وەزیری خوێندنی باڵا: بە شێوازی ئەلیکترۆنی و بەپێی خاڵبەندی پڕۆسەی “لەجیاتی دانان” بۆ گرێبەستەکان ئەنجام دەدرێت
وەزارەتی خوێندنی باڵا و توێژینەوەی زانستی ڕایگەیاند، کە بەمەبەستی چەسپاندنی شەفافیەت و دادپەروەری و ڕەخساندنی دەرفەتی یەکسان بۆ سەرجەم دەرچووان، هەفتەی داهاتوو پلاتفۆرمێکی ئەلیکترۆنی کارا دەکرێت بۆ ئەنجامدانی پڕۆسەی “لەجیاتی دانان” بۆ ئەو شوێنانەی گرێبەستیان تێدا چۆڵ بووە.
ئەم بڕیارە لە کۆبوونەوەیەکدا بە سەرپەرشتیی د. ئارام محەمەد قادر، وەزیری خوێندنی باڵا و توێژینەوەی زانستی و بە ئامادەبوونی بەڕێوەبەری گشتیی کارگێڕی و دارایی و نوێنەرانی زانکۆکان درا، کە تێیدا وردەکاریی سیستەمە ئەلیکترۆنییەکە خرایە ڕوو.
پڕۆسەی لەجیاتی دانان کەسانێک دەگرێتەوە کە:
١. وانەبێژانێک کە بە گرێبەست لەسەر داهاتی ناوخۆ دامەزراون و دەستبەکار نەبوون.
٢. ئەوانەی لەسەر داهاتی خوێندنی باڵا و زانکۆکان بە گرێبەست دامەزراون و دەستبەکار نەبوون.
٣. هەموو ئەوانەی بە کرێی کاری ڕۆژانە دامەزراون و دەستبەکاربوونیان نەکردووە.
لەوتەیەکدا، د. ئارام محەمەد قادر ڕایگەیاند: “دوای ڕەزامەندیی ئەنجومەنی وەزیران و پاڵپشت بە بڕگەی شەشەم لە ڕێنمایی ژمارە (١٠)ی ساڵی (٢٠١٩)ی وەزارەتی دارایی، پرۆسەی لەجیاتی دانان بەپێی پسپۆڕی و بڕوانامە بە شێوازێکی تەواو شەفاف ئەنجام دەدرێت. سەرجەم دەرچووانی دانەمەزراو لە تەواوی هەرێمی کوردستان دەتوانن داواکاری بە ئەلیکترۆنی پێشکەش بکەن.”
لەلایەن خۆشییەوە، بەڕێوەبەری گشتیی کارگێڕی و دارایی ڕوونی کردەوە کە سیستەمەکە بە سیستەمی خاڵبەندی دادپەروەرانە داواکارییەکان دەپڵێوێتەوە و ئاسانکاریی تەواو بۆ پێشکەشکاران کراوە بۆ ئەوەی بەپێی مەرج و ڕێنماییەکان داواکارییەکانیان تۆمار بکەن.