ئێمە لە تۆرە کۆمەڵایەتیەکان

کوردستان

پارێزەی ڕاوێژكار و ڕاوێژكاری یاسایی گروپی كۆمپانیاكانی بەڕێز پڕۆژەیاسایەكی پێشنیاركراو تایبەت بە دۆخی كرێنشینان ئامادەدەكات

خەڵك – بەشی هەواڵ

بەرهەم ڕەئووف پارێزەی ڕاوێژكار و ڕاوێژكاری یاسایی گروپی كۆمپانیاكانی بەڕێز پڕۆژەیاسایەكی پێشنیاركراو تایبەت بە دۆخی كرێنشینان ئامادەدەكات و پێشكەشی ئەنجومەنی وەزیرانی هەرێم و سەرجەم فڕاكسیۆنەكانی پەرلەمانی كوردستانی دەكات.

 

دەقی بڕۆژە یاساكە:

پرۆژە یاسایەكی پێشنیاركراو تایبەت بە دۆخی كرێنشینان كە ئامادەكراوە لە لایەن پارێزەری راوێژكار(بەرهەم رۆوف علی)

بەرێزان/

-ئەنجومەنی وەزیرانی حكومەتی هەرێمی كوردستان
-سەرجەم فڕاكسیۆنەكانی پەرلەمانی كوردستان

پڕۆژە یاسایەكی پێشنیاركراو تایبەت بە كرێنشینان بەهۆی ئەم دۆخە لە ناكاوەی كە هەرێمی كوردستانی پێدا تێپەڕدەبێت بەهۆی بڵاوبوونەوەی ڤایرۆسی كۆرۆناوە.

ناوی پڕۆژە یاسای پێشنیاركراو:
پڕۆژە یاسای ڕەچاوكردنی دۆخی كرێنشینان بەهۆی بڵاوبوونەوەی ڤایرۆسی كۆرۆنا

ماددەی یەكەم/ كات و چوارچێوەی جێبەجێكردنی یاساكە (سریان و مدة هذا القانون):
أ/ كار بەم یاسایە دەكرێت لە ڕێكەوتی (١٥/٣/٢٠٢٠) تا ڕۆژی كۆتایی هاتنی ئەم دۆخە لەناكاوە و ڕاگەیاندنی كۆتایی هاتنی دۆخەكە لەلایەن حكومەتی هەرێمی كوردستانەوە.
ب/ ئەم یاسایە ئەو ماڵە بەكرێدراوانە وەك (دوكان، ماركێت، مۆڵ، شوێنە بازرگانییەكان بە گشتی) ناگرێتەوە كە سوودی لێ بینراوە وە بەدرێژایی ئەم دۆخە بەكارهێنراون.

ماددەی دووەم/ تایبەت بە ئەو خانووبەرانەی كە بۆ مەبەستی نیشتەجێبوون بەكرێدراون كرێچی تەنها لەسەدا پەنجا (%50) كرێی بەكرێدراوەكە دەداتە خاوەن موڵك لەسەر بنەمای ئەو كرێیەی كە لە پێشووتردا پێی داوە.

ماددەی سێهەم/ تایبەت بەو خانووبەرانەی كە بۆ مەبەستی غەیری نیشتەجێبوون بەكرێدراون ئەوا كرێچی تەنها ڕێژەی (%30) لەسەدا سی كۆی كرێكە دەداتە خاوەن موڵك، ئەمەش تەنها ئەو دوكان و شوێنە بازرگانییانە دەگرێتەوە كە لە ماوەی (قەدەغەكردنی هاتوچۆ) و بارودۆخی ڕووبەڕووبونەوەی ڤایرۆسی كۆرۆنا نەیانتوانیوە سوود لە بەكرێدراوەكە وەربگرن وە شوێنەكانیان داخراوە.

ماددەی چوارەم/ ئەو كرێیەی لەلایەن كرێچییەوە دەدرێت بە خاوەن موڵك بە درێژایی بەردەوامی ئەم دۆخە بە كرێی تەواوەتی دادەنرێت تا دۆخەكە كۆتایی پێ دێت وەك لە ماددەی یەكەمدا باسكراوە.

ماددەی پێنجەم/ بەمەبەستی جێبەجێكردنی ماددەی سێهەمی ئەم یاسایە لیژنەیەك پێك دەهێنرێت بە بڕیاری سەرۆكی یەكە كارگێرییەكان بەمەبەستی جیاكردنەوەی ئەو بەكرێدراوانەی كە لەم دۆخەدا نەیانتوانیوە سوود ببینن لە بەكرێدراوەكانیان كە ئەم یاسایە دەیانگرێتەوە.

