ئەمڕۆ یەکشەممە، زیاتر لە 12 ملیۆن قوتابی و خوێندکار لە نزیکەی 30 هەزار قوتابخانەی حکومی و تایبەت لە کەرکووک و بەغدا و هەموو پارێزگاکانی عێراق جگە لە هەرێمی کوردستان، دەستیان بە ساڵی خوێندنی نوێی 2026 ــ 2027 کرد.
کەریم سەید، وتەبێژی وەزارەتی پەروەردەی عێراق ڕایگەیاند کە وەزارەت هەموو پێداویستی و ئامادەکارییەکانی ژینگەی خوێندنی بۆ دەستپێکردنی ساڵی نوێی خوێندن دابین کردووە.
ڕوونیشیکردەوە کە لە ساڵی خوێندنی ئەمساڵدا زیاتر لە 12 ملیۆن قوتابی بەشداری دەکەن، لەوانە نزیکەی 1.2 ملیۆن منداڵ دەچنە پۆلی یەکەمی سەرەتایی.
وەزارەتی پەروەردە ئەمساڵ پۆلە سەرەتاییە نوێکان بۆ منداڵانی خوار تەمەنەکەی 5 ساڵ لە هەندێک قوتابخانەدا دەکاتەوە، بۆ ئەوەی زنجیرەی خوێندنی ئەم توێژە تەواو بکرێت و لە ساڵی خوێندنی داهاتوودا ئامادەی تۆمارکردن لە پۆلی یەکەمی سەرەتایی بن.
وتەبێژی وەزارەتی پەروەردە ئاماژەی بەوەش کرد کە یەکێک لە گرنگترین کێشەکانی بەردەم پەروەردە، کەمی بینای قوتابخانەیەکانە. بەگوێرەی زانیارییەکان، عێراق بۆ پڕکردنەوەی ئەم کەلێنە پێویستی بە نزیکەی 8 هەزار قوتابخانەی نوێ هەیە.
لە هەمان کاتدا، لە ساڵی ڕابردوودا نزیکەی 1,000 قوتابخانە لە چوارچێوەی پرۆژەی قوتابخانە چینییەکان خراونەتە خزمەت، هەروەها نزیکەی 500 قوتابخانەی تر لە پرۆژەی ژمارە یەکی وەزارەت بەکار هاتوون، لەگەڵ چەندین پرۆژەی هاوشێوە لە پارێزگاکانی دیکە.
وەزارەتی پەروەردە هەروەها ڕایگەیاندووە کە هەوڵەکان بۆ کۆتاییهێنان بە کێشەی نزیکەی 1,000 قوتابخانەی کابینەی لە سەرانسەری عێراق بەردەوامە و ئامانج ئەوەیە بە هەنگاو بە هەنگاو جێگەی ئەم قوتابخانە کارڤانیانە بە بینای نوێ بگیرێتەوە.