گفتوگۆکانی بودجە و شایستە داراییەکان لە نێوان هەولێر و بەغدا، تەنیا ژمارەی سەر کاغەزی کۆبوونەوە وەزارییەکان نین، بەڵکو بابەتێکی ژیانییە و ڕاستەوخۆ دەستکاری بژێویی هەر ماڵێک لە هەرێمی کوردستان دەکات.
بەردەوامبوونی کۆبوونەوەکان لەسەر دامەزراندنی فەرمانبەرانی گردبەست (عەقد)، وردبینی لە ئەژمارە داراییەکان و مسۆگەرکردنی ناردنی شایستە داراییەکان، هەموان دەخاتە بەردەم ڕاستییەکی ڕوون، دەبێت ژیان و بژێویی هاووڵاتییان بە تەواوی لە ململانێ سیاسییەکان بەدوور بێت.
لە ڕاڕەوە سیاسییەکانەوە بۆ سەر سفرەی خێزانەکان
هاووڵاتییان لە هەرێمی کوردستان، لە مامۆستا و پزیشکەوە تا دەگاتە فەرمانبەر و کاسبکار، بە ئومێد و چاوەڕوانییەوە دەرواننە ئەنجامی ئەم کۆبوونەوانە، چونکە سەقامگیریی دارایی و دابەشکردنی بەردەوامی مووچە تەنیا ڕەفاهییەت نیە، بەڵکو بزوێنەری سەرەکیی تەواوی ئابووریی بازاڕە.
کاتێک ئاڵوگۆڕی دارایی دوادەکەوێت:
-توانای کڕینی بازاڕی ناوخۆیی دادەبەزێت.
-جوڵەی ئابووری و پرۆژە بچووکەکان تووشی سستبوون دەبن.
-گوشاری کۆمەڵایەتی و دەروونی لەسەر ئەو خێزانانە زیاد دەکات کە تەنیا پشتیان بە مووچەی مانگانە بەستووە.
نەبوونی ڕێککەوتنی کاتی
دەستکەوتی ڕاستەقینە لە دروستکردنی ڕێککەوتنی کاتیدا نیە کە لەگەڵ یەکەم قەیرانی سیاسی هەڵوەشێتەوە، بەڵکو لە دانانی میتۆدێکی دارایی بەردەوامدایە کە ئەم خاڵانە لەخۆ بگرێت:
1- ئاسایشی مووچە و شایستەکان: پەیڕەوکردنی سیستەمێکی دارایی ڕوون کە ڕواندنی مووچەی فەرمانبەران و خانەنشینان دور لە کێشە سیاسییەکان مسۆگەر بکات.
2- جێگیرکردنی ڕەوشی فەرمانبەرانی عەقد: یەکلاییکردنەوەی دۆسیەی بەهەمیشەییکردنی فەرمانبەرانی گردبەست و بەرزکردنەوەی پلەکانیان، چونکە ئەمە ئاسایشی وەزیفی بۆ توێژێکی بەرفراوانی گەنجان دەستەبەر دەکات.
3- هەژمارکردنی ڕوون و دادپەروەرانە: ڕێکخستنی داهاتە فیدراڵی و ناونهەتییەکان بەپێی دەستوور، بە جۆرێک دادپەروەری بەدیبهێنێت و بارگرانی لەسەر شانی هاووڵاتییان دروست نەکات.
سەرکەوتنی هەر دانوستاندنێک بە بڕی ئەو پارەیە ناپێورێت کە لە خشتەکاندا نووسراوە، بەڵکو بەو ئارامییە دەپێورێت کە دەچێتە ناو ماڵی هەر هاووڵاتییەکەوە کاتێک دڵنیا دەبێتەوە لە دابینکردنی بژێویی خێزانەکەی.
ئەوەی ئەمڕۆ لە شاندەکانی دانوستانکاری هەردوو حکومەت داوا دەکرێت، هەستکردنە بە بەرپرسیارێتیی ئەخلاقی و نیشتمانی.
هاووڵاتییانی کوردستان ساڵانێک لە خۆڕاگرییان نیشانداوە، و مافی دەستووری و انسانییانە کە ئەم لێکتێگەیشتنانە ببنە هەنگاوی کرداری لەسەر زەوی بۆ کۆتاییهێنان بە دڵەڕاوکێی دارایی و دەستپێکردنی قۆناغێکی نوێ لە سەقامگیری و گەشەپێدان.