بافڵ تاڵەبانی و عەباس عێراقچی لەبارەی بەرەنگاربوونەوەی تیرۆر و سنورەکان قسەیان کرد و بەهێزکردنی پەیوەندییەکانی نێوانیان بەتایبەتی ناوچەی سلێمانی جەختی لێ كرایەوە.
وەزارەتی دەرەوەی ئێران لە ڕاگەیەنراوێكدا ئاماژەی بەوەكردووە، عەباس عێراقچی، وەزیری کاروباری دەرەوەی کۆماری ئیسلامیی ئێران و بافڵ تاڵەبانی، سەرۆکی یەکێتیی نیشتمانیی کوردستان لە پەیوەندییەکی تەلەفۆنیدا جەختیان لەسەر پەرەپێدانی پەیوەندییە ئابووری و بازرگانییەکان، بەهێزکردنی هەماهەنگییە ئەمنییەکان لە سنوورە هاوبەشەکان و بەرەنگاربوونەوەی تیرۆر کردەوە.
بەپێی ڕاگەیەنراوەكە، وەزیری کاروباری دەرەوە سوپاس و پێزانینی خۆی بۆ پێشوازی و پێشکەشکردنی خزمەتگوزارییەکانی یەکێتیی نیشتمانیی کوردستان بە زیارەتکارانی چلە “ئەربەعین” دەربڕی.
ئاماژە بەوەشدراوە، بەهێزکردنی پەیوەندییەکانی نێوان کۆماری ئیسلامیی ئێران و هەرێمی کوردستانی عێراق، بەتایبەتی ناوچەی سلێمانی بە جەختکردنەوە لەسەر پەرەپێدان و فراوانکردنی هاوکارییە ئابووری و بازرگانییەکان تاوتوێ کرا.
بەپێی ڕاگەیەنراوەكە، جەختیان لەسەر پێویستیی بەهێزکردنی هەماهەنگی و هاوکارییە ئەمنییەکان کردەوە بە مەبەستی پاراستنی ئاسایشی سنوورە هاوبەشەکان.
عێراقچی و تاڵەبانی جەختیان كردەوە لەسەر دەستەبەرکردنی سەقامگیری لە ناوچە سنوورییەکان و بەرەنگاربوونەوەی کاریگەرانەی هەڕەشە تیرۆریستییەکان لەسەر بنەمای ڕێککەوتنی ئەمنی لەنێوان ئێران و عێراقدا.
لای خۆشییەوە، نووسینگەی راگەیاندنی سەرۆکی یەکێتی بڵاویکردەوە؛ لە پەیوەندییەکەدا، هەردوولا بیروڕایان دەربارەی دوا پێشهاتە ئەمنی، سیاسی و ئابوورییەکانی ناوچەکە ئاڵوگۆڕ کرد و تاوتوێی رێگەچارەکانی کۆتاییهێنان بە ئاڵۆزییەکانی ئێستایان کرد.
جەختیان لە گرنگیی پاراستنی ئاشتی و سەقامگیری و بەهێزکردنی هەماهەنگی لە رووبەڕووبوونەوەی ئاڵەنگارییە هاوبەشەکاندا کردەوە.
سەرۆکی یەکێتی جەختی لە گرنگیی بەردەوامیی دیالۆگ و پەیوەندییە دیپلۆماسییەکان کردەوە وەک کاریگەرترین رێگا بەرەو هێورکردنەوەی ئاڵۆزییەکان، گەڕاندنەوەی ئاشتی و سەقامگیری، و پاراستنی بەرژەوەندییەکانی هەموو گەلانی ناوچەکە.
دەستخۆشی لە وەزیری دەرەوەی ئێران عەباس عێراقچی کرد بۆ هەوڵە بەردەوامە دیپلۆماسیی و بنیاتنەرەکانی لە گەڕان بەدوای چارەسەری ئاشتییانە بۆ ململانێکان و سەقامگیرییەکی فراوانتردا.
لە درێژەی گفتوگۆکاندا، وەزیری دەرەوەی ئێران بانگهێشتی بافڵ تاڵەبانی کرد بۆ تاران بەمەبەستی گفتوگۆی زیاتر لەسەر لێکەوتە ئەمنی و ئابوورییەکانی ململانێکان لەسەر ئاستی ناوچەکە و نێودەوڵەتی.