ئێمە لە تۆرە کۆمەڵایەتیەکان

کوردستان

وەزارەتی ئەوقاف، ڕێوشوێنەكانی بۆ ڕووبەڕوونەوەی ڤایرۆسی كۆرۆنا دەگرێتەبەر


خەڵك-بەشی هەواڵ

 

وتەبێژی وەزارەتی ئەوقاف و كاروباری ئایینی حكومەتی هەرێمی كورستان ڕایدەگەیەنێت، وتاری سبەینێ هەینی تایبەت دەبێت بە خۆپارێزی لە ڤایرۆسی كۆرۆنا.

بەهۆی بڵاوبوونەوەی ڤایرۆسی كۆرۆنا لە وڵاتانی دەوروبەری هەرێمی كوردستان و عیراق، حكومەتی هەرێمی كوردستان سەرجەم ڕێكارەكانی بۆ ڕووبەڕووبونەوەی ڤایرۆسی كۆرۆنا گرتوەتەبەر و بۆ ئەو مەبەستەش مانگێك پشووی لە سەرجەم ناوەندەكانی خوێندن ڕاگەیاند.

نەبەز ئیسماعیل وتەبێژی وەزارەتی ئەوقاف و كاروباری ئایینی حكومەتی هەرێمی كوردستان بە (خەڵك)ی ڕاگەیاند، ناونیشانی وتاری هەینی بۆ سبەینێ 28-2-2020 دیاریكراوە و تایبەتە بە خۆپارێزی لە نەخۆشی و ڤایرۆسی كۆرۆنا بە هاوكاری وەزارەتی تەندروستی.

ناوبراو، داواشی لە مامۆستایانی ئایینی كرد بە هەموو شێوەیەك هاوڵاتیانی هۆشیار بكەنەوە لە مەترسی ڤایرۆسەكە و شێوازی خۆپارێزییان، تاكو ڕێگری بكەین لە بڵاوبوونەوەی ڤایرۆسەكە لە هەرێمی كوردستان.

کوردستان

لیژنەی باڵای ئۆپراسیۆنەكانی سلێمانی ڕێنمایی نوێی بۆ قەدەغەی هاتووچۆ دەكرد


خەڵك – بەشی هەواڵ

لیژنەی باڵای ئۆپراسیۆنەكانی پارێزگای سلێمانی ڕایدەگەیەنێت، قەدەغەكردنی هاتووچۆ لەنێوان یەكە كارگێڕییەكانی سنوری پارێزگای سلێمانی و پارێزگاو ئیدارە سەربەخۆكانی ترو پارێزگاكانی عیراقیشدا تا 10ی نیسان بەردەوام دەبێت، دەشڵێت،”بەپێی لیستی موچە، ڕۆژانە كارئاسانیی بۆ موچەخۆرانی ئەو شوێنانە دەكرێت كە موچە وەردەگرن”.

لیژنەی باڵای ئۆپراسیۆنەكانی پارێزگای سلێمانی لە ڕاگەیەنراوێكدا، كەوێنەیەكی دەست (خەڵك) كەوتووە ڕایگەیاندووە، قەدەغەكردنی هاتووچۆ لەنێوان یەكە كارگێڕییەكانی سنوری پارێزگای سلێمانی و پارێزگاو ئیدارە سەربەخۆكانی ترو پارێزگاكانی عیراقیشدا تا (١٠/ ٤/ ٢٠٢٠) بەردەوام دەبێت.

ڕاشیگەیاندووە ، قەدەغەكردنی هاتووچۆی تەواو لە سەعات (٦)ی ئێوارە بۆ سەعات (١٢)ی شەو بەردەوام دەبێت شەوانە لە سەعات (١٢)ی شەو بۆ سەعات (٦)ی بەیانی هاتووچۆی سنورداركراو بۆ كاری زۆر پێویست بەپێی ڕێنماییە تەندروستیی و كارگێڕیی و ئارامییەكان، لە سنوری قائیمقامیەتی قەزای مەڵبەندی سلێمانیدا، ڕێگەپێدراو دەبێت

