ئێمە لە تۆرە کۆمەڵایەتیەکان

کوردستان

“هێزەكانی پێشمەرگە بۆ هەر ئەركێك پێیان بسپێردرێت ئامادەن”


خەڵك-بەشی هەواڵ

ئەمینداری گشتی وەزارەتی پێشمەرگە ڕایدەگەیەنێت، هێزەكانمان ئامادەیە هەركاتێك پێویست بوو بۆ ئاڵوگۆڕكردنی هێزەكانی ناوخۆ بۆ ئەوەی بەشێك لە ئەركەكان لەناو شارەكان لە ئەستۆ بگرین.

جەبار یاوەر ئەمینداری گشتی وەزارەتی پێشمەرگەی حكومەتی هەرێمی كوردستان بە دەنگی ئەمریكای ڕاگەیاند، لەدۆخی بڵاوبوونەوەی ڤایرۆسی كۆرۆنادا، وەك وەزارەتی پێشمەرگە چەندین ڕۆڵمان گێڕاوە، لەوانە دەزگای ڕاگەیاندنی پێشمەرگە بەردەوام بانگەشە بۆ ڕێنماییەكانی وەزارەتی تەندروستی دەكات بۆ وشیاركردنەوەی هێزەكانی پێشمەرگە و خەڵكی كوردستان، دامودەزگاكانی پێشمەرگە بەتایبەت دەزگای پێشمەرگەی هێزەكانی حەفتا نەخۆشخانەیەكی تایبەتی دروست كرد لەماوەیەكی پێوانەیی كە دە ڕۆژ بوو ناوییان نا نەخۆشخانەی(ئاسا) كە ئێستا ئەو نەخۆشخانەیە لەكاردایە و ئەو كەسانەی گرتووەتەخۆ كە تووشی ڤایرۆسەكە بوون، جگە لەوەی تیمەكانی تەندروستی پێشمەرگە لەگەڵ تیمە تەندروستییەكاندا هاوكار و هەماهەنگن بۆ هاوكاریكردنی هێزەكانی ناوخۆ و ئاسایش بۆ ئەوەی بتوانن كۆنتڕۆڵی ئاسایشی شارەكان بكەن لەڕووی كەرەنتینەكردنی هاتوچۆكردنی هاووڵاتیان بەتایبەت لەنێوان شار و شارۆچكەكانی هەرێمی كوردستان.
وتیشی”جگە لەو ئەركانە، پاراستنی هێڵەكانی بەرگری كوردستانیشیان لە ئەستۆیە، چونكە ئێمە تا ئێستا هێڵێكمان هەیە كە لەخانەقینەوە دەست پێدەكات تا ناوچەی ڕەبیعە لەسەر سنووری سوریا كە 1000 كم-ە، هێزەكانی پێشمەرگە هەموو ئەو ناوچانە دەپارێزێت تا تیرۆریستانی داعش تاكو سوود لەو دەرفەتە وەرنەگرن بێن زیان لە خەڵكی هەرێمی كوردستان بدەن”.

ئاماژەی بۆ ئەوەش كرد، وەك وەزارەتی پێشمەرگە پێشتر ئامادەیی خۆیان نیشانداوە تاهاوكای پارێزگار و لیژنە ئەمنیەكان بین بۆ كۆنتڕۆڵكردنی دۆخی ناو شارەكان، بەڵام تائێستا لەلایەن پارێزگار و دامودەزگای پارێزگاكانەوە داوامان لێنەكراوە هێزی پێشمەرگە لەناو شارەكان بەشدار بێت، هەركاتێك ئەوان پێویستیان بوو، داوایان لێكردین هێزەكانمان ئامادەیە.

ئاشكراشیكرد، وەك هێزەكانی پێشمەرگە پێشتریش ئامادەیی خۆمان بۆ پارێزگاكان پیشانداوە و وتومانە هێزەكانمان هەمووی ئامادەیە هەركاتێك پێویست بوو بۆ ئاڵوگۆڕكردنی هێزەكانی ناوخۆ بۆ ئەوەی بەشێك لە ئەركەكان لەناو شارەكان لە ئەستۆ بگرین و ئاگاداری هەموو پارێزگارەكانمان كردووە، بەڵام هێشتا پارێزگارە بەڕێزەكان داوایان لێنەكردووین.

