ئێمە لە تۆرە کۆمەڵایەتیەکان

کوردستان

بڕیاری نوێ‌ بۆ نمرە و تاقیكردنەوەكان دەدرێن
وەزیری پەروەردەی هەرێم ڕوونكردنەوەیەك بڵاودەكاتەوە

خەڵك- بەشی هەواڵ
وەزیری پەروەردەی حكومەتی هەرێم لەسەر قۆناغەكانی ڕاگرتنی پڕۆسەی خوێندن و درێژكردنەوەی ماوەكانی قەدەغەی هاتووچۆ و دواتر كۆتایی هێنان بە پڕۆسەی خوێندن چەند ڕوونكردنەوەیەك بڵاودەكاتەوە و ئاشكرای دەكات، كە هەفتەی داهاتوو چەند بڕیارێكی نوێ‌ دەدەن.

ئالان حەمەسەعید، وەزیری پەروەردەی هەرێم لە ڕوونكردنەوەكەدا، كە تەلەفزیۆنی پەروەردەیی بڵاویكردۆتەوە، ئاماژەی بەوەكردووە، پێویستمان بەوە هەیە لە سەرەتای هەفتەی ئاییندە ئەنجومەنی وەزارەتمان، ئەگەر دۆخی تەندروستی ڕێگابدات بەڕێوبەری پەروەردەی قەزاكان، رێنمایی ورد بە كۆی گشتی بابەتەكان دەربچوێنین و دیراسەی ئەوە بكەین بۆ بەرژەوەندی مامۆستایان و قوتابیان.

بڕیارەكانیش تایبەت دەبن بە(چۆن سیستمی ئی ـ پەروەدەیان بۆ كارابكەینەوە؟، چۆن مامەڵە لەگەڵ نمرەی تراز (درجە حرجە) بكەن؟، ئایا بریار بدەین ئەو قوتابیانەی كە سوودیان لەو بڕیارە وەرنەگرتووە چۆن بتوانن تاقیكردنەوەی خولی دووەم بكەن؟، ئایا لە وەرزی یەكەم تاقیكردنەوە بكەن یان لەو وانانەی كە لەوەرزی دووەم خوێندوویانە و خۆیان بۆ تاقیكردنەوەكان ئامادەكردبوو؟، ئایا عبور و بڕیار بۆ بەدیهێنانی دادپەروەری بۆ قوتابیان بۆ خولی دووەمیش ئەژمار بكرێت باشتر نییە؟، یان چۆن لە هەندێك حاڵەت وا بگونجێنرێت قوتابی كە سوودی لە عبور وەرنەگرت سوود لە بڕیار وەربگرێت؟).

دەقی ڕوونكردنەوەكەی وەزیری پەروەردە:

سەلامەتی مامۆستایان و قوتابیان
لەمەودوا، ناوبەناو، وتارێك دەنووسم لەسەر پرسە پەروەردەییەكان، میدیاكانیش ئازادن لە بڵاوكردنەوەی بەمەرجێك ناوەڕۆكەكەی وەك خۆی بڵاوبكەنەوە.

* پێش 25ی شوبات:

لە ۱٥ ی شوبات، بەڕێز سەرۆكی حكومەتی هەرێمی كوردستان، رایسپاردین كە پێویستە لە ئێستاوە بیر لە سەلامەتی گیانی مامۆستایان و قوتابیان بكەینەوە، ئەو ڤایرۆسە هەر دێت, بەڵام گرنگە مامۆستایان و قوتابیان بە سەلامەتی لێی دەربچن، بۆیە داوای كرد دیراسەی كەرتی پەروەردە بكەین لەو دەوڵەتانەی ڤایرۆسەكە تیایدا بڵاو بووەتەوە و رەچاوی تایبەتمەندی كوردستانیش بكەن. لەو روانگەیەوە دیراسەیەكمان ئامادەكرد بۆ لیژنەی جێبەجێكاری ڕووبەڕووبوونەوەی كۆرۆنا كە 22ی شوبات، بە سەرپەرشتی بەڕێز وەزیری ناوخۆ كۆبوونەوەمان ئەنجام دا، لەوێ بڕیاردرا كە ئەو پێشنیارە لە كۆبوونەوەی 25ی شوباتی ئەنجومەنی وەزیران بخرێتەڕوو.

