ئێمە لە تۆرە کۆمەڵایەتیەکان

کوردستان

حزبێك پشتیوانی بۆ خۆپیشاندانی مامۆستایان و فەرمانبەران ڕاگەیاند

خەڵك – بەشی هەواڵ
ئەنجومەنی باڵای مامۆستایانی یەكگرتووی ئیسلامی كوردستان پشتیوانی بۆ خۆپیشاندانی مامۆستایان و فەمانبەرانی دهۆك و شار و شارۆچكەكانی دیكەی هەرێم ڕادەگەیەنێت و دەشڵێت: “مامۆستایان ناچارن پەنا ببنە بەر دروستكردنی فشاری مەدەنی بۆ بەدەستهێنانی مافەكانیان”.

ئەنجومەنی باڵای مامۆستایانی یەكگرتوو لەبەیاننامەیەكدا، كە وێنەیەكی دەست (خەڵك) كەوتووە ڕایگەیاندووە، مامۆستایان ناچارن پەنا ببنە بەر دروستكردنی فشاری مەدەنی بۆ بەدەستهێنانی مافەكانیان، كە كەمترین فشاری مەدەنی خۆپیشاندان و گردبوونەوەی ناڕەزایەتییە لەلایەن مامۆستایان و مووچەخۆرانەوە.

ڕاشیگەیاندووە، “بەداخەوە لەلایەن دەسەڵاتی بێ پلانی هەرێمەوە ئەوەش بە مامۆستایان ڕەوا نابینرێت و پەنا بۆ دەستگیركردن و هەڕەشە و چاوسوركردنەوە دەبرێت، ئەمەش ڕێگایەكە بۆ ئەوەی مامۆستا و فەرمانبەران چاوترسێن بكرێن و پەنا بۆ گردبوونەوە و خۆپیشاندان نەبەن”.

ئاماژەی بەوەشكردووە، پشتگیری هەر خۆپیشاندان و گردبوونەوەیەكی ناڕەزایی مەدەنیانە بۆ داواكردنی مافی مامۆستایان و مووچەخۆرانی هەرێمی كوردستان دەكەین و ئیدانەی پەنا بردن بۆ هەڕەشە و توندوتیژی بەرامبەر مامۆستایانی خۆپیشاندەر دەكەینەوە.

دەقی بەیاننامەكە:

