ئێمە لە تۆرە کۆمەڵایەتیەکان

کوردستان

پارێزگاری هەولێر لەسەر داگیركردنی زەوی لەلایەن هاووڵاتیەكەوە ڕوونكردنەوەیەك بڵاودەكاتەوە

خەڵك – بەشی هەواڵ

پارێزگاری هەولێر ڕایدەگەیەنێت، هێرش تەیار ئەو كەسەی دەستی بەسەر زەوی ژمارەیەك هاووڵاتیەكی هەولێردا گرتووە لەلایەن پارێزگارەوە بانگكراوە دەدرێتە دادگا و دەشڵێت،”دەبێت ملكەچی یاسا بێت و ئیتر عەنتەریات و یاسا شكێنی و پیسخۆری لە كەس قبوڵ ناكرێت”.

پارێزگاری هەولێر لە ڕوونكردنەوەیەكدا، كەوێنەیەكی دەست (خەڵك) كەوتووە ڕایگەیاندووە، دوای گەیشتنی سكاڵای چەند هاووڵاتیەكی شاری هەولێر، كە كەسێك بە ناوی هێرش تەیار دەستی بەسەر زەویەكانیان داگرتووە و ناهێڵیت بەكاری بهێنن، كە بۆ دروستكردنی چەند كارگەیەك بۆیان تەرخان كراوە.

دەشڵێت ،” دوای دواداچوون دەركەوتووە هێرش تەیار لەو شوێنە ڕووبەری 66 هەزار مەتر دوجا زەوی لە ساڵی ٢٠٠٣ وەرگرتووە و لە ساڵی ٢٠١٣ گرێبەستەكەی كۆتایی هاتووە، كەچی هەر بەوە نەوەستاوە و زێدەرۆیی كردۆتە سەر ڕووبەری 111 هەزارو 900 مەتر دووجاش”.

ڕاشیگەیاندووە، دەبێت گەندەڵكاران بزانن، هەڵبەستنی بوختان و درۆ بە كەڵكیان نایەت و رێكاری یاسایی توند بەرامبەریان دەگرینە بەر، هەرچەندە زۆرینەی خەڵكی هەولێر پاشەڵ و پاشخانی پڕ لە پیسخۆری ئەمانە دەزانێت.

روونكردنەوەیەك لە نووسینگەی پارێزگاری هەولێر:
دوای گەیشتنی سكاڵای چەند هاووڵاتیەكی شاری هەولێر كە كەسێك بە ناوی هێرش تەیار دەستی بەسەر زەویەكانیان داگرتووە و ناهێڵیت بەكاری بهێنن كە بۆ دروستكردنی چەند كارگەیەك بۆیان تەرخان كراوە. پارێزگار سەرۆكایەتی شارەوانی هەولێری راسپارد بۆ بە دواداچوونی بابەتەكە و دەركەوت هێرش تەیار لەم شوێنە رووبەری ٦٦٠٠٠ مەتر دوجای لە ساڵی ٢٠٠٣ وەرگرتووە و لە ساڵی ٢٠١٣ گرێبەستەكەی كۆتایی هاتووە، كەچی هەر بەوە نەوەستاوە و زێدەرۆیی كردۆتە سەر رووبەری ١١١٩٠٠مەتر دووجا، تەنانەت تجاوزی كردۆتە سەر شەقامی گشتی بە درێژی ٣٣٠ م و بە پانی ٤٠ مەتر، هەروەها شەقامێكی دیكە بە درێژی ٢٠٠ مەترو پانی ٢٥مەتر .
بۆیە لە لایەن پارێزگاری هەولێر بە ئامادەبوونی لایەنە پەیوەندیدارەكان بانگ كرا بۆ هەڵگرتنی ئەم زێدەرۆییانە، دوای ئەوەی بەردەوام بوو لە پێداگیریكردن لەسەر داگیر كردنی موڵك و ماڵی گشتی، لە لایەن پارێزگار ئاگادار كرایەوە كە دەدرێتە دادگاو دەبێ ملكەچی یاسا بێت و ئیتر عەنتەریات و یاسا شكێنی و پیسخۆری لە كەس قبوڵ ناكرێت، هەڵساوە نووسینێكی بە زمانی تەشهیر و بوختان هۆنیتەوە و چەند پەیج و سایتێكی قین لە دڵ و دژە چاكسازیش بۆیان بڵاو كردۆتەوە.
دەبێ گەندەڵكاران بزانن، هەڵبەستنی بوختان و درۆ بە كەڵكیان نایەت و رێكاری یاسایی توند بەرامبەریان دەگرینە بەر. هەرچەندە زۆرینەی خەڵكی هەولێر پاشەڵ و پاشخانی پڕ لە پیسخۆری ئەمانە دەزانێت، بەڵام لە گەڵ ئەوەش بە پێویستمان زانی ئەم روونكردنەوەیە بڵاو بكەینەوە.
تێبینی: هەموو دیكۆمێنت و بەڵگەنامەكانی گەندەڵیەكانیان و زێدەرۆییەكانیان دراونەتە دادگا.
نووسینگەی پارێزگاری هەولێر
2020.5.14