كۆبوونەوە هاوڕا بوو لەبارەی ئەوەی لە 26ی شوبات سەرجەم ناوەندەكانی خوێندنی وەزارەتمان بكرێتە پشوو لە چوارچێوەی سیاسەتی خۆپارێزیی لە ڤایرۆسی كۆرۆنا، پاشان لە 1ی ئادار یەكەمین حاڵەتی كۆرۆنا تۆماركرا لە كوردستان، كە بەخۆشحاڵییەوە هەنگاوەكانی حكومەت لەو بارەیەوە هەنگاوی پێشوەختەو هەستكردن بوو بە بەرپرسیارێتی .

* پاش 25ی شوبات:

پاش ئەو رێككەوتە، وەزارەت چوار پلانی قۆناغبەندی ئامادەكرد بۆ كۆبوونەوەی لیژنەی باڵای وەزاری كە لە 4ی ئادار بەسەرپەرشتی بەڕێز سەرۆكی حكومەت ئەنجامدرا. پلانەكان قۆناغبەندی بوون بۆ:

24ی ئادار، 1ی نیسان، ۱٥ی نیسان، ۲ی ئایار. ئەنجومەنی وەزیران و لیژنەی باڵای وەزاری كە كۆبوونەوەیەكیان بەسەرپەرشتی بەڕێز جێگری سەرۆكی حكومەت بوو، بەگوێرەی قۆناغبەندی تاووتوێی پرسەكانمان دەكرد. لەو ساتانەش سەرقاڵ بووین بە دوو ئەركی گرنگی دیكە كە بتوانین خزمەت بكەین بە قوتابیان و خوێندكارانی كوردستان، ئەوانیش دروستكردنی پلاتفۆرمێكی پەروەردەیی گشتگیر بوو بە ناوی قوتابخانەی ئەلیكترۆنی، وێڕای دۆخی كەرەنتینە، لە 11 رۆژی یەكەمی پرۆسەكە زیاتر لە 750 هەزار قوتابی ئەكاونتەكانیان ئاكتیڤ كرد و بینەری وانەكانیان بوون، دووەمیان بریتی بوو لە بە ئاسمانیكردنی كەناڵی پەروەردەیی، كە ئەمەش سوودێكی زۆری بۆ قوتابیان و خوێندكاران هەیە.

كۆبوونەوەی 5ی ئایاری ئەنجومەنی وەزیران:

لەو كۆبوونەوەیە پاش دیراسەكردنی بابەتە پەروەردەییەكان بڕیاردرا دەسەڵات بدرێتە وەزارەتی پەروەردە كە لە 1ی حوزەیران تاقیكردنەوەكان ئەنجام بدرێن، هەڵسەنگاندنی تەندروستی وابوو كە ئێمە ناتوانین قوتابخانەكان بۆ خوێندن بكەینەوە، بەڵام دەتوانین بۆ ئەنجامدانی تاقیكردنەوە نێوانی قوتابیان و خوێندكاران هەبێت تا دوو مەتر, بەڵام خوێندن ئەو شێوازەی بەسەردا جێبەجێ ناكرێت، ئەوكاتە كە ئەم بریارە درا ژمارەی تووشبووان زیادی نەكردبوو، چەند رۆژێك بوو چەندین شار و شارۆچكەی كوردستان هیچ حاڵەتێكی تیا تۆمار نەكرابوو.

زیادبوونی ژمارەی تووشبوان بە كۆرۆنا :

لەماوەیەكی كەمدا ژمارەی تووشبووان بەشێوازێكی دراماتیكی لە زیادبوون دابوو، لەگەڵ بەڕێز وەزیری تەندروستی قسەمان كرد، كە ئێمە تەنها 11 رۆژمان ماو بۆ تاقیكردنەوەكان، ئایا هەڵسەنگاندنی تەندروستی ڕێگا دەدات ئێمە زیاتر لە یەك ملیۆن و حەوت سەد و پەنجا هەزار قوتابی ببەینەوە بۆ ناوەندەكانی خوێندن بۆ تاقیكردنەوە، بەڕێز وەزیری تەندروستی داوای كرد دوو رۆژیان لەبەردەست بێت بۆ ئەوەی هەڵسەنگاندنێكی ورد و یەكلاكەرەوە پێشكەش بكەن و لەگەڵ بەڕێوبەرانی گشتی تەندروستی و تیمی پەتاناسی وەزارەت و رێكخراوی WHO راوێژ بكەن، پاش وەرگرتنەوەی وەڵام لە 21 ی ئایار و پێشكەشكردنی ڕای وەزارەتی تەندروستی چوار بژاردەمان خستە بەردەم بەڕێزان: سەرۆك وەزیران و جێگر و ئەندامانی ئەنجومەنی وەزیران، سەرەنجام، پاش رەزامەند بوون، ئەو بڕیارەماندا كە لە شەوی 23ی ئایار لە ڕێگای میدیاكانەوە راگەیەندرا .

