ڕۆژنامەی فایننشاڵ تایمزی بەریتانی لە ڕاپۆرتێکدا ئاشکرای کردووە، ڕووسیا لە ساڵی 2023ـەوە بە نهێنی یارمەتی ئێران دەدات بۆ پەرەپێدانی مووشەکی کروزی پێشکەوتوو.
پرۆگرامە نهێنییەکە ناوی “سی 430 ئێڵ”ـە و ئامانجە سەرەکییەکەی یارمەتیدانی ئێرانە بۆ دروستکردنی بزوێنەری “ڕامجێت”.ئەم بزوێنەرە وادەکات مووشەکی کروز بە خێرایی چەند هێندەی خێرایی دەنگ بفڕێت.
ئەم مووشەکانە دوو تایبەتمەندی مەترسیداریان هەیە: خێرایی زۆر بەرز و فڕین لە بەرزییەکی نزم. ئەمەش کاتی هەستپێکردن و تێکشکاندنی لەلایەن سیستمی بەرگرییەوە زۆر کەم دەکاتەوە. هەڕەشەیەکی ڕاستەوخۆشە بۆ سەر کەشتییە جەنگییەکانی ئەمریکا لە کەنداو.
لێکۆڵینەوەکە پشتی بە نامەی دزەپێکراوی ڕووسی، تۆماری گەشتەکان و شیکردنەوەی سەربازی ڕووسیا بەستووە. پرۆگرامەکە تەنانەت لە کاتی جەنگی ئەم دواییەی ئەمریکا و ئیسرائیل دژ بە ئێرانیش بەردەوام بووە.
فابیان هینز، پسپۆڕی مووشەکی ئێرانی، دەڵێت ئەمە “گواستنەوەی تەکنەلۆژیایەکی سەربازی زۆر هەستیارە لە ڕووسیاوە، کە ئێرانییەکان بۆ چەندین دەیە ویستوویانە بەدەستی بهێنن” و پێویستی بە ڕەزامەندی بەرزترین ئاستی سیاسی ڕووسیا هەیە.
بەپێی ڕاپۆرتەکە، ئێران ئێستا سیستمی بزوێنەری ڕامجێتی دروست کردووە و تاقی کردووەتەوە، بەڵام تا ئێستا هیچ بەڵگەیەک نییە کە مووشەکێکی کروزی خێرایی دەنگ بەم تەکنەلۆژیایە چووبێتە خزمەتەوە.
