام بە لە خوێندنەوە

کوردستان

تەقینەوەیەك لە كەركوك ڕویدا

 

خەڵك- بەشی هەواڵ

تەقینەوەیەك لە كەركوك ڕویدا و سەرچاوەیەكی ئەمنیش دەڵێت، ڕووداوەكە جگە لە زیانی ماددی، قوربانی لێنەكەوتۆتەوە.

دوانیوەڕۆی ئەمڕۆ پێنج شەممە، سەرچاوەیەكی ئەمنی لە شاری كەركوك ڕایگەیاند”تەقیتەوەیەك لە ناوەڕاستی شاری كەركوك و لە نزیك كۆلێژی یاساوە ڕویدا”.

بەوتەی سەرچاوەكە”تەقینەوەكە بەهۆی كەوتنەخوارەوەی گوللـەیەكی هاوەنەوە بووە لە نزیك كۆلێژی یاسا لە ناوەڕاستی كەركوك”، ڕەتیشكردەوە جگە لە زیانی ماددەی، ڕووداوەكە هیچ قوربانییەكی لێكەوتبێتەوە.

پێشتر سەرچاوەكان لە شاری كەركوك، ئاماژەیان بە تەقینەوەیەك كرد لە نزیك كۆلێژی یاسا لە شارەكە، بەبێ‌ ئەوەی زانیاریی لەبارەی سروشتی تەقینەوەكەوە بخەنەڕوو.

بەردەوام بە لە خوێندنەوە

کوردستان