بوومەلەرزەیەکی بەهێز بە گوڕی ٧.٤ پلە باشووری مەکسیک دەهەژێنێت و هۆشداریی تسۆنامی دەدرێت
دەستەی ڕووپێوی جیۆلۆجیی ئەمریکا ڕایگەیاند، کە بوومەلەرزەیەکی بەهێز بە گوڕی ٧.٤ پلە بەپێی پێوەری ڕێختەر، ناوچەی بوێرتو مادیرۆی لە باشووری مەکسیک هەژاندووە.
لە دوای ڕوودانی بوومەلەرزەکە، سەنتەری ئەوروپی-ناوەڕاست بۆ چاودێریی بوومەلەرزەکان هۆشداریی لە ئەگەری دروستبوونی شەپۆلەکانی تسۆنامی ڕاگەیاند، و داوای لەو هاووڵاتیانە کرد کە لە ناوچە کەناراوییەکاندا دەژین، وەک ڕێکارێکی خۆپارێزی لە کەناراوەکان دوور بکەونەوە و بەرەو شوێنە بەرزەکان بڕۆن.
هەرچەندە تاوەکو ئێستا هیچ ڕاپۆرتێکی فەرمی سەبارەت بە قەبارەی زیانە مادییەکان یان کەوتنەوەی قوربانیی گیانی بڵاونەکراوەتەوە، بەڵام دەسەڵاتدارانی ناوخۆیی مەکسیک لە ئامادەباشیی تەواودان و بەردەوامن لە هەڵسەنگاندنی شوێنەوارەکانی بوومەلەرزەکە و چاودێریکردنی دۆخەکە، ئەمەش لە پێناو بەرەنگاربوونەوەی هەر تێکچوونێکی ئەگەری کە ڕەنگە لەو کەناراوانەدا ڕووبدات کە دەڕواننە سەر دەریای هێمن.