بەڕێوەبەری گشتی كتێبخانە گشتییەكان ڕایدەگەیەنێت، لە ڕێگەی دوو پڕۆژەوە دەیانەوێت خەڵك لەگەڵ كتێب ئاشت بكەنەوە و كە كۆكردنەوەی نزیكەی 500 هەزار كتێبە كە بەخشراوە لە لایەن كەسایەتی و هاووڵاتیانەوە دەدرێتە چاكسازییەكان بە گەوران و منداڵان و ژنانەوە ، پلانی داهاتوویان پڕكردنەوەی ڕەفی كتێبخانەی ناوەندەكانی خوێندنە .
دیار وەستا عەزیز، بەڕێوەبەری گشتی كتێبخانە گشتییەكانی وەزارەتی ڕۆشنبیری لە چاوپێكەوتنێكدا لەگەڵ (خەڵك)ی ڕاگەیاند، تا پێش ساڵێك لە هەرێم 6 كتێبخانەی گشتی هەبووە، بەڵام خۆشبەختانە دوو كتێبخانەی دیكە كراوەتەوە، یەكێكیان لە زاخۆ و ئەوە دیكەیان لە ئیدارەی سۆران لە هەفتەی داهاتوو بۆ خەڵكی ئەو ناوچەیە دەكرێتەوە و 92 كتێبخانەش لە شارو شارۆچكەكان هەیە.
وتیشی،” لە وەزارەتی ڕۆشنبیری چەند پڕۆژەیەكیان دەست داوەتێ، لەوانە بە دیجیتاڵكردنی سەرجەم ئەو كتێبانەی هەیە، هەروەها ژمارەی سپاردنیان داوە بە هەندێك ناوچەكە ئەمە وا دەكات نوسەر بۆ چاپكردنی كتێبەكەی نەگاتە سلێمانی یان هەولێر، هەر لە ناوچەكەی خۆیەوە سپاردن وەردەگرێت”.
خەڵك: ئێستا لە هەرێمی كوردستان چەند كتێب لە نێو ڕەفەی كتێبخانەكان بوونی هەیە؟
بەخۆشحاڵیەوە ئەتوانم بلێم نزیك دەبینەوە لە ملیۆن كتێبی هەمەجۆر، كە ئەمە جێگەی خۆشحاڵیە و هەڵدەدەین ئەوە زیاتر بكرێت و كارمان لەسەر ئەوەشكردووە، كە ژمارەی سپاردنی نێو دەوڵەتی وەربگرین، كە ئەمە وەزیری ڕۆشنبیری كاری جدی لەسەر دەكات و بەمەش دەتوانین كتێبەكانمان لە ڕەفەی كتێبخانە جیهانییەكان دابنێن.
تیراژی كتێبەكان جێگەی خواستی ئێوەن؟
بەڵی…تیراژیان تەنها لە سەروبەندی كۆرۆنا كەمبوون ئەگەرنا ئێستا هەمووی لێی ڕازین، بە تایبەت كێتبەكانی بواری وەرزش، كە پێشتر كەم بوون ئێستا زیادی كردووە، لە كتێبخانەكان ڕەفەكانی بەشێكی باش لەو كتێبانەی تێدایە، كە پێشتر كەم بوون یان هەر نەبوون.
سلێمانی پایتەختی ڕۆشنبیریە ئێوە لای خۆتانەوە چیتان كردووە بۆ ئەوە؟
بۆ ئەوەی جەنابتان باسی دەكەن، ئێمە دوو پڕۆژەمان دەست داوەتێ یەكێكیان هەفتەی داهاتوو ئەنجامەكەی بۆ هەموو لایەك ئاشكرا دەكرێت، كە ئەویش هەڵمەتێكی كۆكردنەوەی كتێبە لەگەڵ وەزارەتی كار لەسەر خەتین، كە نزیكەی 5 هەزار كتێبمان كۆكردەوە پێشكەشی چاكسازییەكانی (گەوران و منداڵان و ژنانی ) دەكەین، كە دوو كەسایەتی و ڕێكخراوەیی كاری جدیان لەسەر كردووە.
هەروەها، كاری ئایندەمان ئەوەیە، كە چۆن بتوانین ناوەندەكانی خوێندن بە تایبەت لە ناوەندی و ئامادەییەكان ئەو كتێبخانانەی هەیانە ڕەفەكانیان پڕ بكەینەوە لەكتێب، كە نزیكەی 70%ی ناوەندەكانی خوێندن كتێبخانەی تایبەت بەخۆیان هەیە، لەگەڵ وەزارەتی پەروەردەش بۆ ئەو مەبەستە لەسەر خەتین، جگە لەوەی لە ئێستادا لە هەموو هەرێم لە كتێبخانە گشتییەكان میوانداری خوێندكاران دەكرێت، بۆ ئاشنا كردنیان بە كتێب.
كەمتەرخەمی هەیە لە ئاست ئەو بەرپرسیارێتیەی لە ئەستۆتانە ؟
بەقەدەر ئەوەی باسمان كردووە كەمتەرخەمیمان هەیە، كە لە خۆمان بێت یان لە سەروو ئێمەوە بێت، بەقەدەر ئەوەش كەموكورتیمان هەیە، كە بەنوسراوی ڕەسمی ئاڕاستەی سەروو خۆمانمان كردووە.