بۆ/ هەموو یەكە كارگێڕیی و فەرمانگە پەیوەندیدارەكانی سنوری پارێزگای سلێمانی
بابەت/ گشتاندن
بەناوی پارێزگای سلێمانی و لیژنەی باڵای ئۆپراسیۆنەكانی پارێزگای سلێمانی بۆ بەرەنگاربوونەوەی كۆرۆنا، پاڵپشت بەو دەسەڵاتەی لە بەیانی ژمارە (٢٥)ی ساڵی (٢٠٢٠)ی وەزارەتی ناوخۆدا پێمان بەخشراوە. بڕیارماندا بە:
١-قەدەغەكردنی هاتووچۆ لەنێوان یەكە كارگێڕییەكانی سنوری پارێزگای سلێمانی و پارێزگاو ئیدارە سەربەخۆكانی ترو پارێزگاكانی عێراقیشدا تا (١٠/ ٤/ ٢٠٢٠) بەردەوام دەبێت.
٢-قەدەغەكردنی هاتووچۆی تەواو لە سەعات (٦)ی ئێوارە بۆ سەعات (١٢)ی شەو تا ڕۆژی (١٠/ ٤/ ٢٠٢٠) شەوانە بەردەوام دەبێت.
٣-دەسەڵاتی تەواو دەدەینە هەموو قائیمقامیەتەكانی سنوری پارێزگای سلێمانی، بۆئەوەی لەماوەی سەعات (١٢)ی شەو تا (٦)ی ئێوارە، بەپێی تایبەتمەندیی سنورە كارگێڕییەكانیان، خزمەتگوزارییە گشتییەكان و پێداویستییەكانی ڕۆژانەی هاووڵاتیان بەپێی ڕێكارەكانی لەلایەن پارێزگای سلێمانی پەسەندكراون و لەسەر بنەمای ڕێنماییە تەندروستیەكان، پلانەكانیان جێبەجێ بكەن.
٤-شەوانە لە سەعات (١٢)ی شەو بۆ سەعات (٦)ی بەیانی هاتووچۆی سنورداركراو بۆ كاری زۆر پێویست بەپێی ڕێنماییە تەندروستیی و كارگێڕیی و ئارامییەكان، لە سنوری قائیمقامیەتی قەزای مەڵبەندی سلێمانیدا، ڕێگەپێدراو دەبێت.
٥-قەدەغەكردنی هاتووچۆ ئەو سێكتەرانە ناگرێتەوە كە لە بەیانەكانی وەزارەتی ناوخۆو بڕیارەكانی لیژنەی باڵای ئۆپراسیۆنەكانی پارێزگای سلێمانی بۆ بەرەنگاربوونەوەی كۆرۆنا دیاریكراون، بەتایبەتیش پزیشكانی هەڵگری ناسنامەی سەندیكای پزیشكانی كوردستان.
٦-هاتووچۆی كارمەندانی فەرمانگە خزمەتگوزارییەكانی كە (پشوو نایانگرێتەوە)، بەپێی ئەوكاتانەی لەلایەن لیژنەی باڵای ئۆپراسیۆنەكانی پارێزگای سلێمانی بۆ بەرەنگاربوونەوەی كۆرۆناوە دیاریكراون لەڕێی ناسنامەو پێناساندنی فەرمیی بەڕێوەبەرایەتیی گشتیی و بەڕێوەبەرێتی فەرمانگەكانی خۆیانەوە دەبێت، وەك (تەندروستی، كارەبا، ئاو، زیادەڕەوی شارەوانیی، بەڕێوەبەرایەتی كۆمپانیای گشتی دروستكردنی دانەوێڵە، بەڕێوەبەرایەتی كۆمپانیای گشتی بازرگانی خۆراك، بانكە حكومییەكان، گەنجینەكانی ١ و ٢، كشتوكاڵ، ڤێتێرنەری، دەروازە سنورییەكان، گومرگ، فڕۆكەخانە، شێڵتەرو خانەكانی ژنان و مناڵان و نەوجەوانان و بەساڵاچووان).
٧-كەرتی تایبەت لە بوارەكانی (ئاڵوگۆڕی بازرگانیی، سوتەمەنیی، پاڵاوگە، كارەبا، پەیوەندییەكان، ئینتەرنێت، سیتیەكان، كۆمپانیاكانی سكوریتی، عەلوە، كۆمپانیاكانی كۆكردنەوەی خۆڵ و خاشاك، بانكی ئەهلی، كارگەكانی بەرهەمهێنانی پێداویستیە تەندروستیەكان و پاككردنەوە، كۆمپانیاكانی خۆراك، پەلەوەر، خانووی پلاستیكی و كێڵگە كشتوكاڵییەكان، مەڕوماڵات، شیرەمەنیی، كۆمپانیاكانی دابەشكاریی، چالاكیی فرۆشتنی كارگە پیشەسازییەكان، كارگەكانی دەرمان) بەردەوام دەبن بەپێی ڕێكارە تەندروستیی و كارگێڕیی و ئارامییەكانی پێشتر دیاریكراون.
