ئێمە لە تۆرە کۆمەڵایەتیەکان

کوردستان

هەڤاڵ ئەبوبەکر: كۆتایی بە بەهەدەردانی خۆراك و پێداویستیەكانی ڕۆژانە بهێنن

خەڵک – بەشی هەواڵ

پارێزگاری سلێمانی لەڕێگەى پەیامێکەوە داوا لەهاوڵاتییان دەکات،  كۆتایی بە بەهەدەردانی خۆراك و پێداویستیەكانی ڕۆژانە بهێنن، ئەوەندە بەكاربهێنن كە پێویستیانە، بۆئەوەی هیچ بەش‌و ژەمەخۆراكێك زیاد لە پێویست نەبێت‌و نەكرێتە سەبەتەی خۆڵەكانەوە.

هەڤاڵ ئەبوبەکر پارێزگاری سلێمانى لەنامەیەکدا ڕایگەیاند، داواتان لێدەكەین زیاد لە پێویستی خۆتان‌و خۆراك‌و پێداویستیەكان مەكڕن، چونكە هەموو ئەمانە ئەگەری خراپبوون‌و كۆنبوون‌و بەسەرچوونیان هەیەو سەرەتایەكی ترسناك دەبن بۆ برەودان بە گیانی خۆپەرستیی‌و خوڵقاندنی قەیرانی ئابووریی.


ئاماژەى بەئەوەشدا، داوا لە ماركێت‌و دوكانەكان دەكات، زیاد لە پێویستی خۆیان‌و خواستی كڕیارەكانیان خۆراك‌و كەلوپەلی پێویست تاقت نەكەن، چونكە لە ئەگەری هەر خراپبوون‌و تێكچوونێكدا خۆیان بەرپرسیار دەبن‌و زیان بە ئاسایشی خۆراك‌و ئابووریی نیشتمانی دەگەیەنن.


هاوکات داوا لە كۆمپانیا بازرگانیەكانی خۆراك‌و پێداویستیە سەرەكیەكانیش دەكات، بەهەمان گیانی مرۆڤدۆستیی‌و نیشتمانیانەیانەوە بەردەوامبن لە دابینكردنی پێداویستیەكان‌و بە بەرنامەیەكی شیاو بەردەوامیی بە سوڕی بازرگانیی‌و ئابووریی‌و دابینكردنی پێداویستیەكان بدەن.

 

وتیشی: “هەموولا دڵنیا دەكەینەوە، كە جوڵەو ئاڵوگۆڕی بازرگانیی بەردەوامە، خۆراك‌و سوتەمەنیی‌و كاڵاو پێداویستیەكان بە قەبارەی زۆرو شیاو لەبەردەستدان، هەموویان لەژێر كۆنترۆڵی وردی چاودێری نرخ‌و جۆرو قەبارەو دابەشكردنی شیاوانەدان، بە تێپەڕاندنی ئەم دۆخە، جیهان دوچاری دۆخێكی سەختی ئابووریی‌و بازرگانیی دەبێت، بەڵام سوپاس بۆ خودا، هەرێمی كوردستان دەرفەتی ئەوەی دەبێت، كە وەك ناوچەیەكی ئارامی پاكی تەندروستیی ببێتە ناوەندێكی بازرگانیی و ئابووریی گرنگ”.

 

دەقی نامەکە:

هاونیشتمانانی خۆشەویست

پابەندیی و خۆپارێزیتان، خۆڕاگریی و خۆبەخشیتان، نیشانەی هۆشیاریی‌و دانشمەندیی‌و گیانی بەرزی بەرپرسیارێتیانە، بۆیە شایانی سوپاس ‌و ستایش‌و پێزانینێكی زۆرن، كە بەهۆی خۆڕاگریتانەوە بە پشتیوانی خوداو هیمەتی مەردان، دۆخە سەختەكان پێدەنێنە قۆناغەكانی كۆتایی.

ئەم كارەساتەی لەڕێی ئەم پەتایەوە بەسەر مرۆڤایەتیدا هاتووە، وانەی نوێ‌‌و بەبیرداهێنانەوەی ئەزمون‌و كەلتورە جوانەكانی لەگەڵ خۆیدا هێناوە، هەر لە چارەنووسی هاوبەشەوە، تا دەگاتەوە بەیەكەوە ڕووبەڕووبوونەوەو، یەكتر خۆشویستن‌و ئەزمون ئاڵوگۆڕكردن، هەوڵدان بۆ زاڵبوون لە هەموو كەس‌و پنتێكدا بۆئەوەی هەڕەشەكان جارێكیتر دووبارەنەبنەوە.