ماددەی شەشەم/ ئەم یاسایە هەموو ئەو موڵك و ماڵانەش دەگرێتەوە كە هاووڵاتیان لەوەزارەت و فەرمانگەكانی حكومەتیان بەكرێگرتووە.

ماددەی حەوتەم/ پێویستە لەسەر لایەنە پەیوەندیدارەكانی حكومەت چاوپۆشی لە باجی خانووبەرە و دەرامەتی ئەو موڵك و ماڵانە بكەن كە بەندەكانی ئەم یاسایە دەیگرێتەوە بۆ ماوەیەك كە كەمتر نەبێت لە شەش مانگ بەڕەچاوكردنی دۆخەكە.

ماددەی هەشتەم/ ئەم یاسایە یاسایەكی كاتییە و كاركردن پێی كۆتایی دێت بە تێپەڕبوونی ئەم دۆخەی كە هەرێمی كوردستان پیایدا تێدەپەڕێت.

ماددەی نۆیەم/ كار بەهیچ بڕیار و دەقێكی یاسایی و ڕێككەوتنێك ناكرێت كە پێچەوانەی دەقەكانی ئەم یاسایە بن.

ماددەی دەیەم/ پێویستە لەسەر لایەنە پەیوەندیدارەكان دەقەكانی ئەم یاسایە جێبەجێ بكەن.

هۆكارەكانی دەرچوواندنی یاساكە:

بەمەبەستی ڕەچاوكردنی ئەم دۆخەی كە هەرێمەكەمانی پێدا تێپەڕ دەبێت بەهۆی بڵاوبوونەوەی ڤایرۆسی كۆرۆنا و كەمی داهاتی كرێنشینان بە گشتی و سوودمەند نەبوونی زۆرێك لە كرێنشینان لە شوێنەكانیان بەهۆی داخستنیانەوە لە بەرئەوەی بنەماكانی عەدالەت و دۆخی لەناكاو وا دەخوازن ئەم یاسایە دەركرا.

کوردستان

هەرێمی كوردستان هەل بۆ وەبەرهێنەرە ئیسپانییەكان دەڕەخسێنێت

خەڵك- بەشی هەواڵ

ئەمڕۆ نێچیرڤان بارزانی سەرۆكی هەرێمی كوردستان لەگەڵ باڵیۆزی ئیسپانیا لە عێراق خوان خوسیە ئیسكوبار و شاندێكی بازرگانیدا كۆبووەوە.

بەپێی راگەیەندراوی سەرۆكایەتی هەێمی كوردستان، نێچیرڤان بارزانی جەختیكردووە لەسەر پەرەدان بە پەیوەندییەكانی هەرێمی كوردستان و ئیسپانیا بە تایبەت لەلایەنی ئابووری و بازرگانییەوە.

وتیشی: هەرێمی كوردستان ئامادەیە بۆ پێشكەشكردنی سەرجەم پشتیوانی و كارئاسانی كەرتی تایبەت و وەبەرهێنەرانی ئیسپانی بۆ رەخساندنی هەلی كار و وەبەرهێنان لە هەرێم و بەشداریكردن لە كەرتی ئابووری لە كوردستان.

هەردوولایەن تاوتوێی رەوشی گشتی ناوچەكە، پرۆسەی سیاسی عێراق، پەیوەندییەكانی هەرێم و بەغدا و چارەسەركردنی كێشەكانیان، ڤایرۆسی كۆرۆنا و مەترسییەكانی تیرۆر و دۆسێ گرنگەكانی دیكەیان كرد.

بەردەوام بە لە خوێندنەوە

کوردستان

ئامادەكاری بۆ وەرزی نوێی كۆرۆنا و پەتا دەكرێت

خەڵك-ئارام سەردار

بەڕێوەبەری گشتی دیوانی وەزارەتی تەندروستی ڕایدەگەیەنێت، ئامادەكاری كراوە بۆ ئەم وەرزە، چونكە پێشبینی دەكرێت ژمارەی تووشبووان زیاتر بێت و تێكەڵ بێت لەگەڵ ئەنفلۆنزای وەرزی، بۆیە پێویستە هاوڵاتیان پابەندی ڕێنماییەكان بن.

