ئێمە لە تۆرە کۆمەڵایەتیەکان

کوردستان

پارێزگای سلێمانی 15 بڕیاری نوێی بۆ ڕێگری لە بڵاوبوونەوەی كۆرۆنا دەركرد

خەڵك- بەشی هەواڵ
لیژنەی باڵای ئۆپراسیۆنەكانی پارێزگای سلێمانی بۆ بەرەنگاربوونەوەی كۆرۆنا ژمارەیەك بڕیاری نوێ‌ بۆ ڕێگری لە بڵاوبوونەوەی ڤایرۆسی كۆرۆنا و ڕێكارە خۆپارێزیەكان دەركرد و جەختیشدەكاتەوە، كە تەنها لە 12ی شەو بۆ 6ی بەیانی ڕێگی هاتووچۆ هەیە.

لیژنەی باڵای ئۆپراسیۆنەكانی پارێزگای سلێمانی بۆ بەرەنگاربوونەوەی كۆرۆنا لە كۆبوونەوەی ئەمڕۆیدا 15 بڕیاری نوێی دەركرد و جەختیشی كردەوە، كە ئێستا لە قۆناغێكی هەستیار و زۆر مەترسیداری بڵاوبوونەوەو تووشبوونی پەتای كۆرۆناداین، بۆیە پێویستە هەموولایەك باشترو وردترو بە هەناسەیەكی درێژترەوە لە ماڵەكانیاندا بمێننەوە.

دەقی بڕیارەكان:

بۆ/ هەموو یەكە كارگێڕیی و
فەرمانگە پەیوەندیدارەكانی سنوری پارێزگای سلێمانی
بابەت/ گشتاندن

ئەمڕۆ لیژنەی باڵای ئۆپراسیۆنەكانی پارێزگای سلێمانی بۆ بەرەنگاربوونەوەی كۆرۆنا، بە سەرپەرشتی د.هەڤاڵ ئەبوبەكر پارێزگاری سلێمانی و بە ئامادەبوونی سەرۆكی ئەنجومەنی پارێزگای سلێمانی كۆبۆوە. لە كۆبوونەوەكەدا بەوردیی گفتوگۆو هەڵسەنگاندن بۆ میكانیزم و ڕێكارەكانی باشتر خۆپارێزیی‌و چارەسەرسازیی پەتای كۆرۆنا كرا.
لە كۆتاییدا بڕیار لەسەر ئەم خاڵانە دران و پێویستە هەموو لایەك بەتەواوی پابەندبن بە جێبەجێكردنیانەوە:

١- بەپێی ئاماژە تەندروستیەكان، ئێستا لە قۆناغێكی هەستیارو زۆر مەترسیداری بڵاوبوونەوەو تووشبوونی پەتای كۆرۆناداین، بۆیە پێویستە هەموولایەك باشترو وردترو بە هەناسەیەكی درێژترەوە لە ماڵەكانیاندا بمێننەوەو لەڕووی تەندروستی‌و خۆپارێزییەوە خۆیان بۆماوەیەكی درێژتر لەوەی چاوەڕواندەكرا ئامادە بكەن. ڕێكاری یاسایی توند بەرامبەر هەر كەسێك دەگیرێتەبەر، كە پابەندی ڕێنماییە تەندروستی‌و كارگێڕیی‌و ئارامییەكان نەبێت.

٢- پێویستە هاووڵاتیان چ بە پێ‌ چ بە ئۆتۆمبێل و هەر هۆكارێكی تر، هاتنە دەرەوەو هاتووچۆكردن بەتەواوی ڕابگرن‌و تەنها لە حاڵەتی زۆر پێویستدا نەبێت نەیەنە دەرەوە، بەپێچەوانەوە ڕێكاری یاسایی بەرامبەر ئەوكەسانەش دەگیرێتەبەر كە ڕەوشی قەدەغەكردنی هاتووچۆ لە هەر شوێنێكدا تێكبدەن (كۆڵان، گەڕەك، شەقام، شارو شارۆچكەكاندا).