كۆبوونەوەی ئەنجومەنی وەزارەت:

ئەو فەرمانە وەزارییەی كە دەرچوێنرا بەرەزامەندی ئەنجومەنی وەزیران و كۆ دەنگی ئەنجومەنی وەزارەتمان بوو، پێویستمان بەوە هەیە لە سەرەتای هەفتەی ئاییندە ئەنجومەنی وەزارەتمان، ئەگەر دۆخی تەندروستی ڕێگابدات بەڕێوبەری پەروەردەی قەزاكان، رێنمایی ورد بە كۆی گشتی بابەتەكان دەربچوێنین و دیراسەی ئەوە بكەین بۆ بەرژەوەندی مامۆستایان و قوتابیان:

چۆن سیستمی ئی ـ پەروەدەیان بۆ كارابكەینەوە؟

چۆن مامەڵە لەگەڵ نمرەی تراز (درجە حرجە) بكەن؟

ئایا بریار بدەین ئەو قوتابیانەی كە سوودیان لەو بڕیارە وەرنەگرتووە چۆن بتوانن تاقیكردنەوەی خولی دووەم بكەن؟

ئایا لە وەرزی یەكەم تاقیكردنەوە بكەن یان لەو وانانەی كە لەوەرزی دووەم خوێندوویانە و خۆیان بۆ تاقیكردنەوەكان ئامادەكردبوو؟

ئایا عبور و بڕیار بۆ بەدیهێنانی دادپەروەری بۆ قوتابیان بۆ خولی دووەمیش ئەژمار بكرێت باشتر نییە؟

یان چۆن لە هەندێك حاڵەت وا بگونجێنرێت قوتابی كە سوودی لە عبور وەرنەگرت سوود لە بڕیار وەربگرێت؟

پێویستمان بە دانانی بەرنامەیەك هەیە كە پرس و ڕاوێژ لەگەڵ شارەزایانیش بكرێت كە چۆن هەوڵبدەین ساڵی نوێی خوێندن، لانی كەم چوار هەفتەی سەرەتا بۆ پێداچوونەوە و خوێندنی ئەو بابەتانە دابنێین كە وانەی زۆر سەرەكین و قوتابیان و خوێندكاران پێویستە بیخوێنن و ناگونجێت بەسەرماندا تێپەڕبێت، چونكە بە نموونە قوتابیەكی قۆناغی یەكەمی بنەڕەتی هەندێك پیت و وشە و ئاماژە و بنەما سەرەكییەكانی ماتماتیك و زانستی پێویست دەبێت بۆ قۆناغەكانی ئاییندە، ئەمەش ئەرك و بەرپرسیارێتی ئێمەیە كە نابێت دۆخەكە تێپەڕێنین و لە هەمان كاتدا پێویستە بیگونجێنین لەگەڵ پلانی ساڵانەی خوێندن.

بۆ ئەمەش پێویستە میكانیزمی گونجاو شرۆڤە بكەین كە دەرئەنجام مەبەستمانە سوودی بۆ قوتابیان هەبێت. كۆی ئەم پرسانە لە كۆبوونەوەی هەفتەی داهاتووی ئەنجومەنی وەزارەت تاووتوێ دەكرێن و بڕیاریان لەبارەوە پێوەردەگیرێت. پاش تەواو بوون لەو ئەركە بەرنامە ستراتیژییەكەی وەزارەت دێتە پێش كە پێداچوونەوەی گشتگیر و قۆناغبەندە بە پرۆگرامەكانی خوێندن، بۆ ئەوەی لەوەش سەركەوتووبین پێویستە تەنها پشت بە توانایەكی سنوردار نەبەستین، بەڵكو دەبێت هەموو ئارەزوومەندان لە مامۆستایان و سەرپەرشتیاران و پسپۆران و هەموو ئەوانەی گرنكی بە كەرتی پەروەردە دەدەن بەشدار بن و هەریەكەمان لە ئاستی خۆمانەوە دەست بكەین بە هاوكاریكردنی ئەو لیژنانەی كە پێكدێن بۆ پێداچوونەوە بە پرۆگرامەكانی خوێندن، ئەمەش كاری یەك دوو رۆژ و یەك دوو مانگ نییە، بەڵكو بەگوێرەی ئەو پلانەی بۆی دانراوە پارالێل لە هەموو ئاست و قۆناغەكان ئەم كارە دەكەین، لای منیش ئەولەویەت بۆ مامۆستایانە، چونكە بەركەوتەی راستەوخۆیان لەگەڵ پرۆگرامەكان هەیە و لە هەموومان شارەزاترن.

