ئێمە لە تۆرە کۆمەڵایەتیەکان

کوردستان

لەسەر سەندنەوەی پارێزبەندی لە پەرلەمانتاران فڕاكسیۆنی كۆمەڵ هاتە دەنگ

خەڵك – بەشی هەواڵ

فڕاكسیۆنی كۆمەڵی ئیسلامی كوردستان لە پەرلەمانی كوردستان لەسەر هەوڵی سەندنەوەی پارێزبەندی لە ئەندامێكی فڕاكسیۆنەكەیان ڕاگەیەنراوێكی بڵاوكردەوە.

فڕاكسیۆنی كۆمەڵی ئیسلامی كوردستان لە پەرلەمانی كوردستان لە ڕاگەیەنراوەكەدا ڕایگەیاندووە:” لەكاتێكدا هەرێمی كوردستان و خەڵكەكەی گیرۆدەی برسێتی و بێكاری و دەیان قەیرانی تری دروستكراو بووەتەوە و باجی سیاسەتی هەڵە و قۆرخكاریی و گەندەڵیی ٢٩ ساڵی حزبە دەسەڵاتدارەكان دەدات، لەبری مشورخواردنی خێرای حكومەت لە دۆزینەوەی چارەسەری خێرا و گونجاو، خۆی خەریككردووە بە هەوڵی سزادان و تۆڵەكردنەوە لە هەركەسێك ڕەخنەیەك بگرێت و باس لە گەندەڵیی بكات”.

فڕاكسیۆنی كۆمەڵ ئەوەشیخستووەتەڕوو:”دوایین هەوڵی سەرۆكی حكومەت لەو پێناوەدا، بەكارهێنانی دادگا و داواكاریی گشتییە بۆ ناچاركردن و بەكارهێنانی پەرلەمان بەمەبەستی هەڵگرتنی پارێزبەندیی لەسەر پەرلەمانتاری فڕاكسیۆنەكەمان سۆران عومەر سەعید”.

فڕاكسیۆنی كۆمەڵ ئاماژەی بەوەشداوە:”ڕایگشتی لەم پێشهاتە خەتەرناكە ئاگاداردەكەینەوە، داواش لە هەموو فڕاكسیۆنەكانی پەرلەمان دەكەین ڕێگەنەدەن ئەم هەوڵە سەربگرێت كە دواجار پەرلەمانی كوردستان لە بەرزترین دەسەڵاتی یاسادانان و چاودێرییەوە دەكاتە دەزگایەكی بندەستی حكومەت و بەرپرسە دەستڕۆیشتووەكانی !”.

 

دەقی ڕاگەیەنراوەكە:

بەناوی خوای بەخشندەی میهرەبان

ڕاگەیدراوێك لە فراكسیۆنی “كۆمەڵ”ـەوە

لەكاتێكدا هەرێمی كوردستان و خەڵكەكەی گیرۆدەی برسێتی و بێكاری و دەیان قەیرانی دیكەی دروستكراو بۆتەوە و باجی سیاسەتی هەڵە و قۆرخكاریی و گەندەڵیی ٢٩ ساڵی حزبە دەسەڵاتدارەكان دەدات، لەبری مشورخواردنی خێرای حكومەت لە دۆزینەوەی چارەسەری خێرا و گونجاو، خۆی خەریككردووە بە هەوڵی سزادان و تۆڵەكردنەوە لە هەركەسێك ڕەخنەیەك بگرێت و باس لە گەندەڵیی بكات .

دوایین هەوڵی سەرۆكی حكومەت لەو پێناوەدا، بەكارهێنانی دادگا و داواكاریی گشتییە بۆ ناچاركردن و بەكارهێنانی پەرلەمان بەمەبەستی هەڵگرتنی پارێزبەندیی لەسەر پەرلەمانتاری فراكسیۆنەكەمان كاك (سۆران عومەر سەعید) .