٣- بەڕێوەبەرایەتی گشتی تەندروستی سلێمانی بەبەردەوامیی زانیاریی‌و ڕێنمایی دروست‌و ڕاست بەشێوەیەكی شەفافانەو ئاشكرایانە لەسەر ڕەوشی پەتاكەو كەیسەكان‌و دۆخی تەشەنەسەندنی بڵاودەكاتەوە، تەنها سەرچاوەی بڵاوكردنەوەی ئەو زانیارییانە دەبێت لە سنوری پارێزگای سلێمانیدا، بەتایبەتی كە لایەنی تەندروستی لە عێراق‌و هەرێمدا متمانەی تەواویان بە ڕێكار‌و پشكنینەكانی بەڕێوەبەرایەتی گشتی تەندروستی سلێمانی بەخشیوە، متمانەی تەواوتان بە ڕێكارو ئاكامی پشكنینەكانی بەڕێوەبەرایەتی گشتی تەندروستی سلێمانی هەبێت.

٤- هەموو لایەك ئاگادار دەكەینەوە ژمارەی تووشبووان لە هەڵكشاندایە، بۆئەوەی ئێوە نەبن بە یەكێك لەو تووشبووانەو دەرفەتی چارەسەركردن بە تووشبووەكان ببەخشن، پێویستە لە ماڵەكانتاندا بمێننەوەو پەیڕەوی ڕێنماییە تەندروستیەكان بكەن، كە تەنها چارەسەری سەرەكیی ئەم پەتایەیە.

٥- ڕێكاری یاسایی لەبەرامبەر هەر كەسێكدا لە هەر پلەوپایەو پۆستێكدا بێت دەگیرێتەبەر، گەر دەستبخاتە ناو كاری دامودەزگا تەندروستیەكانەوە، هیچ جیاوازییەك لەنێوان هیچ كەسێكدا ناكرێت‌و كەرتی تەندروستی بە ئەمانەتەوە خزمەتی هەموو كەسێك دەكات.

٦- یەكە كارگێڕییەكان لە سنوری پارێزگای سلێمانی ڕاسپێردران بە هەماهەنگیی لەگەڵ لایەنە پەیوەندیدارەكاندا ڕێوشوێنی كاركردن لە بوارەكانی (خواردنی خێرا، نۆڕینگەكان) دیاریبكەن.

٧- هەر هاتووچۆیەكی پێویست لەنێوان یەكە كارگێڕییەكاندا لە سەعات (١٢)ی شەو بۆ (٦)ی بەیانی دەبێت‌و هیچ مۆڵەتێكی ڕێگەپێدان لەنێوان یەكە كارگێڕییەكاندا ناكرێت، بە ئاگاداریی ڕاستەوخۆی پارێزگای سلێمانی نەبێت.

٨- بڕی پێویستی (سوتەمەنی، خۆراك، پێداویستیە سەرەكیەكان، سەوزەو میوە) دابین كراون‌و ئاڵوگۆڕە بازرگانییەكان بەردەوامن، یەكە كارگێڕییەكان لەڕێی لیژنەكانیانەوە چاودێری وردی نرخ و كوالێتی و قەبارەی خستنەڕوویان دەكەن‌و هەركەسێك هەوڵی قۆرخكاریی‌و شاردنەوەی كاڵا بدات، سزای یاسایی توند دەدرێت.

٩- لیژنەی ئارامیی یەكە كارگێڕییەكان ڕاسپێردران، لەسەر بنەمای پێشهاتە نوێكانی ئەم پەتایە، پلان‌و ڕێكاری نوێ‌ بۆ باشتر خزمەتكردنی هاووڵاتیان‌و گەیاندنی خزمەتگوزارییەكان دابڕێژنەوە.

١٠- نەخۆشخانە ڕاوێژكارییەكانی (ددان) لە سلێمانیدا ڕۆژانە بەدرێژایی (٢٤) سەعات خزمەتگوزاریی پێشكەش دەكەن‌و ئەم نەخۆشخانانە بەردەوام كراوە دەبن (پیرەمێرد، شۆڕش، فایەقی حاجی عەلی).

١١- تا ڕۆژی ٢٣/ ٣/ ٢٠٢٠ بازاڕی دراو و حەواڵە ناكرێتەوەو ڕێوشوێنی تەندروستی گونجاو بۆ ئەم بوارە دیاریدەكرێت.

