ئێمە لە تۆرە کۆمەڵایەتیەکان

کوردستان

‎ “هێرشەكەی سەر كوڵەجۆ، بەڵگەی بەردەوامی مەترسییەكانی داعشە لەسەر ناوچەكە”

خەڵك – بەشی هەواڵ
كۆسرەت ڕەسول عەلی، ‎سەرۆكی ئەنجوومەنی باڵای سیاسی و بەرژەوەندی ‎یەكێتیی نیشتمانیی كوردستان، لەڕاگەیەنراوێكدا ئاماژەی بەوەداوە،
هێرشەكەی شەوی ڕابردووی سەر كوڵەجۆ، بەڵگەی بەردەوامی مەترسییەكانی داعشە لەسەر ناوچەكەو پێویستە كۆمەڵگەی نێودەوڵەتی و هاوپەیمانی دژی داعش بزانن تیرۆرستان هەر كاتێك بۆیان بگونجێ هێرش دەكەن.

لە ڕاگەیەنراوێكدا، كە وێنەیەكی گەیشتووتە تۆڕی میدیایی(خەڵك)، وێڕای دەربڕینی هاوخەمی بۆ لەدەستدانی دوو پێشمەرگەی كوردستان، كۆسرەت ڕەسول عەلی، ئەوە دەخاتەڕوو، كە داعش هێشتا مەترسییەكانی لەسەر ناوچەكە ماوە.

دەقی ڕاگەیەنراوەكە

كۆسرەت ڕەسول عەلی هاوخەمی و پرسە ئاراستەی شەهیدانی كوڵەجۆ دەكات

‎بەڕێزان خانەوادەی شەهیدان سوركێو ڕەشید و ئیسماعیل فارس

‎بەداخەوە دوێنێ شەو لە هێرشێكی تاریكپەرستان و تیرۆرستانی داعش بۆ سەر ناوچەی كوڵەجۆ لە گەرمیانی قوربانیدان و لانكەی ئەنفال و قارەمانان، هەریەك لە كاكە سوركێو ڕەشید و ئیسماعیل فارس لە بەرەنگارییەكی قارەمانانە دژی هێرشەكەی داعش شەهید بوون و بەگیان و ژیانی خۆیان، كوردستانیان پاراست و شكستیان بە هێرشی تیرۆرستان هێنا.
‎هاوخەمی قوڵی خۆم بۆ شەهیدبوونی هەردوو پێشمەرگە قارەمانەكە دەردەبڕم، هاوبەشی خەمتانم و هیواخوازم خوای گەورە سەبووری هەموومان بداو شەهیدانیش جێگایان بەهەشتی بەرین بێ.
‎دووبارە پرسەو سەرەخۆشی و هاوخەمی خۆم دەردەبڕم و دووپاتی دەكەمەوە تا كوردستان پێشمەرگەی قارەمانی وەك شەهید ئیسماعیل و شەهید سوركێوی هەبێ پارێزراوین و تیرۆرستان بە مەرامی گڵاویان ناگەن، هێرشەكەی دوێنێ شەویش بەڵگەی بەردەوامی مەترسییەكانی داعشە لەسەر ناوچەكەو پێویستە كۆمەڵگای نێودەوڵەتی و هاوپەیمانی دژی داعش بزانن تیرۆرستان هەر كاتێك بۆیان بگونجێ هێرش دەكەن.

‎كۆسرەت ڕەسول عەلی
‎سەرۆكی ئەنجومەنی باڵای سیاسی و بەرژەوەندی
‎یەكێتیی نیشتمانیی كوردستان

کوردستان

كارەبای سلێمانی چەند گەڕەكێك لە بەستنی پێوەری زیرەك ئاگادار دەكاتەوە

خەڵك-بەشی هەواڵ

 

بەڕێوەبەرایەتی گشتی كارەبای سلێمانی ڕایدەگەیەنێت، لەگەڵ دەستپێكردنی قۆناغی دووەمی بەستنی پێوەری زیرەك، كە بریتیە لە ناساندنی پێوەرەكە بە ماڵەكە (Linking) لە سنووری پارێزگای سلێمانی، بە تایبەتی گەڕەكەكانی بەكرەجۆ، سەرچنار، شەهیدانی سەرچنار، گردی سەرچنار، داوا لە دانیشوانی ئەو‌ گەڕە‌كانە دەكەین، كە هاوكاری تیمەكان بن بە پێدانی (پسوڵەی كارەبا)ی ماڵەكەیان و ئاسانكاریان بۆ بكەن تا پڕۆسە‌كە ئەنجام دەدەن، ئەوەش تەنیا بۆ ناساندن و كاركردنی پێوەرەكەیە.

بەڕێوەبەرایەتی گشتی كارەبای سلێمانی لە ڕاگەیەنراوێكدا ئاماژە بۆ ئەوە دەكات، دڵنیاین هاووڵاتیان لەبەستنی پێوەرەكە هاوكاربوون و لەمەشدا هاوكاریان دە‌بن، چونكە ئەو‌ پڕۆژەیە یەكێكە لە پڕۆژە گرنگ و ستراتیژییەكان بۆ چارەسەركردنی كێشەی كارەبا لە كوردستان.

بەردەوام بە لە خوێندنەوە

کوردستان

(خەڵك) مەترسییەكانی هەڵبژاردنەكانی داهاتووی عیراق لە كەركوك ئاشكرا دەكات

خەڵك-تەنیا هەورامی

بەرپرسی مەڵبەندی كەركوكی بزوتنەوەی ئیسلامی ڕٍایدەگەیەنێت، لە پەڕلەمانی عیراق پیلانێكی زۆر گەورە بەڕێوەیە دژی كورد.