٨-كارمەندو ڕۆژنامەوانانی كەناڵەكانی ڕاگەیاندن ڕێگەپێدراو دەبن، بەمەرجێك لەگەڵ باج یان ناسنامەی كەناڵەكەیاندا نووسراوی ڕاسپاردنیان بە ئەركی ڕۆژانەی ڕاگەیاندنكارانەیان هەبێت لەلایەن دەزگاكەیانەوە.
٩-بەپێی لیستی موچە، ڕۆژانە كارئاسانیی بۆ موچەخۆرانی ئەو شوێنانە دەكرێت كە موچە وەردەگرن، بەمەرجێك بەڵگەی فەرمیی پیشانبدەن‌و پابەندی ڕێنماییە تەندروستی‌و كارگێڕی‌و ئارامییەكان بن.
١٠-هەموو هێزەكانی پۆلیس‌و ئاسایش‌و پۆلیسی هاتوچۆ‌و لیوای یەكی پاراستنی سلێمانی و لیواكانی سكرتاریەت و هێزەكانی پێشمەرگە، بە شێوازێكی نوێ‌‌و بەپێی دابەشبوونی گەڕەكەكان، لە تیمی هاوبەشدا ئەركی چاودێریكردنی پابەندبوون بە قەدەغەی هاتووچۆوە جێبەجێ‌ دەكەن، تەنها پۆلیسی هاتووچۆ مافی لێپێچینەوەی لە شۆفێرو ئۆتۆمبێلەكان هەیە، لەگەڵ هەموو تیمێكدا ڕێبەرێكی تەندروستی بەشدار دەبێت بۆ ڕێنماییكردنی شۆفێرو سەرنشینان.
١١-لەدوای سەعات (١٢)ی شەوی (٦/ ٤/ ٢٠٢٠)ەوە، هەموو چالاكییە ئابووریی‌و بازاڕگەریی‌و دارایی‌و عەلوەو یەكەكانی نیشتەجێبوون‌و كۆمپانیاكانی سكوریتی و سیتیەكان و كۆمپانیاكانی دابەشكاریی‌و ماركێت‌و خزمەتگوزاریی ڕۆژانە پێویستەكان وەك (ماركێت، بەقاڵ، شیرەمەنیی، نانەواخانە، سەمونخانە، قەسابخانە، دەرمانخانە، (چێشتخانەو خواردنی خێرا – كە پێویستە تەنها بەشێوەی دلیڤەری بن))، لەلایەن قائمقامیەتی سلێمانی‌و (یەكە كارگێڕییەكانەوە) بەهاوبەشی لەگەڵ بەڕێوەبەرایەتی چاودێری بازرگانی و بەڕێوەبەرایەتی ئاسایشی ئابووریدا، بە هەماهەنگیی (ژووری بازرگانی و پیشەسازی سلێمانی و كۆمەڵەی هاوردەو هەناردەكاران و یەكێتی كۆمپانیاكانی دابەشكاریی) ڕێكدەخرێنەوە، بەمەرجێك كە پابەندی ڕێنماییە تەندروستی‌و كارگێڕی‌و ئارامییەكان بن، (قائیمقامەتی قەزای مەڵبەندی سلێمانی و (یەكە كارگێڕییەكان) ڕێكاری پێویست بۆ هەر بوارێكیان دیاریدەكەن و ڕایدەگەیەنن).
١٢-جوڵەو كاروباری دامودەزگا حكومیەكان‌و كۆمپانیاكانی كەرتی تایبەت لەلایەن پارێزگای سلێمانی‌و بەڕێوەبەرایەتی كاروباری ناوخۆی پارێزگاو فەرمانگەی پەیوەندیدارەوە ڕێكدەخرێنەوە.
١٣-پێویستە هەموو هاووڵاتییەك لەكاتی هاتنە دەرەوەو مامەڵەی ڕۆژانەدا، دەستكێش‌و ماسك بەكاربهێنێت‌و پابەندی ڕێنماییە تەندروستی‌و كارگێڕی‌و ئارامییەكان بێت.
١٤-هەموو كارێكی خێرخوازیی پێویستە بە ئاگاداری یەكە كارگێڕییەكان‌و لیژنەی سەرژمێریكردنی خێزانە كەمدەرامەتەكانەوە بێت لە پارێزگاو یەكە كارگێڕییەكاندا.
١٥-بانكە ئەهلییەكان بەهەمان پەیڕەوی ڕاگەیەندراوی پێشوو بەردەوام دەبن.
١٦-بازاڕی دراوی سلێمانی‌و هەر شوێنێكی تریش دادەخرێن تا ئەوكاتەی لەلایەن قائمقامیەتی قەزای مەڵبەندی سلێمانی‌و بەڕێوەبەرایەتی ئاسایش‌و ژوری بازرگانی و پیشەسازییەوە بەشێوەیەكی تەندروستی گونجاو ڕێكدەخرێنەوە.
١٧-پێویستە هەموو هاووڵاتیان‌و دامودەزگاكانی كەرتی گشتیی‌و تایبەت‌و مێدیاكان‌و ڕێكخراوەكان بایەخی تەواو بە كەلتوری (خۆپارێزیی و تاكپارێزیی) بدەن‌و برەو بە پەروەردەی تاكپارێزیی بدەن بۆ سەرلەنوێ‌ كردنەوەی بوارە جیاجیاكان لە ئایندەدا بەجۆرێك، كە تاك خۆی، خۆی بپارێزێت.