خوای گەورە پشتیوان بێت لە ئەنجامدانی ئەركە گەورەكان سەركەوتوو دەبین، پرۆسەی پەروەردە پێویستی بە هیمەتی هەمووانە، مامۆستایان و پەروەردەكاران ساڵێكی زۆر نموونەیی و پڕ بەخششیان بەڕێكرد و ئەوەی لە توانایان بوو درێغیان نەكرد، ئەمساڵ زۆر بە گەرموگوڕیی دەستمانپێكرد، لێرەدا پێویستە بڵێم كە مامۆستایان و پەروەردكاران شایستەی ڕێز و پێزانین، ویستی هەموومان بوو خوێندن دەست پێبكەینەوە، تاقیكردنەوەكان ئەنجام بدەین، بەڵام كە لەدەرەوەی ئیرادەی ئێمە كۆرۆنا رێگربوو توانیمان هەر ئەوە بكەین، لە بیرم دێ ئەوكاتانەی بەڕێز سەرۆك وەزیران زۆر لەخەمی پرۆسەی پەروەردەبوو، بەڵام هەمیشەش دووپاتی دەكردەوە كە زانست و فێربوون بۆ خزمەت و سەلامەتی مرۆڤایەتییە نەك بۆ زیانپێگەیاندنی، مامۆستایان و قوتابیانیش ئەگەر كۆرۆنا زیانیان پێبگەیەنێت بۆ ئێمە ئەستەمە ئەو ریسكە بە ژیانیانەوە بكەین.

کوردستان

وەزارەەتی تەندروستی: ١٧ تووشبووی دیکەی کۆرۆنا گیانیان لە دەست دا

خەڵك – بەشی هەواڵ

ئەمڕۆ یەک شەممە وەزارەتی تەندروستی هەرێمی کوردستان ئاماری نوێی تایبەت بە کۆرۆنای بڵاوکردەوە.

لە ئامارەکەدا هاتووە کە ١٧ حاڵەتی نوێی مردن و ٥٤٢ تووشبووی نوێ تۆمارکراون و ١٤١ نەخۆشیش چاکبوونەتەوە.

دەقی راگەیەندراوەکەی وەزارەتی تەندروستی:

ئاماری نوێی تایبەت بە نەخۆشی ڤایرۆسی کۆرۆنای نوێ COVID19 ژمارە (١٦٥)

1. کەرەنتین: (٢٤ هاوڵاتی نوێ لە کەرەنتین)
٢٣١ هاوڵاتی لە کەرەنتینن لە ٧ شوێنی جیاواز (١١٠ سلێمانی)، (١٢١ دهۆك).

2. پشکنین: (٤١٠٤ پشکنینی نوێ)
(١٤٨١ هەولێر)، (٤٣٦ سلێمانی، ٢١٦ گەرمیان)، (١٩٣١ دهۆك)، (٤٠ هەڵەبجە)

3. تووشبوو: (٥٤٢ تووشبووی نوێ)
(٢٨٥ هەولێر)
(٥٦ سلێمانی، ٢٥ گەرمیان)
(١٦٠ دهۆك)
(١٦ هەلەبجە)
4. چاکبوون: (١٤١ چاکبوون)
(٨٦ هەولێر)
(٢٧ گەرمیان)
(٢٠ دهۆك)
(٨ هەلەبجە)

5. مردن: (١٧ مردن)
(١٠ هەولێر)
(٥ سلێمانی، ١ گەرمیان)
(١ هەلەبجە)
ئاماری گشتی:
کەڕەنتین ٢١٥٤٥ هاوڵاتی (٢١٣١٤ دەرچوو)
پشکنین ٢٢٦١٨٢ (٩٤٤٧٨ هەولێر، ٧٠٢٦٦ سلێمانی، ٥٩٣١١ دهۆك، ٢١٢٧ هەڵەبجە)
تووشبوون ١٧٠٣٩ (٦٢٠٥ هەولێر، ٩٠٩٣ سلێمانی، ١٢٠٤ دهۆك، ٥٣٧ هەڵەبجە)
چاکبوون ١٠١٤٣ (٣٥٩٧ هەولێر، ٥٦٢٠ سلێمانی، ٤٥٥ دهۆك، ٤٧١ هەڵەبجە)
لەژێر چارەسەر ٦٢٤٨ (٢٤٢٨ هەولێر، ٣٠٢٢ سلێمانی، ٧٤١ دهۆك، ٥٧ هەڵەبجە)
مردن ٦٤٨ (١٨٠ هەولێر، ٤٥١ سلێمانی، ٨ دهۆك ، ٩ هەڵەبجە)

