ئێمە لە تۆرە کۆمەڵایەتیەکان

کوردستان

“نابێ‌ بژێوی و مووچەی فەرمانبەران دوابخرێ‌”
یەكگرتوو پشتیوانی بۆ خۆپیشاندانی فەرمانبەران ڕاگەیاند

خەڵك- بەشی هەواڵ

یەكگرتووی ئیسلامی كوردستان ڕایدەگەیەنێت، بژێوی هاووڵاتیان و مووچەی فەرمانبەران ئەمڕۆ لە پێشەوەی پێداویستی و ئەركی سەرەكی حكومەتی هەرێمە و هەرگیز ڕەوا نیە دوابخرێت و دەشڵێت: “ئێمە بەگەرمی پشتگیری داواكانیان بەڕێكاری مەدەنی و دیموكراسی دەكەین”.

بەهۆی ئەوەی 50 ڕۆژە مووچەی فەرمانبەران دابەش نەكراوە، ئەمڕۆ كارمەندانی تەندروستی دەستیان بە خۆپیشاندان و بایكۆتی دەوام كرد و بڕیارە مامۆستایان و فەرمانبەرانیش لەگەڵ دەستپێكردنەوەی دەوام خۆپیشاندان ئەنجام بدەن.

بەپێی یەكگرتووی ئیسلامی كوردستان، ئەمڕۆ ئەنجوومەنی جێبەجێكردن كۆبۆتەوە و لە ڕاگەیەنراوێكی 5 خاڵیدا داوای پێانی مووچەی فەرمانبەران و دابین كردنی بژێوی هاووڵاتیان دەكات و پشتیوانی خۆی بۆ خۆپیشاندانی فەرمانبەران بۆ “داواكردنی مافەكانیان” دەردەبڕێت.

دەقی ڕاگەیەنراوەكە:
ئەمڕۆ سێ شەممە 28ی نیسانی 2020، ئەنجومەنی جێبەجێكردنی یەكگرتووی ئیسلامی كوردستان كۆبونەوەی ئاسایی خۆی ئەنجام دا بە ئامادەبوونی بەڕێزان سەرۆكی هەردوو فراكسیۆنی یەكگرتوو لە پەرلەمانی كوردستان و عێراق ، پاش تاوتوێی دۆخەكە ئەم ڕاگەیەندراوەی ڕاگەیاند:
سەرەتا وێڕای پیرۆزبایی هاتنی مانگی پیرۆزی ڕەمەزان، سوپاسی خودا دەكەین و دەستخۆشی دووبارە دەكەینەوە بۆ سەرجەم ئۆپەراسیۆنەكانی ڕوبەڕوبونەوەی پەتای (ڤایرۆسی كۆرۆنا ) كە بەخۆشحاڵیەوە قۆناغێكی سەختی تێپەڕاندوەو پشت بەخوا بەرەو كۆتای دەڕۆین..

1. بژێوی هاوڵاتیان و موچەی فەرمانبەران ئەمڕۆ لە پێشەوەی پێداویستی و ئەركی سەرەكی حكومەتی هەرێمەو هەرگیز ڕەوا نیە دوابخرێت و مامەڵەی سیاسی پێوەبكرێت..
بۆیە داواكارین حكومەتی هەرێم بەرپرسانە مامەڵەی ئەم پرسە بكات و هەرچی زووە هاوڵاتیان دڵنیا بكاتەوە لە بژێوی ماڵ و منداڵیان..

2. ڕاستە قەیرانی دارایی جیهانی گرتووەتەوە و ئێمەش بەشێكین لەو قەیرانە، بەڵام ئەوەش شاراوە نیە كە هەرێمەكەمان جیاواز لە دەوڵەتانی تر گرفتی كەڵەكەبوی زۆرەو ئەو حاڵەتەی ئەمڕۆ ئەنجامی ئەو ڕابردووە نا دروستەیە چونكە ئاشكرایە گەندەڵی و ناشەفافی متمانە ناهێڵێ و بێ متمانەیش ترسناكەو دۆخەكە بەرەو قەیرانی جۆراوجۆر دەبات..

3. داواكارین كە هەرچی زووە گرفت و كۆسپەكانی پەیوەندی هەرێم و بەغدا چارەسەر بكرێ و حكومەتی هەرێم هەوڵەكانی بەشەفافیەت چڕ بكاتەوە لە ڕێكەوتن لەگەڵ ناوەند..

4. پرسی چاكسازی ڕاستەقینە لەئەركە هەنوكەیەكانی هەرێمی كوردستانەو دەرفەتی پاشخستنی بە هیچ پاساوێك ڕەوا نیە..

5. داوای فەرمانبەران بۆ موچەكانیان مافێكی ئاسایی ڕەوایەو پێویستە حكومەتی هەرێم بەجیدی وەری بگرێت و بە عەمەلی بەدەم داواكارییەكانەوە بچێت..

لەكۆتاییدا ئێمە لە یەكگرتووی ئیسلامی كوردستان وێڕای داوای یەكڕیزی نیشتیمانی و كۆتایی هێنان بە ناكۆكی حزبی نەخوازراو، ڕایدەگەیەنین كە بژێوی و موچەی فەرمانبەران جێی فەرامۆشكردن نیەو ئێمە بەگەرمی پشتگیری داواكانیان بەڕێكاری مەدەنی و دیموكراسی دەكەین.