ئەمەی بەڕێز سەرۆكی حكومەتی هەرێمی كوردستان دەستی داوەتێ، پێشهاتێكی خراپ و مەترسیدارە و سەرەتایەكی تاریكە بە ئاراستەی دامەزراندنی دەسەڵاتێكی ئەمنی كە لەسایەیدا هیچ مەودایەك بۆ ئازادی دەربڕین و كاری پەرلەمانیی ناهێڵێتەوە .

ئەركی بەڕێزیان و كابینەكەی چارەسەركردنی قەیرانەكان و بژێوی و گوزەرانی خەڵكە كە بە دوو مانگیش توانای دابەشكردنی موچەیەكی نەماوە !

ئێمە چاوەڕێ بووین ئەم خولەی پەرلەمان لە خولەكانی پێشوو كاراتر بێت لە بینینی ئەرك و مومارەسەی دەسەڵاتەكانی، بەڵام بەداخەوە بەتەواو خراوەتە ژێر هەژموونی هێزێكی سیاسیی دیاریكراو و بۆتە پاشكۆی سیاسەت و ئەجێندای حكومەت و بەوهۆیەشەوە پەرلەمانتاران جگە لەوەی لە ڕۆڵی چاودێریكردن و لێپرسینەوە خراون، خەریكە وایلێدێت نەشتوانێت قسە بكات و ڕەخنە بگرێت !

ئێمە وێڕای سوپاس و پێزانینمان بۆ هەڵوێستی فراكسیۆنەكان و كەسایەتی و جەماوەری كوردستان, ڕایگشتییش لەم پێشهاتە خەتەرناكە ئاگاداردەكەینەوە، داواش لە هەموو فراكسیۆنەكانی پەرلەمان دەكەین ڕێگەنەدەن ئەم هەوڵە سەربگرێت كە دواجار پەرلەمانی كوردستان لە بەرزترین دەسەڵاتی یاسادانان و چاودێرییەوە دەكاتە دەزگایەكی بندەستی حكومەت و بەرپرسە دەستڕۆیشتووەكانی !

فراكسیۆنی كۆمەڵ
لە پەرلەمانی كوردستان
٤ ی ئایاری ٢٠٢٠
هەولێر

کوردستان

دەربەندیخان.. لە ڕووداوێكی هاتوچۆدا هاووڵاتیەك گیانی لەدەستدا و ژمارەیەكی تریش برینداربوون

خەڵك – یەحیا حبیب

لێپرسراوی ڕاگەیاندنی نەخۆشخانەی گشتی شەهید ڕەئووف بەگ ڕایگەیاند، “كەمێك بەر لە ئێستا تەرمی هاووڵاتییەكیان گەیاندە نەخۆشخانەكەمان كە بە ڕووداوی هاتوچۆ گیانی لەدەستداوە و چەند كەسێكی تریش برینداربوون”.

كەمال ئەحمەد، لێپرسراوی ڕاگەیاندنی نەخۆشخانەی گشتی شەهید ڕەئووف بەگ لە لێدوانێكیدا بە (تۆڕی میدیایی خەڵك)ی ڕاگەیاند، “كەمێك پێش ئێستا تەرمی هاووڵاتییەكیان گەیاندە نەخۆشخانەكەمان كە لە ڕووداوێكی هاتووچۆدا گیانی لەدەست دابوو”.

لێپرسراوی ڕاگەیاندنی نەخۆشخانەی گشتی شەهید ڕەئووف وتیشی، “ئەو هاووڵاتییەی گیانی لەدەستداوە ناوی (ا، ح) و تەمەنی 25 ساڵە “، دەشڵێت، “چەند بریندارێكی تر هەبووە و ڕەوانەی نەخۆشخانەی گشتی دەربەندیخان كراون”.

بەپێی زانیارییەكانی (تۆڕی میدیایی خەڵك) لە ڕێگای سۆڵەوە لە كاتی هاتنەوەی خێزانێك لە سێوسێنان بەرەو دەڤەری شارەزوور تووشی ڕووداوێكی هاتوچۆ دەبن، بەهۆیەوە هاووڵاتییەك گیانی لە دەستداوە و چەند هاووڵاتییەكی تریش بریندار بوون.

