مەگنیسیۆم، ئەو كانزا سیحراوییەی جەستەت لە بێدەنگیدا هاواری بۆ دەكات

خەوی ناڕێک، گرژبوونی کتوپڕی ماسولکەی قاچ لە کاتی خەودا، دڵەڕاوکێی بێ هۆکار و ئارەزووی توند بۆ خواردنی شوکولاتە؟

جەستەت نەخۆش نییە، تەنها هاوار دەکات بۆ یەک کانزای سەرەکی کە ناوی مەگنیسیۆمە!

مەگنیسیۆم پادشای کانزاکانە لە جەستەدا، چونکە بەرپرسە لە ڕێکخستنی زیاتر لە ٣٠٠ کارلێکی کیمیایی و زیندەیی. یارمەتی خاوبوونەوەی ماسولکەکان دەدات، سیستمی دەماری هێور دەکاتەوە و دڵ دەپارێزێت.

کێشەکە لێرەدا چییە؟ کاتێک دەچیتە دەرمانخانە، دەبینیت چەندین جۆری جیاوازی مەگنیسیۆم هەیە و ئەگەر جۆری هەڵە هەڵبژێریت، تەنها پارەکەت خەسار کردووە. لێرەدا دوو گرنگترین جۆرەکەت بۆ ڕوون دەکەینەوە:

1. مەگنیسیۆم گلایسینەیت (Magnesium Glycinate): ئەم جۆرە زۆر بە ئاسانی لە ڕێگەی ڕیخۆڵەوە دەمژرێت و دەگاتە مێشک. کاری سەرەکی هێورکردنەوەی مێشکە، دەردانی هۆرمۆنی خەو ڕێکدەخات و دڵەڕاوکێ و فشاری دەروونی کەم دەکاتەوە.

2. مەگنیسیۆم سیتریت (Magnesium Citrate): ئەم جۆرە ئاو کێش دەکات بۆ ناو ڕیخۆڵەکان. بۆیە زیاتر بۆ چالاککردنی کۆئەندامی هەرس و چارەسەرکردنی قەبزی (Constipation) بەکاردێت.

خواردنی سرووشتی وەک: گازۆ، بادەم، سپێناخ و شوکولاتەی تۆخ سەرچاوەی نایابی مەگنیسیۆمن.