کوردستان

هەپەگە؛لە هەفتانین و خواكورك و دێرسیم چالاكییان ئەنجامداوە و سێ سەرباز كوژرا

خەڵك – بەشی هەواڵ

ناوەندی ڕاگەیاندنی هێزەكانی پاراستنی گەل- هەپەگە ڕایدەگەیەنێت، لە هەفتانین خواكورك و دێرسیم لەگەڵ گەریلاكانی یەژاستار دژی سوپای توركیا چالاكییان ئەنجامدا.

ئەمڕۆ ناوەندی ڕاگەیاندنی هێزەكانی پاراستنی گەل-هەپەگە لە ڕاگەیەنراوێكدا بڵاویكردەوە، لە دوو ڕۆژی ڕابردوودا لە هەفتانین خواكورك و دێرسیم لەگەڵ گەریلاكانی یەژاستار دژی سوپای توركیا چالاكییان ئەنجامداوە و سێ سەرباز كوژرا.

 

دەقی ڕاگەیەنراوەكەی هەپەگە :
هەفتانین
گەریلاكانی یەژاستار لە چوارچێوەی هەنگاوی شۆڕشگێریی جەنگی هەفتانین، ڕۆژی ١٥ی ئەم مانگە كاتژمێر ٠٣:٥٠ خولەكی دوانیوەڕۆ، دژی سوپای تورك لە گردی شەهیدان چالاكیی نیشانشكێنیان ئەنجامدا، لەو چالاكییەدا سەربازێك كوژرا.

خواكورك
ڕۆژی ١٦ی ئەم مانگە كاتژمێر ٠٤:٠٠ی بەرەبەیان، هێزەكانمان لە چوارچێوەی هەنگاوی شۆڕشگێریی شەهید باگەڕ و شەهید ڕۆنیا-دا، لە گردی شەهید دەروێش دژی سوپای داگیركەری تورك چالاكییان ئەنجامدا، لە چالاكییەكەدا مۆڵگە و حەشارگەی دووژمن كرانە ئامانج، بەڵام ژمارەی كوژراو بریندارەكان ڕوون نەبووەتەوە.

دێرسیم
سوپای داگیركەری تورك لە نزیك گوندی چاكماكلی لە ناوچەی خۆزاتی دێرسیم بارەگایەك دروست دەكات، گەریلاكانی یەژاستار ڕۆژی ١٤ی ئەم مانگە كاتژمێر ٠٨:٠٠ی بەیانی دژی پاسەوانانی بارەگاكە چالاكییان ئەنجامدا، لەم چالاكییەدا دوو سەربازی دووژمن كوژران و دووی دیكەش برینداربوون، یەكینەكەمان بە سەلامەت گەڕایەوە شوێنی خۆی.

