کەشناسی هەرێم: شەپۆلێکی سووکی تۆز و خۆڵ بەردەوام دەبێت و گەرمیان بەرزترین پلەی گەرما تۆمار دەکات
بەڕێوەبەرایەتی گشتی کەشناسی و بوومەلەرزەزانی هەرێمی کوردستان پێشبینییەکانی خۆی بۆ دۆخی کەشوهەوای ٤٨ کاتژمێری داهاتوو بڵاوکردەوە، کە تێیدا ئاماژە بە بەردەوامی شەپۆلی گەرما و بوونی تۆزێکی سووک لە هەوادا دەکات.
بۆ ئەمڕۆ هەینی و سبەینێ شەممە، پێشبینی دەکرێت ئاسمانی ناوچە جیاجیاکانی هەرێمی کوردستان بە گشتی ساماڵ بێت، بەڵام هاوکات شەپۆلێکی سووکی تۆز و خۆڵبارین هەوای ناوچەکان دەگرێتەوە کە کاریگەری لەسەر مەودای بینین دەبێت.
پێشبینی پلەکانی گەرمای پارێزگا و ناوچەکانی هەرێم:
بەپێی ڕاگەیەندراوەکەی کەشناسی، بەرزترین پلەی گەرما لە سنووری ئیدارەی گەرمیان تۆمار دەکرێت و دابەشبوونی پلەکانی گەرماش بەم شێوەیە دەبێت:
گەرمیان و چەمچەماڵ: ٤٤ پلەی سیلیزی (بەرزترین پلە)
هەولێر: ٤٢ پلەی سیلیزی
دهۆک و زاخۆ: ٤١ پلەی سیلیزی
سلێمانی و پیرمام: ٤٠ پلەی سیلیزی
حاجی ئۆمەران (ناوچە شاخاوییەکان): ٣١ پلەی سیلیزی (نزمترین پلە)