لەهەمان كاتدا ئەم دۆخە تەندروستیەی ئێستا بەسەر جیهاندا هاتووە، دۆخێكی ئابووری نوێشی لەگەڵ خۆیدا هێناوەو لە ئایندەیەكی نزیكدا دۆخێكی نوێتر دەهێنێتە كایەوە، كە پێویست دەكات سەبەتەی خۆراكیی‌و چارەسەرسازیی‌و ئاسایشی ئابووریش، بەهەمان شێوەی ئاسایشی تەندروستیی ڕێكبخەین‌و یەكبخەین.

بۆیە دڵسۆزانەو خزمەتكارانە، داوا لە هەموو ئێوەی ئازیز دەكەم، كە كۆتایی بە بەهەدەردانی خۆراك و پێداویستیەكانی ڕۆژانە بهێنن، ئەوەندە بەكاربهێنن كە پێویستیانە، بۆئەوەی هیچ بەش‌و ژەمەخۆراكێك زیاد لە پێویست نەبێت‌و نەكرێتە سەبەتەی خۆڵەكانەوە، هەروەها داواتان لێدەكەین زیاد لە پێویستی خۆتان‌و خۆراك‌و پێداویستیەكان مەكڕن، چونكە هەموو ئەمانە ئەگەری خراپبوون‌و كۆنبوون‌و بەسەرچوونیان هەیەو سەرەتایەكی ترسناك دەبن بۆ برەودان بە گیانی خۆپەرستیی‌و خوڵقاندنی قەیرانی ئابووریی.


داوا لە ماركێت‌و دوكانەكان دەكەین، زیاد لە پێویستی خۆیان‌و خواستی كڕیارەكانیان خۆراك‌و كەلوپەلی پێویست تاقت نەكەن، چونكە لە ئەگەری هەر خراپبوون‌و تێكچوونێكدا خۆیان بەرپرسیار دەبن‌و زیان بە ئاسایشی خۆراك‌و ئابووریی نیشتمانی دەگەیەنن.


داوا لە كۆمپانیا بازرگانیەكانی خۆراك‌و پێداویستیە سەرەكیەكانیش دەكەین بەهەمان گیانی مرۆڤدۆستیی‌و نیشتمانیانەیانەوە بەردەوامبن لە دابینكردنی پێداویستیەكان‌و بە بەرنامەیەكی شیاو بەردەوامیی بە سوڕی بازرگانیی‌و ئابووریی‌و دابینكردنی پێداویستیەكان بدەن وەك لە كۆبوونەوەماندا لەگەڵ بەڕێزتاندا دیاریمانكردووە.


هەموولا دڵنیا دەكەینەوە، كە جوڵەو ئاڵوگۆڕی بازرگانیی بەردەوامە، خۆراك‌و سوتەمەنیی‌و كاڵاو پێداویستیەكان بە قەبارەی زۆرو شیاو لەبەردەستدان، هەموویان لەژێر كۆنترۆڵی وردی چاودێری نرخ‌و جۆرو قەبارەو دابەشكردنی شیاوانەدان، بە تێپەڕاندنی ئەم دۆخە، جیهان دوچاری دۆخێكی سەختی ئابووریی‌و بازرگانیی دەبێت، بەڵام سوپاس بۆ خودا، هەرێمی كوردستان دەرفەتی ئەوەی دەبێت، كە وەك ناوچەیەكی ئارامی پاكی تەندروستیی ببێتە ناوەندێكی بازرگانیی و ئابووریی گرنگ.


بۆیە خۆپارێزیی‌و پابەندیتان، بەهێزكردنی كەلتوری دەستپێوەگرتن‌و بەهەدەرنەدان‌و لەخۆگرتنەوە، ئەوەندەی تر زەمینەی ئەو دەرفەتە نێودەوڵەتیانە، لە ناوخۆدا پتەوو بەهێزو لەبار دەكات.

شادو سەربەرزو سەركەوتوو بن..

د.هەڤاڵ ئەبوبەكر
پارێزگاری سلێمانی

٢٦/ ٣/ ٢٠٢٠

ریکلام

کوردستان

بەوێنە.. بەهۆی زۆری بارانبارین نوێژەكان كۆدەكرێنەوە

خەڵك -یەحیا حبیب

بەهۆی نالەباری كەش و هەوا و زۆری بارانبارین لە شارەزوور مامۆستایانی ئاینی لە بەشێك لە مزگەوتەكانی شارۆچكەكە هەڵدەستن بە كۆكردنەوە و پێشخستنی نوێژەكانی (نیوەڕۆو عەسر) و (مەغریب و عیشا) پێكەوە.