بەردەوام بە لە خوێندنەوە

کوردستان

كەلار.. لە ڕووداوێكی هاتوچۆدا كەسێك برینداربوو

خەڵك – بەشی هەواڵ

ڕاگەیاندنی هاتوچۆی گەرمیان بڵاویكردەوە،لە ڕووداوێكی هاتوچۆدا كەسێك بریندار بووە.

هاتوچۆی گەرمیان لە ڕاگەیەنراوێكدا ڕایگەیاند ئێوارەی ئەمڕۆ، لەناوشاری كەلار ڕووداوێكی پێكدادان لەنێوان ئۆتۆمبێلێكی نەناسراو و ماتۆڕسكیلێك ڕوویدا، لە ئەنجامی ڕووداوەكە لێخوڕی ماتۆڕسكیلەكە بریندار بوو.

هاتوچۆی گەرمیان ئەوەشیخستەڕوو: بریندارەكە بۆ وەرگرتنی چارەسەری پێویست ڕەوانەی نەخۆشخانەی فریاكەوتنی شەهید هەژار كراوە.

هاتوچۆی گەرمیان ئاماژەی بەوەشداوە، لە دوای ڕووداوەكە شۆفێری ئۆتۆمبێلەكە هەڵهاتووە و لێكۆڵینەوە لەچۆنیەتی ڕووداوەكە لەلایەن تیمی هاتوچۆ دەستی پێكردووە.

بەردەوام بە لە خوێندنەوە

کوردستان

بە وێنە؛ تەرمی دوو كۆچبەری كورد دۆزرانەوە

خەڵك- بەشی هەواڵ
لە چەند ڕۆژی ڕابردوودا تەرمی دوو كۆچبەری كورد لە وڵاتەكانی توركیا و یۆنان بە هاوكاری دەزگای لوتكە دۆزرانەوە، كە لە دوو ڕووداوی جیاوازدا گیانیان لەدەست دابوو.

ئاری جەلال، سەرۆكی دەزگای لوتكە بۆ كاروباری ئاوارە و پەنابەران بۆ (خەڵك) ڕایگەیاند، كە لەلایەن كەسوكاری دوو كۆچبەری كوردەوە ئاگادار كراینەوە لە گیان لەدەستدانی كورەكانیان لە توركیا و یۆنان، بۆیە دەستبەجێ نوێنەرمان (كوردە یەشار) لە وڵاتی توركیا و (شێخ حسێن حەمەساڵح) لە وڵاتی یۆنان دەستیان بە گەڕان كرد بەشوێن تەرمی ئەو دوو قوربانییەدا.

وتیشی، “لەپاش دوو شەو و دوو ڕۆژ لە گەڕان و بەدواداچوون، تەرمی (سیوان ساڵح) لەلایەن نوێنەرمانەوە لە كەناراوەكانی دەریای ئیجە دۆزرایەوە و تەرمی (شكار محەمەد)یش لەلایەن نوێنەرمانەوە لە وڵاتی یۆنان لە نزیك شاری ساڵۆنیك لە جەنگەڵێكدا دۆزرایەوە”.

جەختیشی كردەوە، بڕیار وایە لە ئایندەیەكی نزیكدا ڕاپۆرتی پزیشكی تەرمەكان ڕادەستی كەسوكاریان بكرێتەوە و بگەڕێنرێنەوە زێدی خۆیان بۆ بەخاكسپاردنیان.

ئاری جەلال ئاشكراشی كرد، سیوان ساڵح گەنجێكی تەمەن ٣٠ ساڵانە و خەڵكی سەردەشتە، شكار محەمەد تەمەنی ٣١ ساڵە و خەڵكی قەڵادزێیە.

بەردەوام بە لە خوێندنەوە

کوردستان