١٢- بە هەماهەنگیی لەگەڵ فەرمانگەی داواكاری گشتیدا دەستبەسەر هەر مەڕوماڵاتێكی قاچاخدا دەگیرێت‌و بەهیچ شێوەیەك ناگەڕێنرێتەوە بۆ خاوەنەكەی ‌و ڕێكاری یاسایی لەبەرامبەر خاوەنەكەیدا دەگیرێتەبەر.

١٣- ڕێگا سەرەكییەكان تەسك‌و دیاریكراو دەكرێن‌و هاتووچۆ لە زۆربەی شەقام‌و ڕێگا سەرەكییەكانی ناوشاری سلێمانیدا ڕادەگیرێن.

١٤- هەر كەس‌و دەستەو لایەن‌و كۆمپانیایەك دەیەوێت ڕاستەوخۆ خۆی كاری خێرخوازیی بكات، پێویستە كارەكانی گواستنەوەو دابەشكردن بخاتە نێوان سەعات (١٢)ی شەو بۆ (٦)ی بەیانی و ڕێگە بە هیچ كەمپین‌و دیاریكردنی شوێنێك بۆ كۆكردنەوەی كۆمەك نادرێت.

١٥- بەڕێوەبەرایەتی گشتی تەندروستی سلێمانی ڕاسپێردرا، بەرنامەی گونجاو و پێویست بخاتە بەردەستی كەرتی تایبەت بەمەبەستی ڕاهێنان‌و خۆئامادەكردنی كارمەندەكانیان بۆ پشتیوانیكردنی كەرتی گشتیی لە هەر دۆخێكی پێویستدا.

لەگەڵ رێزدا…
د.هەڤاڵ ئەبوبەكر
پارێزگاری سلێمانی
٢١/ ٣/ ٢٠٢٠

کوردستان

فرسەت سۆفی: ئەگەر هاوڵاتییان پابەندبن ئامارەکانی کۆرۆنا ڕوو لەدابەزین دەبێت

خەڵک-ئارام سەردار

پارێزگاری هەولێر ڕایدەگەیەنێت، پابەندنەبوون بەڕێنماییەکان وایکرد بگەینە ئەو قۆناغە سەختە، بەڵام هێشتا دەرفەت ماوە ئەگەر هاوڵاتییان پابەندبن و ڕێنماییەکان جێبەجێبکەن دەتوانین ئەو دۆخه سەختە تێپەڕبکەین.

 

فرسەت سوفی، پرێزگاری هەولێر لەکۆنفڕانسێکی رۆژنامەوانیدا ڕایگەیاند، بەداخەوە ئەوەی نەمان دەخواست پێی گەیشتین، هەرچەندە ڕێکاری باشمان گرتە بەر، بەڵام پابەند نەبوون بەڕێنماییەکان وایکرد بگەینە ئەو قۆناغە سەختە، وەکو ژووری ئۆپڕاسیۆن و پارێزگای هەولێر هەرچی لەتواناماندا بێت دەیکەین بۆ پاراستنی تەندروستی خەڵک، ئەوانەی تووش نەبوون بیانپارێزین و ئەوانەشی تووشبوون لەنەخۆشخانەکان وەریان بگرین.

 

دەشڵێت: هێشتا دەرفەت ماوە ئەگەر هاوڵاتیان پابەندبن و ڕێنماییەکان جێبەجێ بکەن دەتوانین ئەو دۆخه سەختە تێپەڕبکەین، تاکە چارەسەریش تاک پارێزییە بەبەستنی دەمامک و دوورکەوتنەوە لەشوێنی قەرەباڵغ.

 

ئەوەشی خستەڕوو، ئەوانەی باوەڕیان بەنەخۆشییەکە نەبوو ئێستا دەبینن هەر ڕۆژە و پێشوازی لەتەرمی ئازیزێک دەکەین یان دەبینن توشبووان لە چ دۆخێکدان، بەڵام ئێستاش دەبینین هاوڵاتیان باشتر خۆیان دەپارێزن ئەگەر بەم شێوەیە بڕوات ڕەنگە لەداهاتوو ئامارەکان بەرەو کەمبوونەوە بچن، بەپێچەوانەوە ئیلتزام نەکردن بە ڕێنماییەکان ڕەنگە دۆخەکە لەئێستاش خراپتر بێت.