هێرشی ئاسمانیی
فڕۆكە جەنگییەكانی سوپای داگیركەری تورك، ڕۆژی ١٤ی ئەم مانگە كاتژمێر ٠١:٠٠ی بەرەبەیان ناوچەی خانتوری هەفتانین، ڕۆژی ١٥ی ئەم مانگە كاتژمێر ٠٥:٠٠ی ئێوارە ناوچەی بەكتۆریا و هەروەها ڕۆژی ١٥ی ئەم مانگەش كاتژمێر ١٠:٣٠ خولەكی شەو گردی ئامێدی لە ناوچەی ئامێدی سەربە دهۆك-یان بۆردوومانكرد.

بەردەوام بە لە خوێندنەوە

کوردستان

هەولێر؛دزێك دەستگیركرا كە ماددەی هۆشبەریشی بەكارهێناوە

خەڵك – بەشی هەواڵ
بەڕێوەبەرایەتیی پۆلیسی پارێزگای هەولێر ڕایدەگەیەنێت ، دوای كۆكردنەوەی زانیاری و بەدواداچوون كەسێكیان دەستگیركرد ، كە تۆمەتبارە بە دزینی 2 ماتۆڕسكیل، دەشڵێت،”لە ماڵەكەیدا دەست بەسەر ماددەی هۆشبەر و كەرەستەكانی بەكارهێنانی و جلوبەرگی سەربازی بە پلەی عەمید گیرا”.

بەڕێوەبەرایەتیی پۆلیسی پارێزگای هەولێر لە ڕاگەیەنراوێكدا ، كە وێنەیەكی دەست (خەڵك) كەوتووە ڕایگەیاندووە، تیمەكانمان دوای كۆكردنەوەی زانیاری و بەدواداچوون، لە ماوەی كاتژمێرێكدا لە گەڕەكی پۆلیسان كەسێكیان بە ناوی (س.ع) بە تۆمەتی دزینی 2 ماتۆڕسكیل دەستگیر كرد.

ڕاشیگەیاندووە، لە ماڵەكەیدا ماددەی هۆشبەر و كەرەستەی بەكارهێنانی ماددە هۆشبەرەكان و دەمانچەیەك و 2 ماتۆڕسكیلەكە و كۆمەڵێك فیشەك و هەندێك (جلوبەرگی سەربازی بە پلەی عەمید) دەستیان بەسەردا گیرا.

ئاماژە بۆ ئەوەشكراوە، تۆمەتباری ناوبراو بەپێی ماددە (446) لە یاسای سزادان بەند كرا و دۆسیەیەكی دیكەی سەربەخۆش لەسەر تۆمەتبار كرایەوە بەپێی ماددە (14)ی هۆشبەرەكان، لەبەر ئەوەی ماددەی هۆشبەری بەكارهێنابوو.

بەردەوام بە لە خوێندنەوە

کوردستان

تەقینەوەیەك لە كەركوك ڕویدا

 

خەڵك- بەشی هەواڵ

تەقینەوەیەك لە كەركوك ڕویدا و سەرچاوەیەكی ئەمنیش دەڵێت، ڕووداوەكە جگە لە زیانی ماددی، قوربانی لێنەكەوتۆتەوە.

دوانیوەڕۆی ئەمڕۆ پێنج شەممە، سەرچاوەیەكی ئەمنی لە شاری كەركوك ڕایگەیاند”تەقیتەوەیەك لە ناوەڕاستی شاری كەركوك و لە نزیك كۆلێژی یاساوە ڕویدا”.

بەوتەی سەرچاوەكە”تەقینەوەكە بەهۆی كەوتنەخوارەوەی گوللـەیەكی هاوەنەوە بووە لە نزیك كۆلێژی یاسا لە ناوەڕاستی كەركوك”، ڕەتیشكردەوە جگە لە زیانی ماددەی، ڕووداوەكە هیچ قوربانییەكی لێكەوتبێتەوە.

پێشتر سەرچاوەكان لە شاری كەركوك، ئاماژەیان بە تەقینەوەیەك كرد لە نزیك كۆلێژی یاسا لە شارەكە، بەبێ‌ ئەوەی زانیاریی لەبارەی سروشتی تەقینەوەكەوە بخەنەڕوو.

بەردەوام بە لە خوێندنەوە

کوردستان