ڕوونیشیكردەوە، وەك هێزەكانی پێشمەرگە ئەو ڕۆڵەی دەیبینین بۆ ڕووبەڕووبوونەوەی داعش، ئامادەین هەمان ڕۆڵ ببینین بۆ بەرەنگاربوونەوەی ڤایرۆسی كۆرۆنا و پاراستنی ئەمنیەتی شارەكان.
جەختی لەوەش كردەوە، داوادەكەم هێزەكانی وەزارەتی ناوخۆ و ئاسایش ئەگەر پێویستی كرد هێزەكانی پێشمەرگەش ئەوپەڕی توانا و هێزی خۆیان بەكاربهێنن تاخەڵك پەیوەست بكەن بەڕێنماییەكانی وەزارەتی ناوخۆ و تەندروستی بۆ ڕێگریكردن لە هاتوچۆ، چونكە ئەگەر بەتوندی ئەو ڕێنماییانە جێبەجێ نەكەین بەتایبەت بەسەر ئەوانەی كە “لاسارن” بێگومان كۆرۆنا وەك داعشە دەبێتە مەترسییەكی گەورە لەسەر ژیانی خەڵك، هێز بەكارهێنان بۆ جێبەجێكردنی یاسا و ڕێنماییە نەك سەركوتكردن و توندوتیژی، بەڵكو بۆ ئەوەیە هەوڵبدەین نەهێڵین خەڵك هاتوچۆ بكەن و قەرەباڵغی دروست بكەن ئەوەش ڕێ و شوێن هەیە ئەویش دانانی بازگە یا دەست بەسەرداگرتنی مۆڵەت و ئۆتۆمبێل، تاكو ئەم دۆخە دەڕوات.

کوردستان

ژمارەیەك تووشبووی كۆرۆنا چاكبوونەوە
وەزیری تەندروستى: تكایە با وەك وڵاتانمان لێ‌ نەیەت بەس نەخۆش بژمێرین


خەڵك – ئارام سەردار
وەزیری تەندروستی هەرێم ڕایگەیاند، وردەكاری بڕیارەكەی دێوێنێ ئێمە لێی سودمەند دەبین، چونكە كاروبارەكانی چاودێری و كاری تیمەكان ئاسانتر دەبێت و ڕێگری لەبڵاوبوونەوەی كۆرۆنا دەكات.

د. سامان بەرزنجی، وەزیری تەندروستی هەرێم لە كۆنگرەیەكی ڕۆژنامەوانیدا ئاماژەی بۆ ئەوەشكرد، لەكاتی جێبەجێكردنی بڕیارەكە لەسەرتای ئەمڕۆ نیگەران بوین لەئیجرائات كردن لەگەڵ كارمەندانی تەندروستی لەلایەن هێزە ئەمنیەكان، بەڵام دڵنیاكراینەوە بەڕێزەوە مامەڵە لەگەڵ تیمە تەندروستیەكان دەكرێت، چونكە ئەوان وەك سەربازی ون خزمەت دەكەن، بۆیە ڕێكاری پێویست دەگیرێتەبەر بۆ ئەوەی هیچ كەس بەناوی پزیشك و كارمەندانی تەندروستی سوود لەم دەرفەتانە وەرنەگیرێت بۆ هاتووچۆ، كارئاسانی بۆ پزیشك و تیمە پزیشكیەكانیش دەكرێت و داوای لێبوردن دەكەین ئەگەر هەر كارمەندێك ڕاگیرابێت لەبازگەكان.

دەشڵێت: “لەهەفتەی سێیەمداین بۆ قەدەغەی هاتووچۆ، كە سوودی زۆری هەبووە بۆ ڕێگری لەبڵاوبوونەوەی كۆڕۆنا، لە مانگی یەكی ئەمساڵ ڕێكاری پێویستیش لەهەرێم گیراوتەبەر، بۆتە هۆكاری ئەوەی بەهەزاران حاڵەت كەم بكەینەوە ئەویش بەكەرەنتینەكردن و پشكنین لەفڕۆكەخانە و چەندین ڕێكاری پێویستی تر، هەرچەندە هاووڵاتیان زەرەرمەندی ژیان بوون، بەڵام تەندروستی هاووڵاتیان لەپێشترە”.

جەختیشی كردەوە، ناتوانین بڵێین لەحاڵەتی كۆنتڕۆڵ كردنین، چونكە دەبینین بەهۆی بەركەوتە چەند حاڵەت زیادی كردووە، بۆیە تكا دەكەین هاووڵاتیان لەماڵ بمنێننەوە و نەیەنە دەرەوە و بەركەوتنیان نەبێت.

ئەوەشی خستەڕوو، بەهۆی هەندێ ڕێكار و بانگەواز چەندین حاڵەتی ترمان دۆزیوەتەوە، بۆیە تاوەكو هاوشێوەی وڵاتانمان لێ نەیەت، كە تەنها ژمارەی نەخۆشەكان بژمێرین و نەتوانین چارەسەری توشبووان بكەین، بۆ دابینكردنی خۆراك پێویستیش بڕیاری پێویست دەدرێت.

وتیشی، “تا ئێستا ۷٤ نەخۆش چونەتەوە ماڵەكانیان و تەنها ۱٤۰ نەخۆش ماون، كە باری تەندروستیان باشە”.

بەردەوام بە لە خوێندنەوە

کوردستان

قوباد تاڵەبانی گەیشتە قائیمقامیەتی سلێمانی


خەڵك- بەشی هەواڵ
جێگری سەرۆكی حكومەتی هەرێم بۆ ئاگاداربوون لە ڕێكارەكانی خۆپارێزی و قەدەغەی هاتووچۆ گەیشتە قائیمقامیەتی سلێمانی.

