سەرچاوە حکومییەکانی ڕۆژئاوا ئاشکرایان کردوە، کە چاوەڕوان دەکرێت ئەحمەد شەرعی سەرۆکی سووریا، سێ مەرسومی سەرۆکایەتیی تایبەت بەپلە و پۆستی سەرکردە کوردەکان و ڕێکاری خوێندن بەزمانی کوردی لەوڵاتدا دەربکات.
بهگوێرهى پێگەی (نۆرس پڕێس) کە پشتی بەزانیاریی سەرچاوە ئاگادارەکان بەستووە، مەرسومی یەکەم بریتییە لەدامەزراندنی مەزڵوم عەبدی وەک ڕاوێژکاری ئەحمەد شەرعی سهرۆكى سووریا و مەرسومی دوەمیش تایبەتە بەدامەزراندنی سیاسیی کورد ئیلهام ئەحمەد وەک ئەندامی ئەنجوومەنی گەل، جگە لەوانەش، مەرسومی سێیەم تایبەت دەبێت بەڕێکخستنی میتۆد و میکانیزمی پرۆسەی خوێندن بەزمانی کوردی لەناوچە جیاوازەکانی سووریادا.
دەرکردنی ئەم مەرسومانە دوای کۆبونەوەیەکی گرنگی ڕۆژی سێ شەممە دێت، کە لەکۆشکی گەل لەدیمەشق لەنێوان شەرع و عەبدی و ئیلهام ئەحمەد و ژمارەیەک لەبەرپرسانی دیکەی کورددا بەڕێوەچوو.
لەدوای ئەو کۆبونەوەیەش، مەزڵوم عەبدی لەکۆنگرەیەکی ڕۆژنامەوانی لەکۆشکی گەل، هەڵوەشاندنەوەی هێزەکانی سوریای دیموکرات (هەسەدە)ی ڕاگهیاندو جهختیكردهوه، ههموو ئامادهكارییهك بۆ تێکەڵبونیان لهگهڵ سوپای سوریادا تهواو بوه.