 

سەبارەت بەڕێنمایی نوێ وتی، پابەندی ڕێنمایی و بڕیاری وەزارەتەکانی تەندروستی و ناوخۆین، تاوەکو ئەوان گۆڕانکاری نەکەن ئێمە ناتوانین هیچ گۆڕانکاریەک لەبڕیار و ڕێنماییەکان بکەین.

بەردەوام بە لە خوێندنەوە

کوردستان

بەهۆی تەقەی هێزە ئەمنییەكانی ئێران، 3 كوڵبەر بوونە قوربانی

خەڵك-بەشی هەواڵ

 

ڕێكخراوی مافی مرۆڤی هەنگاو ڕایدەگەیەنێت، هێزە چەكدارەكانی حكومەتی ئێران لە سنووری ئورمیە تەقەیان لە كاروانێكی كۆڵبەران كردووە و كۆڵبەرێك كوژراوە و دوو كۆڵبەری دیكە بریندار كراون.

ڕێكخراوی مافی مرۆڤی هەنگاو لە ڕاگەیەنراوێكدا ئاماژە بۆ ئەوە دەكات، سەرلەبەیانی ئەمڕۆ شەممە 15-8-2020 هێزە چەكدارەكانی ئێران لە كوێستانی گوندی (كوران)ی ئورمیە تەقەیان لە كاروانێكی كۆڵبەران كردووە و سێ كۆڵبەر كوژراو بریندار كراون.

ئاشكراشیكرد، بەهۆی تەقەی هێزە چەكدارەكانی ئێران كۆڵبەرێك بە ناوی “سیراج ئەحمەدی” كوژراوە و تا ئێستا ناسنامەی ئەو دوو كۆڵبەری دیكە كە بریندار كراون بۆ هەنگاو ڕوون نەبووەتەوە.

بەپێی ئامارەكانی ڕێكخراوی مافی مرۆڤی هەنگاو، لە ماوەی مانگی گەلاوێژ لە سنوورەكانی مەریوان، بانە، نەوسوود، چاڵدێران و ئورمیە ٥ كۆڵبەر كوژراون.

بەردەوام بە لە خوێندنەوە

کوردستان

بەتۆمەتی دزیكردن، پۆلیس كەسێكی دەستگیر كرد

خەڵك-بەشی هەواڵ

 

بەڕێوەبەری ڕاگەیاندنی پۆلیسی گەرمیان ڕایدەگەیەنێت، بەتۆمەتی دزیكردن لەپەیمانگایەكی كەلار پۆلیس تۆمەتبارێك دەستگیر دەكات.

عەلی جەمال قدووری بەڕێوەبەری ڕاگەیاندنی پۆلیسی گەرمیان لە ڕاگەیەنراوێكدا ئاماژە بۆ ئەوە دەكات، دوای ئەوەی لەبەرواری 9/ 8 لەنێو بینای پەیمانگای وەرزشی ناحكومی گەرمیان كۆمەڵێك كەرەستەی پەیمانگاكە دزرا، لەوانە دوو كۆمپیتەر و جهازێكی تۆماركردنی كامێرای چاودێری و كامێرایەكی فۆتۆگرافی و یەك میمۆری و یەك سێت جل و بەرگی وەرزشی ، یەك كاتژمێر دوای دزینی كەرەستەكان پۆلیسی بەشی نەهێشتنی تاوانی گەرمیان دوای لێكۆلینەوە توانیان تۆمەتبار بدۆزنەوە و دەستگیری بكەن و دەست بەسەر بەشێكی كەرەستە دزراوەكاندا بگرن.

ئاشكراشیكرد، دوای لێكۆڵینەوە تۆمەتبار دانی بەتاوانەكەدا ناوە و لەئێستادا بەبڕیاری دادوەرو بەپێی مادەی 443 بەند كراوە.

بەردەوام بە لە خوێندنەوە

کوردستان