ئەنجومەنی جێبەجێكردنی
یەكگرتووی ئیسلامی كوردستان
28-4-2020

کوردستان

دەربەندیخان.. لە ڕووداوێكی هاتوچۆدا هاووڵاتیەك گیانی لەدەستدا و ژمارەیەكی تریش برینداربوون

خەڵك – یەحیا حبیب

لێپرسراوی ڕاگەیاندنی نەخۆشخانەی گشتی شەهید ڕەئووف بەگ ڕایگەیاند، “كەمێك بەر لە ئێستا تەرمی هاووڵاتییەكیان گەیاندە نەخۆشخانەكەمان كە بە ڕووداوی هاتوچۆ گیانی لەدەستداوە و چەند كەسێكی تریش برینداربوون”.

كەمال ئەحمەد، لێپرسراوی ڕاگەیاندنی نەخۆشخانەی گشتی شەهید ڕەئووف بەگ لە لێدوانێكیدا بە (تۆڕی میدیایی خەڵك)ی ڕاگەیاند، “كەمێك پێش ئێستا تەرمی هاووڵاتییەكیان گەیاندە نەخۆشخانەكەمان كە لە ڕووداوێكی هاتووچۆدا گیانی لەدەست دابوو”.

لێپرسراوی ڕاگەیاندنی نەخۆشخانەی گشتی شەهید ڕەئووف وتیشی، “ئەو هاووڵاتییەی گیانی لەدەستداوە ناوی (ا، ح) و تەمەنی 25 ساڵە “، دەشڵێت، “چەند بریندارێكی تر هەبووە و ڕەوانەی نەخۆشخانەی گشتی دەربەندیخان كراون”.

بەپێی زانیارییەكانی (تۆڕی میدیایی خەڵك) لە ڕێگای سۆڵەوە لە كاتی هاتنەوەی خێزانێك لە سێوسێنان بەرەو دەڤەری شارەزوور تووشی ڕووداوێكی هاتوچۆ دەبن، بەهۆیەوە هاووڵاتییەك گیانی لە دەستداوە و چەند هاووڵاتییەكی تریش بریندار بوون.

بەردەوام بە لە خوێندنەوە

کوردستان

كەلار.. لە ڕووداوێكی هاتوچۆدا كەسێك برینداربوو

خەڵك – بەشی هەواڵ

ڕاگەیاندنی هاتوچۆی گەرمیان بڵاویكردەوە،لە ڕووداوێكی هاتوچۆدا كەسێك بریندار بووە.

هاتوچۆی گەرمیان لە ڕاگەیەنراوێكدا ڕایگەیاند ئێوارەی ئەمڕۆ، لەناوشاری كەلار ڕووداوێكی پێكدادان لەنێوان ئۆتۆمبێلێكی نەناسراو و ماتۆڕسكیلێك ڕوویدا، لە ئەنجامی ڕووداوەكە لێخوڕی ماتۆڕسكیلەكە بریندار بوو.

هاتوچۆی گەرمیان ئەوەشیخستەڕوو: بریندارەكە بۆ وەرگرتنی چارەسەری پێویست ڕەوانەی نەخۆشخانەی فریاكەوتنی شەهید هەژار كراوە.

هاتوچۆی گەرمیان ئاماژەی بەوەشداوە، لە دوای ڕووداوەكە شۆفێری ئۆتۆمبێلەكە هەڵهاتووە و لێكۆڵینەوە لەچۆنیەتی ڕووداوەكە لەلایەن تیمی هاتوچۆ دەستی پێكردووە.

بەردەوام بە لە خوێندنەوە

کوردستان

بە وێنە؛ تەرمی دوو كۆچبەری كورد دۆزرانەوە

خەڵك- بەشی هەواڵ
لە چەند ڕۆژی ڕابردوودا تەرمی دوو كۆچبەری كورد لە وڵاتەكانی توركیا و یۆنان بە هاوكاری دەزگای لوتكە دۆزرانەوە، كە لە دوو ڕووداوی جیاوازدا گیانیان لەدەست دابوو.

ئاری جەلال، سەرۆكی دەزگای لوتكە بۆ كاروباری ئاوارە و پەنابەران بۆ (خەڵك) ڕایگەیاند، كە لەلایەن كەسوكاری دوو كۆچبەری كوردەوە ئاگادار كراینەوە لە گیان لەدەستدانی كورەكانیان لە توركیا و یۆنان، بۆیە دەستبەجێ نوێنەرمان (كوردە یەشار) لە وڵاتی توركیا و (شێخ حسێن حەمەساڵح) لە وڵاتی یۆنان دەستیان بە گەڕان كرد بەشوێن تەرمی ئەو دوو قوربانییەدا.

وتیشی، “لەپاش دوو شەو و دوو ڕۆژ لە گەڕان و بەدواداچوون، تەرمی (سیوان ساڵح) لەلایەن نوێنەرمانەوە لە كەناراوەكانی دەریای ئیجە دۆزرایەوە و تەرمی (شكار محەمەد)یش لەلایەن نوێنەرمانەوە لە وڵاتی یۆنان لە نزیك شاری ساڵۆنیك لە جەنگەڵێكدا دۆزرایەوە”.

جەختیشی كردەوە، بڕیار وایە لە ئایندەیەكی نزیكدا ڕاپۆرتی پزیشكی تەرمەكان ڕادەستی كەسوكاریان بكرێتەوە و بگەڕێنرێنەوە زێدی خۆیان بۆ بەخاكسپاردنیان.

ئاری جەلال ئاشكراشی كرد، سیوان ساڵح گەنجێكی تەمەن ٣٠ ساڵانە و خەڵكی سەردەشتە، شكار محەمەد تەمەنی ٣١ ساڵە و خەڵكی قەڵادزێیە.

بەردەوام بە لە خوێندنەوە

کوردستان