كۆكردنەوەی نوێژەكان چییە:
كۆكردنەوەی نوێژ، بریتیە لە ئەنجامدانی دوو نوێژی (واجب) لە یەك كاتدا، ئەنجامدانی نوێژی (نیوەڕۆ و عەسر) و (مەغریب و عیشا) لە كاتی یەكێكیاندا لە بەر نەخۆشی یاخود خراپی كەش و هەوا و گەشتكردن ئەنجام دەدرێت بەڵام نوێژی بەیانی لەگەڵ هیچ نوێژێكدا كۆناكرێتەوە و دەبێت لە كاتی خۆیدا ئەنجام بدرێت.

بەڵگە لە سەر كۆكردنەوەی نوێژەكان:
عەبدوڵا بن عەباس یەكێك لە هاوەڵانی پێغەمبەری ئیسلام دەڵێت، “پێغەمبەر درودی خودای لە سەر بێت نوێژەكانی نیوەڕۆ و عەسر هەروەها مەغریب و عیشای پێكەوە ئەنجامداوە بە بێ هەبونی ترس و گەشتكردن “.

شێوەكانی كۆكردنەوەی نوێژ:

(جمع و تقدیم) هێنان و ئەنجامدانی نوێژی عەسر بۆ لای نیوەڕۆ یاخود ئەنجامدانی نوێژی عیشایە لەگەڵ نوێژی مەغریبدا.

(جمع و تأخیر) بە پێچەوانەوەیە، ئەنجامدانی نوێژەكانی نێوەڕۆ لەگەڵ عەسر و مەغریب لەگەڵ عیشادایە.

ساڵانە لەگەڵ هاتنی وەرزی پایز و زستاندا، بەهۆی زۆری بارانبارین یاخود هاتنی كڕێوەدا، مامۆستایانی ئاینی بەشێك لە شار و شارۆچكەكانی هەرێم نوێژەكان كۆدەكەنەوە و یەكێك لە سونەتەكانی پێغەمبەری ئیسلام زیندوو دەكەنەوە.

ئەمە وێڕای زۆرینەی مامۆستایانی ئاینی ئەو سونەتە زیندوو ناكەنەوە بەهۆی هەبونی هۆكارەكانی هاتوچۆ و زۆری مزگەوتەكان و نزیكیان.

No description available.No description available.No description available.

بەردەوام بە لە خوێندنەوە

کوردستان

“لەم قەیرانانەدا زامنكردنی مووچەی فەرمانبەرانی هەرێم سەرەكیتیرن پێویستیە”

خەڵك – بەشی هەواڵ

ئەندامێكی پێشووی پەڕلەمانی عیراق  ڕایدەگەیەنێت، هەرێم ئامادە نیە پرۆسەی نەوت تەسلیمی بەغدا بكات، بەغداش هەموو هەوڵەكانی خسۆتەگەڕ لە قۆناغی ئێستادا بڕێك نەوتی هەرێم لە ڕێگەی سۆمۆوە بفرۆشرێ و لە قۆناغی داهاتوودا هەموو پرۆسەكە بخاتە بندەستی خۆی.

سالار مەحمود، ئەندامی پێشووی پەڕلەمانی عیراق و چاودێری سیاسی ڕایگەیاندووە، گرێبەستە نەوتییەكانی هەرێم وای كردوە كۆمپانیاكان كۆنترۆڵی سەرچاوەی سامانی سروشتی هەرێم بكەن و لە هەر هەوڵێكی دەربازبووندا دادگاكانی بەریتانیا بەكار دێنن وەك لە ڕابردوو لەسەردەمی ئاشتی هەورامی سزای ماددی هەرێمیان دا.

ڕاشیگەیاندووە، چارەسەر ئامادەیی هەرێمە بە بەردەوامی لەبەغدا بۆ دەستەبەری شایستە داراییەكانی كوردستان بە گفتوگۆو گەیشتن بە رێكەوتن لە چوارچێوەی بودجەی ساڵی داهاتوو، لەناو ئەم فرە قەیرانانەدا زامنكردنی موچەی فەرمانبەرانی هەرێم سەرەكیتیرن پێویستیە.

بەردەوام بە لە خوێندنەوە

کوردستان

یەكەمین پاسپۆرت لە چەمچەماڵ درایە دوو تاقانەی شەهید و ئەنفالكراو

خەڵك- بەشی هەواڵ
لێپرسراوانی باڵای وەزارەتی ناوخۆی حكومەتی هەرێمی كوردستان سەردانی قەزای چەمچەماڵ یان كرد و لەرێی كردنەوەی نوسینگەی پاسپۆرتی قەزاكەوە، یەكەمین پاسپۆرتیان بەخشییە دوو تاقانەی شەهید و ئەنفالكراوی سنورەكە.

