ئێمە لە تۆرە کۆمەڵایەتیەکان

کوردستان

ئەرسەلان بایز: ڕۆژێك شەهیدەكان بە كفنی سوورەوە دەگەڕێنەوە و دەڵێن پەشیمانین

خەڵك – بەشی هەواڵ

ئەندامێكی ئەنجومەنی باڵای بەرژەوەندییەكانی یەكێتیی نیشتمانیی كوردستان ڕایدەگەیەنێت، دەترسم ڕۆژێك، شەهیدەكان بە كفنی سوورەوە دەرگای هەموو ماڵە لێپرسراوە حزبی و حكومیەكان بگرن.

ئەرسەلان بایز ئەندامی ئەنجومەنی باڵای بەرژەوەندییەكانی یەكێتیی نیشتمانیی كوردستان لە نووسینێكیدا دۆخی هەرێمی بە ڕووداوەكانی ناو ڕۆمانێكی نووسەرێكی جەزائیری دەچوێنێت و دەڵێت: نایشارمەوە دەترسم ڕۆژێك هەمان ڕووداو لە كوردستان ڕووبدات، شەهیدەكان بە كفنی سوورەوە دەرگای هەموو ماڵە لێپرسراوە حزبی و حكومیەكان بگرن و بڵێن: ئێوە…! لەو ڕێبازەی ئێمە لەسەری شەهید بووین لاتان داوە. ئێوە لە خانووە قوڕەكان دوور كەوتونەتەوە و شەڕتان لەسەر دەسەڵات و دەسكەوتە. ئێوە هێندەی خەمی خۆتانە نیو هێندە خەمی میللەت و خزمەتگوزاری و دادپەروەری و سەروەری یاساتان نییە.

دەقی نووسینكەی ئەرسەلان بایز:

شەهیدەكان دەگەڕێنەوە..!!

جەزائیر بە وڵاتی ملیۆن شەهید ناسراوە. لە ڕۆژهەڵاتی ناوەڕاست هیچ سیاسیەك نیە ناوی (جەمیلە بوحیرد)+ی نەبیستبێ كە لە زیندان جۆرەها ئەشكەنجە درا. چونكە لە شەڕی بەرەنگاربوونەوەو شۆڕش لە پێناوی سەربەخۆییدا، فەڕەنسیەكان بە ئاگرو ئاسن وەڵامیاندانەوەو دەیان زیندان و كوشتارگەیان بۆ خەڵكە فیداكارو پێشمەرگەكانیان دامەزراندبوو. نووسەرو ئەدەبیاتی ئەو وڵاتە چ لە سەردەمی شۆڕش و بەرەنگاربوونەوەدا، چ لەدوای سەركەوتنی شۆڕش دەیان شیعرو پەخشان و چیرۆك و رۆمانیان لەسەر خۆڕاگری و ئازایەتی ئەو گەلە فیداكارە نووسیوەك بەڵام یەكێ لەو شاكارانە بەناوی (الشهدا‌‌و یعودون هذا الاسبوع) لە نووسینی (الطاهر الوطار) زۆر كاریتێكردم و سەرنجی ڕاكێشام، چونكە زۆر لە ئەزموونی شۆڕشی كوردستانی باشوور دەچێت. پووختەی ڕۆمانەكە بە هەندێ دەسكارییەوە:

((دوای چەندین ساڵ خەبات و خۆڕاگری و قوربانی داگیركەرە فەڕەنسیەكان شكستیان هێناو شۆڕش سەركەوت، ئیتر ئاهەنگی خۆشی سەرانسەری وڵاتی جەزائری گرتەوە. خەڵكەكە خۆشی خۆشی ئەوەیان بوو لە دەست داگیركەر ڕزگاریان بوو، ئیتر خۆیان لە ڕێگای ڕۆڵەكانی خۆیانەوە حوكمڕانی دەكرێن و ئارامی و خۆش گوزەرانی و دادپەروەری و یاسا بەرقەرار دەبێ. ئیتر بەروبومی وڵات بۆ خۆیان خەرج دەكرێت و ئاوەدانی ڕوو لە هەموو شوێنێك دەكات.. چەوسانەوەو جیاوازی نامێنێت. بەڵام بەداخەوە پاش ماوەیەك لەسەر دەسەڵات و دەسكەوتی زاتی ناكۆكی كەوتە نێوان برا شۆڕشگێڕەكانی دوێنێ و ماڵە شەهیدەكان بێ ناز كەوتن. (ماندووبوون، فیداكاری، سەرماو گەرما، دوور كەوتنەوە لە ماڵ و مناڵ، زیندان و تێهەڵدان خرانە سەبەتەی بێ نرخ و فەرامۆش كران). ئیتر شەڕو ناكۆكی لە بری چەسپاندنی دیموكراتی و خزمەتگوزاری، لەبری دادپەروەری و سەروەری یاسا بوو بە ململانێی شەخسی لەسەر پۆست و ئیمتیازات)).