بەیاننامەیەك لە مامۆستایانی یەكگرتووەوە
سەبارەت بە قەیرانی دواكەوتنی موچە و خەباتی مەدەنی مامۆستایان..
مامۆستایان و پەروەرشیارانی دڵسۆز..
باوكان و دایكانی رێزدار..
خەمخۆرانی پەروەردەو فێركردن لە كوردستان..
وەك هەموولایەك دەزانین كە بەهۆی بێ پلانی و نەبوونی سەلیقەی كارگێڕی و دارایی بەرپرسانەوە، بەردەوام هەرێمەكەمان دوچاری قەیران و كێشەی جۆراوجۆر دەبێتەوە، بەتایبەت كێشە و قەیرانی دارایی و دواكەوتنی بەردەوامی دابەشكردنی موچەی فەرمانبەرانی كوردستان، بەشێوەیەك لە ئێستادا كە پێنج مانگی ئەمساڵ تێپەڕ دەبێت، موچەخۆرانی هەرێم هیچ موچەیەكی ساڵی ٢٠٢٠یان وەرنەگرتووە، ئەمەش بووەتە هۆی گرفتی گەورە لەسەر ژیان و بژێوی هاوڵاتیانی كوردستان، بەتایبەت لە ئان و ساتێكدا كە بەرەو پێشوازی جەژنی پیرۆزی رەمەزان دەڕۆین و، لە هەركاتێك زیاتر هاوڵاتی پێویستی بە كڕینی پێداویستییەكانی جەژن و دڵخۆشكردنی ماڵ و منداڵی هەیە..
بەردەوامی درێژەدان بەم قەیرانانە لەم كاتەدا لە وێستگەیەكدایە كە مامۆستایان و قوتابیانیش سەرقاڵی خۆئامادەكردنن بۆ تاقیكردنەوەكانی كۆتایی وەرزی دووەم، تا بەهۆی پەتای ڤایرۆسی كۆرۆناوە ساڵی خوێندن دوچاری شكست نەبێت و كۆتایی پێ بهێنرێت، بەڵام بێگومان ئەمە بەخراپی باری دەرونی و گیرفانی بەتاڵی مامۆستا و قوتابی و كەسوكاری قوتابیانەوە ناكرێت و سەركەوتوو نابێت..
بۆیە مامۆستایان ناچارن پەنا ببنە بەر دروستكردنی فشاری مەدەنی بۆ بەدەستهێنانی مافەكانیان، كە كەمترین فشاری مەدەنی خۆپیشاندان و گردبوونەوەی ناڕەزایەتییە لەلایەن مامۆستایان و موچەخۆرانەوە، بەڵام بەداخەوە لەلایەن دەسەڵاتی بێ پلانی هەرێمەوە ئەوەش بە مامۆستایان رەوا نابینرێت و پەنا بۆ دەستگیركردن و هەڕەشە و چاوسوركردنەوە دەبرێت ، ئەمەش ڕێگایەكە بۆ ئەوەی مامۆستا و فەرمانبەران چاوترسێن بكرێن و پەنا بۆ گردبوونەوەو خۆپیشاندان نەبەن، بۆیە بەم بۆنەیەوە ئێمە سەرنج و هەڵوێستی خۆمان لەم خاڵانەدا دەخەینە ڕوو:
1- پشتگیری پرۆسەی پەروەردەو فێركردن بە ئەركی خۆمان دەزانین، بەڵام بەرپرسیارێتی لە ئەستۆی حكومەتی هەرێمە، چونكە سەركەوتنی پرۆسەكە باری دەرونی و ئاستی بژێوی دەوێ، كە بەداخەوە لە خێزانی مامۆستا و قوتابیانی كوردستانیان دابڕیوە..
2- پشتگیری هەر خۆپیشاندان و گردبوونەوەیەكی ناڕەزایی مەدەنیانە دەكەین، بۆ داواكردنی مافی مامۆستایان و موچەخۆرانی هەرێمی كوردستان..
3- پەنا بردن بۆ هەڕەشە و توندوتیژی بەرامبەر مامۆستایانی خۆپیشاندەر، بە هەموو شێوەیەك ئیدانە ئەكەین و، بە هەوڵی ترسنۆكانەی دەزانین بەرامبەر هاوڵاتی مافخوراوی كوردستان..
4- داواكارین هەرچی زووە خۆپیشاندەران و مامۆستایان ئازاد بكرێن.
5- داوا لە وەزارەتی پەروەردە دەكەین كە واقیعیانە مامەڵە لەگەڵ كۆتایی ساڵی خوێندن و ئەنجامدانی تاقیكردنەوەكاندا بكات و، هەوڵی دابینكردنی دوو موچەی مامۆستایان بدات تا بە ئاسودەیی و بێ كێشە تاقیكردنەوەكان سەركەوتوو ببن.
6- داوا لە یەكێتی مامۆستایانی كوردستان و، رێكخراو و دەزگا و كەسایەتییە پەیوەندیدارەكان دەكەین، كە سڵ نەكەنەوە لە پشتگیری داوای رەوای مامۆستایان و، دژایەتی هەر ستەم و توندوتیژییەك بكەن كە بەرامبەر مامۆستایان دەكرێت لە شوێنێكی ئەم كوردستانە بن..
لەگەڵ دوبارەی پشتگیری مامۆستایان و، پێداگری لەسەر دژایەتی ستەمی دواكەوتنی موچەو، ئازادی بۆ مامۆستایانی كارامەو دڵسۆز..
سەركەوتوو بێت خەباتی مەدەنی مامۆستایان بۆ داواكردنی مافە ڕەواكانیان و، كۆتایی بێت بە ستەمی ستەمكار و گەندەڵكاران لە كوردستان..
ئەنجومەنی باڵای مامۆستایانی یەكگرتوو
٢٠٢٠/٥/١٦
٢٣ی رەمەزانی ١٤٤١

کوردستان

ئەم هەواڵە نوێدەكرێتەوە..
خۆپیشاندانی سەرتاسەری مامۆستایان دەستیپێكرد

سلێمانی ـ نزار جەزا

ئەمڕۆ شەممە لە یەكەم رۆژی دەستپێكردنی ساڵی نوێی خوێندن لە شاری سلێمانی مامۆستایان نەچوونە هۆڵەكانی خوێندن و خۆپیشاندانیان دەستپێكرد.

پەیامنێری (خەڵك) لە شوێنی خۆپیشاندانەكەدا وتی: خۆپیشاندەران لە پێش بەڕێوەبەرایەتی پەروەردەی رۆژئاوا كۆبوونەتەوە و خۆپیشاندانیان سازكردووە و خەڵكی دیكەشیان لەگەڵدایە.

ئاماژەی بەوەشكرد خۆپیشاندەران داوای خەرجكردنی موچەكانیان دەكەن كە ماوەی چەند مانگە پێیان نەدراوە لەگەڵ دابەشكردنی موچە مانگانە لە كاتی خۆیدا.

ناڕازییەکان کە مامۆستایان ڕابەرییان دەکەن لەبەردەم بەڕێوەبەرایەتی پەروەردەی ڕۆژئاوای سلێمانی گردبوونەتەوە و دروشمی جۆراوجۆر دەڵێنەوە.