لەسەردانەكەی ئەمڕۆدا و لەمەراسیمێكدا، “رێبەر ئەحمەد” وەزیر و “چەتۆ ساڵح” بریكاری وەزارەتی ناوخۆ هاوڕێ لەگەڵ ژمارەیەك لەلێپرسراوانی حكومی پارێزگای سلێمانی، نوسینگەی پاسپۆرتی چەمچەماڵیان كردەوە و بەشەكانیان بەسەركردەوە و لەنزیكەوە لەچۆنێتی بەرێوەچوونی كاروباری ئەفسەر و كارمەندانی نوسینگەكەیان كۆڵییەوە.

دواتر و لەكۆنفرانسێكی رۆژنامەییدا، “رێبەر ئەحمەد” وەزیری ناوخۆ گرنگی كردنەوەی نوسینگەی پاسپۆرتی بۆ قەزاكە خستەروو بەتایبەت كەزیاتر لە 7500 بنەماڵەی شەهیدان لێرەن كەبەشێكی زۆریان خاوەنی چەندین كەسی ئەنفالكراون، وتیشی ئێمە هاتوین بەشێك لەو خزمەتگوزارییانەی كەحكومەت پێشكەشی هاوڵاتیانی دەكات بۆ هاوڵاتیانی ئەم سنورە بەردەست بكەین.

هەر لەكۆنفراسەكەدا، “چەتۆ ساڵح” بریكاری وەزارەتی ناوخۆ ڕایانگەیاند: خزمەتكردنی كەسوكاری شەهیدان و ئەنفالكراوان بەئەركی سەرشانی خۆمان دەزانین لەم پێناوەشدا هەنگاوەكانمان زۆری ماوە بۆ خزمەتكردن، وتیشی شەرەفمەندین كە لەناوكەس و كارەكەی خۆماندا ئەمڕۆ یەكەم پاسپۆرت دەبەخشینە دوو تاقانەی شەهید و ئەنفالكراو.

لەو مەراسیمەدا وەزیر و بریكاری وەزارەتی ناوخۆ، یەكەمین دوو پاسپۆرتی چاپكراوی نوسینگەكەیان بەخشییە دوو كوڕی تاقانە كەباوكیان شەهید و ئەنفالكراوە بەناوەكانی (ژیار ئاسۆ شەهاب، هەڤاڵ غالب محمد).

جێی باسە كردنەوەی نوسینگەی پاسپۆرتی چەمچەماڵ،‎ هەنگاوێكی تری خزمەت و كارئاسانییە بۆ كەسوكاری شەهید و ئەنفالكراوانی سنورەكە، هەموو ئەو دەسەڵاتانەش كەلەبەرێوەبەرایەتی گشتی پاسپۆرتی سلێمانی بۆ وەرگرتنی پاسپۆرت و نوێكردنەوەی ئەنجام دەدرێت، لەنوسینگەی پاسپۆرتی چەمچەماڵیش دەبێت.

دواتر وەفدەكەی وەزارەتی ناوخۆ بەسەرۆكایەتی “رێبەر ئەحمەد” و “لیوا چەتۆ ساڵح” و وەفدی هاورێیان، بەمەبەستی دابەشكردنی پێداویستی (15) فەرمانگە و بەرێوەبەرایەتی، سەردانی كۆگای نوێی پارێزگای سلێمانی بۆ هەماهەنگی قەیرانەكان كرد.

ئەم هەوڵەش دەرەنجامی سەردانە بەردەوامەكانی “چەتۆ ساڵح” بریكاری وەزارەتی ناوخۆ دێت بۆ ناوچە جیاوازەكان و بەدواداچوون بۆ داواكاری فەرمانگەكانی سەر بەوەزارەتەكەی و گه یاندنی ئه و داواكاریانه ش بۆ سەروی خۆی لە وەزیری ناوخۆو بەڕێز كاك “قوباد تاڵەبانی “جێگری سەرۆكی ئەنجومەنی وەزیران

دابین كردنی ئەم پێداویستیانەش بەمەبەستی باشتر پێشكەشكردنی خزمەتگوزارییەكان بەهاوڵاتیان و بەدەنگەوەهاتنی داواكاری و خواستی بەرێوەبەرایەتییەكان.

 

بەردەوام بە لە خوێندنەوە

کوردستان