بۆ زانیاری زیاتر سەردانی داشبۆردی حکومەتی هەرێمی کوردستان بکەن لەم لینکە (https://gov.krd/coronavirus/dashboard/).
وێڕای دەستخۆشی بۆ پزیشکان و کارمەندانی تەندروستی و هەموو تیمەکانی پزیشکی کە لە ئەرکدان، جارێکی تر داوا دەکەین هاووڵاتیان پابەندبن بە ڕێنماییەکانی تەندروستی و دورکەوتنەوە لە شوێنی قەڵەبالغ و دانانی ماسك و دەستکێش، وە لەکاتی پێویستدا پەیوەندی بکەن بە هێڵی گەرمی ژمارە (١٢٢).

وەزارەتی تەندروستی
حکومەتی هەرێمی کوردستان
٩ی ئاب ٢٠٢٠

بەردەوام بە لە خوێندنەوە

کوردستان

دیار ئیبراهیم: هاووڵاتییان دەتوانن بەم دوو ڕێکارە ئاسانە خۆیان لە کۆرۆنا بپارێزن

خەڵك – ئارام سەردار
ئەندامێكی لیژنەی باڵای بەرەنگاربوونەوەی كۆرۆنا دەڵێت ئەو ڕێكارانەی بۆ خۆپاراستن لە تووشبوون بە كۆرۆنا پێویستن كارێكی زەحمەت نین، كە گرنگترینیان بەكارهێنانی دەمامك و خۆبەدوورگرتنە لە چوونە نێو قەرەباڵغی.

دکتۆر دیار ئیبراهیم، ئەندامی لیژنەی باڵای بەرەنگاربوونەوەی كۆرۆنا لە وەزارەتی تەندروستی بە(خەڵک)ی ڕاگەیاند، ئەو دۆخەی دەیبینین لە تووشبووانی كۆرۆنا، ڕێژەیەکی نەخوازراوە، سەرچاوەی گواستنەوەی نەخۆشیەکەش لەکەسێکەوە بۆ کەسێکی تر دەبێت، تاکە ڕێگر بۆ بڵاونەبووەشی پابەندبوونی هاوڵاتیان بە ڕێنماییە سادەکانی ڕێکخراوی تەندروستییە کە لەلایەن وەزارەتیشەوە پشتڕاست کراوەتەوە و بڵاوکراونەتەوە.

دەشڵێت، زیادبوونی ژمارەی تووشبووان چاوەڕوانکراوبوو، چونکە تێکەڵاویەکی زۆر دروست بووە بەشێک لەهاوڵاتیانیش بابەتی كۆرۆنایان لەبیرخۆیان بردۆتەوە، کە هەر کەمتەرخەمیەکیش وادەکات خێراتر ڤایرۆسەکە بڵاوبێتەوە، لەبەر ئەوەی تەنها بەشێکی هاوڵاتیان بڕوایان بەنەخۆشیەکە هەیە و پابەندن، بەڵام بەشێکی زۆریان بڕوایان پێ نیە و پابەندنین ئەمەش وادەکات ژمارەکان زیاتر بێت و گوشار دروست بێت لەسەر نەخۆشخانەکانیش دروست بێت.

ڕوونیشی کردەوە، لەسەرەتای سەرهەڵدانی كۆرۆنا حکومەت و وەزارەتی تەندروستی بەڕوونی ڕایانگەیاند دامەزراوە تەندروستیەکان بەم شێوەیە نین بتوانن ژمارەیەکی زۆر بەرکەوتووان لەخۆبگرن، بوودجەیەکی ئەوتۆش نیە خزمەتی ئەو ڕێژە زۆرە بکەین.