نووسەر بەردەوام دەبێت و دەڵێ:

(بەیانیەك زوو لەناكاو لەگەڵ شەبەقی، لە زەنگی دەرگای هەریەك لە ماڵە لێپرسراوەكانی حزب و حكومەت دەدرێت. لێپرسراوەكان بە شپرزەیی لە خەوی شیرین ڕادەپەڕن و خۆیان كۆدەكەنەوە، مەترسی ئەوەیان لەلا دروست دەبێت كە بێگومان (حتما) شتێكی خراپ ڕوویداوە. ئەگینا ئەو لە دەرگا دانە شەبەقیە لە پای چی و بۆ چیە…؟ كاتێ بە شپڕزەیی دەرگا دەكەنەوە دەبینن كۆمەڵێك شەهید لەبەر دەرگا وەستاون و هەموو بەیەك دەنگ دەڵێن ئێمە زیندوو بووینەوە. ئیتر شار دەشڵەژێ، لێپرسراوەكان سەنگەر دەگرن و بە ڕێگای هەمە جۆر فشار دەخەنە سەر لەشكری شەهیدەكان تاكو دەیان گێڕنەوە ناو گۆڕەكانیان).

#منیش نایشارمەوە دەترسم ڕۆژێك هەمان ڕووداویش لە كوردستان ڕووبدات، شەهیدەكان بە كفنی سوورەوە دەرگای هەموو ماڵە لێپرسراوە حزبی و حكومیەكان بگرن و بڵێن:

-ئێوە…! لەو ڕێبازەی ئێمە لەسەری شەهید بووین لاتان داوە. ئێوە لە خانووە قوڕەكان دوور كەوتونەتەوەو شەڕتان لەسەر دەسەڵات و دەسكەوتە. ئێوە هێندەی خەمی خۆتانە نیو هێندە خەمی میللەت و خزمەتگوزاری و دادپەروەری و سەروەری یاساتان نیە.

یان بڵێن:
-ئێمە زیندوو بووینەوە. هاتوین لە دەسەڵات و دەسكەوت بەشی خۆمان وەربگرین. ئێوە هەمووتان بەناهەق دەوڵەمەند بوون…ئەی بەشی ئێمەو مناڵەكانمان..؟؟!!!.

باشە ئەگەر شەهیدەكان هاتنەوەو ئەو پرسیارو داواكارییانەیان لە ئێمە كرد، ئێمە وەڵاممان چی بێت..؟!

ـــــــــــــــــــــــــ
+جمیلە بوحیرد:
ساڵی (1935) لە دایك بووە. ساڵی (1954) جەزائیرییەكان دژی داگیركەری فەرەنسا شۆڕشیان كرد. بەیانیان كاتێ قوتابیان ڕیز دەبوون و سروودیان دەوت. لە ژێر فشاری فەرەنسیەكان دەیانوت: (فەرەنسا دایكمانە) بەڵام (جمیلە) بە پێچەوانەی هەموو قوتابیەكان لە ڕیز هاتە دەرەوەو وتی (جەزائیر دایكمانە) بەڕێوەبەری قوتابخانە بانگی كردوو توندترین سزای دا. (جەمیلە) لە ساڵی (1954) ڕاستەوخۆ بەشداری لە خەباتی (بەرەی ڕزگاری نیشتیمانیی جەزائیركرد) بوو بە ئەڵقەی پێوەندی نێوان لێپرسراوی شۆڕش لە شاخ و لێپرسراوی ڕێكخستنە نهێنیەكان لە شار. فەرەنسیەكان بە وردی چاودێرییان كرد تاكو ڕۆژێك تەقەیان لێكردو برینداریان كرد. دواتر حوكمی لە سێدارە دانیان بەسەردا سەپاند. دنیا بۆ پشتیوانی هاتنە سەر خەت و فەرەنسایان ناچاركرد حوكمەكەی بە حوكمی تاهەتایی بگۆڕن. دوای چەندین ساڵ لە زیندان و ئەشكەنجەدان، لە دوای ڕزگار بوونی جەزائیر ئازاد كرا

کوردستان

پێشمەرگەیەك بە تەزووی كارەبا گیانی لەدەستدا

خەڵك- بەشی هەواڵ
پێشمەرگەیەك لە دیوانی وەزارەتی پێشمەرگەی حكومەتی هەرێمی كوردستان، بە تەزووی كارەبا گیانی لە دەستدا.