د. هەڤاڵ ئەبوبەکر
پارێزگاری سلێمانی
سەرۆکی لیژنەی باڵای ئۆپراسیۆنەكانی پارێزگای سلێمانی بۆ بەرەنگاربوونەوەی كۆرۆنا
٦ / ٤ / ٢٠٢٠

بەردەوام بە لە خوێندنەوە

کوردستان

هەولێر: هاتووچۆی توێژەكان و كاتی كردنەوەی ماركێت و نانەواخانەكان ڕاگەیەنرا


خەڵك – ئارام سەردار

لیژنەی باڵای ڕووبەڕووبونەوەی كۆرۆنا، چەند بڕیارێكی نوێی لەبارەی گرتنەبەری ڕێكارەكانی خۆپارێزی و ڕێگری لەبڵاوبوونەوەی كورۆنا ڕاگەیاند، بڕیاریدا كەوا ڕۆژانە 18 كاتژمێر بەپێی كۆمەڵێك ڕێنمایی هاتووچۆ و كردنەوەی ماركێت و نانەواخانە و شوێنەكانی سەوزە و میوە فرۆشتن هەبێت، ژووری ئۆپەڕاسیۆنی پارێزگای هەولێر ئەو 18 كاتژمێرەی بەسەر سێكتەرە جیاوازەكان دابەشكردوە و هەرسكێتەرێك بەپێیی ئەو كاتەی بۆیی دیاری كراوە دەتوانێت كار بكات یان جوڵەی هاتووچۆی هەبێت.