دکتۆر دیار ئیبراهیم ئاماژەی بۆ ئەوەشکرد، ئەوکەسانەی بڕوایان بە كۆرۆنا نیە دەتوانن دۆخی تووشبووان ببینن، چونکە بەدڵنیاییەوە کەسانی نزیکی هەموو کەسێک تووشی كۆرۆنا بووە، نەمانی شوێنیش لە نەخۆشخانەکان و دابینکردنی نەخۆشخانەی تریش ئاماژەیە بۆ زۆری ژمارەی تووشبووان، لەبەر ئەوە هیچ بارگرانی نیە دەمامک ببەستی یان تێکەڵی شوێنی قەرەبالغ نەبیت یاخود لەماڵ نەچینە دەرەوە.

وتیشی، ئێمە لەکۆبوونەوەی خۆمان جەخت لەسەر ئەوەکراوەتە سەنتەر و شوێنی نوێ بکرێتەوە بۆ چارەسەری تووشبووان، بەڵام ئەمە مانای ئەوە نیە ئیمە شوێنمان هەبێت بۆ ژمارەیەکی زۆر، چونکە پێویستیان بە ئامێری تەندروستی دەبێت لەوانەش ئامێری هەناسەدانی دەستکرد کە ڕەنگە ژمارەیەکی زۆرهەبێت، بەڵام بەشی هەموو خەڵکی کوردستان ناکات ئەگەر هەمووان تووشبن، بۆیە داوا لەهەموو لایەک دەکەم لەسەرجەم چین و توێژەکان هاوڵاتیان ئاگادار بکەنەوە لە خۆپاراستنیان، چونکە ئەگەر پابەند نەبن کاریگەری دەبێت لەسەر زیادبوونی ژمارەی تووشبووان.

بەردەوام بە لە خوێندنەوە

کوردستان

جێگری لێپرسراوی پەیوەندییەکانی دەرەوەی هەرێم لەسەر پشکی یەکێتی دەستبەکاربوو

خەڵك – بەشی هەواڵ

ئەمڕۆ یەك شەممە دابان شەدەڵە لەسەر پشکی یەکێتی وەکو جێگری لێپرسراوی پەیوەندییەکانی دەرەوەی هەرێمی کوردستان دەستبەکاربوو.

بە ئامادەبوونی قوباد تاڵەبانی جێگری سەرۆکی ئەنجومەنی وەزیران و سەفین دزەیی لێپرسراوی فەرمانگەی پەیوەندییەکانی دەرەوە ڕێوڕەسمی دەستبەکاربوونی دابان شەدەڵە لە پۆستی جێگری لێپرسراوی پەیوەندییەکانی دەرەوە بەڕێوەچوو، جێگری سەرۆکی ئەنجومەنی وەزیران وێرای پیرۆزبایی لە دابان شەدەڵە، هیوای سەرکەوتنی بۆ خواست و ستایشی کار و چالاکییەکانی پێشووی کرد کە نوێنەری حکومەتی هەرێمی کوردستان بوو لە وڵاتی ئیسپانیا.

قوباد تاڵەبانی لە بەشێکی دیکەی وتەکانیدا رایگەیاند فەرمانگەی پەیوەندییەکانی دەرەوە یەکێکە لە پایە گرنگەکانی حکومەت و ڕۆڵی گرنگی بینوە لەسەر ئاستی ناوخۆ و دەرەوە و توانیویەتی ببێتە پردێکی باش بۆ پتەوکردنی پەیوەندییەکان لەگەڵ وڵاتانی دەرەوە و ئێمەش وەک سەرۆکایەتی ئەنجومەنی وەزیران پاڵپشتی هەنگاو و کارەکانیانین.

جەختیشی کردەوە یەکێک لە ئەولەویاتی حکومەتی هەرێم گرنگیدانە بە پەیوەندییە دیپلۆماسییەکان و پەرەپێدانی ئەم فەرمانگەیە و رێکخستنەوە و فراوانکردنی پەیوەندییەکانی هەرێمە لەگەڵ وڵاتانی جیهان، لەوبڕوایەداین کاک سەفین وەک لێپرسراو و کاک دابان وەک جێگر پێکەوە دەتوانن هەنگاوی باش بنێن لەوبارەیەوە.

لە ڕێوڕەسمەکەدا سەفین دزەیی لێپرسراویی فەرمانگەی پەیوەندییەکانی دەرەوە لە وتەیەکدا بەخێرهاتنی دابان شەدەڵەی کرد و ئاماژەی بەوەدا کە بەڕێزیان ئەزمونێکی باشی هەیە لە پرسی پەیوەندییەکان بۆیە گەشبینین پێکەوە بتوانین کارەکانی فەرمانگە بە باشی راپەڕێنین.

بەردەوام بە لە خوێندنەوە

کوردستان