بەپێی ڕاگەیەندراوێك كە ئەمڕۆ چوار شەممە لەلایەن شۆڕش ئیسماعیل وەزیری پێشمەرگەی حكومەتی هەرێمی كوردستانەوە بڵاوكرایەوە:”سەرلەبەیانی ئەمڕۆ چوارشەممە 5ی ئابی2020، هەواڵی كۆچی دوایی پێشمەرگە و كارمەندی دیوانی وەزارەتمان (ن.ع / سامان سادق مستەفا) پێگەیشت”.

وەزیری پێشمەرگە دەڵێت: “كۆچكردوو، ماوەی چەندین ساڵە لەخۆشەویستی بۆ باخچەكانی وەزارەت و دڵسۆزی لە پێشمەرگایەتیدا خۆنەویستانە لە ئەركەكەی بەردەوام بوو، ئەمڕۆش لەكاتی كاركردندا، كە چەندین ساڵە باخەوانی وەزارەتە بەهۆی رووداوی كارەباوە گیانی لەدەستدا”.

هەر لە ڕاگەیەندراوەكەدا شۆڕش ئیسماعیل دەڵێت” پرسە و سەرەخۆشی لەخۆمان و كەسوكارو خانەوادەكەیان دەكەین ئومێدەوارین دواناخۆشی هەموولایەك بێت، رۆحی كۆچكردووش شاد بێت”.

بەردەوام بە لە خوێندنەوە

کوردستان

كەركوك، فەرماندەیەكی مەیدانی داعش دەستگیركرا

خەڵك- بەشی هەواڵ
دەزگای ئاسایشی نیشتمانی عیراق، دەستگیركردنی فەرماندەیەكی مەیدانی و چەكدارێكی (دیوان الجند)ی ڕێكخراوەكە لە پارێزگەی كەركوك ڕادەگەیەنێت.

بەپێی ڕاگەیەندراوێك كە ئەمڕۆ چوار شەممە لەلایەن دەزگای ئاسایشی نیشتمانی عیراقەوە بڵاوكرایەوە”بەپشتبەستن بە زانیارییە هەواڵگرییەكان، هێزێكی دەزگای ئاسایشی نیشتمانی لە پارێزگەی كەركوك توانی لەڕێی یاداشتی دادوەرییەوە یەكێك لە فەرماندە مەیدانییەكانی بە ناو (دیوانی جوندی سەر ویلایەتی كەركوك)ی سەردەمی دەستگرتنی داعش بەسەر ناوچەكەدا دەستگیربكات، ئەو فەرماندەیەی داعش دانی ناوە بە سەركردایەتیكردنی بۆ هێرشكردنە ناوچەی بەشیر و هێرشكردنە سەر هێزە ئەمنییەكان، وێڕای ڕاگواستنی خێزانەكان و تەقاندنەوەی ماڵەكانیان”.

هەر لە ڕاگەیەندراوەكەدا هاتووە”هێزێكی تری سەر بە دەزگاكە، یەكێك لە چەكدارەكانی بە ناوی دیوانی جوندی ویلایەتی كەركوك بەپێی ماددەی (1/4 تیرۆر) دەستگیركرد، دەستگیركراوەكەش دانی ناوە بە بەشداریی لە چەندان هێرش بۆسەر هێزە حكومییەكان لە باشووری خۆرئاوای كەركوك و لەپاش وەرگرتنی وتەكانيشی، ڕادەستی لایەنە پەیوەندیدارەكان كرا، تا ڕێوشوێنی یاسایی لەدژ بگیرێتەبەر”.

بەردەوام بە لە خوێندنەوە

کوردستان

پەروەردە وەڵامی تاقیكردنەوەكانی 12ی ئامادەیی بڵاوكردەوە

خەڵك- بەشی هەواڵ
وەزارەتی پەروەردەی حكومەتی هەرێمی كوردستان، پرسیار و وەڵامی تاقیكردنەوەی ئەمڕۆی 12ی ئامادەیی بە هەردوو بەشی زانستی و وێژەیی بڵاوكردەوە.

بەڕێوەبەرایەتی ئەزموونەكانی وەزارەتی پەروەردەی هەرێم پرسیار و وەڵامی تاقیكردنەوەی وەزاری (فیزیا/ بەشی زانستی) و (جوگرافیا/ بەشی وێژەیی) پۆلی 12ی ئامادەیی بۆ ساڵی خویندنی (2019-2020) خولی یەكەمی بڵاوكردەوە.

1- پرسیارەكانی تاقیكردنەوەی فیزیا

2- پرسیارەكانی تاقیكردنەوەی جوگرافیا

بەردەوام بە لە خوێندنەوە

کوردستان