خاڵس قادر، بەڕێوەبەری گشتی دیوانی وەزارەتی تەندروستی لەبارەی ئەگەرەكانی زیاتربوونی ژمارەی تووشبووانی كۆڕۆنا بە(خەڵك)ی ڕاگەیاند، تاوەكو ئێستا كۆڕۆنا لەكوردستان لەبڵاوبوونەوەی بەردەوامدایە، بەڵام لەپارێزگایەك بۆ پارێزگایەكی تر جیاوازە ئەگەر بەراوردی بكەین لەگەڵ هەفتەی ڕابردوو لەدهۆك زۆرترین حاڵەت تۆمار دەكرێت، هەولێر كەم بۆتەوە و لەسلێمانیش ماوەیەكی زۆرە كەم بۆتەوە دوای ئەوەی ژمارەی تووشبووان گەیشتە لوتكە، دەتوانین بڵێین بڵاوبوونەوەی كۆڕۆنا لەژێر كۆنتڕۆڵدا نییە و هۆكاری بەردەوامی بڵاوبوونەوەش بەهۆی پابەند نەبوونی هاوڵاتیان و كرانەوەی زۆر و ئاسایی بوونەوەی ژیانە، لەكاتێكدا پێشبینی دەكرا ژمارەكان كەمتر بن.

دەشڵێت: ڕاستە ئێستا ژمارەی تووشبووان كەمتر بووە لەهەندێ پارێزگا، چونكە خەڵكێكی زۆر تووشی بوون و ڕۆژانەش ژمارەی تووشبووان بەردەوامە و لەكۆی گشتی هەرێمی كوردستان ژمارەكان زۆرە و لەبڵاوبوونەوەی فراوانداین.

خاڵس قادر ڕونیشیكردەوە، كارێكی باشە خەڵك ترسی نەبێت، بەڵام پێویستە بەهۆشیاری مامەڵە بكرێت و ڕێنماییەكان جێبەجێ بكرێن، چونكە هەموو پەتایەك بڵاودەبێتەوە لایەنی ترس هەبێت خراپە، بەڵام ناشبێت بەسلبی مامەڵەبكرێت و دەمامك فڕێ بدرێت و قەرەباڵغی دروست بكەی، یان تەوقەبكرێت، بۆیە ژیان ئاسایی كردنەوە بە پابەندبوونی ڕێنماییەكانە.

باسی لەوەشکرد، هەماهەنگیمان کردوە لەگەڵ عێراق تاوەکو ڤاکسنی دژی ئەنفلۆنزای وەرزی بەردەست بێت بدرێت بەگروپە مەترسیدارەکان.

بەردەوام بە لە خوێندنەوە

ئابوری

بەگوژمەى ١٦٠ ملیۆن دینار پڕۆژەیەک لەهەولێر ئەنجامدەدرێت

هەولێر-ئارام سەردار

 

جێگری پارێزگاری هەولێر ڕایدەگەیەنێت، پڕۆژە خزمەتگوزاریەکان بەردەوامە و بەگوژمەی ١٦٠ ملیۆن دینار چەند شەقامێکی شارەدێی دارەتوو قیرتاو دەکەن.

مەسعود کاڕەش، جێگری پارێزگاری هەولێر بۆ کاروباری هونەری لەکۆنفڕانسێکی ڕۆژنامەوانیدا ڕایگەیاند، پڕۆژکان بەردەوامە لەسەرجەم سێکتەرەکانی ئاو و کارەبا و ڕێگاوبان و ئاوەڕۆ، ئەمڕۆش یەکێک لەپڕۆژەکانمان لەدارەتوو بەسەرکردەوە، کە بەهۆی نەبوونی بوودجە پڕۆژەی جووت سایدی ناو شارەدێی دارتوو وەستابوو، ئاستەنگی زۆری دروست کردبوو بۆ هاوڵاتیان، بەخۆشحاڵیەوە توانیمان بە گوژمەیەکی کەم تەواوی جووت سایدەکە قیرتاو بکرێت و هاوڵاتی سوودی لێ ببینن، کە گوژمەکەی نزیکەی ١٦٠ ملیۆن دینار بوو، دوو شەقامی تریشی لەگەڵ قیرتاو دەکەن.

دەشڵێت، لەپڕۆژەکان بەردەوام دەبن بەپێی بوودجەی بەردەست تاوەکو هاوڵاتیان سوودمەند بن لە پڕۆژەی خزمەتگوزاری ئاو وکارەبا و ڕێگاو بان لەشار و شارۆچکەکان، کۆمەڵێک پڕۆژەش لە بەرنامەدان ئەو شوێنانە قیرتاو دەکرێن کە پێویستن بەر لەوەرزی زستان.

 

سەبارەت بە کێشەی شکانی بۆڕی ئاوی ئیفرازو گرانکردنی نرخی تانکەری ئاو وتی، ئومێدمان وایە جارێکی تر ئەو بۆڕیە نەشکێت، ئەمجارەش بەهۆی گواستنەوەی بۆڕیەکە لەژێر ڕێگای گۆپاڵ وای لێهات و شکا، ئەوەی ڕوویدا ڕەنگە جارێکی تر بەم کاتە زۆرە ڕوونەداتەوە، دەشبێت نرخ بۆ تانکەرەکان دیاری بکرێت.

بەردەوام بە لە خوێندنەوە

کوردستان