وەزارەتی ناوخۆی عێراق دەستگیرکردنی ئەفسەرێک و سێ کارمەندی پۆلیسی لە پارێزگای دیوانیە ڕاگەیاند، بە تۆمەتی دەستدرێژیکردنە سەر کچێکی ڕاگیراو لە یەکێک لە بنکەکانی پۆلیسی شارەکە.
بەپێی ڕاگەیەندراوێکی وەزارەتەکە، دوای بڵاوبوونەوەی هەواڵەکە، دەستبەجێ لێژنەیەکی لێکۆڵینەوە پێکهێنرا و توانرا هەر چوار تۆمەتبارەکە دەستگیربکرێن و ڕەوانەی لێکۆڵینەوە کران بۆ ئەوەی ڕکاری یاساییان بەرامبەر بگیرێتەبەر.
تۆمەتبارەکان بەپێی ماددەی 14 لە یاسای هێزەکانی ئاسایشی ناوخۆ دەستگیرکراون، و لە ئەگەری ساغبوونەوەی تۆمەتەکە لەسەریان، لە کارەکانیان دەردەکرێن و ڕووبەڕووی سزای توند دەبنەوە کە لە حەوت ساڵ زیندانیکردن کەمتر نەبێت.