دەزگای ئاسایشی هەرێم: بە حەوت مووشەک هێرشکرایە سەر زڕگوێزەڵە، قسرد و قەرەداغ
بەرەبەیانی ئەمڕۆ هەینی، دەزگای ئاسایشی هەرێمی کوردستان لە ڕاگەیەندراوێکی فەرمیدا ئاشکرای کرد کە چەند ناوچەیەکی جیاواز لە سنووری پارێزگای سلێمانی ڕووبەڕووی هێرشی مووشەکی بوونەتەوە. بەپێی زانیارییەکانی دەزگای ئاسایش، هێرشەکە لە کاتژمێر ٦:٢٠ی بەرەبەیانی ئەمڕۆدا و بە حەوت مووشەک ئەنجامدراوە کە بەسەر چەند شوێنێکی جیاوازدا دابەش بوون.
سەبارەت بە شوێنی کەوتنی مووشەکەکان، دەزگای ئاسایشی هەرێم ڕوونکردنەوەی داوە کە گوندی زڕگوێزەڵە بە چوار مووشەک کراوەتە ئامانج، لە کاتێکدا گوندی قسرد یەک مووشەکی لێ کەوتووەتە خوارەوە، و ناوچەی نزیک گردی کوپان لە قەرەداغیش بە دوو مووشەکی دیکە بۆردومان کراوە.
لە کۆتایی ڕاگەیەندراوەکەدا جەخت لەوە کراوەتەوە کە لە ئێستادا تیمەکانی دەزگای ئاسایشی هەرێم لە تەواوی شوێنی ڕووداوەکان ئامادەن و بەدواداچوونی ورد و بەردەوام ئەنجام دەدەن، ئەمەش بە مەبەستی زانین و دەستنیشانکردنی قەبارەی تەواوی ئەو زیانە گیانی و مادییانەی کە بەهۆی ئەو هێرشە مووشەکییانەوە بە ناوچەکان گەیشتوون.