هێمن قادر، جێگری پارێزگاری هەولێر و وتەبێژی ژووری ئۆپەڕاسیۆنی پارێزگای هەولێر، لەكۆنفڕانسێكی ڕۆژنامەوانیدا ڕایگەیاند، لەدوای 48 كاتژمێر قەدەغەی هاتووچۆی تەواو، بۆ پاراستنی تەندروستی گشتی، كۆمەڵێك بڕیار دەرچوون تاكارئاسانی بۆ هاوڵاتیان بكرێت و قەدەغەی هاتووچۆش بەردەوام بێت.

دەشڵێت، قەدەغەی هاتووچۆ بەم شێوەیە دەبێت، بەپێی خشتەیەك كە لەكاتژمێر 6ی بەیانی تاوەكو 12ی نیوەڕۆ، ئۆتۆمبێلی دابەشكردنی غاز و هەڵگرتنی خاشاك و تەنكەری زێراب و ئۆتۆمبێلی گواستنەوەی بەرهەمەكانی شیرەمەنی كە لەدەرەوەی شارەكان دێن دەتوانن هاتوچۆ بكەن.

هەرووەها دوكانەكانی سەوزە و میوە لەهەمان كاتدا كراوە دەبن، جگە لەوەش فەرمانبەرانی بانك جگە لەناسنامە پێوستە خشتەی كاتی دەوامیان لابێت، گۆشتفرۆشی ئاژەڵی و سەربڕینخانەی مریشك و ئەوانەی كاری بەروبوومی كشتوكاڵ دەكەن لەم كاتانە دەتوانن هاتووچۆ بكەن.

ئاماژەی بۆ ئەوەشكرد، لەكاتژمێر 12ی نیوەڕۆ تاوەكو 6ی ئێوارە نوسینگەكانی ئاڵوگۆڕی دراو و بانكە ئەهلیەكان لەدووشەممە و چوارشەممە كراوەدەبن.

هەروەها لە هەمان كاتدا، ئۆتۆمبێلی گواستنەوەی دەرمان رێگەی هاتووچۆیان هەیە، بەڵام گواستنەوەی پارە بۆ بانكەكان بەهۆی دابەشكردنی مووچە لە كاتژمێر 6ی بەیانی تاوەكو 6ی ئێوارە دەبێت، لەكاتژمێر 6ی ئێوارە تاوەكو 12ی شەو، ڕێگا بەهیچ هاتووچۆیەك نادرێت و قەدەغەی تەواوەتی هاتووچۆ پیادە دەكرێت، جگە لە ئۆتۆمبێلی هێزە ئەمنیەكان و كارمەندانی تەندروستی.

هێمن قادر، باسی لەوەشكرد، لەكاتژمێر 12ی شەو تاوەكو 6ی بەیانی جیا لەهاتووچۆی هێزە ئەمنییەكان و كارمەندانی تەندروستی، ئۆتۆمبێلی گواستنەوەی گازی مۆلیدە و ئەوانەی بۆ باخداری و چوونە كیڵگەكانن رێ بە هاتووچۆیان دەدرێت، لەگەڵ ئۆتۆمبێلەكانی گواستنەوی كەل و پەلی بریكارانی خۆراك.

ئەوەشی خستەڕوو، ئەم توێژانەش بەدەرن لەكاتە دیاری كراوەكان بۆ هاتووچۆ، وەك پزیشكان و كارمەندانی تەندروستی بەپێی خشتەی كاری خۆیان، نەخۆشانی شێرپەنجە و تالاسیمیا و نەخۆشانی گورچیلە بەپێی ناسنامە لەكاتی پێویست ڕێگایان پێدەدرێت و دەزگاكانی ڕاگەیاندنیش بەپێی پشتگیری دەزگاكانیان ڕێپێدراون، هەروەها ئوتومبێلەكانی خزمەتگوزاری و دیبلۆماتەكان ڕێگا پێدراون، ئەوانەی تریش بەپێی پشتگیری و ناسنامە.