بڕیارە پاش کەمێکی دیکە بەڕێپێوان بەڕێبکەون بۆ بەردەم بینای پارێزگای سلێمانی و لەوێ بەیاننامەی خۆیان بخوێننەوە و تێیدا کۆی داواکارییەکانیان دەخەنەڕوو و هەنگاوی دواتریان ئاشکرادەکەن.

هاوكات لە شاری كەلار و كۆیەش خۆپیشاندانی مامۆستایان دەستیپێكردووە و لەبەردەم بەڕێوەبەرایەتییەكانی پەروەردەی شارەكانیاندا كۆبوونەتەوە.

هاوكات بڕیارە لە شاری هەڵەبجە و رانیەش خۆپیشاندانی مامۆستایان بەڕێوەبچێت.
زانیاری نوێتر…

بەردەوام بە لە خوێندنەوە

کوردستان

راوێژكاری ئاسایشی نەتەوەیی عێراق گەیشتە هەولێر

خەڵك- بەشی هەواڵ

راوێژكاری ئاسایشی نەتەوەیی عێراق قاسم ئەعرەجی گەیشتە هەولێر بە سەرۆكایەتی شاندێكی ئەمنی.

سەرچاوەیەك بۆ الاخباریە وتی: ئەعرەجی لەگەڵ شاندێكی ئەمنی گەیشتووەتە هەولێر.

ناوبراو لەگەڵ بەرپرسە ئەمنییەكانی هەرێمی كوردستاندا كۆدەبێتەوە.

زانیاری زیاتر لەبارەی سەردانەكە بڵاونەكراوەتەوە، بەڵام هاوكاتە لەگەڵ هەڕەشە و هۆشدارییەكانی ئەمریكا بۆ عێراق لەسەر هێرشكردنەسەر بەرژەوەندییەكانی ئەمریكا لەلایەن ملیشیا چەكدارەكانەوە.

هاوكات نێچیرڤان بارزانی سەرۆكی هەرێمی كوردستان ئامادەیی هاوكاری و پشتیوانی بۆ دابینكردنی سەقامگیری و ئاسایش لە عێراق نیشانداوە.

بەردەوام بە لە خوێندنەوە

کوردستان

بەڕێوەبەری گشتی پەروەردەی سلێمانی پشتیوانی لە خۆپیشاندانی مامۆستایان دەكات

خەڵك-بەشی هەواڵ

 

بەڕێوەبەری گشتی پەروەردەی سلێمانی ڕایدەگەیەنێت، لەگەڵ كردنەوەی دەرگای خوێندنگەكان لە سنووری پارێزگای سلێمانی، هەوڵدەدەن خۆیان لەگەڵ ڤایرۆسی كۆرۆنا ڕابهێنن و بیكەنە بەشێك لە ژیانیان.

ئەمڕۆ یەك شەممە 27-9-2020 دڵشاد عومەر بەڕێوەبەری گشتی پەروەردەی سلێمانی، لە كۆنگرەیەكی ڕۆژنامەوانی و لە یەكێك لە خوێندنگەكانی سلێمانی دەستپێكردنی پڕۆسەی خوێندنی ساڵی 2020- 2021ی بۆ خوێندكارانی پۆلی 12ی ئامادەیی و قۆناغەكانی یەك و دووی بنەڕەتی ڕاگەیاند.

ناوبراو ئاشكرایكرد، ئەمڕۆ دەستدەكرێتەوە بە پڕۆسەی نوێی خوێندن بۆ خوێندكارانی پۆلی 12ی ئامادەیی و یەك و دوو بنەڕەتی و 10ی 10ش قۆناغەكانی تر دەستپێدەكەنەوە كە ماوەی 14 ڕۆژ بەردەستە، ئەگەر سەركەوتوو بن دەتوانن قۆناغەكانی تریش بهێننەوە بۆ ناو خوێندنگەكان.

ئاماژەی بۆ ئەوەش كرد، دەبێت ڤایرۆسی كۆرۆنا بكەین بە بەشێك لە ژیانمان و ژیان ئاسایی بكەینەوە، كارو كەسابەت باش بێت، ڕەوشی ئابووری وڵات باش بێت ئاشتەوایی بەدوادادێت.

بەڕوەبەری پەروەردە پشتیوانی خۆشی بۆ ئەو مامۆستایانە دەربڕی كە ئەمرشۆ خۆپیشاندان دەكەن و وتیشی”هەوڵ دەدەین هەموو مافەكانتان بۆ جێبەجێ بكرێت و ئێمەش بەشێكین لە ئێوە، چونكە پاشەكەوت و لێبڕین ئێمەشی گرتووەتەوە”..

بەردەوام بە لە خوێندنەوە

کوردستان