بەپێی ڕاگەیەنراوێكی قائیمقامیەتی سلێمانی، كە دراوە بە (خەڵك) قوباد تاڵەبانی، جێگری سەرۆكی حكومەتی ھەرێمی كوردستان سەردانی دیوانی قائیمقامیەتی سلێمانی كردووە و لەگەڵ ئاوات محەمەد، قائیمقامی سلێمانی و لیژنەی ئەمنی سلێمانی كۆبۆتەوە.

هەر بەپێی ڕاگەیەنراوەكە، ئامانجی سەردانەكەی جێگری سەرۆكی حكومەتی ھەرێم بۆ لە نزیكەوە ئاگاداربونە لە بڕیار و ڕێوشوێنەكانی تایبەت بە بەرەنگاربوونەوەی كۆرۆنا لە سلێمانی و گرتنەبەری ڕێكار و ڕێوشوێنی پێویست بۆ پاراستنی تەندروستی ھاووڵاتیان و ڕێگریكردن لە تەشەنەسەندنی زیاتری ڤایرۆسی كۆرۆنا لە ھەرێمی كوردستان.

شەوی ڕابردوو وەزارەتی ناوخۆی هەرێم بڕیارێكی نوێی بۆ قەدەغەی هاتووچۆ دەركرد و لە نیوەڕۆی ئەمڕۆوە كەوتە بواری جێبەجێ‌ كردنەوە، كە سەرجەم دوكان و نانەواخانە و سەمونخانە و شوێنەكانی دیكە داخران و هاتووچۆی هاووڵاتیان بە ئۆتۆمبێل و پیادەش قەدەغە كرا تاوەكو ماوەی 48 كاتژمێر.

بەردەوام بە لە خوێندنەوە

کوردستان

وەزیری ناوخۆ: لەم ٤٨ کاتژمێرەدا پێداچوونەوە بەپلانەکانیاندا دەکەن و پلانی نوێ ڕادەگەیەنن


خەڵک – بەشی هەواڵ

وەزیری ناوخۆی حکومەتى هەرێم ڕایگەیاند، ئێستا لەقۆناغێکی زۆر باشدان و حاڵەتەکان زۆر کەمن، بەڵام ئەم ٤٨ کاتژمێرە قەدەغەى هاتوچۆیان ڕاگەیاندووە، بۆئەوەی پێداچوونەوە بەپلانەکانیاندا بکەن و لەدوای ئەوەوە بەرنامەی نوێ بۆ ئاسانکاری هاوڵاتییان و سەلامەتی هاوڵاتییان ڕابگەیەنن.

 

ڕێبەر ئەحمەد وەزیری ناوخۆی حکومەتى هەرێم لەکۆنفڕانسێکی ڕۆژنامەوانیدا ڕایگەیاند، بڕیاری قەدەغەى هاتوچۆیان بەڕێنمایی نوێ و ڕێکاری نوێوە دەرکرد، بۆئەوەی بزانن لەکوێی قۆناغەکەدان.

 

ئاماژەى بەئەوەشدا، خەڵکی کوردستان مەترسییەکان وەک خۆی وەرناگرن و نابینن و دەڵێن ئەم ڤایرۆسە لەکوردستان جیاوازە لەوڵاتانی دیکە، بەڵام بەو جۆرە نییە، بەڵکو هەمان ڤایرۆسە، بەڵام بەهۆی ڕێکارەکانى حکومەتى هەرێم و خۆپارێزی هاوڵاتییانەوە ئێستا لەم قۆناغەدان.

 

باسی لەئەوەشکرد، لەچەند ڕۆژی ڕابردوودا هەستیان کرد، لەماوەى ڕۆژانی ڕابردوودا ژمارەیەک کەس سوودیان لەپێناسەکانیان وەرگرت و ڕێگەپێدانى زۆر بەخەڵک درابوو، و هاوڵاتییان لەهەندێک شوێن بە پیادە ڕۆشتنە دەرەوە، بۆیە قەدەغەى هاتوچۆ وەک خۆی جێبەجێنەدەکرا، لەبەرئەو هۆکارانە ئەم بڕیارەیان دەرکرد.

 

ئەوەشی خستەڕوو، دەیانەوێت پێداچوونەوە و هەڵسەنگاندن بۆ کارەکانی ڕابردوو بکەن و ٤٨ کاتژمێریان بە ئیدارەکان و پارێزگاکان داوە، بۆئەوەی پێداچوونەوە و هەڵسەنگاندن بکەن و بەرنامە و پلانی تۆکمە دابنێن، بۆئەوەی بەرنامە دابنێن ئاسانکاری بۆ هاوڵاتییان بکەن و هاوڵاتییانیش سەلامەتبن.

 

ئاماژەى بەئەوەشدا، ترسیان لەوە هەیە، خەڵکی دیکە لەناو کۆمەڵگەدا هەبن، کە تووشبووی ڤایرۆسی کۆرۆنان، بۆیە ئەم بڕیارەیاندا، هەرچەندە تاکو ئێستا ئەو حاڵەتانەى تۆمارکراون کەمن و ڕێژەیەکی باشیان لێ چاکبوونەتەوە.

بەردەوام بە لە خوێندنەوە

کوردستان