وتییشی: عەلوەی سەوزە و میوە لە كاتژمێر 12ی شەو تاوەكو 12ی نیوەڕۆ دەكرێنەوە، كارمەندانی بەشێك لەدامەزراوەكانی وەك كەشناسی و كشتوكاڵ بەناسنامە و پشتگیری هاتووچۆ دەكەن، هێزە ئەمینەكانیش بەپێی خشتەی دەوامكردنیان.

هێمن قادر، جێگری پارێزگاری هەولێر و وتەبێژی ژووری ئۆپەڕاسیۆنی پارێزگای هەولێر، ئاماژەی بۆ ئەوەشكرد، ماركێت و نانەواخانە و سەموونخانەكان لەكاتژمێر 8ی بەیانی تاوەكو 8ی ئێوارە و بەنزینخانە لەكاتژمێر 8 بۆ 6ی ئێوارە دەكرێنەوە و كارمەندانی ماركێت لە 7ی بەیانی تاوەكو 8ی ئێوارە و شەفتی ئێوارانیش لەدوای كاتژمێر ٦ دەبێت، دەرمانخانەكانیش كراوە دەبن و پزیشكی دەرمانساز لەسەر دەرمانخانەكان دەبن، ئەوانەشی مووچە وەردەگرن بەپێی ناسنامە دەتوانن هاتووچۆ بكەن لەكاتژمێر 8ی بەیانی تاوەكو 2ی دوای نیوەڕۆ.

هێمن قادر، جێگری پارێزگاری هەولێر وتیشی، ڕێگا نادرێت هیچ كەس كۆمەك و هاوكاری خۆی بۆ هاوڵاتیان بیبات، هەر سەرپێچیەكیش هەبێت سزای كەسی سەرپێچی كار دەدرێت، ڕێكارەكانیش لەبەرژوەندی هاوڵاتیاندایە.

بەردەوام بە لە خوێندنەوە

کوردستان

تەندروستی سلێمانی؛ لە سبەینێوە پزیشكان بە میكانیزمێكی نوێ دەتوانن هاتووچۆ بكەن


خەڵك – بەشی هەواڵ

وتەبێژی بەڕێوبەرایەتی گشتی تەندروستی سلێمانی ڕایدەگەیەنێت ، دوای ڕووداوەكەی ئەمڕۆی سلێمانی لە نێوان پزیشكێك و مەفەرەزەیەكی هێزەكانی ئاسایشی ناوخۆ لە ئێستادا لیژنەی لێكۆڵینەوە دروستكراوە ، دەشڵێت ،” هەموو پزیشكان تەنها بە باجی پزیشكی خۆیان دەتوانن هاتووچۆ بكەن و بچنە سەر كارەكانیان”.

یاد نەقشبەندی، وتەبێژی بەڕێوبەرایەتی گشتی تەندروستی سلێمانی لە ڕوونكردنەوەیەكدا، كە وێنەیەكی بۆ (خەڵك) ناردووە ڕایگەیاندووە ، پاش ئەوەی ئەمرۆ ڕووداوێكی نەخوازراو لە نێوان پزیشكێكی بەرێوبەراتیەكەمان و هێزە ئەمنییەكاندا ڕوویدا ، دەست بەجێ بەرێوبەری گشتی چووە شوێنی ڕووداوەكە و لەسەر داوای بەرێزیان لە ئێستادا لیژنەی لێكۆڵینەوە دروستكراوە.

ڕاشیگەیاندووە، لە ئێستادا سەرجەمی تیمە ئەمنییەكەی ڕووداوەكە دەست بەسەرن تا لێكۆڵینەوە تەواو دەبێت و ئەنجام رادەگەیەنرێت.

ئاشكراشیكردووە ، لە ئەمرۆ وە هەموو پزیشكان تەنها بە باجی پزیشكی خۆیان دەتوانن هاتوچۆ بكەن و بچنە سەر كارەكانیان، كە ئێوارە لە كۆبونەوەی لیژنەی باڵای بەرەنگاربوونەوەی كۆرۆنا لە شاری سلێمان بڕیاری لەسەر دراوە .

بەردەوام بە لە خوێندنەوە

کوردستان