حەسەن شیخانی بەرپرسی مەڵبەندی كەركوكی بزوتنەوەی ئیسلامی بە (خەڵك)ی ڕاگەیاند، ئێستا لە بەغدا نەیارانی كورد لە بەغدا بە دوو ڕیتم كار دەكەن، یەكەم پشێوێ لەناوچە دابڕاوەكان و چۆڵكردنی كوردنیشینان لەو ناوچانە، دووەم بەناوی هەمواركردنەوەی دەستور دەیانەوێ دەسەڵاتەكانی هەرێم كەم بكەنەوە و لەمانە مەترسیدارتر هەمواركردنەوەی یاسای هەڵبژاردنە.
وتیشی”بیرمان نەچێت كورد لە كاتی نووسینەوەی ڕەشنووسی دەستووردا لەوپەری هێزدا بوو، توانی هەندێك لە مەرجە چارەنووسازەكانی گەلەكەمان بچەسپێنن لە دەستوری عیراقدا، دیارە هەمواركردنەوەی دەستور ویستی پێكهاتەی عەرەبە بەتایبەت و توركمان كەمتر بەمەبەستی كەمكردنەوەی كورسیەكانی كوردە لە پارێزگای كەركوك و ناوچە دابڕینراوەكان”.

ئاماژەی بۆ ئەوەش كرد، ئەوان مەبەستیانە هەر پارێزگایەك بكرێتە چەند بازنەیەك بۆ دابەشبوونی دەنگەكانی كورد، لای هەموومان ئاشكرایە لەو هەڵبژاردنانەی كە عیراق یەك بازنەیی یان بازنەیەكی داخراو بوو، كورد زۆرترین كورسی بەدەستهێنا بۆ ئەنجومەنی نوێنەرانی عیراق، لەكاتی هەمواركردنەوەی یەكەمی هەڵبژاردنەكاندا كە سیستمی یەك بازنەیی بوو، كورسیەكانی ناوچە دابڕاوەكان زۆر كەمی كرد، بۆیە پەنا دەبەن بۆ سەدەها پسپۆری بیانی و ناوەوە بۆ هەمواركردنەوەكەی دەستوور.
ڕوونیشیكردەوە، ئەگەر كورد یەكڕیز نەبێت لە پەڕلەمانی عیراق، پیلانێكی زۆر گەورە بەڕێوەیە لە دژی كورد بۆ ناوچە دابرێنراوەكان، ئەگەر فراكسیۆنە كوردییەكان یەك هەڵوێست نەبن بۆ وەستانەوە دژی و ڕێپێوانی جەماوەری نەكرێ وەك ساڵی ٢٠٠٨ كەنزیكەی ٢٨ شەهیدمان دا بەیاسا و دەستور نیوەی خاكی كوردستان دەدۆرێنین.
ئاشكراشیكرد، پێشبینی دەكرێت كورسییەكانی كورد لە كەركوك هەشت كورسین لە كۆی دوانزە كورسی، دادەبەزێت بۆ دوو یان سێ كورسی، ئەم كارە وردكاری زۆری تێدا كراوە بە شێوازێك ڕۆژێك دێت كورد خۆی داوا دەكات ماددەی ١٤٠ جێبەجێنەكرێ .

شێخانی ڕاشیگەیاند، ئەم پڕۆژە یاسایە لەلایەن سەرۆكایەتی كۆمارەوە پێشنیاز كراوە چۆن دكتۆر بەرهەم واژووی لەسەر كردووە ڕەوانەی كۆمسیۆنی هەڵبژاردنەكان كراوە و ئەوانیش بە دەستكاریەوە ڕەوانەی پەڕلەمانی عیراقی دەكەن بۆ دەنگدان لەسەری و پەسەندكردنی، بەڵام ئەو ڕاویژكارە كوردانەی سەرۆك كۆمار هیچ یاداشتێكیان نەنووسیوە بۆ سەرۆك كۆمار لەسەر مەترسییەكانی ئەم یاسایە یان هەر نەیانخوێندوەتەوە.

حەسەن شیخانی بەرپرسی مەڵبەندی كەركوكی بزوتنەوەی ئیسلامی

حەسەن شیخانی بەرپرسی مەڵبەندی كەركوكی بزوتنەوەی ئیسلامی

بەردەوام بە لە خوێندنەوە

کوردستان

“ڕاگەیاندنی قەدەغەی هاتوچۆ لە هەولێر ئەگەرێكی دوورە”

خەڵك-بەشی هەواڵ

قائیمقامی هەولێر ڕایدەگەیەنێت، ئەمڕۆ دەوام لە فەرمانگەكانی حكومەتی هەرێمی كوردستان ئاساییە.

نەبەز عەبدولحەمید قائیمقامی قەزای ناوەندی هەولێر لە لێدوانێكی ڕۆژنامەوانیدا ڕایگەیاند، ئەمڕۆ یەك شەممە دەوام لە فەرمانگەكانی حكومەت ئاساییەو ڕاگەیاندنی قەدەغەی هاتوچۆش ئەگەرێكی دوورە.

وتیشی”ئەگەر هاووڵاتیان پابەندنەبن، ناچاردەبین ڕێكارەكان توندتر بكەینەوە، كە ئەگەری قەدەغەی هەیە هاتوچۆ وەك بژاردە بەكاربێنین”.

ئەمەش لەكاتێكدایە، لە چەند ڕۆژی ڕابردوودا ژمارەی تووشبووانی ڤایرۆسی كۆرۆنا لە پارێزگای هەولێر بەڕێژیەیەكی بەرچاو زیادی كرد و بەو هۆیەشەوە تاقیكردنەوەكانی خولی دووەمی پۆلە ناكۆتاكان دواخرا.

بەردەوام بە لە خوێندنەوە

کوردستان